Anou aprann fason ki Jehovah agir
“Faire moi konn to fason agir . . . pou ki mo kapav konn toi.”—EXODE 33:13.
1, 2. (a) Kifer Moïse ti touye enn Égyptien kan li ti trouve li pé maltraite enn Hébreu? (b) Ki Moïse ti pou bizin aprann pou li kapav servi Jéhovah?
MOÏSE ti elevé dan la famille Pharaon, ek li ti gagne enn l’education ki ti basé lor enn sagesse ki ti ena valeur pou bann grand personnage en Égypte. Pourtant, Moïse ti koné ki li pa ti enn Égyptien. So bann parent ti bann Hébreu. Kan li ti ena 40 an, li ti al guetté ki ti pé passé parmi so bann frere israélite. Kan li ti trouve enn Égyptien pé maltraite enn Hébreu, sa ti pousse li pou agir. Li ti touye sa Égyptien-la. Moïse ti choisir pou vinn dan coté le peuple Jéhovah, ek li ti pensé ki Bondié ti pé servi li pou delivré so bann frere. (Actes 7:21-25; Hébreux 11:24, 25) Kan la famille royal ti aprann seki li ti faire, zot ti considere Moïse couma enn criminel, ek li ti bizin sauvé pou sauve so la-vie. (Exode 2:11-15) Pou ki Jéhovah kapav servi li, Moïse ti pou bizin konn pli bien fason ki Jéhovah agir. Eski li ti pou accepté ki Jéhovah enseigne li?—Psaume 25:9.
2 Apré sa, pendant 40 an, Moïse ti al vive en exil, ek li ti vinn enn berger. Moïse pa ti decouragé, ni li ti vinn amer parski so bann frere israélite pa ti accepté li, mais li ti accepté sa situation ki Jéhovah ti pé permette-la. Mem si plusieurs l’année ti’nn passé sans ki personne pa ti parette interessé ar li, Moïse ti laisse Jéhovah forme li. Plitar li ti ecrire: “Moïse ti enn kikenn ki ti pli humble parmi tou bann dimoune ki ti ena lor la terre.” (Nombres 12:3) Li pa ti ecrire sa parski li ti ena enn trop grand l’opinion lor li-mem, mais plutot li ti inspiré par l’esprit saint Bondié. Jéhovah ti donne Moïse bann responsabilité extraordinaire. Si nou aussi nou faire zeffort pou ena l’humilité, Jéhovah pou beni nou.—Tsephania 2:3.
Moïse ti gagne enn mission
3, 4. (a) Ki mission Jéhovah ti donne Moïse? (b) Ki l’aide Moïse ti gagné?
3 Enn jour, enn ange ki ti represente Jéhovah, ti koz ar Moïse pré kot montagne Horeb, en Sinaï. Li ti dire Moïse: “Oui, mo finn trouvé couma mo peuple pé passe misere en Égypte, ek mo finn tann zot crié a cause bann ki pé force zot pou travail, parski mo konn bien bann douleur ki zot pé supporté. Mo pé desann pou delivré zot dan la main bann Égyptien ek pou faire zot sorti dan sa pays-la, ek faire zot al dan enn bon pays ki grand, ek kot di-lait ek di-miel coulé.” (Exode 3:2, 7, 8) Sa montré ki Jéhovah ti ena enn grand travail pou Moïse, mais li ti bizin faire sa travail-la dan maniere ki Jéhovah ti envie.
4 Ange Jéhovah ti ajouté: “Asterla vini, ek laisse mo envoye toi kot Pharaon, ek to bizin tire mo peuple, bann Israélite, dan l’Égypte.” Moïse ti hesité. Li pa ti senti-li qualifié pou rempli sa mission-la, ek si li ti bizin compte zis lor so prop la-force, vrai-mem li pa ti qualifié. Mais Jéhovah ti promette li: “Mo pou avek toi.” (Exode 3:10-12) Jéhovah ti donne Moïse pouvoir pou faire bann mirak. Grace a sa, tou dimoune ti pou koné ki c’est vrai-mem Bondié ki finn envoye li. Aaron, frere Moïse ti pou al avek li pou servi couma so porte-parole, ek Jéhovah ti pou montré zot seki zot ti bizin dire ek faire. (Exode 4:1-17) Eski Moïse ti pou rempli sa mission-la avek fidelité?
5. Couma l’attitude bann Israélite ti vinn enn problem pou Moïse?
5 Au commencement, bann ancien parmi bann Israélite ti croire Moïse ek Aaron. (Exode 4:29-31) Mais apré sa, ‘bann Israélite, ki bann Égyptien ti mette en charge travail,’ ti reproche Moïse ek so frere, parski a cause zot, ‘Pharaon ek so bann serviteur, ti nepli kapav senti [bann Israélite].’ (Exode 5:19-21; 6:9) Enn lot fois, kan bann Israélite ti pé quitte l’Égypte, zot ti paniké kan zot ti trouve bann Égyptien pé suive zot. Devant zot ti ena la mer Rouge ek derriere zot, calesse bann Égyptien. Zot ti senti-zot bloqué ek zot ti blame Moïse. Couma eski ou ti pou reagir? Mem si bann Israélite pa ti ena bateau, lor l’ordre Jéhovah, Moïse ti dire zot prepare zot pou allé. Lerla, Bondié ti faire de l’eau la mer Rouge separé, ek fond la mer ti vinn sec pou ki bann Israélite kapav passé.—Exode 14:1-22.
Enn kitsoz ki pli important ki delivrance
6. Lor ki Jéhovah ti attire l’attention Moïse kan Li ti donne li enn mission?
6 Kan Jéhovah ti donne Moïse sa mission-la, Li ti montré l’importance ki So nom ena. Li ti bien important pou respecté sa nom-la, ek sa Kikenn ki li representé-la. Kan Moïse ti demann Jéhovah plus renseignement lor So nom, Li ti dire li: “Mo pou vinn seki mo pou vini.” En plus, Moïse ti pou bizin dire bann Israélite: “Jéhovah, Bondié to bann ancetre, Bondié Abraham, Bondié Isaac ek Bondié Jacob, finn envoye moi kot zot.” Lerla Jéhovah ti ajouté: “Sa-mem mo nom pou touletan, ek avek sa [nom-la], bann dimoune pou rappel moi pou generation apré generation.” (Exode 3:13-15) Partout lor la terre zordi, bann serviteur Bondié encore toujours konn Li par so nom Jéhovah.—Isaïe 12:4, 5; 43:10-12.
7. Ki Bondié ti dire Moïse faire, mem si Pharaon ti bien arrogant?
7 Devant Pharaon, Moïse ek Aaron ti dire ki Jéhovah finn envoye zot, ek zot ti annonce zot message. Mais Pharaon ti bien arrogant, ek li ti reponn zot: “Kisannla sa Jéhovah-la, pou ki mo bizin ecoute so la-voix ek laisse Israël allé? Mo pa konn Jéhovah ditou ek mo pa pou laisse Israël allé aussi.” (Exode 5:1, 2) Apré, Pharaon ti montré ki li ti ena enn leker dur, ek ki li pa ti garde so parole, mais Jéhovah ti dire Moïse contigne al annonce bann message plusieurs fois devant li. (Exode 7:14-16, 20-23; 8:1, 2, 20) Moïse ti kapav trouvé ki Pharaon ti bien agacé. Eski sa ti pou vaut la peine contigne al guette li encore? Bann Israélite ti pé attann zot delivrance avek impatience, mais Pharaon ti refusé, ek li ti categorik. Ki ou ti pou faire dan place Moïse?
8. Ki bienfait fason ki Jéhovah finn agir avek Pharaon finn amené, ek ki l’effet sa bann l’evenement-la bizin ena lor nou?
8 Moïse ti ré-al encore devant Pharaon pou annonce encore enn lot message. Li ti dire: “Guette seki Jéhovah, Bondié bann Hébreu finn dire: ‘Laisse mo peuple allé, pou zot servi moi.’ ” Bondié ti dire aussi: “Mo ti bien kapav fini leve mo la-main pou envoye enn l’epidemie maladie lor toi ek lor to peuple, pou faire toi disparette lor la terre. Mais, si mo finn laisse toi vive, c’est pou faire toi trouve mo la-force ek pou ki mo nom proclamé partout lor la terre.” (Exode 9:13-16) Jéhovah ti pou montré so pouvoir kan Li ti pou envoye so jugement lor Pharaon. Lerla, sa ti pou servi couma enn l’avertissement pou n’importe kisannla ki ti pou osé defié Li. Sa l’avertissement-la ti pou applik aussi ar Satan le Diable, li-mem ki plitar Jésus ti appel “chef le monde.” (Jean 14:30; Romains 9:17-24) Pareil couma Jéhovah ti dire, So nom ti’nn proclamé partout lor la terre. Grace a So patience, bann Israélite ek enn grand la-foule dimoune etranger ki ti vinn ar zot pou adore Jéhovah, ti gagne la vie sauve. (Exode 9:20, 21; 12:37, 38) Depuis sa, nom Jéhovah finn proclamé partout, ek sa finn permette plusieurs million dimoune pou accepté vrai religion.
Enn peuple difficile
9. Couma bann Israélite, pourtant peuple Moïse, pa ti respecté Jéhovah?
9 Bann Hébreu ti konn nom Bondié. Moïse ti servi sa nom-la kan li ti koz avek zot, mais zot pa ti toujours respecté Jéhovah. Jéhovah ti faire bann mirak pou delivré bann Israélite dan l’Égypte. Mais apré sa, ki ti arrivé kan zot pa ti gagne de l’eau pou boire? Zot ti reproche Moïse. Lerla, zot ti commence plaigné concernant mangé. Moïse ti dire zot ki, en realité, zot pa ti pé critik zis li ek Aaron, mais Jéhovah Li-mem. (Exode 15:22-24; 16:2-12) Lor montagne Sinaï, Jéhovah ti donne bann Israélite la Loi, ek Li ti faire bann l’evenement extraordinaire arrivé devant zot. Seulement, le peuple ti desobeir ek zot pa ti tardé pou faire enn veau en or ek pou adore sa. Lor la, zot ti pretann ki zot pé faire enn “fête pou Jéhovah.”—Exode 32:1-9.
10. Kifer zordi bann ancien bizin prend compte seki Moïse ti demann Jéhovah en Exode 33:13?
10 Couma Moïse ti bizin agir avek enn peuple ki Jéhovah Li-mem ti considere couma enn peuple ki ti ena la tête-dur? Moïse ti supplie Jéhovah, li ti dire Li: “S’il te plait, si mo finn gagne to faveur, faire moi konn to fason agir, s’il te plait, pou mo kapav konn toi, pou ki mo kapav gagne to faveur.” (Exode 33:13) Dan nou lepok, bann ancien ki prend soin bann Témoins de Jéhovah, zot prend soin enn troupeau ki beaucoup pli humble ki le peuple Israël. Kan-mem, zot aussi zot faire sa la-priere-la: “Faire moi konn to fason agir, ô Jéhovah; enseigne moi to bann sentier.” (Psaume 25:4) Kan bann ancien konn bien fason ki Jéhovah agir, sa permette zot traite bann situation dan enn fason ki en accord avek Parole Bondié ek avek So personnalité.
Seki Jéhovah attann ar so peuple
11. Ki la loi Jéhovah ti donne Moïse, ek kifer sa interesse nou?
11 Lor montagne Sinaï, Jéhovah ti dire seki Li ti attann ar so peuple. Plitar, Li ti ecrire les Dix Commandements lor deux tablette roche ek li ti donne sa Moïse. Kan Moïse ti desann lor montagne, li ti trouve bann Israélite pé adore enn veau en or. Dan so colere, li ti crase sa bann tablette-la. Jéhovah ti ré-ecrire les Dix Commandements, mais sa fois-la, Moïse li-mem ti bizin decoupe bann tablette dan roche. (Exode 32:19; 34:1) Bann commandement-la ti reste pareil, zot pa finn changé. Moïse ti bizin suive zot bien. Bondié ti aussi faire Moïse bien comprend ki qualité Bondié Li été, pou ki Moïse koné couma li bizin agir en tant ki So representant. Bann chrétien pa obligé suive la Loi mosaïk, mais dan seki Jéhovah ti dire Moïse, ena beaucoup principe de base ki pa finn changé, ek ki toujours applik ar tou bann serviteur Jéhovah. (Romains 6:14; 13:8-10) Anou examine certain parmi sa bann principe-la.
12. Kan Jéhovah ti demann pou adore zis Li tousel, couma sa ti bizin influence bann Israélite?
12 Adore zis Jéhovah tousel. Kan Jéhovah ti dire adore zis Li tousel, Li ti dire sa devant nation Israël. (Exode 20:2-5) Bann Israélite ti trouve beaucoup preuve ki montré ki Jéhovah Li-mem vrai Bondié. (Deutéronome 4:33-35) Jéhovah ti bien faire comprend ki, malgré tou seki bann lezot nation ti pé pratiké, Li, Li pa pou tolere okenn forme idolatrie ou spiritisme parmi so peuple. Zot pa ti bizin content Li zis par obligation. Zot tou ti bizin content Jéhovah avek tou zot leker, tou zot nâme ek tou zot la-force. (Deutéronome 6:5, 6) Sa ti pou concerne zot parole, zot conduite—en realité, chaque domaine dan zot la-vie. (Lévitique 20:27; 24:15, 16; 26:1) Jésus Christ aussi ti bien faire comprend ki Jéhovah attann ki adore zis Li tousel.—Marc 12:28-30; Luc 4:8.
13. Kifer bann Israélite ti bizin obeir Bondié, ek ki bizin pousse nou pou obeir Li? (Ecclésiaste 12:13)
13 Obeir zis bann commandement Jéhovah. Nation Israël ti bizin rappel ki, letan zot ti faire enn l’alliance avek Jéhovah, zot ti faire enn promesse pou obeir zis Li tousel. Zot ti ena enn grand liberté dan zot la-vie personnel, mais dan bann domaine kot Jéhovah ti donne zot bann commandement, zot ti bizin obeir tou seki Li ti dire zot. Sa ti pou montré zot l’amour pou Bondié ek sa ti pou faire zot gagne bann benediction pou zot ek pou zot bann descendant, parski tou seki Jéhovah ti demann zot, ti pou zot prop bien.—Exode 19:5-8; Deutéronome 5:27-33; 11:22, 23.
14. Couma Bondié ti montré bann Israélite l’importance pou donne priorité bann kitsoz spirituel?
14 Donne priorité bann kitsoz spirituel. Bann Israélite ti bizin occupe zot bann besoin materiel, mais sa pa ti bizin faire zot neglige bann activité spirituel. Fodé pa ki zot ti ena zis bann l’objectif materiel dan zot la-vie. Toulé-semaine, Jéhovah ti’nn fixé enn period lé-temps kot bann Israélite ti bizin occupe zis bann activité ki concerne vrai l’adoration, ek Jéhovah ti dire ki sa lé-temps-la ti sacré. (Exode 35:1-3; Nombres 15:32-36) Chaque l’année, zot ti bizin reserve lé-temps aussi pou assisté bann l’assemblée special. (Lévitique 23:4-44) Sa ti pou donne zot l’occasion pou koz lor bann kitsoz extraordinaire ki Jéhovah finn faire, pou rappel so fason agir ek pou exprime zot reconnaissance pou so bonté. Kan le peuple ti exprime zot l’attachement pou Jéhovah, sa ti pou augmente zot la-crainte ek zot l’amour pou Li, ek sa ti pou aide zot pou marche dan so bann chemin. (Deutéronome 10:12, 13) Zordi, bann serviteur Jéhovah kapav tire beaucoup profit dan bann bon principe ki trouve dan sa bann instruction-la.—Hébreux 10:24, 25.
Nou bizin bien comprend bann qualité Jéhovah
15. (a) Couma connaissance ki Moïse ti ena lor bann qualité Jéhovah, ti aide li? (b) Ki bann question kapav aide nou pou reflechi en profondeur lor chaque qualité Jéhovah?
15 Seki ti pou aide Moïse pou agir bien avek bann Israélite, c’est enn bon connaissance lor bann qualité Jéhovah. Dapré Exode 34:5-7, Bondié ti passe devant figure Moïse ek Li ti dire: “Jéhovah, Jéhovah, enn Bondié ki ena misericorde ek compassion, ki pa en colere vite, ki rempli ar l’amour fidel ek la verité, ki garde l’amour fidel pou bann millier dimoune, ki pardonne bann erreur, bann faute, ek bann peché, mais Li pa retire so punition, ek a cause faute bann papa, Li puni bann garson ek bann ti-zenfant, troisieme generation ek quatrieme generation.” Prend lé-temps pou medite lor sa bann parole-la. Demann ou-mem: ‘Ki chaque qualité vedir? Couma Jéhovah finn manifesté sa qualité-la? Couma bann ancien dan congregation kapav manifesté sa qualité-la? Couma sa qualité-la bizin influence bann action ki sakenn parmi nou faire?’ Anou examine zis dé-trois l’exemple.
16. Couma nou kapav approfondi nou connaissance lor misericorde Bondié, ek kifer li important nou faire sa?
16 Jéhovah, enn “Bondié ki ena misericorde ek compassion.” Si ou ena livre Étude perspicace des Écritures, kifer ou pa lire lartik ki koz lor ‘Misericorde’? Ou-soit ou kapav faire bann recherche lor la dan l’Index des publications Watchtower ou-soit dan Watchtower Library lor CD-ROM,a si ou ena enn computer. Servi enn concordance pou rod bann text ki koz lor misericorde. Ou pou trouvé ki, kan Jéhovah manifesté so misericorde, Li pa zis parfois diminué punition ki enn dimoune merité, mais Li aussi ena compassion pou sa dimoune-la. Sa qualité-la pousse Bondié pou prend bann disposition pou soulage so peuple. Nou trouve sa kan Bondié ti donne bann Israélite seki zot ti bizin lor plan materiel ek spirituel, pendant zot voyage vers la Terre Promise. (Deutéronome 1:30-33; 8:4) Jéhovah ti montré so misericorde ek Li ti pardonne so peuple kan zot ti faire erreur. Sa montré nou ki quantité nou bizin montré compassion envers nou prochain zordi!—Matthieu 9:13; 18:21-35.
17. Kan nou comprend seki vedir compassion Jéhovah, couma sa kapav aide nou pou favorise vrai l’adoration?
17 Misericorde Jéhovah marche ensam avek so compassion. Si ou ena enn dictionnaire, guetté ki sa vedir “compassion.” Lerla, compare sa avek bann verset ki dire ki Jéhovah ena compassion. Dapré la Bible, kan Jéhovah manifesté so compassion, sa vedir ki Li aussi interessé ar so bann serviteur ki pé passe par bann situation difficile, ek Li ena l’amour pou zot. (Exode 22:26, 27) Dan n’importe ki pays, bann etranger ek aussi lezot dimoune kapav trouve zot dan enn situation difficile. Kan Jéhovah ti enseigne so peuple dan le passé pou pa faire preference ek pou montré zot bon envers sa qualité dimoune-la, Li ti rappel zot ki zot aussi, zot ti bann etranger en Égypte. (Deutéronome 24:17-22) Ki nou kapav dire lor nou, ki faire partie dan peuple Bondié zordi? La compassion permette nou garde nou l’unité ek attire lezot dimoune pou adore Jéhovah.—Actes 10:34, 35; Révélation 7:9, 10.
18. Ki nou aprann ar bann limite ki Jéhovah ti fixé pou bann Israélite, concernant zot relation avek lezot nation?
18 Seulement, compassion ki bann Israélite ti ena pou bann dimoune dan lezot nation, pa ti bizin passe avant zot l’amour pou Jéhovah ek pou so bann principe. Par exemple, bann Israélite ti gagne l’ordre pou pa suive tradition sa bann nation-la, ni zot coutume religieux, ni zot conduite immoral. (Exode 34:11-16; Deutéronome 7:1-4) Sa applik aussi pou nou zordi. Nou bizin reste enn peuple saint, pareil couma nou Bondié Jéhovah, Li saint.—1 Pierre 1:15, 16.
19. Ki nou pa pou faire si nou bien comprend fason ki Jéhovah considere bann faute?
19 Pou faire Moïse bien comprend So fason agir, Jéhovah ti dire li, ki mem si Li pa tolere peché, Li pa en colere vite. Li donne dimoune lé-temps pou aprann so bann la-loi ek pou mette zot en pratik. Si enn dimoune repenti kan li’nn faire enn peché, Jéhovah pardonne li. Mais Li pa retire so punition envers bann ki merité, parski zot finn faire bann faute grave. Li ti dire Moïse ki, conduite bann Israélite ti pou kapav ena soit enn bon, soit enn mauvais l’influence lor bann generation apré. Kan bann serviteur Bondié bien comprend so fason agir, sa pou empeche zot pou blame Jéhovah, si zot gagne problem a cause bann kitsoz ki zot-mem zot inn faire, ek zot pa pou dire ki Li tardé pou agir.
20. Ki kapav aide nou pou ena bann pli bon relation avek nou bann frere ek soeur, ek avek bann dimoune ki nou joinde dan nou ministere? (Psaume 86:11)
20 Si ou envie augmente ou connaissance lor Jéhovah ek lor so fason agir, contigne faire bann recherche, ek medité kan ou lire la Bible. Etudié bien bann different qualité extraordinaire dan personnalité Jéhovah. Reflechi dan la priere couma ou kapav imite Li ek faire pli bien so volonté. Sa pou aide ou evite bann piege, ena bann pli bon relation avek ou bann frere ek soeur, ek aide lezot dimoune pou konn nou grand Bondié ek pou content Li.
[Note]
a Tousala publié par bann Témoins de Jéhovah.
Ki ou finn aprann?
• Kifer l’humilité ti important pou Moïse, ek kifer li bien important pou nou aussi?
• Kan Moïse ti al annonce parole Jéhovah plusieurs fois devant Pharaon, ki bon resultat finn ena?
• Ki bann principe bien important, ki applik ar nou aussi, Jéhovah finn enseigne Moïse?
• Couma eski nou kapav augmente nou connaissance lor bann qualité Jéhovah?
[Zimage, page 9]
Avek fidelité, Moïse ti al dire Pharaon, parole Jéhovah
[Zimage, page 10]
Jéhovah ti faire Moïse konn So bann la-loi
[Zimage, page 12]
Medite lor bann qualité Jéhovah