Garde bann l’amitié solide dan enn le monde kot pena l’amour
“Mo donne zot l’ordre pou suive sa bann kitsoz-la: ki zot content zot camarade.”—JEAN 15:17.
1. Kifer bann chretien premier siecle ti bizin reste bann bon camarade?
PENDANT so dernier la nuit lor la terre, Jésus ti encourage so bann disciple fidele pou garde l’amitié ki zot ti ena entre zot. Inpé pli boner dan la soirée, li ti dire zot ki grace a l’amour ki zot ti pou montré sakenn pou so prochain, lezot dimoune ti pou koné ki zot so bann disciple. (Jean 13:35) Bann zapotre ti bizin reste bann bon camarade pou zot kapav endure bann l’epreuve ki ti pé attann zot, ek faire travail ki Jésus bientot ti pou donne zot. Avek le temps, bann dimoune ti konn bann chretien premier siecle couma bann dimoune ki ti ena enn l’attachement bien solide pou Bondié ek aussi pou sakenn so camarade.
2. (a) Ki nou bien decidé pou faire, ek kifer? (b) Ki bann question nou pou examiné?
2 Zordi, sa faire nou plaisir pou forme partie dan enn l’organisation mondial kot tou bann membre suive l’exemple sa bann chretien premier siecle-la! Nou bien decidé pou obeir commandement ki Jésus inn donné pou manifesté enn vrai l’amour sakenn pou nou camarade. Selman, dan lepok dernier jour, bann dimoune en general pa fidele ek zot pena l’affection naturel. (2 Tim. 3:1-3) Souvent, zot l’amitié pa sincere ek zot faire camarade par l’interet. Pou nou garde nou l’identité en tant ki bann vrai chretien, fodé pa ki nou ena sa qualité l’attitude-la. Alors, anou examine sa bann question-la: Lor ki kitsoz vrai l’amitié basé? Couma nou kapav faire bann bon camarade? Kan eski nou pou bizin arrete faire camarade avek enn dimoune? Ek couma nou kapav garde enn l’amitié solide avek lezot?
Lor ki kitsoz vrai l’amitié basé?
3, 4. Lor ki kitsoz vrai l’amitié basé, ek kifer?
3 Bann l’amitié ki bien solide basé lor l’amour pou Jéhovah. Le roi Salomon ti ecrire: “Si enn kikenn kapav maitrise enn sel dimoune, deux ensam pou kapav resisté kont li. Ek enn la corde trois tresse pa casse vite.” (Eccl. 4:12) Kan Jéhovah Li-mem Li sa troisieme la corde-la dan enn l’amitié, sa l’amitié-la pou dure longtemps.
4 Li vrai ki bann dimoune ki pa content Jéhovah zot aussi zot kapav faire bann bon camarade. Mais kan l’amour pou Bondié attire deux dimoune, zot l’amitié pou solide. Si ena bann desaccord, bann vrai camarade pou agir dan enn fason ki faire Jéhovah plaisir. Kan bann l’ennemi Bondié essaye crée bann division entre bann vrai chretien, zot decouvert ki zot pa kapav detruire l’amitié ki ena entre zot. Toute longue l’Histoire, bann serviteur Jéhovah finn disposé pou mort plutot ki trahir zot camarade.—Lire 1 Jean 3:16.
5. Kifer l’amitié ki ti ena entre Ruth ek Naomi ti bien solide?
5 Pena doute ki c’est avek bann ki content Jéhovah ki nou kapav crée bann l’amitié pli solide. Anou prend l’exemple Ruth ek Naomi. L’amitié ki ti ena entre sa deux femme-la c’est enn parmi bann l’amitié pli extraordinaire ki mentionné dan la Bible. Kifer zot l’amitié ti bien solide? Ruth ti donne enn raison kan li ti dire Naomi: “To peuple pou vinn mo peuple, ek to Bondié, mo Bondié. . . . Ki Jéhovah faire coumsa avek moi ek ajoute encore, si enn lot kitsoz a part la mort vinn mette enn separation entre moi ek toi.” (Ruth 1:16, 17) Li clair ki Ruth ek Naomi ti ena toulé-deux enn grand l’amour pou Bondié, ek zot ti laisse sa l’amour-la influence fason ki zot ti traite zot camarade. A cause sa, Jéhovah ti beni zot toulé-deux.
Couma faire bann bon camarade
6-8. (a) Ki ou bizin faire pou developpe enn l’amitié solide? (b) Couma ou kapav prend l’initiative pou faire camarade?
6 L’exemple Ruth ek Naomi montré nou ki c’est pa par hasard ki bann vrai l’amitié formé. Bann l’amitié coumsa basé lor l’amour ki sakenn ena pou Jéhovah. Mais aussi c’est grace a bann grand zeffort ek enn l’esprit sacrifice, ki nou reussi developpe bann l’amitié ki solide. Mem bann prop frere ek soeur dan enn famille ki adore Jéhovah, bizin faire zeffort pou crée enn vrai l’amitié entre zot. Alors, couma nou kapav faire bann bon camarade?
7 Prend l’initiative. L’apotre Paul ti encourage so bann camarade dan congregation Rome pou “contigne montré l’hospitalité.” (Rom. 12:13) Alors, pou montré l’hospitalité, sa demann ki nou faire plusieurs ti kitsoz, regulierement. Li pareil coumadir nou pé marche lor enn ti sentier, nou faire enn pas apré enn lot. Personne pa kapav montré l’hospitalité dan nou place. (Lire Proverbes 3:27.) Enn fason ki nou kapav montré l’hospitalité c’est kan nou invite different membre congregation pou prend enn repas avek nou. Eski ou kapav prend l’habitude pou montré l’hospitalité regulierement envers bann membre dan ou congregation?
8 Enn lot fason ki ou kapav prend l’initiative pou faire camarade c’est kan ou invite different proclamateur pou preche avek ou. Kan ou pé debouté devant la porte enn dimoune ek ou pé tann ou frere ou-soit ou soeur koz avek tou so leker lor so l’amour pou Jéhovah, sa-mem assez pou faire ou vinn pli proche ar li.
9, 10. Ki l’exemple Paul inn donne nou, ek couma nou kapav imite li?
9 Ena l’affection pou pli beaucoup dimoune. (Lire 2 Corinthiens 6:12, 13.) Eski ou finn deja ena sentiment ki pena personne dan ou congregation avek ki ou kapav faire camarade? Dan sa cas-la, eski li possible ki ou trop difficile kan ou pé choisir bann ki kapav vinn ou camarade? L’apotre Paul ti donne enn bon l’exemple kan li ti ena l’affection pou pli beaucoup dimoune. Ti ena enn lepok, jamais li ti pensé ki li ti pou kapav vinn bon camarade avek bann non-Juif. Pourtant, li ti vinn “enn zapotre pou bann nation.”—Rom. 11:13.
10 En plus, Paul pa ti limite so l’amitié zis ar bann dimoune ki ti ena mem l’age ki li. Par exemple, li ek Timothée ti vinn bann bon camarade malgré ki ti ena enn grand difference l’age ek culture entre zot. Zordi, beaucoup jeune bien apprecié l’amitié ki zot finn crée avek bann membre pli agé dan congregation. Vanessa, ki ena environ 20 an, dire: “Ena enn soeur ki mo bon camarade ki ena plus ki 50 an. Mo kapav dire li n’importe ki kitsoz ki mo ti pou dire bann camarade dan mo l’age. Ek li interesse-li bien avek moi.” Couma bann l’amitié coumsa developpé? Vanessa reponn: “Mo finn bizin faire bann grand zeffort pou crée sa l’amitié-la, ek pa zis attann ki sa developpé par li-mem.” Eski ou disposé pou faire camarade avek bann dimoune ki pena mem l’age ki ou? Pena doute ki Jéhovah pou beni ou bann zeffort.
11. Ki nou kapav aprann ar l’exemple Yonathân ek David?
11 Reste fidele. Salomon ti ecrire: “Enn vrai camarade montré so l’amour touletan; li couma enn frere ki’nn né pou bann moment difficile.” (Prov. 17:17) Kan li ti ecrire sa bann parole-la, kitfois Salomon ti pense l’amitié ki so papa, David, ti ena avek Yonathân. (1 Sam. 18:1) Le roi Saül ti envie ki so garson Yonathân vinn le roi en Israël. Mais Yonathân ti accepté ki Jéhovah ti’nn choisir David pou vinn le roi. Yonathân ti different avek Saül. Li, li pa ti jaloux David. Li pa ti en colere kan bann dimoune ti loué David, ek li pa ti avale tou bann palab ki Saül ti fané lor David. (1 Sam. 20:24-34) Eski nou pareil couma Yonathân? Kan nou bann camarade gagne bann privilege, eski nou content pou zot? Kan zot dan probleme, eski nou reconforte zot ek nou soutenir zot? Si nou tann bann palab lor enn camarade, eski desuite nou croire sa? Ou-soit eski pareil couma Yonathân, nou defann nou camarade avek fidelité?
Kan nou bizin arrete faire camarade avek enn dimoune
12-14. Ki difficulté certain etudiant la Bible gagné, ek couma nou kapav aide zot?
12 Kan enn etudiant la Bible commence faire bann changement dan so la vie, kitfois li kapav gagne enn difficulté: li possible ki li ena bann camarade ki li bien content mais ki pa vive en accord avek bann principe la Bible. Dan le passé, kitfois li ti passe le temps avek zot. Mais asterla, li comprend ki bann activité ki zot faire kapav ena enn mauvais l’influence lor li, ek li pensé ki li necessaire pou limite so frequentation avek zot. (1 Cor. 15:33) En mem temps, li kapav ena sentiment ki si li pa frequente zot, li pa pé montré so fidelité envers zot.
13 Si ou enn etudiant la Bible ki pé faire face ar sa qualité difficulté-la, rappel ki enn vrai camarade pou content ki ou pé ameliore ou la vie. Kitfois li mem kapav envie etudié la Bible ensam avek ou pou konn Jéhovah. Parkont, bann fausse camarade pou “contigne koz en mal lor [ou]” parski ou pa pé al ensam avek zot pou “amenn sa mem mauvais la vie-la.” (1 Pierre 4:3, 4) En realité, c’est pa ou ki pa fidele envers sa bann camarade-la, mais c’est zot ki pa fidele envers ou.
14 Kan bann etudiant la Bible perdi bann camarade ki zot ti ena avant, ki pa content Bondié, bann membre congregation kapav rempli sa vide-la ek faire camarade avek zot. (Gal. 6:10) Eski ou konn personnellement bann dimoune ki assisté reunion dan ou congregation ek ki pé etudié la Bible? Eski parfois ou kapav passe bann moment avek zot pou encourage zot?
15, 16. (a) Couma nou bizin reagir si enn camarade arrete servi Jéhovah? (b) Couma nou kapav montré nou l’amour pou Bondié?
15 Mais ki pou arrivé si enn camarade dan congregation decide pou tourne lé-dos ar Jéhovah ek kitfois bizin exclu li? Sa situation-la kapav bouleverse ou beaucoup. Enn soeur raconte seki li ti ressenti kan enn so bon camarade ti arrete servi Jéhovah. Li dire: “Mo ti ena l’impression coumadir enn partie dan mo-mem ti’nn mort. Mo ti croire ki mo camarade ti bien solide dan la verité, mais non. Mo ti demann moi si li pa ti pé servi Jéhovah zis pou faire so famille plaisir. Lerla sa inn faire moi examine mo bann prop mobile. Mo ti demann moi kifer moi mo pé servi Jéhovah?” Couma sa soeur-la ti faire face ar sa situation-la? Li dire: “Mo ti jette mo fardeau lor Jéhovah. Mo bien decidé pou montré Jéhovah ki mo content Li pou seki Li été, pa zis parski Li donne moi bann camarade dan so l’organisation.”
16 Nou pa kapav attann pou reste camarade ar Bondié si nou al dan coté bann dimoune ki choisir pou faire camarade ar le monde. Disciple Jacques ti ecrire: “Eski zot pa koné ki enn kikenn ki camarade ar le monde, li l’ennemi ar Bondié? Alors, n’importe kisannla ki envie vinn camarade ar le monde pé faire li-mem vinn l’ennemi ar Bondié.” (Jacq. 4:4) Nou kapav montré nou l’amour pou Bondié kan nou ena confiance ki Li pou aide nou si nou perdi enn camarade, a condition ki nou reste fidele envers Li. (Lire Psaume 18:25.) Sa soeur ki nou ti mentionné-la ti dire: “Mo finn aprann ki nou pa kapav oblige enn dimoune pou content Jéhovah ou-soit pou content nou. Finalement sakenn bizin faire so choix.” Mais, ki nou kapav faire pou garde enn l’amitié solide avek bann ki reste attaché ar congregation?
Garde nou l’amitié solide avek lezot
17. Couma bann bon camarade kozé entre zot?
17 Enn bon communication li bien important dan enn l’amitié. Kan ou lire seki la Bible raconté lor Ruth ek Naomi, David ek Yonathân, ek Paul ek Timothée, ou pou remarké ki bann bon camarade koz franc mais avek respé sakenn envers so camarade. Concernant fason ki nou bizin koz avek lezot, Paul ti ecrire: “Fodé ki zot parole faire toujours plaisir pou tendé, assaisonné ar di-sel.” Ici Paul ti pé koz lor fason ki nou bizin koz avek “bann ki en dehors,” setadir, bann dimoune ki pa nou bann frere ek soeur spirituel. (Col. 4:5, 6) Si bann dimoune ki pa dan la verité merite ki nou koz ar zot avek respé, comié plus nou bizin faire sa avek nou bann camarade ki servi Jéhovah!
18, 19. Couma nou bizin considere conseil ki nou gagné ar enn camarade ki dan la verité, ek ki l’exemple bann ancien Éphèse inn donne nou?
18 Bann bon camarade ena consideration pou l’opinion sakenn so camarade. Alors, communication ki ena entre zot bizin agreable ek en mem temps franc. Le roi Salomon ki ti sage, ti ecrire: “De l’huile ek l’encens, c’est sa ki faire leker content, ek aussi douceur ki ou compagnon manifesté par conseil ki so nâme donné.” (Prov. 27:9) Eski c’est coumsa ki ou considere conseil ki enn camarade donne ou? (Lire Psaume 141:5.) Si enn camarade dire ou ki li tracassé a cause chemin ki ou pé prend, couma eski ou reagir? Eski ou considere sa couma enn preuve ki li ena l’amour pou ou, ou-soit eski sa offense ou?
19 L’apotre Paul ti ena bann relation bien proche avek bann ancien dan congregation Éphèse. Kitfois li ti konn certain parmi zot kan zot ti fek vinn bann croyant. Mais pendant so dernier reunion avek zot, li ti donne zot bann conseil bien franc. Couma zot ti reagir? Bann camarade Paul pa ti offensé. Au contraire, zot ti apprecié ki li ti interessé avek zot, ek zot ti mem ploré kan zot ti maziné ki jamais zot ti pou retrouve li encore.—Actes 20:17, 29, 30, 36-38.
20. Ki enn camarade ki ena l’amour pou faire?
20 Bann bon camarade pa zis accepté bann bon conseil mais zot konn aussi donne bann conseil. Bien sur, nou bizin koné kan nou bizin “veille [nou] prop zaffaire.” (1 Thess. 4:11) Nou bizin aussi reconette ki sakenn “pou rann compte pou li-mem devant Bondié.” (Rom. 14:12) Mais kan li necessaire, enn camarade ki ena l’amour pou faire so camarade rappel bann principe Jéhovah. (1 Cor. 7:39) Par exemple, ki ou pou faire si ou remarké ki ou camarade ki celibataire pé commence ena bann sentiment pou enn kikenn ki pa dan la verité? Eski ou pa pou dire li nanyin parski ou peur pangar ou faire di-tort ou l’amitié avek li? Ou-soit, ki ou pou faire si ou camarade pa prend compte ou conseil? Enn bon camarade pou al guette bann ancien pou zot aide so camarade ki pé al dan enn mauvais chemin. Pou faire sa, li bizin ena courage. Selman, si enn l’amitié li basé lor l’amour pou Jéhovah, pena nanyin ki pou kapav faire li enn di-tort ki pa pou kapav reparé.
21. Ki nou tou nou pou faire de temps en temps, mais kifer li bien important ki nou garde bann l’amitié solide dan congregation?
21 Lire Colossiens 3:13, 14. De temps en temps, nou pou faire nou bann camarade ena “enn kitsoz kont” nou, ek zot aussi zot pou faire ou-soit dire kitsoz ki pou faire nou en colere. Jacques ti ecrire: “Nou tou, souvent nou faire erreur.” (Jacq. 3:2) Mais, nou pa juge enn vrai l’amitié par quantité fois ki nou faire peché sakenn kont nou camarade, mais par quantité ki nou pardonne sakenn nou camarade dan enn fason complet. Li vrai-mem bien important ki nou developpe bann l’amitié solide grace a enn communication franc, ek ki nou pardonne sakenn nou camarade avek tou nou leker! Si nou manifesté sa qualité l’amour-la, li pou vinn enn “kitsoz parfait ki soude nou tou ensam.”
Couma ou pou reponn?
• Couma nou kapav faire bann bon camarade?
• Kan eski li necessaire ki ou arrete faire camarade avek enn kikenn?
• Ki nou bizin faire pou garde enn l’amitié solide?
[Zimage lor page 25]
Lor ki kitsoz l’amitié entre Ruth ek Naomi ti basé?
[Zimage lor page 26]
Eski souvent ou manifesté l’hospitalité?