Servi To Limazinasion kan To Lir Bann Zistwar Biblik

Labib rakont boukou zistwar ki’nn arive dan lepase, ek zot kapav ansegn nou bann leson bien inportan. Si nou servi nou limazinasion kan nou lir sa bann zistwar-la, nou pou konpran zot pli bien ek nou pou gagn pli boukou bienfe. Anou get trwa kitsoz ki kapav ed nou pou fer sa.

• Lir zistwar-la for. Kan to lir zistwar-la for, sa kapav ed twa pou trouv pli bien seki’nn arive. Kan to lir enn zistwar ki ena dan Labib an fami, to kapav fer sak manb to fami lir ek amenn rol enn personaz ki ena dan zistwar-la. Koumsa, zistwar-la pou vinn pli vivan pou zot.

• Esey konpran seki’nn arive. Esey konpran santiman ek seki pe pase dan latet sak personaz. Par exanp, demann tomem: ‘Kifer eski sa personaz-la inn koz ouswa inn azir koumsa? Ki mo ti pou panse ek resanti si mo ti dan so plas?’

• Fer enn desin. Kan to desinn bann zistwar ki ena dan Labib, sa kapav ed twa pou servi to limazinasion ek pou rapel zistwar-la pli bien. Pa ezite fer bann desin, mem si to desin pa zoli-zoli.