“Traverse Pays-La”
“Traverse pays-la dans tou so longueur ek so largeur.”—GENÈSE 13:17.
1. Ki instruction intéressant Bondié ti donne Abraham?
ESKI ou content voyagé dans la campagne, kitfois al faire enn lé-tour dans l’auto pendant week-end? Certains préfère al lor bicyclette pou faire l’exercice ek prend tou zot lé-temps pou admire partout. Éna lézot ki choisir pou faire bann randonnées pou zot kapav konn plus enn l’endroit ek prend le temps pou vrai-même apprécié li. Normalement sa bann qualités excursions-la pa dure longtemps. Mais mazinn enn coup séki Abraham ti’nn ressenti après ki Jéhovah ti’nn dire li: “Lévé, traverse pays-la dans tou so longueur ek so largeur, parski c’est toi ki mo pou donne sa”!—Genèse 13:17.
2. Kot-sa Abraham ti allé après ki li ti quitte l’Égypte?
2 Anou analyse contexte sa bann paroles-la. Abraham ti’nn reste en Égypte avec so madame ek lézot dimoune encore. Genèse chapitre 13 dire nous ki zot ti quitte l’Égypte ek zot ti amène zot bann troupeau ziska “Négueb.” Lerla Abraham “ti campé dans enn place après l’autre, depuis Négueb ziska Béthel.” Après, ti’nn arrive enn problème entre so bann gardiens troupeaux ek bann gardiens troupeaux so neveu Lot. Li ti vinn évident ki zot deux ti pou bizin rode bann l’endroits séparé pou zot bann troupeaux. Lerla, avec bon coeur, Abraham ti laisse Lot choisir en premier kot li ti envie allé. Lot ti choisir “District Jourdain,” enn vallée bien vert “couma jardin Jéhovah,” ek plitar li ti al reste Sodome. Bondié ti dire Abraham: “Lève to lizié, s’il te plaît, ek depuis kot to été, guette vers le nord, vers le sud, vers l’est ek vers l’ouest.” Sûrement, depuis enn place dans hauteur près avec Béthel, Abraham ti kapav trouve lézot parties sa pays-la. Mais, Abraham ti pou faire plus ki zis guette pays-la. Bondié ti invite li pou “traverse pays-la” ek pou konn pli bien la nature ek bann l’endroits sa pays-la.
3. Concernant bann trajets ki Abraham inn faire, kifer li kapav difficile pou mazinn sa dans nou l’esprit?
3 Nous pa koné ziska ki point Abraham ti traverse le pays avant li arrive Hébrôn, mais certainement li ti pli konn la Terre Promise ki la plupart parmi nous. Mazinn bann l’endroits ki mentionné dans sa récit-la—Négueb, Béthel, District Jourdain, Sodome, ek Hébrôn. Eski li difficile pou situé mentalement kot sa bann l’endroits-la ti été? C’est vrai, li kapav difficile pou beaucoup parmi nous, parski péna beaucoup parmi bann serviteurs Jéhovah ki’nn visite bann places ki la Bible faire mention ek ki’nn traverse sa pays-la dans tou so longueur ek so largeur. Kan-même, nous éna bann bon raisons pou montré l’intérêt pou konn sa bann l’endroits ki la Bible mentionné-la. Kifer?
4, 5. (a) Ki rapport Proverbes 18:15 éna avec la connaissance ek compréhension bann pays ki la Bible mentionné? (b) Ki nous rann nous compte kan nous lire Tsephania chapitre 2?
4 Parole Bondié dire: “Léker enn dimoune intelligent gagne la connaissance, ek zoreille bann sages rode la connaissance.” (Proverbes 18:15) Nous kapav gagne la connaissance lor beaucoup sujets, mais la connaissance ki pli important c’est la connaissance exacte concernant Jéhovah ek so bann manières agir. Oui, certainement séki nous lire dans la Bible li bien-bien important pou gagne sa connaissance-la. (2 Timothée 3:16) Mais, remarqué ki sa implique aussi la compréhension. La compréhension c’est capacité pou comprend enn kitsoz, pou discerné, ou-soit pou saisi liens ki existé entre so bann différent parties ek séki li été en gros. Sa li applique pou bann détails concernant bann l’endroits ki mentionné dans la Bible. Par exemple, la plupart parmi nous koné kot l’Égypte trouvé, mais ziska ki point eski nous comprend sa boute ki dire ki Abraham ti quitte l’Égypte “en direction Négueb,” plitar ziska Béthel, ek après ziska Hébrôn? Eski ou comprend kot sa bann l’endroits-la été par rapport ar enn avec l’autre.
5 Peut-être ou kapav inn lire Tsephania chapitre 2 dans ou programme lecture la-Bible. Dans sa chapitre-la, ou trouve noms bann la-villes, peuples ek pays. Par exemple, ou pou trouve bann places couma Gaza, Ashqelôn, Ashdod, Éqrôn, Sodome ek Ninive, ek aussi Canaan, Moab, Ammôn, ek l’Assyrie; tou sa-la finn mentionné zis dans sa enn chapitre-la. Ziska ki point ou’nn kapav situé mentalement sa bann l’endroits kot vrai-même bann dimoune ti resté, bann dimoune ki ti impliqué dans réalisation prophétie ki Bondié inn donné?
6. Kifer certains Chrétiens inn comprend ki bann maps zot important? (Guette l’encadré.)
6 Beaucoup étudiants la-Bible inn tire grand profit kan zot inn consulté bann maps kot éna bann pays ki la Bible mentionné. C’est pa parski zot trop content map ki zot faire sa, mais parski zot réalisé ki zot kapav augmente zot connaissance lor Parole Bondié, kan zot servi bann maps. Bann maps kapav aussi aide zot pou comprend plus ek pou trouvé ki rapport éna entre séki zot déjà koné ek bann lézot l’informations. À mesure ki nous examine certains l’exemples, sans doute ou reconnaissance pou Jéhovah pou augmenté ek ou pou comprend pli bien bann récits ki trouve dans so Parole. (Guette l’encadré page 14.)
Nous Comprend Pli Bien kan Nous Konn la Distance
7, 8. (a) Ki kitsoz exceptionnel Samson ti faire en rapport avec la ville Gaza? (b) Ki renseignement rann sa encore pli impressionant? (c) Couma connaissance ek compréhension lor sa récit concernant Samson-la, kapav aide nous?
7 Dans Juges 16:2, ou kapav lire séki ti arrive Juge Samson kan li ti dans la ville Gaza. Zordi mentionne sa l’endroit-la souvent dans l’information, donc ou kapav éna enn l’idée apépré kot-sa Samson ti été, dans enn territoire Philistin près ar la Côte Méditerranée. [11] Asterla remarqué séki Juges 16:3 dire: “Samson inn reste dormi ziska minuit ek lerla, li’nn levé minuit ek li’nn trappe bann battants la-porte la-ville ek zot deux montants, li’nn rasse zot avec [zot] barre ek li’nn mette zot lor so zépaules ek li’nn saryé zot là-haut lor boute montagne ki en face Hébrôn.”
8 Gaza ti couma enn forteresse. Sans doute, so bann la-portes ek bann montants ti bien large ek lourd. Mazinn enn coup couma pou saryé sa! Samson ti réussi faire li, mais kot-sa li ti amène sa, ek ki chemin li ti bizin prend? Eh bien, Gaza trouve lor la côte, apépré même niveau ki la mer. [15] Mais, Hébrôn trouve dans l’est lor enn hauteur 900 mètres—ti bizin monte enn vrai la-pente! Nous pa koné kot-sa exactement “montagne ki ti en face Hébrôn” li été, mais la ville-la [Hébrôn] situé environ 60 kilomètres ar Gaza et bizin faire la-monté toute-long la route! Kan nous konn la distance ki ti éna, eski nous pa pli impressionné par sa kitsoz extraordinaire ki Samson finn accompli? Et rappelle kifer Samson ti kapav faire sa qualité actions-la—“L’esprit Jéhovah inn agir lor li.” (Juges 14:6, 19; 15:14) Zordi, en tant ki Chrétiens, nous pa atann ki l’esprit Bondié donne nous enn la-force physique exceptionnel. Pourtant, par la force sa-même l’esprit-la, nous kapav augmente nou compréhension lor bann questions spirituel profond. Li kapav aussi rann la personne ki nous été à l’intérieur fort. (1 Corinthiens 2:10-16; 13:8; Éphésiens 3:16; Colossiens 1:9, 10) Oui, kan nous comprend récit concernant Samson, nous convaincu encore plus ki l’esprit Bondié kapav aide nous.
9, 10. (a) Ki ti faire partie dans la victoire ki Guidéôn ti remporté lor bann Madianites? (b) Couma kan nous konn géographie sa bann l’endroits ki mentionné-la, sa aide nous pou comprend pli bien sa récit-la?
9 Enn l’autre récit ki montré nous l’importance konn bann distances, c’est victoire Guidéôn lor bann Madianites. La plupart dimoune ki lire la Bible koné ki Juge Guidéôn ek so groupe 300 zom ti remporte la victoire lor 135,000 envahisseurs ki ti’nn faire enn alliance entre zot-même. Sa bann envahisseurs-la ti bann Madianites, bann Amaléqites, ek lézot encore ki ti pé campé dans la plaine de Yizréel, près kot la colline de Moré. [18] Bann zom Guidéôn ti soufflé bann cors, zot ti craze bann jars pou découver zot bann flambeaux, ek zot ti crié: “L’épée Jéhovah ek l’épée Guidéôn!” Sa ti faire zot l’ennemis peur. Panique lor zot. Résultat: Zot ti népli koné ki pou faire. Séki fait, zot inn commence touye zot entre zot-même. (Juges 6:33; 7:1-22) Eski c’est sa-même tou séki ti arrivé, zis enn attaque rapide pendant la nuit? Contigne ou lecture en Juges chapitres 7 ek 8. Ou pou trouvé ki Guidéôn ti contigne sa l’attaque-la. Parmi bann l’endroits ki mentionné, éna certains ki kitfois pa parette lor bann maps la-Bible parski aster, nous pa koné kot zot ti été. Kan-même, éna enn bon quantité l’endroits ki’nn identifié, pou permette nous suive séki Guidéôn ti faire.
10 Guidéôn ti poursuive le reste sa l’armé ki ti’nn faire enn alliance entre zot. Li’nn poursuive zot ziska dépasse Beth-Shitta ek allé même vers le sud ziska Abel-Mehola, près kot Jourdain. (Juges 7:22-25) Récit-la raconté: “Guidéôn ti arrive ziska Jourdain ek li’nn traverse [la rivière], li ek sa trois cents zom ki ti avec li-la; zot ti fatigué mais zot ti contigne poursuive bannla.” Après ki zot inn arrive l’autre côté, bann Israélites inn poursuive zot l’ennemis vers le sud ziska Soukkoth ek Penouël, près avec Yabboq, après zot inn monte bann collines Yogbeha (près avec la ville moderne Amman en Jordanie). Sa veut dire ki zot ti faire apépré 80 kilomètres pou poursuive ek laguerre contre zot l’ennemis. Guidéôn ti capture ek ti touye deux lé-rois Madianites; ek après li’nn retourne dans so la-ville, Ophra, près kot sa place ki zot ti commence laguerre-la. (Juges 8:4-12, 21-27) Li clair ki sa kitsoz extraordinaire ki Guidéôn ti faire-la, ti plus ki zis soufflé cors pendant enn ti moment, lève bann flambeaux, ek crié. Ek maziné couma sa donne poids avec séki la Bible dire concernant bann zom ki’nn démontré zot la-foi: “Le temps pou manqué si mo contigne raconte zot concernant Guidéôn [ek lézot ki ti,] faible couma zot ti été, mais zot ti recevoir la puissance, ek zot ti vinn bann zom courageux dans la guerre.” (Hébreux 11:32-34) Bann Chrétiens aussi kapav fatigué physiquement, mais eski li pa important ki nous contigne faire volonté Jéhovah?—2 Corinthiens 4:1, 16; Galates 6:9.
Couma Dimoune Pensé ek Réagir?
11. Ki trajet bann Israélites ti bizin faire avant ek après ki zot ti arrive Qadesh?
11 Certains kapav consulté bann maps Biblique pou koné kot bann l’endroits été, mais eski ou pensé ki bann maps kapav aide nous pou comprend façon pensé bann dimoune? Prend l’exemple bann Israélites ki ti quitte Montagne Sinaï pou al vers la Terre Promise. Après ki zot inn arrêté plusieurs places en chemin, finalement zot inn arrive Qadesh (ou-soit, Qadesh-Barnéa). [9] Deutéronome 1:2 montré ki sa ti enn trajet 11-jours lor enn distance apépré 270 kilomètres. C’est à partir là ki Moïse ti envoye 12 espions dans la Terre Promise. (Nombres 10:12, 33; 11:34, 35; 12:16; 13:1-3, 25, 26) Bann espions ti al vers le nord, zot ti traverse le Négueb, kitfois zot ti passe Béer-Shéba, ensuite Hébrôn, ek zot ti arrive ziska la frontière nord la Terre Promise. (Nombres 13:21-24) Bann Israélites ti bizin erré dans désert pendant 40 ans parski zot ti accepté rapport défavorable les dix espions. (Nombres 14:1-34) Ki sa faire nous comprend lor zot la-foi ek zot volonté pou faire Jéhovah confiance?—Deutéronome 1:19-33; Psaume 78:22, 32-43; Jude 5.
12. Ki nous kapav dire finalement lor la foi bann Israélites, ek kifer li bon ki nous réfléchi lor la?
12 Anou réfléchi lor bann détails géographique sa trajet-la. Si bann Israélites ti’nn manifesté la foi ek ti’nn suive conseil Josué ek Caleb, eski zot ti pou bizin marche sa quantité-la pou arrive dans la Terre Promise? Ti éna seulement 16 kilomètres entre Qadesh ek Béer-Lahaï-Roï, kot Isaac ek Rébecca ti resté. [7] Ti éna enn distance moins ki 95 kilomètres ziska Béer-Shéba, ki la Bible dire ti trouve net dans sud la Terre Promise. (Genèse 24:62; 25:11; 2 Samuel 3:10) Après ki zot inn marche depuis l’Égypte ziska Montagne Sinaï, ek après 270 kilomètres ziska Qadesh, coumadire zot ti à deux-pas de la Terre Promise. Dans nou cas, nous aussi nous zis deux-pas pou rentre dans paradis terrestre ki Jéhovah inn promette nous. Ki leçon nous kapav tiré? L’apôtre Paul ti ajoute enn conseil kan li ti pé koz lor situation bann Israélites: “Alors anou faire tou nou possible pou rentre dans sa repos-la, attention kikenn tombe dans même l’exemple désobéissance.”—Hébreux 3:16–4:11.
13, 14. (a) Dans ki situation bann Guibéonites inn prend enn décision bien important? (b) Ki sa montré concernant l’attitude bann Guibéonites, ek ki leçon nous bizin tiré ladan?
13 Parkont, kan nous examine récit Biblique concernant bann Guibéonites nous trouve enn l’autre l’attitude; zot ti démontré ki zot éna confiance ki Bondié pou réalise so volonté. Après ki Josué ti’nn conduire bann Israélites l’autre côté la Rivière Jourdain dans pays ki Bondié ti promette famille Abraham, ti’nn le temps pou expulsé bann Cananéens. (Deutéronome 7:1-3) Parmi ti éna aussi bann Guibéonites. Bann Israélites ti renverse Jéricho ek Aï ek zot ti pé campé pa trop loin, à Guilgal. Bann Guibéonites pa ti envie mort couma bann Cananéens ki ti’nn maudi par Jéhovah. Alors zot ti envoye zot bann représentants pou vinn guette Josué à Guilgal. Zot ti faire semblant sorti dans enn pays en-dehors territoire Canaan pou ki zot kapav faire enn alliance d’amitié avec bann Hébreux.
14 Sa bann représentants-la ti dire: “To bann serviteurs sorti dans enn pays bien loin, zot inn vini à propos nom Jéhovah to Bondié.” (Josué 9:3-9) Zot linge ek zot mangé ti faire croire ki vrai-même zot sorti bien loin, mais en réalité Guibéôn ti trouve 30 kilomètres seulement avec Guilgal. [19] Convaincu, Josué ek so bann chefs inn faire enn l’alliance d’amitié avec Guibéôn ek so bann la-villes voisines. Eski trik bann Guibéonites ti zis enn moyen pou zot évite trouve la mort? Au contraire, sa ti montré désir ki zot ti éna pou gagne faveur Bondié Israël. Jéhovah ti d’accord ki bann Guibéonites “vinn bann ki ramasse du bois ek puise de l’eau pou l’assemblée ek pou l’autel Jéhovah;” zot ti fourni du bois pou l’autel de sacrifice. (Josué 9:11-27) Bann Guibéonites ti contigne montré zot disposé pou faire bann travail bien bas pou servi Jéhovah. Kitfois certains ti parmi bann Nethinim ki ti retourne de Babylone ek ki ti servi dans temple ki ti’nn reconstruire. (Ezra 2:1, 2, 43-54; 8:20) Nous kapav imite zot l’attitude kan nous faire tou nou possible pou garde la paix avec Bondié ek montré nous disposé pou faire n’importe ki ti-travail nous gagné dans so service.
Disposé pou Manifesté l’Esprit Sacrifice
15. Kifer nous bizin intéressé avec géographie kan nous lire les Écritures Grecques Chrétiennes?
15 Dans les Écritures Grecques Chrétiennes, éna aussi bann récits kot géographie bann pays Biblique mentionné, par exemple bann voyages ek ministère de Jésus ek l’apôtre Paul. (Marc 1:38; 7:24, 31; 10:1; Luc 8:1; 13:22; 2 Corinthiens 11:25, 26) Essaye mazinn bann trajets ki ti impliqué dans sa bann récits ki nous pou guetté asterla.
16. Couma eski bann Chrétiens ki ti reste Bérée ti montré zot l’amour ek l’estime pou Paul?
16 Pendant so deuxième voyage missionnaire (la ligne mauve lor map), Paul ti arrive Philippes, ki maintenant trouve dans la Grèce. [33] Là, li’nn rann témoignage, li’nn al dans prison ek li’nn libéré, ek après li’nn poursuive so voyage pou al Thessalonique. (Actes 16:6–17:1) Kan bann Juifs inn monte enn émeute, bann frères Thessaloniciens inn insisté pou ki Paul al Bérée, ki ti trouve apépré 65 kilomètres pli loin. Paul ti’nn réussi dans so ministère à Bérée mais bann Juifs ti’nn vini ek ti’nn provoque bann la-foules. Alors, “bann frères inn faire Paul sorti vite pou al ziska la mer,” ek “bann ki ti pé conduire Paul inn amène li ziska Athènes.” (Actes 17:5-15) Apparemment, certain ki ti’nn fek converti ti disposé pou marche 40 kilomètres ziska la Mer Égée, paye zot voyage par bateau, ek voyagé environ 500 kilomètres en mer. Enn voyage coumsa ti kapav dangereux, mais bann frères ti accepté pou faire sa, ek sa ti permette zot passe plus lé-temps avec l’apôtre Paul ki ti enn représentant Bondié.
17. Ki nous kapav comprend pli clairement enn fois ki nou’nn saisi ki distance éna entre Milet ek Éphèse?
17 Pendant so troisième voyage (la ligne vert lor map), Paul ti arrive dans Port Milet. Li ti envoye appelle bann anciens congrégation Éphèse ki ti à enn distance apépré 50 kilomètres. Mazinn sa bann anciens-la ki ti laisse tou séki zot ti pé faire pou al joinde Paul. Sûrement lor la route, zot ti pé koz avec l’enthousiasme lor sa réunion ki ti pou éna-la. Après ki zot inn réuni avec Paul ek ki zot inn tann li prié, “zot inn verse enn quantité larmes, ek zot inn maye li-cou Paul ek zot inn embrasse li avec tendresse.” Après, “zot inn conduire li ziska bateau” pou li al Jérusalem. (Actes 20:14-38) Sûrement zot ti pou éna beaucoup pou réfléchi ek pou kozé kan zot ti lor chemin pou retourne Éphèse. Eski ou pa impressionné par l’amour ek l’estime ki zot inn montré kan zot inn marche tou sa distances-la pou ki zot kapav reste ensemble avec enn serviteur itinérant ki ti kapav instruire zot ek encourage zot? Eski ou trouve enn kitsoz ladan ki ou kapav appliqué dans ou la-vie ek dans ou façon pensée?
Aprann Konn Sa Pays-La ek Séki Pé Atann Nous
18. Ki nous bizin décidé pou faire en rapport avec bann l’endroits ki mentionné dans la Bible?
18 Bann l’exemples ki nous finn fek mentionné montré l’importance pou nous konn bien bann pays ki Bondié ti donne bann Israélites ek so bann regions ki souvent nous joinde dans bann récits Biblique. (Ek nous kapav élargi nou vision mental pou ki nous aprann aussi concernant bann pays voisin, ki mentionné dans bann récits la-Bible.) À mesure ki nous augmente nou connaissance ek nou compréhension de la Terre Promise en particulier, nous kapav rappelle enn condition bien important ki bann Israélites ti bizin rempli pou zot rentre dans pays “du lait ek du miel” ek profite sa pays-la. Eh bien, zot ti bizin éna la crainte pou Jéhovah ek garde so bann commandements.—Deutéronome 6:1, 2; 27:3.
19. Ki deux paradis mérité ki nous contigne accorde zot nou l’attention?
19 Pareillement zordi, nous bizin faire nou part, nous bizin éna la crainte pou Jéhovah ek contigne suive so bann commandements. Kan nous faire sa, nous pou contribué pou faire sa paradis spirituel-la vinn pli joli. Oui, nous contribué pou développe le paradis spirituel ki existé zordi dans la congrégation Chrétienne partout dans le monde. De plus en plus nous pou konn so bann caractéristiques ek bénédictions. Ek nous koné ki nous pou gagne encore plus bénédictions. Josué ti faire bann Israélites traverse le Jourdain ek ti conduire zot dans enn pays fertile ki ti pou satisfaire tou zot désirs. Nous, asterla, nous éna bann bon raisons pou atann avec impatience ek confiance le Paradis terrestre, le bon pays ki devant nous.
Eski Ou Rappelle?
• Kifer nous bizin éna désir pou augmente nou connaissance ek nou compréhension lor bann pays ki mentionné dans la Bible?
• Ki détail concernant géographie enn l’endroit, ki’nn examiné dans sa l’article-la, inn aide ou en particulier?
• À mesure ki ou finn aprann plus concernant géographie bann l’endroits ki mentionné dans enn certain récit, ki leçon certainement ou’nn tiré?
[Encadré/Zimage lor page 14]
“Voyez le bon pays”
À l’occasion bann l’assemblées district 2003 ek 2004, bann Témoins de Jéhovah ti content pou recevoir brochure “Voyez le bon pays.” Sa nouveau publication-la, disponible dans environ 80 langues, ek li rempli avec bann maps ek bann tableaux en couleur ki montré bien bann différents l’endroits ki mentionné dans la Bible, surtout la Terre Promise dans différents l’époques.
Sa l’article-la faire référence avec bann maps spécifique ki nous kapav trouvé lor bann pages ki zot numéro écrire en caractères gras, couma par exemple [15]. Si ou éna sa nouveau brochure-la, passe inpé lé-temps pou ou familiarise-ou avec so bann caractéristiques particulier ki kapav aide ou pou augmente ou connaissance ek ou compréhension lor Parole Bondié.
(1) Beaucoup maps éna aussi enn légende (enn note enba ou-bien à côté) ou-soit enn l’encadré ki explique bann symboles ek signes ki éna lor map-la [18]. (2) La plupart bann maps éna enn échelle ki permette calcule distance en miles ek en kilomètres pou ki nous kapav saisi bien grandeur ou-soit distance ki éna [26]. (3) Normalement éna enn flèche qui pointe vers le nord, séki permette pou suive bann directions [19]. (4) Souvent éna différents couleurs lor bann map parski zot indique bann différent hauteurs [12]. (5) Dans bord bann maps, éna bann lettres/chiffres ki permette ou situé enn grillage (carré) ki ou kapav servi pou retrouve bann la-villes ou-soit bann noms [23]. (6) Dans l’index noms bann l’endroits ki lor deux pages [34-5], ou kapav trouve numéro page en caractères gras, ek en plus souvent, grille (carré) kot l’endroit-la situé, par exemple E2. Après ki ou’nn servi sa bann guides-la dé-trois fois, ou kapav étonné couma zot vraiment enn grand l’aide pou ou augmente ou connaissance ek approfondi ou compréhension lor la Bible.
[Tableau/Map lor page 16, 17]
RÉGIONS NATURELLES
(Guette publication)
A. Littoral de la Grande Mer
B. Plaines à l’ouest du Jourdain
1. Plaine d’Asher
2. Bande côtière de Dor
3. Terrains de pâture du Sharôn
4. Plaine de Philistie
5. Vallée centrale est-ouest
a. Plaine de Meguiddo
b. Basse plaine de Yizréel
C. Montagnes à l’ouest du Jourdain
1. Collines de Galilée
2. Collines du Carmel
3. Collines de Samarie
4. Shéphéla (bann ti-collines)
5. Région montagneuse de Juda
6. Désert de Juda
7. Négueb
8. Désert de Parân
D. Araba (Rift Valley)
1. Bassin de Houlé
2. Région de la mer de Galilée
3. Vallée du Jourdain
4. Mer Salée (Mer Morte)
5. Araba (au sud la Mer Salée)
E. Montagnes/Plateaux à l’est du Jourdain
1. Bashân
2. Guiléad
3. Ammôn et Moab
4. Plateau montagneux d’Édom
F. Montagnes du Liban
[Map]
Mt. Hermôn
Moré
Abel-Mehola
Soukkoth
Yogbeha
Béthel
Guilgal
Guibéôn
Jérusalem
Hébrôn
Gaza
Béer-Shéba
Sodome?
Qadesh
[Map/Zimage, page 15]
(Guette publication)
CANAAN
Meguiddo
GUILÉAD
Dothân
Shekèm
Béthel (Louz)
Aï
Jérusalem (Salem)
Bethléhem (Ephrath)
Mamré
Hébrôn (Makpéla)
Guérar
Béer-Shéba
Sodome?
NÉGUEB
Rehoboth?
[Montagne]
Moria
[Étendue de l’eau]
Mer salée
[Rivière]
Jourdain
[Zimage]
Abraham ti traverse le pays
[Map lor page 18]
(Guette publication)
Troas
SAMOTHRACE
Néapolis
Philippes
Amphipolis
Thessalonique
Bérée
Athènes
Corinthe
Ephèse
Milet
RHODES