Revision Lekol ministere theocratik

Nou pou examine bann question ki lor sa feuille-la dan Lekol ministere theocratik pendant semaine ki commence a partir le 22 février 2010. Surveillant lekol pou faire enn revision pendant 20 minute. Sa revision-la basé lor bann sujet ki ti faire a partir semaine 4 janvier ziska le 22 février 2010.

1. Ki bann raison kitfois ti pousse certain Israélite pou tardé pou prend la Terre promise, ek ki leson nou kapav aprann ar sa? (Jos. 18:2, 3) [4 janv., it-1-⁠F p. 934 § 1] Bann Israélite ti prend enn quantité di-bien pendant zot bann victoire, en plus pa ti vrai-mem ena okenn danger ki bann Cananéen vinn attak zot. A cause sa, kitfois certain tribu pa ti trouve sa urgent pou occupe le reste territoire. Kitfois aussi, zot pa ti envie faire face ar bann groupe l’ennemi ki ti encore pé resisté. Leson ki nou kapav aprann c’est: fodé ki jamais nou laisse bann kitsoz materiel ou-soit enn l’attitude indifferent empeche nou avancé pou faire volonté Bondié.

2. Ki ti surement pousse Josué pou dire seki li ti faire dan Josué 24:14, 15, ek ki l’effet sa bizin ena lor nou? [11 janv., w08-CE 1/5 p. 21-22 § 4-6] Josué ti trouvé couma Jéhovah ti commence realise So promesse pou donne Israël enn pays. (Gen. 12:7) Li ti temoin dix plaie ki ti tombe lor l’Égypte. Josué ti traverse la mer Rouge en securité. Li ti trouvé couma Jéhovah ti donne bann Israélite tou seki zot ti bizin pendant sa 40 an ki zot ti passé dan desert Sinaï-la. Pena enn sel ki ti’nn mort de soif ou-soit de faim. (Deut. 8:14-16) Li ti trouve bann Israélite gagne la victoire lor bann nation Cananéen ki ti bien puissant ek prend la Terre promise avek l’aide Jéhovah. (Jos. 10:14) Kan nou medite lor bann parole Josué, sa bizin pousse nou pou ena confiance dan capacité ki Jéhovah ena pou soutenir, protege, ek delivré So peuple.

3. Cite enn fason couma bann adorateur Baal ek zot l’adoration ti vinn bann piege ek bann tentation pou bann Israélite. (Juges 2:3) [18 janv., w08-⁠F 15/2 p. 27 § 2-3] Kan bann Israélite ti rente dan la Terre promise, zot ti nepli bann nomade, ek beaucoup ti vinn bann planteur. Zot ti frequente bann Cananéen ek sa ti enn piege pou zot parski sa ti amenn zot pou accepté croyance bannla lor l’agriculture. Bann Cananéen ti adore plusieurs Baal—bann bondié ki ti supposé faire la terre produire pli beaucoup. Li parette ki beaucoup Israélite ti encore croire en Jéhovah, mais zot ti laisse-zot piegé par materialisme letan zot ti considere Baal couma bondié ki ti pou protege zot bann plantation ek donne-zot seki zot ti pou bizin toulé-jour.

4. Ki leson nou kapav aprann ar Éhoud ki ti servi so l’epée avek courage? (Juges 3:16, 21) [18 janv., w97-⁠F 15/3 p. 31 § 3] Pareil couma Éhoud ti konn servi bien so l’epée, nou essaye faire tou pou servi bien “­l’epée l’esprit, setadir, parole Bondié.” (Éph. 6:17) A travers nou l’etude personnel ek bann reunion ki nou assisté toulé-semaine, nou faire bann grand zeffort pou servi Parole Bondié dan enn fason efficace kan nou preche la bonne nouvelle lor Royaume Bondié. (Mat. 24:14)

5. Ki l’encouragement nou gagné kan nou etudié fason ki Jéhovah ti delivré Guidéôn ek so 300 zom? (Juges 7:19-22) [25 janv., w05-⁠F 15/7 p. 16 § 8] L’exemple Guidéôn montré ki Jéhovah kapav delivré so peuple dan n’importe ki situation, mem kan Li servi bann dimoune ki parette faible ou-soit sans defense. Dan nou la guerre en tant ki chretien, nou kapav trouve-nou dan bann situation difficile ek ki kapav parette desesperé parski nou pli tigit ki nou bann l’ennemi. Pourtant, seki la Bible dire lor Guidéôn encourage nou pou faire confiance Jéhovah pou nou reussi au lieu ki nou mette nou confiance dan bann plan humain. Jéhovah, ki ena enn pouvoir sans limite, pou beni ek pou delivré tou bann ki ena la foi en Li. (Zek. 4:6)

6. Dan ki fason Jéhovah so nâme ti “nepli kapav tini a cause malheur ki Israël ti pé gagné”? (Juges 10:16) [1^er févr., cl-⁠F p. 254-255 § 10-11] Parski nation Israël ti commence adore bann fausse bondié, Jéhovah ti laisse bann Ammonite domine zot pendant 18 an. Mais finalement kan bann Israélite ti repenti avek tou zot leker, Jéhovah ti nepli kapav trouve zot souffert. Alors Bondié ki ena enn grand misericorde, ti donne Yiphtah pouvoir pou delivré bann Israélite ar zot bann l’ennemi. (Juges 11:32, 33) Sa l’exemple-la montré nou ki Jéhovah bien koné par ki l’epreuve so bann serviteur passé ek Li envie delivré zot ar zot souffrance.

7. Eski Yiphtah ti pé pense pou faire enn sacrifice humain kan li ti faire so voeu? (Juges 11:30, 31) [8 févr., w05-CE 1/3 p. 10 § 1] Yiphtah pa ti pou kapav pense enn kitsoz coumsa. La Loi ti dire: “Fodé pa ki parmi zot, ena kikenn ki passe so garson ou-soit so tifi dan difé.” (Deut. 18:10) Surement, bann Israélite pa ti garde bann zanimo ki ti kapav offert en sacrifice dan zot lakaz. Yiphtah ti koné ki li ti pou bizin offert sa kikenn ki ti pou sorti dan so lakaz pou vinn joinde li, setadir enn serviteur ou-soit so tifi, “couma enn sacrifice ki brule net” dan sens ki sa dimoune-la ti pou consacré so la vie net pou servi Jéhovah dan So temple.

8. Eski la force Samson ti vrai-mem dan so cheveux? (Juges 16:18-20) [15 févr., w05-⁠F 15/3 p. 28 § 4-5] Non. Cheveux Samson ti represente bann relation special ki li ti ena avek Jéhovah en tant ki enn naziréen. Kan li ti laisse enn situation developpé ki ti amenn so bann l’ennemi pou rase so la tête, sa ti affecté so naziréat ek ‘Jéhovah ti quitte li.’ (Juges 16:17, 20) Si nou envie contigne gagne benediction Jéhovah, nou bizin donne valeur nou bann relation ki nou ena avek Li ek pa faire nanyin ki pou mette en danger voeu ki nou finn faire pou servi Li.

9. Ki kapav aide nou pou comprend action extraordinaire ki Samson ti faire ek ki decrire dan Juges 16:3? [15 févr., w04-CE 1/11 p. 15-16 § 7-8] Samson ti sarié bann la porte bien lourd ek bann montant enn la ville ki ti enn forteresse Philistin. Li ti sarié sa lor enn distance 60 km depuis la mer ziska lor enn montagne ki ti trouve 900 metre hauteur. Zordi, en tant ki chretien, nou pa attann ki l’esprit Bondié donne nou enn la force physik extraordinaire. Pourtant, par la force sa mem l’esprit-la, nou kapav augmente nou connaissance lor bann question spirituel profond. Li kapav aussi rann sa dimoune ki nou été endan-la pli fort. (1 Cor. 2:12; Éph. 3:16)

10. Ki nou kapav aprann ar seki ena dan Juges 16:30 concernant nâme enn dimoune? [15 févr., w90-⁠F 1/9 p. 5 § 6; sp-⁠F p. 13-14] Beaucoup religion enseigné ki lekor enn dimoune mort, alors ki nâme li, li pa mort. Mais mot ki servi dan la Bible pou “nâme” vedir dimoune-la li-mem. Pareil couma bann parole Samson ek lezot dimoune montré, bann serviteur fidele Jéhovah ti comprend ki nâme kapav mort ek li mort. (Gen. 17:14; Jos. 10:37; Job 7:15)