DAN ENN LEMOND KI ANBA-LAO

1 | Pran Swin Ou Lasante

KIFER LI INPORTAN?

Enn katastrof natirel ouswa enn lot problem kapav afekte nou lasante dan boukou fason.

Kan bann kitsoz koumsa arive, nou ena tandans pou strese. Ek kan nou strese pandan lontan, bien souvan nou tom malad.
Bann sitiasion grav kouma enn katastrof natirel ouswa enn lepidemi kapav rann travay bann dokter bien difisil parski zot bizin okip boukou dimounn anmemtan. Li kapav osi arive ki pena ase medsinn.
Akoz bann sitiasion koumsa, li kapav arive ki bann dimounn pa kapav aste bann kitsoz ki zot bien bizin, kouma manze ek medsinn.

Seki Ou Bizin Kone

Kan ou gagn enn maladi grav ouswa ou strese, ou kapav koumans negliz oumem ek aret fer bann kitsoz ki bon pou ou lasante. Lerla, avek letan ou kapav plis malad.
Si ou pa tret ou bann problem lasante, zot kapav vinn pli grav ek mem met ou lavi an danze.
Plis ou an bonn sante, plis ou pou kapav pran bann bon desizion kan ena bann sitiasion difisil.
Ki ou ris ouswa pov, ena bann kitsoz ki ou kapav fer pou pran swin ou lasante.

Seki Ou Kapav Fer

Enn dimounn ki ena sazes esey trouv bann danze ki kapav ena ek li fer bann kitsoz pou evit sa bann danze-la. Li parey pou nou lasante. Bien souvan ou kapav diminie risk pou gagn enn maladi ouswa anpes li vinn pli grav kan ou gard oumem ek ou lanvironnman touletan prop. Alor, li bien inportan pran bann prekosion.

“Kan nou fer tou pou res prop ek gard nou lakaz prop, nou depans mwins kas pou al kot dokter ek pou aste medsinn.”—Andreas.a

a Finn sanz sertin nom dan sa magazinn-la.

KI OU KAPAV FER?—Esey Sa:

Pandan bann moman difisil, sa bann kitsoz-la pou ed ou pou pran swin ou lasante

GARD OUMEM EK OU LANVIRONNMAN PROP

Gard oumem ek ou lanvironnman prop

Labib dir: “Enn dimounn ki ena bon zizman kasiet kan li trouv enn danze.” (Proverb 22:3) Esey trouv bann kitsoz ki kapav danzere pou ou lasante ek evit zot.

Lav ou lame souvan avek delo ek savon, sirtou avan ki ou tous enn manze ouswa apre ki ou’nn al twalet.
Netway ek dezinfekte ou lakaz regilierman, sirtou bann plas ek bann kitsoz ki ou touse souvan.
Tanki posib evit res tro pre ar bann dimounn ki ena enn maladi kontazie.

MANZ BANN MANZE KI BON POU LASANTE

Manz bann manze ki bon pou lasante

Labib dir: “Personn pa air so prop lekor, me li nouri li e donn li boukou latansion.” (Efezien 5:29) Nou montre ki nou kontan nou lekor kan nou fer bien atansion ar bann kitsoz ki nou met dan nou lekor.

Bwar boukou delo.
Manz diferan kalite frwi ek legim.
Pa manz bann manze gra, tro boukou disel ek disik.
Pa fime ouswa pran ladrog ek evit bwar tro boukou lalkol ouswa medsinn.

“Pou evit tom malad, nou fer zefor pou manz bann manze ki bon pou lasante. Si nou pa ti fer sa, nou ti pou depans boukou kas ar dokter ek medsinn. Nou prefer servi nou kas pou aste bann manze ki pou ed nou res an bonn sante.”—Carlos.

FER LEXERSIS EK REPOZE

Fer lexersis

Labib dir: “Vomie enn pwanie repo, ki de pwanie travay dir ek galoup deryer divan.” (Ekleziast 4:6) Nou bizin travay, me nou bizin osi repoze.

Res aktif. Ou kapav koumans par mars enn tigit toulezour. Bann aktivite fizik kapav amelior ou lasante mem si ou dan laz, andikape, ouswa si ou ena enn maladi kronik.
Repoze

Repoze bien. Si ou pa repoze ase, ou pou plis strese ek ou pa pou kapav konsantre kouma bizin. Avek letan, ou kapav mem devlop bann problem lasante ki bien grav.
Fixe enn ler pou al dormi ek respekte sa ler-la. Esey al dormi ek leve mem ler toulezour.
Evit get televizion ouswa servi bann laparey elektronik zis avan al dormi.
Evit sa bann kitsoz-la: Bann manze ki tro lour, lalkol ouswa bann kitsoz ki ena kafeinn zis avan al dormi.

“Mo’nn realize ki mo somey ena enn lefe lor mo lasante. Parfwa, kan mo pa dormi ase, mo latet fermal ek mo santi mo lekor lour ek kas-kase. Me kan mo dormi bien, mo santi mwa bien ek mo ena lafors pou fer tou mo travay. Mo ena pli boukou lenerzi ek mo pa malad souvan.”—Justin.