‘Élargi Nou l’Amour’
1. Ki responsabilité sakenn parmi nou, nou éna?
1 Dans la congrégation, sakenn parmi nou, nou éna enn résponsabilité. Nou bizin faire en sorte ki éna enn bon l’atmosphère dans la congrégation. (1 Pierre 1:22; 2:17) Nou kapav arrivé faire sa kan nou “élargi” nou l’amour pou nou bann frères ek soeurs. (2 Cor. 6:12, 13) Kifer eski li important ki nou bien konn nou bann frères ek soeurs?
2. Kifer li important ki nou développe l’amitié avec nou bann frères ek soeurs?
2 Bann l’Amitié Vinn Pli Solide: A mesure ki nou habitué ar nou bann frères ek soeurs, nou apprécié plus zot la-foi, zot l’endurance ek bann lézot qualités ki zot manifesté. Zot bann défauts parette pli tipti dans nou lizié, ek l’amitié ki nou éna avec zot, li grandi. Kan nou konn nou bien, nou pou trouve li pli facile pou fortifié ek réconforte nou camarade. (1 Thess. 5:11) Coumsa, nou tou nou kapav vinn enn “l’aide ki fortifié” nou camarade pou résisté kont bann mauvais l’influences ki éna dans lé monde Satan. (Col. 4:11) Kan nou considère bann pressions ki existé dans sa dernier jours-la, nou bien reconnaissant ki nou éna bann bon camarades dans l’organisation Jéhovah!—Prov. 18:24.
3. Couma nou kapav vinn enn l’aide ki fortifié lézot?
3 Bann bon camarades kapav fortifié nou ek réconforte nou surtou kan nou faire face ar bann grand difficultés. (Prov. 17:17) Enn Chrétien ki’nn bizin lutte kont bann sentiments négatif, dire: “Mo bann camarades ti dire moi bann kitsoz encourageant lor moi pou aide moi surmonte mo bann pensées négatif.” Oui, bann camarades coumsa zot vrémem enn bénédiction de Jéhovah!—Prov. 27:9.
4. Couma eski nou kapav bien konn lézot dans la congrégation?
4 Intéresse Nou ar Lézot: Couma eski nou kapav élargi nou l’amour pou nou bann frères ek soeurs? C’est vrai ki avant bann réunions nou dire zot tou bonjour, mais nou kapav aussi faire enn zeffort pou éna enn conversation encourageant avec zot. San ki nou rentre dans zot la-vie personel, anou montré ki nou intéressé ar zot. (Phil. 2:4; 1 Pierre 4:15) Nou kapav montré sa aussi kan nou invite zot pou enn repas. (Luc 14:12-14) Nou kapav aussi faire bann l’arrangements pou sorti avec zot dans la prédication. (Luc 10:1) Kan nou faire zefforts pou konn nou bann frères ek soeurs pli bien, nou contribué pou éna plus l’unité dans la congrégation.—Col. 3:14.
5. Dans ki façon nou kapav élargi nou l’amitié?
5 Eski nou éna tendance pou choisir bann camarades ki éna mem l’âge ki nou, ou-soit ki intéressé ar mem kitsoz ki nou? Fodé pa nou laisse sa bann facteurs-la empêche nou pou développe l’amitié avec lézot membres dans la congrégation. Nou éna l’exemple l’amitié ki ti éna entre David ek Yonathân, ek entre Ruth ek Naomi. Zot ti développe enn l’amitié bien solide mem si ti éna enn grand différence l’âge entre zot, ek zot ti sorti dans différent l’environnement. (Ruth 4:15; 1 Sam. 18:1) Eski ou kapav élargi ou l’amitié? Si ou faire sa, ou pou gagne beaucoup bénédictions ki ou pa atann.
6. Ki bienfaits nou pou gagné kan nou élargi nou l’amour pou nou bann frères ek soeurs?
6 A mesure ki nou élargi nou l’amour pou lézot, nou fortifié nou camarade ek nou favorise la paix dans la congrégation. En plus, Jéhovah Limem béni nou pou l’amour ki nou montré envers nou bann frères. (Ps. 41:1, 2; Héb. 6:10) Kifer eski ou pa fixé l’objectif pou aprann konn pli bien autant frères ek soeurs ki possib?