Question 3: Kifer Bondié permette ki mo souffert?
PAPA Ian ti bien content boire. Mem si Ian ti gagne tou seki li ti bizin lor plan materiel, li pa ti gagne l’affection so papa, ek sa ti mank li beaucoup. Ian dire: “Mo pa ti ena beaucoup l’affection pou mo papa, surtout parski li ti boire ek par fason ki li ti traite mo mama.” A mesure ki Ian ti pé grandi, li ti commence ena bann doute si vrai-mem Bondié existé. “Mo ti demann-mo-mem: ‘Si vrai-mem Bondié existé, kifer Li permette ki dimoune souffert?’”
Kifer li normal ki nou pose sa question-la?
Mem si ou pena beaucoup probleme dan ou la vie, surement, parski ou content la justice, ou en colere kan ou trouve bann dimoune innocent souffert. Selman, sa question concernant la souffrance-la touche ou surtout si personnellement ou pé gagne bann l’epreuve pareil couma Ian, ou-soit si enn dimoune ki ou content tombe malade ek mort.
Ki reponse certain dimoune donné?
Certain croire ki Bondié pé permette souffrance pou enseigne nou l’humilité ek compassion. Ena lezot ki pensé ki bann dimoune pé souffert dan sa le monde-la pou bann peché ki zot finn faire dan enn lot la vie dan le passé.
Ki sa bann reponse-la montré?
Bondié pa sensible ar souffrance bann dimoune ek li difficile pou nou content Li parski Li pa interessé ar nou. Bondié Li cruel.
Ki la Bible enseigné?
La Bible dire dan enn fason clair ki Bondié pa responsable souffrance bann dimoune. “Fodé pa ki enn dimoune dan l’epreuve dire, Bondié pé testé moi; parski pa kapav testé Bondié par bann mauvais kitsoz, ek Li pa testé personne dan sa fason-la.” (Jacques 1:13, The Bible in Basic English) En realité, l’idée ki Bondié responsable souffrance bann dimoune, li pa en accord avek fason ki la Bible decrire personnalité Bondié. Kifer?
Enn parmi bann qualité principal ki Bondié ena c’est l’amour. (1 Jean 4:8) Pou mette l’accent lor sa point-la, la Bible decrire Bondié couma enn kikenn ki ena bann sentiment pareil couma enn mama ki prend soin so tibaba. Bondié ti demandé: “Eski enn femme kapav blié so tibaba ki encore pé boire avek li, ek pena pitié pou garson ki sorti dan so ventre? Sa bann femme-la kapav blié, mais moi mo pa pou blié toi.” (Isaïe 49:15) Eski ou pensé ki enn mama ki ena l’amour pou so zenfant pou faire li di-tort? Nou pa kapav mazinn sa. Au contraire, enn parent ki content so zenfant pou faire tou pou soulage so souffrance. Li pareil aussi pou Bondié, Li pa faire bann dimoune innocent souffert.—Genèse 18:25.
Mais kan-mem, bann dimoune innocent pé souffert. Kitfois ou demann ou-mem: ‘Si Bondié prend nou compte ek Li ena tou pouvoir, kifer Li pa tire tou bann kitsoz ki faire dimoune souffert?’
Si Bondié pé permette souffrance contigné zordi c’est parski Li ena bann bon raison. Anou guette enn sel parmi sa bann raison-la: c’est souvent bann dimoune ki faire lezot dimoune souffert. Beaucoup dimoune ki dominere ek brite faire lezot souffert, ek zot pa disposé pou changé. Alors, pou ki Bondié kapav tire enn kitsoz principal ki responsable souffrance, Li pou bizin detruire sa qualité dimoune-la.
L’apotre Pierre ti expliké kifer Bondié pankor detruire sa bann dimoune ki faire le mal-la. Li ti ecrire: “Jéhovah pa tardé pou realise so promesse, couma certain dimoune pensé, mais Li ena patience avek zot parski Li pa envie ki personne mort, mais Li envie ki tou dimoune repenti.” (2 Pierre 3:9) Patience Jéhovah montré ki quantité l’amour ek misericorde Li ena.
Mais bientot Jéhovah pou agir. Li pou “rann tribulation bann ki pé faire [bann innocent] passe par tribulation.” Bann dimoune ki faire lezot souffert dan enn fason injuste pou “konn enn jugement ek zot punition, c’est enn destruction eternel.”—2 Thessaloniciens 1:6-9.
Ian, ki nou ti mentionné au commencement, ti gagne bann bon reponse pou so bann question lor souffrance. Seki li ti aprann ti change fason ki li ti considere la vie. Ou kapav lire so l’experience lor page 13 dan La Tour de Garde 1er novembre 2012, en français.