Moïse​—Enn Zom Ki Ti Ena l’Amour

KI ÉTÉ L’AMOUR?

L’amour implik enn grand l’affection pou lezot. Enn dimoune ki ena l’amour montré par so bann parole ek so bann action seki li ressenti pou bann ki li content, mem si sa demann li faire bann sacrifice.

COUMA MOÏSE TI MANIFESTÉ L’AMOUR?

Moïse ti montré ki li ti content Bondié. Dan ki fason? Rappel bann parole ki ena dan 1 Jean 5:3: “Ala seki vedir l’amour Bondié: suive so bann commandement.” Moïse ti vive en accord avek sa principe-la. Tou seki Bondié ti demann li faire​—depuis mission bien difficile pou al koz ar Pharaon ki ti puissant ziska mission ki ti parette simple couma leve so baton lor la Mer Rouge​—Moïse ti obeir. Ki l’ordre-la ti facile pou obeir ou-soit non, Moïse ti faire li. “Li ti faire exactement seki finn dire li.”​—Exode 40:16.

Moïse ti montré l’amour pou bann lezot Israélite. Zot ti reconette ki Jéhovah ti pé servi Moïse pou guide so peuple, alors zot ti vinn vers Moïse pou koz lor zot bann probleme. Nou lire: “Le peuple ti contigne deboute devant Moïse depuis gramatin ziska tantot.” (Exode 18:13-16) Mazinn enn coute ki quantité sa ti fatigant pou Moïse ecoute bann Israélite raconte zot probleme enn journée! Pourtant, Moïse ti content pou aide le peuple parski li ti content zot.

En plus ki li ti ecoute zot, Moïse ti aussi prié pou bann ki li ti content. Li ti mem prié pou bann ki ti faire li di-tort! Par exemple, kan Moïse so soeur, Miriam, ti murmuré kont Moïse, Jéhovah ti faire Miriam gagne la lepre. Au lieu ki li ti content kan Miriam ti gagne sa punition-la, desuite Moïse ti prié Bondié pou li: “Ah Bondié, s’il te plait! Gueri li, s’il te plait!” (Nombres 12:13) Ki kitsoz a part l’amour ti pou kapav pousse Moïse pou faire enn la priere ki pa egoïste coumsa?

KI BANN LESON NOU TIRÉ?

Nou kapav imite Moïse kan nou cultive enn grand l’amour pou Bondié. Sa qualité l’amour-la pousse nou pou obeir So bann commandement ‘avek nou leker.’ (Romains 6:17) Kan nou obeir Jéhovah avek nou leker, nou faire so leker content. (Proverbes 27:11) Nou aussi nou gagne bann bienfait. Apré tou, kan nou servi Bondié avek tou nou leker, nou pa pou zis faire bann kitsoz ki droite mais nou pou content pou faire zot!​—Psaume 100:2.

Enn lot fason ki nou kapav imite Moïse c’est kan nou developpe enn l’amour ki pousse nou pou faire bann sacrifice pou lezot. Kan bann camarade ou-soit bann membre nou famille vinn guette nou avek zot bann tracas, l’amour pousse nou pou (1) donne zot tou nou l’attention; (2) essaye mette nou dan zot place; ek (3) faire zot koné ki nou interessé ar zot.

Pareil couma Moïse, nou kapav prié pou bann ki nou content. Kan zot pé raconte nou zot probleme, parfois nou kapav senti nou decouragé parski nou pa koné couma pou aide zot. Avek regret nou kapav mem dire: “Excuse moi, sel kitsoz ki mo kapav faire c’est prié pou toi.” Mais rappel: “Kan enn dimoune juste prié, sa la priere-la ena enn grand pouvoir.” (Jacques 5:16, The Kingdom New Testament) Nou bann la priere kapav pousse Jéhovah pou faire kitsoz pou sa dimoune-la, alors ki kitfois sans nou la priere Li pa ti pou faire sa. Avredir, ki pli bon kitsoz nou kapav faire pou bann ki nou content a part prié pou zot?a

Eski ou pa d’accord ki nou kapav aprann beaucoup ar Moïse? Mem si li ti enn dimoune ordinaire pareil couma nou, li’nn laisse enn l’exemple extraordinaire lor la foi, l’humilité, ek l’amour. Plus nou imite so l’exemple, plus nou ek lezot pou gagne bann bienfait.​—Romains 15:4.