Eski To Rapel?

Eski to finn lir bann nimero Latour Degard pou sa lane-la? Alor, gete si to kapav reponn sa bann kestion-la:

Ki bann bienfe to pou gagne si to pran letan pou pans Zeova, pou koz avek Li, ek pou ekout Li?

Nou pou pran bann pli bon desizion, nou pou vinn bann pli bon ansegnan, nou lafwa pou vinn pli for, ek nou lamour pou Zeova pou grandi.​—w22.01, p. 30-31.

Kouma sa kapav ed nou si nou fer konfians Zeova ek bann frer ki pran latet dan lorganizasion?

Aster-la, se moman kot nou bizin pa dout fason ki Zeova fer bann kitsoz ek desizion ki bann ansien pran. Lerla, pandan gran detres, nou pa pou tarde pou obeir si nou gagn bann instriksion ki paret drol.​—w22.02, p. 4-6.

Kifer enn anz ti dir Zakari: “Fil-a-plon dan lame [gouverner bann Zwif] Zorobabel”? (Zaka. 4:8-10)

Sa vizion-la ti fer bann Zwif konpran ki, mem si sa nouvo tanp-la ti paret mwin zoli ki tanp Salomon, so konstriksion ti pou fini ek Zeova ti pou aksepte li.​—w22.03, p. 16-17.

Kouma to kapav “enn lexanp . . . par to parol”? (1 Tim. 4:12)

Nou koz avek respe ek bonte dan predikasion, nou sant bann kantik avek tou nou leker, nou reponn souvan dan bann renion, nou koz laverite, nou dir bann kitsoz ki ankouraz lezot, ek nou pa insilte lezot.​—w22.04, p. 6-9.

Kifer sa bebet ki mansione dan Revelasion 13:1, 2 ena bann karakteristik sa kat bebet (gouvernman) ki mansione dan Daniel sapit 7 la?

Bebet dan Revelasion sapit 13 pa reprezant enn sel gouvernman, kouma par exanp Rom. Okontrer, li reprezant tou bann gouvernman ki’nn diriz bann imin ziska zordi.​—w22.05, p. 9.

Kouma nou kapav montre ki nou ena konfians dan lazistis Bondie?

Si enn kikenn insilte nou, ofans nou, ouswa fer enn pese kont nou, nou pa pou res ankoler ar li ek nou pa pou gard li dan leker. Nou pou les tou dan lame Zeova. Li pou repar tou bann ditor ki’nn arive akoz pese.​—w22.06, p. 10-11.

Ki kitsoz enn frer ki pe fer enn lapriyer pandan renion bizin rapel?

Fode pa ki li servi lapriyer pou donn lasanble bann konsey ouswa pou fer bann lanons. Fode pa ki li koz tro boukou, sirtou dan lapriyer ki fer dan koumansman renion. (Mat. 6:7)​—w22.07, p. 24-25.

Dan ki fason “bann ki finn fer lemal pou resisite pou enn zizman”? (Zan 5:29)

Zot pa pou gagn enn zizman negatif dapre seki zot ti fer avan zot lamor. Zot pou zize dapre seki zot pou fer apre zot rezireksion.​—w22.09, p. 18.

Ki kitsoz J. F. Rutherford ti dir dan enn lasanble an Septam 1922?

Dan enn lasanble dan Cedar Point, Ohio, dan Letazini, li ti dir: “Lerwa pe regne! Zot ena responsabilite pou anons sa tou dimounn. Alor, proklam, proklam, proklam Lerwa ek so Rwayom!”​—w22.10, p. 3-5.

Izai sapit 30 koz lor trwa kitsoz ki Bondie fer pou ed nou pou andire. Ki sa trwa kitsoz-la sa?

Sa sapit-la montre nou ki (1) Li ekout nou bien ek Li reponn nou bann lapriyer, (2) Li gid nou, ek (3) Li beni nou aster-la ek Li pou osi beni nou dan lavenir.​—w22.11, p. 9.

Kifer nou kapav dir ki bann parol Psom 37:10, 11, ek 29 inn realize dan lepase ek ki sa pou realize dan lavenir?

David ti pe koz lor zoli lavi ki lepep ti pou ena dan Izrael kan Salomon ti pou regne. Zezi ti koz lor enn paradi ki pou ena dan lavenir ek li’nn sit verse 11. (Mat. 5:5; Lik 23:43)​—w22.12, p. 8-10, 14.