Kifer Li Inportan Nou Kone?
Kifer li inportan kone si vremem ena enn Kreater? Si sa bann prev-la inn konvink ou ki ena enn Bondie Tou-Pwisan, sirman ou pou kontan pou examinn bann prev ki ena dan liv ki Li’nn fer ekrir: Labib. Ek si ou ena konfians dan seki Labib dir, ou pou kapav profit sa bann bienfe-la:
Ou pou plis apresie ou lavi
LABIB DIR: “Depi lesiel [Bondie] avoy lapli, ek bon rekolt, koumsa li finn donn zot manze e fer zot leker kontan.”—Zistwar Bann Apot 14:17.
SEKI SAVEDIR: Tou bann bon kitsoz ki ena dan lanatir, se enn kado nou Kreater. Ou rekonesans pou sa bann kado-la pou grandi ankor plis kan ou pou dekouver ki kantite sa Kikenn ki’nn donn nou tou sa bann kitsoz la, gagn ou traka.
Profit bann bon konsey ki kapav ed nou depi asterla-mem
LABIB DIR: “Alor to pou konpran seki zis, seki drwat ek seki inparsial, sa semin ki amenn ver seki bon la.”—Proverb 2:9.
SEKI SAVEDIR: Antan ki ou Kreater, Bondie kone ki ou bizin pou ki ou ere. Kan ou lir Labib, ou pou aprann boukou kitsoz ki kapav ed ou dan ou lavi.
Gagn repons ou bann kestion
LABIB DIR: “To pou trouv konesans Bondie.”—Proverb 2:5.
SEKI SAVEDIR: Kan ou kone ki ena enn Kreater, sa kapav ed ou gagn repons pou bann kestion inportan, kouma par exanp: Kifer nou lor later? Kifer ena otan soufrans? Ki ariv nou kan nou mor? Ou kapav gagn bann repons bien kler dan Labib.
Enn lespwar pou lavenir
LABIB DIR: “‘Mo konn bien bann panse ki mo ena pou zot,’ se seki Zeova dir: ‘Bann panse ki amenn lape, pa maler, bann panse ki pou donn zot enn lavenir ek enn lespwar.’”—Zeremi 29:11.
SEKI SAVEDIR: Bondie promet ki dan lavenir li pou tir tou mesanste, soufrans, ek mem lamor. Kan nou ena konfians dan bann promes Bondie, nou ena lesperans dan sa kalite lavenir la. Lerla, sa ed nou pou fer fas ar nou bann problem avek kouraz.