Eski ou bann zenfant inn pré?
1. Kifer eski bann zenfant ki al lekol bizin prepare zot bien?
1 Pena doute ki ou bann zenfant konn bann difficulté ek pression dan lekol. Zot gagne aussi bann l’occasion “pou rann temoignage lor la verité.” (Jean 18:37) Eski zot inn prepare-zot pou sa?
2. Ki ou bann zenfant bizin koné pou ki zot pré pou faire face ar bann probleme?
2 Eski ou bann zenfant comprend bien ki sa impliké pou prend part dan bann ceremonie pou fête national ek bann fête païen, ek kifer li pa bon ki zot participe ladan? Eski zot pré pou faire face ar pression ki zot pou gagné en rapport avek bann grand l’etude, ena enn ti-copain, ek prend lalkol ou-soit la drogue? Eski zot pou zis dire ki zot religion defann zot pou faire sa, ou-soit zot koné couma pou explik zot bann croyance?—1 Pierre 3:15.
3. Couma eski bann parent kapav servi zot soirée pou l’adoration en famille pou prepare zot bann zenfant?
3 Servi soirée pou l’adoration en famille: Pena doute ki a mesure ki ou zenfant gagne bann probleme dan lekol, ou pou gagne bann conversation avek li. Si ou faire enn zeffort special pou examine bann probleme avant mem ki sa arrivé, sa pou donne ou zenfant confiance. Kifer ou pa servi certain soirée pou l’adoration en famille pou faire sa? Ou kapav demann ou zenfant ki kitsoz ki faire li gagne plus tracas dan lekol. Kitfois asterla ki li pli grand ek ki li pli comprend, ou kapav ré-examine bann sujet lor ki ou finn kozé avant. (Ps. 119:95) Ou kapav faire bann demonstration kot ou joué role enn professeur, directeur, ou-soit enn camarade lekol. Montré ou zenfant couma servi la Bible ek aussi bann lezot zouti couma livre Comment raisonner ek livre Les jeunes s’interrogent, pou reponn. Enn parent ti servi bann demonstration pou prepare so bann zenfant pou zot koz avek zot bann nouveau professeur chaque l’année kan lekol commencé ek faire zot koné ki zot bann Témoins de Jéhovah.—La Tour de Garde 15 décembre 2010, page 3-5, en français.
4. Ki bann parent ki sage pou faire?
4 Bann difficulté ki bann jeune chretien bizin faire face pendant bann dernier jour pé vinn de plus en plus “difficile pou supporté.” (2 Tim. 3:1) Bann parent ki sage pou essaye aide zot zenfant pou prepare zot pou faire face ar sa bann probleme-la. (Prov. 22:3) Alors, faire tou seki ou kapav pou aide ou bann zenfant pou prepare zot.