Vinn enn proclamateur ki progressé
1 Nou Papa ki dan le ciel content kan so bann serviteur faire bann progré spirituel. Sa impliké ki zot progressé pou vinn bann proclamateur la bonne nouvelle ki mur ek efficace. Paul ti encourage Timothée, ki ti enn surveillant, pou contigné faire zeffort pou ki lezot kapav trouve bien so bann progré. (1 Tim. 4:13, 15) Nou tou bizin faire zeffort pou ameliore qualité nou ministere, mem bann proclamateur ki ena l’experience.
2 Fixé bann l’objectif personnel: Pou nou faire progré, nou bizin fixé bann l’objectif personnel. Ki bann l’objectif nou kapav fixé? Nou kapav essaye vinn pli efficace pou servi la Bible, nou l’epée spirituel. (Éph. 6:17) Li possible ki ena enn l’aspect nou ministere ki nou bizin amelioré, par exemple, rann temoignage dan la rue, par telephone, ou-soit dan bann l’endroit commercial. Kitfois nou kapav faire zeffort pou faire bann visite ki plus efficace. Enn lot bon l’objectif ki nou kapav fixé, c’est pou ameliore nou capacité pou commence ek conduire bann l’etude la Bible.
3 Bann disposition ki pou aide nou: Bann reunion congregation, surtout Lekol ministere theocratik ek reunion service finn faire pou aide nou vinn bann pli bon proclamateur la bonne nouvelle. Plus nou faire zeffort pou prepare ek assisté sa bann reunion-la ek pou applik bann suggestion ki nou gagné, plus nou pou gagne bann bienfait. Nou pena okenn doute lor la.—2 Cor. 9:6.
4 Nou bizin aussi aide sakenn nou camarade pou faire progré. (Prov. 27:17) Kan nou ecoute bien presentation bann lezot proclamateur avek ki nou pé travail dan predication, sa pou aide nou amelioré. En plus, nou surveillant l’etude de livre kapav faire bann l’arrangement pou ki nou gagne enn l’aide personnel. Li vrai-mem enn benediction pou gagne enn predicateur ki ena l’experience, enn pionnier ou-soit enn proclamateur pou aide nou vinn pli efficace ek gagne enn grand la-joie dan nou ministere! Eski ena enn nouveau proclamateur dan ou l’etude de livre? Kitfois ou kapav prend l’initiative pou invite li travail avek ou.
5 Travail pli important ki pé faire zordi, c’est la predication. Kan nou pé offert Jéhovah nou “sacrifice louange,” nou envie donne Li nou best. (Héb. 13:15) Si nou faire tou seki nou kapav pou contigne progressé dan nou ministere, nou pou vinn bann zouvrier “ki pena nanyin pou honté, ki konn servi parole la verité couma bizin.”—2 Tim. 2:15.