Ki Kitsoz Kapav Ed Twa pou Adapte dan To Nouvo Lasanble?

Nicolas ek Céline ti gagn enn lot difikilte. Apre ki zot ti aksepte enn nouvo lafektasion avek biro nasional Lafrans, zot ti demenaze pou al dan enn nouvo lasanble. Zot dir: “Dan koumansman nou ti extra kontan, me apre, sa ti vinn difisil parski nou bann kamarad ti pe mank nou. Anplis, nou pa ti ankor konn bien nou bann frer ek ser dan nou nouvo lasanble.”a Akoz bann difikilte ki ena, ki to kapav fer pou ki sa pas bien kan to al dan enn nouvo lasanble? Ki lezot kapav fer pou ed twa? Ek dan to nouvo lasanble, kouma sakenn kapav ankouraz zot kamarad?

KAT PRINSIP KI KAPAV ED TWA POU ADAPTE

1. Kont lor Zeova. (Ps. 37:5, NW) Kazumi, ki res dan Zapon, ti form parti dan enn lasanble pandan 20 an. Me kan so mari ti gagn enn lot travay, zot ti bizin sanz lasanble. Kouma li ti “met tou dan lame Zeova”? Li dir: “Plizir fwa mo ti devid mo leker ar Zeova pou dir Li ki kantite mo ti panike, mo ti pe santi mwa tousel ek strese. Me sak fwa ki mo ti fer sa, Li ti donn mwa lafors ki mo ti bizin.”

Kouma to kapav kont ankor plis lor Zeova? Parey kouma enn plant bizin delo ek lezot kitsoz pou grandi, nou bizin nouri nou lafwa pou ki li vinn pli for. Nicolas, ki nou ti mansione avan, ti trouve ki lexanp bann zom ki ti fer boukou sakrifis pou fer volonte Zeova, kouma Abraam, Zezi, ek Pol, ti fer so konfians dan Zeova vinn ankor pli for. Si to etidie Labib regilierman, sa pou ed twa pou adapte ar ninport ki sanzman ki ena dan to lavi. To pou kapav osi aprann boukou kitsoz ek lerla servi sa pou ankouraz lezot dan to nouvo lasanble.

2. Pa konpare. (Ekle. 7:10) Jules ti bizin adapte ar enn diferan kiltir kan li ti sorti Benin pou al Lamerik. Li dir: “Mo ti ena linpresion ki sak fwa mo ti zwenn enn nouvo dimounn mo ti bizin rakonte kisann-la mo ete.” Jules ti koumans elwagn li ar bann frer ek ser dan so lasanble parski sa ti diferan ar so ansien lasanble. Me apre ki li ti aprann konn so bann frer ek ser pli bien, li ti sanz so fason panse. Li dir: “Aster-la, mo konpran ki ninport kotsa nou sorti, nou tou nou parey. Nou zis koze ek azir dan diferan fason. Akoz sa li inportan ki nou aksepte bann dimounn kouma zot ete.” Alor, pa konpar to nouvo lasanble ar to ansien lasanble. Enn pionie ki apel Anne-Lise dir: “Mo’nn demenaze parski mo anvi dekouver bann nouvo kitsoz, pa parski mo ti anvi ki bann kitsoz res parey kouma avan.”

Bann ansien osi bizin evit konpar zot nouvo lasanble ar zot ansien lasanble. Zis parski bann frer fer bann kitsoz dan enn lot fason, pa vedir ki li pa bon. Alor, avan ki to fer bann sizesion, aprann konn sitiasion ki ena dan sa landrwa-la. (Ekle. 3:1, 7b) Li pli bon ki to donn enn bon lexanp olie ki to inpoz to lopinion lor zot.—2 Kor. 1:24.

3. Res bien okipe. (Fil. 1:27) Demenazman pran boukou letan ek lenerzi, me li bien inportan pou asiste bann renion depi koumansman, an prezansiel si posib. Anplis, bann frer ek ser dan to nouvo lasanble bizin trouv twa souvan pou ki zot kapav santi zot pros ar twa ek pou ki zot kapav ed twa. Lucinda ek so de tifi ti demenaze pou al dan enn gran lavil dan Sid Afrik. Li rakonte: “Mo bann kamarad ti konsey mwa pou res bien okipe dan lasanble, pou pres ansam ar lezot, ek pou reponn dan bann renion. Nou ti osi dir bann frer ki zot ti kapav servi nou lakaz pou fer bann renion pou predikasion.”

Kan to travay ansam avek to bann frer ek ser dan to nouvo lasanble, sa pou ede pou ki zot kapav ankouraz sakenn zot kamarad. Bann ansien ti ankouraz Anne-Lise, ki nou ti mansione avan, pou esey pres avek tou dimounn. Ki rezilta li ti gagne? Li dir: “Vit-vit mo’nn konpran ki se enn bon fason pou ki mo konpran ki mo ena mo plas dan sa lasanble-la.” Enn lot kitsoz ki kapav ed twa, se kan to port twa volonter pou fer bann kitsoz kouma netwayaz ek mintenans Lasal Renion. Sa pou montre bann frer ek ser ki pou twa se to lasanble. Plis to pas letan dan sa bann aktivite-la, pli vit to bann frer ek ser pou santi zot alez avek twa, ek to pou santi ki se to fami.

4. Fer bann nouvo kamarad. (2 Kor. 6:11-13) Si nou interes nou ar lezot, li pou pli fasil pou nou vinn zot kamarad. Alor, fer bann laranzman pou ki to vinn Lasal inpe avan renion ek res inpe apre renion, koumsa to pou kapav ena letan pou koz avek zot. To kapav osi fer zefor pou konn zot nom. Kan to rapel nom to bann frer ek ser ek to amikal, zot pou anvi konn plis lor twa ek to pou fer bann nouvo kamarad.

Olie ki to pretann ki to diferan pou ki lezot aksepte twa, les to bann nouvo kamarad dekouver ki kalite dimounn to ete vremem. To kapav fer parey kouma Lucinda ti fer. Li dir: “Aster-la, nou ena bann bon kamarad parski nou ti fer zefor pou invit zot kot nou.”

“AKEYIR SAKENN NOU KAMARAD”

Rant dan enn Lasal Renion kot nou pa konn personn kapav fer per pou sertin. Alor, kouma to kapav fer bann frer ek ser ki fek vinn dan to lasanble santi zot alez? Kouma lapot Pol dir, anou “akeyir sakenn [nou] kamarad parey kouma Kris osi inn akeyir [nou].” (Rom. 15:7) Bann ansien kapav swiv lexanp Zezi kan zot akeyir bien bann nouvo. (Get lankadre “Seki Kapav Ed Twa kan To Demenaze.”) Selman, nou tou dan lasanble mem bann zanfan bizin fer zot par pou ki bann nouvo santi zot alez dan lasanble.

Nou kapav montre ki nou pe akeyir lezot kan nou invit zot kot nou, me osi kan nou ed zot dan enn fason pratik. Par exanp, enn ser ti ed enn lot ser ki ti fek vinn dan so lasanble pou vizit landrwa ek ti explik li kouma li kapav fer pou pran transpor piblik. Sa ti bien tous sa nouvo ser-la, ek sa ti ed li pou santi li alez dan sa nouvo landrwa-la.

ENN LOKAZION POU GRANDI

Kan enn sotrel pe grandi, li sanz so lapo plizir fwa avan ki li kapav servi so lezel pou anvole. Dan mem fason, kan nou sanz lasanble nou bizin sanz nou fason panse ek tir bann panse negatif ki nou kapav ena lor nou nouvo lasanble. Koumsa nou pou kapav kontign nou servis pou Zeova parey kouma sa sotrel-la kapav anvole. Nicolas ek Céline, ki nou ti mansione lao, dir: “Demenazman se enn bon formasion. Akoz nou ti bizin adapte avek bann nouvo dimounn ek enn nouvo fason viv, sa ti obliz nou pou devlop bann nouvo kalite.” Jean-Charles, ki nou ti koze dan koumansman sa lartik-la, rakonte kouma so fami finn gagn bann bienfe. Li dir: “Sa bann sanzman-la finn ed nou bann zanfan pou ena plis matirite ek pou ena enn pli bon lamitie avek Zeova. Apre zis de-trwa mwa, nou tifi ti koumans fer devwar dan renion lasemenn ek nou garson ti vinn enn proklamater.”

Me ki to pou fer si akoz to sitiasion to pa kapav demenaze, par exanp, al ede kot bizin plis proklamater? To kapav fer to ansien lasanble paret nouvo kan to met an pratik sertin sizesion ki mansione dan sa lartik-la. Amezir ki to kontign kont lor Zeova, kontign res okipe dan to lasanble kan to fer enn program pou pres avek diferan frer ek ser dan to lasanble. To kapav fer bann nouvo kamarad ouswa to kapav vinn enn pli bon kamarad pou bann ki to deza kone. Kitfwa to kapav fer zefor pou ed enn kikenn ki nouvo ouswa enn kikenn ki bizin led dan enn fason pratik. Kan to ed lezot, sa pou ed twa ena enn pli bon lamitie avek Zeova, parski lamour se enn kalite bien inportan pou bann vre Kretien. (Zan 13:35) Nou kapav sir ki “se bann sakrifis koumsa ki Bondie bien kontan.”—Ebre 13:16.

Malgre bann difikilte, boukou Kretien finn kapav gagn lazwa kan zot inn al dan enn nouvo lasanble, ek twa osi to pou kapav! Anne-Lise dir: “Kan mo’nn sanz lasanble, sa finn permet mwa pou fer pli boukou kamarad.” Kazumi ki’nn demenaze dir: “Kan to bouz dan enn nouvo lasanble, to pou trouve kouma Zeova pou ed twa dan enn fason ki zame to pa ti pou atann.” Ek ki nou kapav dir lor Jules? Li dir: “Bann nouvo kamarad ki mo’nn fer inn permet mwa santi ki mo ena mo plas parmi zot. Aster-la ki mo santi mwa alez laba, mo pa pou anvi kit sa nouvo lasanble-la.”