Kisannla Bondie?

1, 2. Ki kestion souvan bann dimounn poze?

BANN zanfan poz boukou kestion. Kan ou explik zot enn kitsoz, souvan zot demande: ‘Kifer?’ Ek kan ou esey reponn zot, kitfwa zot pou re-demann ou: ‘Be kifer?’

² Ki nou zenn ouswa vie, nou tou nou poz bann kestion. Bann kestion kouma par exanp: Ki nou pou manze? Ki linz nou pou mete? Ouswa ki nou pou aste? Parfwa nou poz osi bann kestion inportan konsernan lavi ek lavenir. Me kan nou pa satisfe ar bann repons ki nou gagne, kitfwa nou aret rod repons sa bann kestion-la.

3. Kifer boukou dimounn panse ki zot pa pou kapav gagn repons zot bann kestion inportan?

³ Eski Labib reponn bann kestion inportan ki nou poze? Sertin dimounn panse wi, me selman zot trouv Labib tro difisil pou konpran. Dapre zot, se zis bann pret ouswa bann ansegnan ki ena repons sa bann kestion-la. Ek lezot onte pou dir ki zot pa konn repons sa bann kestion-la. Ki ou panse ou?

4, 5. Ki bann kestion inportan ou poz oumem? Kifer ou bizin kontign rod repons sa bann kestion-la?

⁴ Sirman ou anvi gagn repons bann kestion, kouma: Pou ki rezon mo lor later? Ki arive apre lamor? Kouma Bondie ete? Zezi, Ansegnan pli seleb, ti dir: ‘Kontign dimande, e to pou gagne, kontign rode e to pou trouve, kontign tape e laport pou ouver pou twa.’ (Matie 7:7) Pa bes lebra tanki ou pa satisfe ar bann repons ki ou gagne!

⁵ Si ou ‘kontign rode,’ ou pou gagn sa bann repons-la dan Labib. (Proverb 2:1-5) Bann repons-la pa difisil pou konpran. Seki ou pe aprann, pou fer ou gagn plis lazwa depi asterla mem ek pou donn ou enn zoli lesperans pou lavenir. Anou koz lor enn kestion ki boukou dimounn poz zot.

ESKI BONDIE GAGN NOU TRAKA?

6. Kifer sertin dimounn panse ki Bondie pa gagn zot traka mem si zot pe soufer?

⁶ Boukou dimounn panse ki Bondie pa gagn nou traka. Zot dir si Bondie ti gagn nou traka, lemond pa ti pou kouma li ete zordi. Nou trouv lager, laenn, ek lamizer partou. Bann dimounn tom malad, soufer, ek mor. Sertin demann zotmem: ‘Si Bondie gagn nou traka, be kifer Li pa tir tou sa bann soufrans-la?’

7. (a) Kouma bann sef relizie inn ansegn bann dimounn ki Bondie Li san pitie? (b) Kifer nou kapav sir ki se pa Bondie ki fer bann move kitsoz arive?

⁷ Bann sef relizie parfwa fer bann dimounn krwar ki Bondie Li san pitie. Kan enn maler arive, zot dir ki se volonte Bondie. Zot dir ki Li’nn anvi ki sa arive. Kan zot dir sa, zot pe akiz Bondie. Me Labib ansegne ki Bondie zame fer bann move kitsoz. Zak 1:13 (NW) montre ki Bondie pa teste personn par bann move kitsoz. Sa verse-la dir: “Kan enn kikenn dan leprev, fode pa li dir: ‘Bondie pe teste mwa.’ Parski pa kapav teste Bondie par bann move kitsoz, ek Li pa teste personn dan sa fason-la.” Alor, mem si Bondie pa anpes bann move kitsoz arive, se pa Li ki fer sa bann move kitsoz-la. (Lir Zob 34:10, 12.) Anou get enn lexanp.

8, 9. Kifer li pa bon nou akiz Bondie pou bann problem ki nou gagne? Donn enn lexanp.

⁸ Esey mazinn enn gran garson ki res kot so bann paran. So papa bien kontan li ek inn ansegn li kouma pou pran bann bon desizion. Me, sa garson-la rebel kont so papa ek kit lakaz. Li fer bann move kitsoz ek gagn boukou problem. Eski papa-la responsab pou seki’nn ariv so garson parski li pa’nn anpes li kit lakaz? Non! (Lik 15:11-13) Parey kouma sa papa-la, kan bann dimounn inn swazir pou rebele ek pou fer seki move, Bondie pa’nn anpes zot. Alor, kan enn move kitsoz arive, nou bizin rapel ki se pa Bondie ki’nn fer sa. Li pa bon ki nou akiz Bondie.

⁹ Ena enn bon rezon kifer ziska ler Bondie pa’nn aret sa bann move kitsoz-la. Dan Sapit 11, ou pou aprann seki Labib dir lor la. Me ou kapav sir ki Bondie kontan nou ek fode pa nou akiz Li pou bann problem ki nou gagne. Ofet, se zis Li tousel ki kapav regle sa bann problem-la.​—Izai 33:2.

10. Kifer nou kapav sir ki Bondie pou repar tou bann dega ki bann move dimounn inn fer?

¹⁰ Bondie Li sin. (Izai 6:3) Tou seki Li fer li pir, li prop, ek li bon. Alor nou kapav fer Li konfians. Me bann dimounn pa kouma Bondie. Parfwa zot fer bann move kitsoz. Ek mem dirizan pli onet ki kapav ena, pena pouvwar pou repar tou ditor ki bann move dimounn fer. Pena personn ki pwisan kouma Bondie. Li ena kapasite ek Li anvi repar tou bann dega ki bann move dimounn inn fer. Li pou detrir tou bann move dimounn pou touletan.​—Lir Psom 37:9-11.

KI BONDIE RESANTI KAN BANN DIMOUNN SOUFER?

11. Ki Bondie resanti kan Li trouv ou soufer?

¹¹ Ki Bondie resanti kan Li trouv seki pe pase lor later ek seki oumem ou pe bizin andire? Labib ansegne ki Bondie “kontan . . . seki zis.” (Psom 33:5) Bondie kontan kan ena lazistis lor later, pa kan ena linzistis. Li pa kontan kan dimounn soufer. Labib dir ki “so leker ti fermal” kan, dan lepase, Li ti trouv lemond ranpli ar bann move kitsoz. (Zenez 6:5, 6) Bondie pa’nn sanze. (Malaki 3:6) Labib montre ki Bondie vremem gagn nou traka.​—Lir 1 Pier 5:7.

12, 13. (a) Kifer nou kontan bann dimounn ek nou gagn zot traka? Ki nou resanti kan nou trouv bann soufrans ki ena dan lemond? (b) Kifer nou kapav sir ki Bondie pou tir tou soufrans ek linzistis?

¹² Labib dir osi ki Bondie inn kree nou dan so resanblans. (Zenez 1:26) Savedir ki Bondie inn kree nou avek bann zoli kalite ki Li ena. Alor, si ou tris kan ou trouv bann dimounn inosan pe soufer, pena dout ki Bondie pli tris ankor kan Li trouv sa! Kouma nou konn sa?

¹³ Labib ansegn nou ki “Bondie limem lamour.” (1 Zan 4:8) Tou seki Bondie fer, Li fer sa parski Li ena lamour. Alor, nou ena lamour parski Bondie ena lamour. Reflesi lor la: Si ou ti ena pouvwar pou tir tou soufrans ek linzistis ki ena dan lemond, eski ou pa ti pou fer li? Wi ou ti pou fer li. Kifer? Parski ou kontan bann dimounn. Ki nou kapav dir lor Bondie? Li ena kapasite, ek Li kontan nou, alor Li pou tir tou soufrans ek linzistis. Ou kapav sir ki tou bann promes Bondie ki trouv dan koumansman sa liv-la pou realize! Me pou ki ou ena konfians dan sa bann promes-la, ou bizin konn plis lor Bondie.

BONDIE ANVI KI OU KONN LI

14. Kouma Bondie apele, ek kouma nou kone ki nou bizin servi so nom?

¹⁴ Si ou anvi vinn kamarad avek enn kikenn, ki premie kitsoz ou pou dir li? Ou nom. Eski Bondie ena enn nom? Boukou relizion dir ki Li apel Bondie ouswa Segner. Me sa se pa bann nom. Zot bann tit parey kouma “lerwa” ouswa “premie minis.” Bondie finn dir nou ki Li apel Zeova. Psom 83:18 (NW) dir: “Ki bann dimounn kone ki twa, ki apel Zeova, to tousel Treo lor later antie.” Sertin version Labib tradir nom Bondie par Yahweh. (Get Psom 68:20, not.) Lezot version Labib, kouma Traduction du monde nouveau, tradir nom Bondie par “Jéhovah” (Zeova). Bann ki’nn ekrir Labib inn servi nom Bondie plizir milye fwa. Zeova anvi ki ou konn so nom ek ki ou servi sa nom-la. Li’nn dir ou so nom pou ki ou kapav vinn so kamarad.

15. Ki nom Zeova vedir?

¹⁵ Nom Bondie, setadir Zeova, ena enn gran sinifikasion. Sa nom-la vedir ki Bondie kapav realiz tou promes ki Li fer ek osi so proze. Nanye pa kapav aret Li. Zis Zeova tousel kapav ena sa nom-la.a

16, 17. Ki savedir (a) “Toupwisan”? (b) “regne pou touzour”? (c) “Kreater”?

¹⁶ Parey kouma nou ti lir pli avan, Psom 83:18 dir konsernan Zeova: “To tousel Treo.” Ek Revelasion 15:3 dir: “[“Zeova,” NW] Bondie Toupwisan, to travay li gran, li enn mervey!” Ki tit “Toupwisan” vedir? Savedir ki Zeova pli for ki ninport kisannla dan liniver. Premie Timote 1:17 dir ki Zeova Li “regne pou touzour.” Savedir ki Li’nn touletan existe. Psom 90:2 explike ki Li existe depi touzour ek pou touzour. Sa vremem extraordiner, pa vre!

¹⁷ Zis Zeova tousel ki Kreater. Revelasion 4:11 dir: “[“Zeova,” NW] Bondie, to merit resevwar laglwar, ek loner ek pwisans parski tomem ki finn kre tou kitsoz, to ti anvi ki zot existe alor zot finn vinn realite.” Wi, ki li bann anz ouswa bann zetwal dan lesiel, bann frwi lor bann pie ouswa bann pwason dan lamer, se Zeova ki’nn kree tousala!

ESKI OU KAPAV VINN KAMARAD ZEOVA?

18. Kifer sertin dimounn panse ki zame zot pou kapav vinn kamarad Bondie? Me ki Labib dir?

¹⁸ Kan sertin dimounn aprann konn bann kalite extraordiner ki Zeova ena, zot demann zotmem: ‘Bondie telman for, telman inportan, ek telman lwin, kifer Li pou interese ar mwa?’ Me eski Bondie anvi ki nou ena bann santiman koumsa? Non. Zeova anvi vinn pros ar nou. Labib dir ki Bondie “pa lwin ar sakenn parmi nou.” (Zistwar Bann Apot 17:27) Bondie anvi ki nou vinn pros ar Li ek Li promet ki Li ‘pou vinn pros ar nou.’​—Zak 4:8.

19. (a) Kouma ou kapav vinn kamarad Bondie? (b) Parmi bann kalite ki Zeova ena, lekel ou pli kontan?

¹⁹ Kouma eski ou kapav vinn kamarad Bondie? Zezi ti dir: “Samem ki vedir lavi eternel, ki zot aprann konn twa, sel vre Bondie, ek sa kikenn ki to finn avoye la, Zezi Kris.” (Zan 17:3, NW.) Kontign aprann, ek ou pou arive konn Zeova ek Zezi. Ek lerla ou pou kapav gagn lavi eternel. Par exanp, nou’nn aprann ki “Bondie limem lamour.” (1 Zan 4:16) Me Li ena ankor lezot zoli kalite. Labib dir nou ki Zeova “ena mizerikord ek konpasion, ki [Li] pa ankoler vit ek ki [Li] ena lamour fidel ek laverite an-abondans.” (Exod 34:6) Zeova Li “bon ek . . . dispoze pou pardone.” (Psom 86:5, NW.) Bondie ena pasians ek Li fidel. (2 Pier 3:9; Psom 18:25) Kan ou lir seki Labib dir lor Bondie, ou pou aprann ankor plis lor so bann zoli kalite.

20-22. (a) Kouma nou kapav vinn pros ar Bondie mem si nou pa trouv Li? (b) Ki ou bizin fer si lezot anpes ou etidie Labib?

²⁰ Kouma ou kapav vinn pros ar Bondie mem si ou pa trouv Li? (Zan 1:18; 4:24; 1 Timote 1:17) Kan ou lir seki Labib dir lor Zeova, ou pou plis trouv Li kouma enn Kikenn reel. (Psom 27:4; Romin 1:20) Ek plis ou aprann lor Zeova, plis ou pou kontan Li ek ou pou santi ou pli pros ar Li.

²¹ Ou pou konpran ki Zeova Li nou Papa. (Matie 6:9) Li’nn donn nou lavi, ek Li anvi ki nou ena pli bon lavi ki kapav ena. Eski se pa samem ki enn bon papa anvi pou so bann zanfan? (Psom 36:9) Labib ansegne ki ou kapav vinn kamarad Zeova. (Zak 2:23) Eski se pa enn gran privilez? Zeova, Kreater liniver, anvi ki ou vinn so kamarad!

²² Sertin dimounn kitfwa pou anvi ki ou aret etidie Labib. Kitfwa zot per tansion ou sanz ou relizion. Me pa les personn anpes ou vinn kamarad Zeova. Li meyer Kamarad ki ou kapav ena.

23, 24. (a) Kifer ou bizin kontign poz kestion? (b) Ki nou pou examine dan prosin sapit?

²³ Kan ou etidie Labib, pou ena sertin kitsoz ki ou pa pou konpran. Pa onte pou poz kestion ouswa pou demann led. Zezi ti dir ki nou bizin ena limilite, parey kouma bann ti zanfan. (Matie 18:2-4) Ek bann zanfan poz boukou kestion. Bondie anvi ki ou gagn repons ou bann kestion. Alor, kontign fer zefor pou etidie Labib pou fer sir ki seki ou pe aprann li laverite.​—Lir Zistwar Bann Apot 17:11.

²⁴ Meyer fason pou aprann lor Zeova se kan ou etidie Labib. Dan prosin sapit, nou pou trouve kifer Labib li diferan ar tou lezot liv.