Bondié delivré bann Israélite

PENDANT beaucoup l’année bann Israélite ti vive en Égypte, zot ti prosperé ek ti vinn beaucoup. Mais, enn nouveau Pharaon ti commence regné. Sa le roi bien dominere-la pa ti konn Joseph. Kan li ti trouve bann Israélite pé augmenté, li ti peur. A cause sa li ti faire zot vinn bann esclave ek li ti donne l’ordre pou noye tou zot bann garson ki ti fek né, dan la riviere Nil. Mais enn mama ki ti ena beaucoup courage, ti protege so ti garson. Li ti cachiette li dan enn panier parmi bann roseaux. Tifi pharaon ti trouve sa tibaba-la ek li ti appel li Moïse. Li ti elevé li dan la famille royal.

Kan Moïse ti gagne 40 an, li ti gagne probleme parski li ti defann enn esclave israélite ki ti pé gagne batté avek enn chef égyptien. Moïse ti sauvé li ti al dan enn pays bien loin ek li ti vive la-bas en exil. Kan Moïse ti ena 80 an, Jéhovah ti ré-envoye li l’Égypte pou al devant Pharaon ek pou demann li laisse peuple Bondié allé.

Pharaon ti refusé carré-carré. Alors, Bondié ti envoye dix plaie lor l’Égypte. Chaque fois ki Moïse ti vinn devant Pharaon pou donne li l’occasion pou evite prochain plaie, Pharaon ti montré li arrogant, ek li ti refuse accepté seki Moïse ek so Bondié, Jéhovah, ti pé demann li. Finalement, dixieme plaie ti amenn la mort lor tou bann premier-né dan sa pays-la. Zis bann famille ki ti obeir Jéhovah ek ki ti passe di-sang enn agneau ki zot ti’nn sacrifié, lor montant zot la porte, ki ti sapé. Sa ange ki Bondié ti envoyé pou detruire tou bann premier-né-la, ti passe la-haut lor sa bann lakaz-la. Depuis sa, chaque l’année bann Israélite ti faire enn fête pou celebré sa grand delivrance-la. Sa fête-la ti appel Pâque.

Apré la mort so premier garson, Pharaon ti donne Moïse ek tou bann Israélite l’ordre pou quitte l’Égypte. Desuite zot ti organise sa grand la foule-la pou zot kapav quitte l’Égypte. Mais Pharaon ti change l’idée. Avek en quantité soldat ek enn quantité char, li ti al derriere zot. Bann Israélite ti parette bloké devant la mer Rouge. Mais Jéhovah ti ouvert la mer Rouge, ek sa ti permette bann Israélite pou passe lor enn la terre sec, entre deux muraille de l’eau! Kan bann Égyptien ti vinn derriere zot, Bondié ti faire sa bann muraille de l’eau-la tombe lor zot. Pharaon ek so l’armée ti noyé.

Plitar, alors ki bann Israélite ti pé campé kot montagne Sinaï, Jéhovah ti faire enn l’alliance avek zot. Li ti servi Moïse couma enn mediateur ek li ti donne nation Israël bann la loi ki ti pou guide zot ek donne zot enn protection dan preské tou domaine zot la vie. Tant ki Israël ti accepté regne Bondié avek fidelité, Jéhovah ti pou avek zot ek grace a zot, lezot nation ti pou gagne bann benediction.

Mais la plupart bann Israélite ti offense Bondié kan zot ti mank la foi en Li. Alors Jéhovah ti faire sa generation-la tourne en rond dan desert pendant 40 an. Apré sa, Moïse ti donne Josué, enn zom fidele, l’ordre pou remplace li. Finalement Israël ti’nn pré pou rente dan pays ki Bondié ti promette Abraham.

—Basé lor Exode; Lévitique; Nombres; Deutéronome; Psaume 136:10-15; Actes 7:17-36.