DAN ENN LEMOND KI ANBA-LAO

3 | Gard enn Bon Relasion Avek Lezot

KIFER LI INPORTAN?

Akoz bann problem ki pe ogmante dan sa lemond-la, boukou dimounn nepli pros ar zot bann fami ek zot bann kamarad.

Bann dimounn nepli frekant zot bann kamarad.
Bann konzwin pe vinn deplizanpli amer ar zot kamarad.
Bann paran pa tro kas latet ar bann problem ki zot zanfan gagne.

Seki Ou Bizin Kone

Bann kamarad bien inportan parski zot kapav ed ou pou res an bonn sante lor plan fizik ek moral, sirtou dan bann moman difisil.
Stres ki ou gagne akoz bann problem ki ena dan sa lemond-la kapav kree bann problem dan ou fami.
Kan ou bann zanfan trouv ouswa tann bann nouvel stresan dan linformasion, sa kapav fer zot plis per.

Seki Ou Kapav Fer

Labib dir: “Enn vre kamarad montre so lamour touletan, ek li enn frer ki’nn ne pou bann moman difisil.”—Proverb 17:17.

Bann kamarad kapav ed nou ek donn nou bann bon konsey. Anplis, kan nou kone ki nou ena bann kamarad koumsa, sa kapav donn nou lafors pou fer fas ar bann problem toulezour.

KI OU KAPAV FER?—Esey Sa:

Pandan bann moman difisil, sa bann kitsoz-la kapav ed ou pou gard enn bon relasion avek lezot

RANFORSI OU MARYAZ

Ranforsi ou maryaz

Labib dir: “De pli bon ki enn . . . Parski si enn ladan tonbe, lot-la kapav lev so kamarad.” (Ekleziast 4:9, 10) Fode pa ki bann konzwin azir kouma de avion lager ki pe al kraz lor zot kamarad. Okontrer zot bizin azir kouma enn pilot ek so kopilot ki pe al dan mem direksion.

Fer ou maximum pou pa tir ou stres lor ou konzwin. Plito, fer zefor pou ena pasians.
Omwin enn fwa par semenn, koz ar ou konzwin lor bann problem ki ou pe gagne. Rapel ki se problem-la ki ou bizin atake—pa ou konzwin.
Rezerv letan pou fer bann kitsoz ki zot kontan ansam.
Rapel bann bon moman ki zot inn pase ansam. Par exanp, zot kapav reget zot bann foto maryaz, ouswa bann lezot zoli souvenir ki zot ena.

“Li arive ki enn koup pa dakor lor sertin kitsoz, me sa pa vedir ki zot pa kapav travay ansam kouma enn lekip. Enn koup kapav pran enn desizion ansam, ek apre zot travay ansam pou ki sa desizion-la reisi.”—David.

VINN ENN BON KAMARAD

Vinn enn bon kamarad

Pa zis aksepte led ki ou gagne ar ou bann kamarad, pans osi kouma ou, ou kapav donn ou bann kamarad enn soutien. Kan ou ed lezot pou vinn for, sa ed ou osi pou vinn for.
Kontakte sertin ou bann kamarad pou pran zot nouvel.
Demann ou bann kamarad kouma zot inn sirmont bann problem ki ou pe fer fas.

“Bann moman difisil zot parey kouma enn siklonn. Kan nou koumans gagn difikilte pou trouv kler akoz lapli ek divan, bann kamarad kapav ed nou pou kone kotsa nou ete ek dan ki direksion nou bizin ale. Bann kamarad gagn nou traka ek zot kone ki nou osi nou gagn zot traka.”—Nicole.

SOUTENIR OU BANN ZANFAN

Soutenir ou bann zanfan

Labib dir: Nou “bizin rapid pou ekoute, me pa prese pou koze.” (Zak 1:19) Kitfwa ou bann zanfan ezite pou dir ou seki trakas zot, me si ou ekout zot avek pasians, sa kapav ed zot pou koze.

Met ou bann zanfan alez pou ki zot kapav dir seki zot ena dan zot leker. Sertin zanfan trouv sa difisil pou koz fas-a-fas ar zot bann paran. Zot plis alez pou koze kan zot pe vwayaze dan loto ouswa kan zot pe marse.
Pa les ou bann zanfan get ouswa lir tro boukou linformasion ki stresan.
Fer ou bann zanfan kone ki bann laranzman ou finn fer pou ki lafami res an sekirite.
Montre ou bann zanfan kouma zot bizin reazir si ena enn problem, enn katastrof natirel ouswa enn irzans.

“Koz ar ou bann zanfan, ek les zot devid zot leker. Kitfwa zot per, ankoler ouswa zot ena enn lot problem. Fer zot kone ki ou osi ou pe lit kont sa bann santiman-la, ek explik zot kouma ou pe sirmont sa.”—Bethany.