Kontign Progrese Antan ki Proklamater
1. Sit bann lexanp dan premie siek ki montre ki nou bizin kontign progrese antan ki proklamater.
1 Bann Kretien bizin kontign fer zefor pou vinn bann meyer proklamater. Se akoz sa ki Zezi ti donn so bann disip formasion pou ki sa ed zot amelior zot bann kapasite. (Lik 9:1-5; 10:1-11) Se akoz sa osi ki Akila ek Prisil ti amenn Apolos kot zot ek ‘ti ansegn li sime Bondie dan enn fason pli exakt.’ (Zist. 18:24-26) Pou sa mem rezon-la, Pol ti ankouraz Timote, enn evanzelizater ki ti ena boukou lexperyans, pou kontign fer zefor pou amelior so lansegnman pou ki “tou dimounn . . . trouv” so progre. (1 Tim. 4:13-15) Malgre komie letan nou pe travay kouma esklav pou Lesegner, nou bizin kontign amelior nou bann kapasite pou prese.
2. Kouma nou kapav aprann avek lezot?
2 Aprann Avek Lezot: Enn fason pou amelior nou kapasite se kan nou aprann avek lezot. (Prov. 27:17) Alor, ekout bien kan lezot proklamater pe prese. Demann bann proklamater efikas bann sigzesion presi, ek ekout bien seki zot dir. (Prov. 1:5) Eski to pa tro kone kouma pou fer enn vizit, koumans enn letid, ouswa partisip dan lezot laspe to minister? Pran linisiativ, ek al demann to sirveyan group ouswa enn proklamater ki ena lexperyans pou form twa. Pa bliye osi ki lespri sin Zeova kapav amelior nou bann kapasite, alor demann Li so lespri sin regilierman dan lapriyer.—Lik 11:13.
3. Kouma nou bizin reazir si nou gagn enn sigzesion ki kitfwa nou pa’nn demande?
3 Si to gagn enn sigzesion pou amelior tomem, pa bizin to ofanse mem si to pa’nn demann sa sigzesion-la. (Ekle. 7:9) Parey kouma Apolos, aksepte sa led-la avek limilite ek rekonesans. Kan nou fer sa, nou montre ki nou ena sazes.—Prov. 12:15.
4. Ki pli bon rezon Zezi ti done pou nou progrese antan ki proklamater?
4 Nou Progre Glorifie Bondie: Pou ankouraz so bann disip pou progrese dan zot minister, Zezi ti servi enn lexanp. Li ti konpar limem ar enn pie rezin ek so bann disip ki ena lesperans pou al dan lesiel ar bann brans. Li ti dir ki so Papa netway tou brans ki raport frwi “pou ki zot donn ankor plis” frwi. (Zan 15:2) Parey kouma proprieter enn karo rezin anvi ki so bann brans raport pli boukou frwi, Zeova osi anvi ki nou kontign ogmant nou kapasite pou prodir “frwi nou lalev.” (Ebre 13:15, NW) Ki bon rezilta ena kan nou fer progre antan ki enn proklamater? Zezi ti dir: “Mo Papa glorifie, ler zot raport boukou fri.”—Zan 15:8.