Anou aprann ar Parole Bondié

Sa lartik-la examine bann question ki kitfois ou finn deja demann-ou-mem ek li montré kot-sa ou kapav trouve bann reponse dan ou la Bible. Bann Témoins de Jéhovah pou bien content pou examine sa bann reponse-la avek ou.

1. Kisannla Bondié?

Vrai Bondié Li Createur tou kitsoz. La Bible appel Li “le Roi l’eternité,” sa vedir ki Li pena commencement ek jamais Li pou ena enn la fin. (Révélation 15:3) Bondié Li la Source la vie, alors nou bizin adore zis Li tousel.​—Lire Révélation 4:11.

2. Couma Bondié été?

Okenn dimoune jamais pa finn trouve Bondié parski Li enn l’Esprit. Sa vedir ki Li ena enn forme la vie ki beaucoup pli superieur ki bann creature physik ki vive lor la terre. (Jean 1:18; 4:24) Nou trouve bann qualité Bondié dan bann kitsoz ki Li’nn faire. Par exemple, kan nou observe fason ki’nn faire bann fruit ek bann fleur ek zot bann different varieté, nou trouve l’amour ek sagesse Bondié. Grandeur l’univers montré nou puissance Bondié.​—Lire Romains 1:20.

Dan la Bible, nou kapav aprann encore plus lor bann qualité Bondié. Par exemple, li dire nou seki Bondié content ek seki Li pa content, couma Li agir envers bann dimoune, ek couma Li reagir dan different situation.​—Lire Psaume 103:7-10.

3. Eski Bondié ena enn nom?

Jésus ti dire: “Nou Papa ki dan le ciel, ki to nom sanctifié.” (Matthieu 6:9) Mem si Bondié ena beaucoup titre, Li ena zis enn sel nom. Chaque langue, prononce li dan different fason. Dan Maurice souvent bann dimoune dire “Jéhovah” ou-soit parfois “Yahvé.”​—Lire Psaume 83:18.

Finn tire nom Bondié dan beaucoup la bible ek finn remplace li par bann titre couma Seigneur ou-soit Bondié. Mais kan ti ecrire la Bible, ti ena nom Bondié environ 7,000 fois. Jésus ti faire konn nom Bondié kan li ti servi sa nom-la pou explik bann dimoune Parole Bondié. Li ti aide zot pou konn Bondié.​—Lire Jean 17:26.

4. Eski Jéhovah interessé ar nou?

Jéhovah montré ki Li interessé ar nou kan Li ecoute personnellement nou bann la priere. (Psaume 65:2) Eski parski ena beaucoup souffrance, sa vedir ki Bondié pa interessé ar nou? Certain dimoune pretann ki Bondié faire nou souffert pou testé nou, mais sa li pa vrai. La Bible dire: “Jamais vrai Bondié pou faire le mal.”​—Job 34:10; lire Jacques 1:13.

Bondié finn honore bann dimoune kan Li’nn donne zot liberté pou choisir. Eski nou apprecié liberté ki nou ena pou choisir pou servi Bondié? (Josué 24:15) Ena beaucoup souffrance parski beaucoup dimoune choisir pou faire di-tort lezot. Sa faire Jéhovah la peine kan Li trouve tou sa l’injustice-la.​—Lire Genèse 6:5, 6.

Bientot, Jéhovah pou servi Jésus pou elimine la souffrance ek bann ki derriere sa. Entre-temps, Jéhovah ena bann bon raison pou permette la souffrance pou enn ti moment. Enn prochain lartik dan sa serie-la pou explik nou kifer Bondié permette la souffrance.​—Lire Isaïe 11:4.

5. Ki Bondié envie nou faire?

Jéhovah inn crée nou avek capacité pou aprann konn Li ek pou content Li. Li envie ki nou aprann la verité lor Li. (1 Timothée 2:4) Si nou etudié la Bible, nou kapav konn Bondié couma enn camarade.​—Lire Proverbes 2:4, 5.

Jéhovah finn donne nou la vie, alors nou bizin content Li plus ki nou content n’importe kisannla. Nou kapav montré Bondié ki nou content Li kan nou koz avek Li dan la priere ek kan nou faire seki Li demandé. (Proverbes 15:8) Jéhovah demann nou pou traite lezot dimoune avek amour.​—Lire Marc 12:29, 30; 1 Jean 5:3.

Pou gagne plus renseignement, guette chapitre 1 dan livre Ki la Bible enseigné vrai-mem?, publié par bann Témoins de Jéhovah.

[Zimage page 23]

Eski kapav ena enn bon raison pou ki Bondié permette la souffrance pou enn ti moment?