Kestion Bann Lekter

Ekrivin Proverb 30:18, 19 dir ki li ‘pa arive konpran fason ki enn zom fer ar enn zennfi.’ Ki li ti pe rod dir?

Boukou dimounn inn esey konpran seki sa fraz-la vedir, ek parmi zot ena mem bann dimounn ki bann exper lor Labib. Dan Labib Tradiksion Lemond Nouvo, sa verse-la dir: “Ena trwa kitsoz ki mo pa arive konpran, ek kat kitsoz ki mo pa konpran: Fason ki enn leg anvole dan lesiel, fason ki enn serpan lor enn ros, fason ki enn bato lor lamer, ek fason ki enn zom fer ar enn zennfi.”—Prov. 30:18, 19.

Avan, nou ti panse ki sa lexpresion-la ti pe dekrir enn move kitsoz. Bann lezot verse dan sa sapit-la dekrir bann move kitsoz ki zame dir “ase.” (Prov. 30:15, 16) Ek verse 20 koz lor “enn fam infidel,” ki dir ki li “pa’nn fer nanye demal.” Akoz sa, nou ti panse ki lexpresion “fason ki enn zom fer ar enn zennfi,” ti pe dekrir enn move kitsoz, kitfwa enn zenom malonet ki ti pe esey anbet enn zenn tifi pou gagn bann relasion sexiel avek li. Anplis, parey kouma enn leg dan lesiel, enn serpan lor enn ros, ouswa enn bato lor lamer, ki pa les okenn tras zot pasaz, sa zom-la kitfwa ti pe fer sa san ki lezot kone.

Me aster-la, nou ena bann bon rezon pou krwar ki sa lexpresion-la vedir enn kitsoz ki bon. Kifer? Parski sa ekrivin-la ti pe dekrir bann kitsoz ki ti inpresionn li.

Bann maniskri Ebre osi montre ki sa verse-la pe koz lor enn kitsoz ki bon. Dapre enn diksioner ki explik bann verse ki ena dan Lekritir Ebre, mo Ebre pou lexpresion “pa arive konpran,” ki trouv dan Proverb 30:18, “pe dekrir enn kitsoz ki enn kikenn . . . trouv extraordiner ouswa enn kitsoz ki paret inposib.”

Crawford H. Toy, enn profeser dan liniversite Harvard dan Letazini, explike ki sa lexpresion-la pa pe dekrir enn move kitsoz. Li dir: “Sa ekrivin-la ti pe esey dekrir ki kantite sa bann kitsoz-la zot extraordiner.”

Alor, nou ena bann bon rezon pou krwar ki Proverb 30:18, 19 pe dekrir bann kitsoz ki vremem extraordiner, bann kitsoz ki nou “pa arive konpran.” Parey kouma sa ekrivin Labib la, nou inpresione kan nou mazine kouma enn leg anvole bien ot dan lesiel, kouma enn serpan kapav ranpe vit-vit lor enn ros mem si li pena lapat, kouma enn gro bato avek bann pwa bien lour lor la kapav vwayaze lor lamer, ek kouma enn zenom ek enn zennfi kapav tom amoure ek ena enn zoli lavi ansam.