1. Eski Se Bondie Ki Responsab Nou Bann Soufrans?

Kifer Repons sa Kestion-la Inportan?

Boukou dimounn rezet Bondie parski zot krwar ki se akoz Li ki ena bann soufrans.

Reflesi lor La

Ki li dan enn fason direk ouswa indirek, boukou sef relizie finn ansegne ki se Bondie ki responsab nou bann soufrans. Par exanp, sertin dir sa bann kitsoz-la:

• Bann katastrof natirel se enn pinision Bondie.

• Bann zanfan mor parski Bondie bizin pli boukou anz dan lesiel.

• Bondie pran par enn kan pandan lager, ek akoz sa boukou dimounn soufer.

Me eski li posib ki seki bann sef relizie pe ansegne lor Bondie, li fos? Ek si Bondie inn rezet zot, eski nou ankor kapav fer zot konfians?

Seki Labib Dir

Se pa Bondie ki responsab nou bann soufrans.

Si Li ti responsab, sa pa ti pou an-akor avek bann kalite ki Labib dir Li ena. Par exanp:

“Dan tou seki [Bondie] fer ena lazistis. . . . Li zis ek drwat.”​—DETERONOM 32:4.

“Li inposib pou mazine ki vre Bondie pou fer lemal, ki Tou-Pwisan pou fer seki pa bon!”​—ZOB 34:10.

“Tou-Pwisan pa manipil lazistis.”​—ZOB 34:12.

Bondie rezet bann relizion ki koz manti lor Li.

Parmi ena bann relizion ki ansegne ki se Bondie ki responsab nou bann soufrans, ek osi bann ki inplike dan bann lager ek violans.

“Bann profet pe predir bann foste lor mo [Bondie so] nom. Mo pa’nn avoy zot ni donn zot lord ni koz ar zot. Enn fos vizion ek . . . manigans ki ena dan zot leker, ala seki bannla pe profetize ar zot.”​—ZEREMI 14:14.

Zezi ti kondann lipokrizi ki ena dan bann relizion.

“Pa tou dimoun ki dir mwa, ‘Segner, Segner’ ki pou rant dan rwayom lesiel, me zis bann ki fer volonte mo papa ki dan lesiel. Zour zizman, pou ena boukou ki pou dir mwa ‘Segner, Segner, lor to nom nou finn azir kouma profet, lor to nom nou finn sas bann move lespri, lor to nom ki nou finn akonpli boukou mirak.’ Lerla li pou dir zot, ‘Zame mo pa finn konn zot; sorti la ale, zot ki komet lemal.’”​—MATIE 7:21-23.