“Éna enn Tendre Affection Sakenn pou So Camarade”
“Dans l’amour fraternel, éna enn tendre affection sakenn pou so camarade.”—ROMAINS 12:10.
1, 2. Ki relation enn missionnaire dans nou l’époque, ek l’apôtre Paul ti éna avec zot bann frères?
DON, enn missionnaire ki’nn servi 43 ans en Extrême Orient, ti bien connu couma enn dimoune ki ti éna enn grand l’affection pou lézot. Asterla ki li bien malade ek ki li pé vive bann dernier moments dans so la-vie, certains dimoune avec ki li ti faire l’étude avant, ti vinn guette li. Zot ti voyage plusieurs milliers kilomètres pou vinn à so côté ek pou dire li “Kamsahamnida, kamsahamnida!”—“Merci, merci!” en Coréen. L’affection ki Don ti éna envers zot, ti touche zot léker.
2 C’est pa seul l’exemple ki nous éna coumsa. Au premier siècle, l’apôtre Paul ti montré enn grand l’affection pou bann dimoune ki li ti servi. Li ti prêt pou faire sacrifice pou zot. Même si Paul ti bien ferme en séki concerne so bann croyances, mais li ti gentil ek li ti intéresse li ar lézot “pareil couma enn mama prend soin so bann zenfants ki li nourri.” Dans lettre ki li ti écrire congrégation Thessalonique, li ti dire: “Parski nous ti éna enn grand l’affection pou zot, nous ti bien content pou partage avec zot, pa zis bonne nouvelle Bondié, mais aussi nou propre nâme, parski nous ti tellement content zot.” (1 Thessaloniciens 2:7, 8) Plitar, kan Paul ti dire so bann frères dans congrégation Éphèse ki zot pa pou ré-trouve li encore, “zot tou ti commence ploré ek zot ti maye so li-cou ek zot ti embrasse li avec tendresse.” (Actes 20:25, 37) Li clair ki si ti éna bann bon relations entre Paul ek so bann frères, c’est pa zis parski zot ti éna même la-foi. Mais c’est parski zot ti éna enn tendre affection sakenn pou so camarade.
Tendre Affection ek l’Amour
3. Dans la Bible, ki lien éna entre l’affection ek l’amour?
3 Dans la Bible, bann qualités couma tendre affection, sympathie ek compassion, zot bien lié avec l’amour, pli grand qualité Chrétien. (1 Thessaloniciens 2:8; 2 Pierre 1:7) Pareil couma bann facettes enn joli diamant, tou sa bann qualités-la zot travail ensemble pou produire bann bon résultats. Zot pa zis rapproche bann Chrétiens entre zot, mais aussi avec zot Papa, Jéhovah. C’est pou sa ki l’apôtre Paul ti donne sa l’encouragement-la so bann compagnons Chrétiens: “Zot l’amour bizin pa hypocrite. . . . Dans l’amour fraternel, éna enn tendre affection sakenn pou so camarade.”—Romains 12:9, 10.
4. Ki mot “tendre affection” veut dire?
4 Dans mot Grec ki Paul ti servi pou “tendre affection,” éna deux parties, enn veut dire l’amitié, ek l’autre-la, l’affection naturel. Enn Bibliste expliqué ki sa veut dire ki entre bann Chrétiens “bizin éna enn grand l’attachement pareil couma éna dans enn famille uni, kot éna l’amour, ek kot sakenn soutenir so camarade.” Eski c’est sa bann sentiments-la même ki ou éna pou ou bann frères ek soeurs Chrétiens? Dans la congrégation, bizin éna enn bon l’ambiance, enn sentiment ki nous tou nous forme enn seul famille. (Galates 6:10) C’est pou sa raison-la ki dans Le Nouveau Testament en anglais moderne, J. B. Phillips inn traduire Romains 12:10, par “Anou éna enn véritable l’affection sakenn pou so camarade, pareil couma éna entre bann frères.” Dans la Bible de Jérusalem nous lire: “Éna l’amour sakenn pou so camarade pareil couma bizin éna entre bann frères.” Oui, si bann Chrétiens content zot camarade, c’est pa par obligation. La Bible dire: ‘Avec l’affection fraternelle ki pa hypocrite,’ nous bizin “content sakenn nou camarade, enn façon intense ek avec tou nou léker.”—1 Pierre 1:22.
‘Bondié Enseigne Nous Pou Content Sakenn Nou Camarade’
5, 6. (a) Couma Jéhovah inn servi bann l’assemblées internationales pou enseigne so bann serviteurs l’affection fraternelle? (b) Couma l’attachement entre bann frères vinn pli fort avec lé-temps?
5 Même si dans sa lé-monde-la “l’amour beaucoup dimoune” pé refroidi, Jéhovah pé enseigne so bann serviteurs dans nou l’époque pou “content zot camarade.” (Matthieu 24:12; 1 Thessaloniciens 4:9) L’assemblées internationales bann Témoins de Jéhovah, c’est bann bon l’occasions ki forme zot pou développe sa l’amour-la. Pendant sa bann l’assemblées-la, bann Témoins local faire connaissance bann frères ki sorti dans bann pays bien loin, ek beaucoup finn reçevoir sa bann délégués étrangers-la kot zot. Pendant enn l’assemblée internationale ki’nn fek passé, certains délégués ti sorti dans bann pays kot dimoune bien réservé, ek pa habitué exprime zot sentiments. Enn Chrétien ki ti aidé dans service logement, dire: “Kan sa bann délégués-la ti fek arrivé, zot ti mal-à-l’aise ek timide. Mais seulement six jours après, kan zot ti bizin dire au revoir bann Témoins ki ti accueillir zot, sakenn ti maye so camarade ek ti pleuré. Zot ti faire l’expérience enn l’amour Chrétien ki jamais zot pa pou blié.” Kan nous montré l’hospitalité envers nou bann frères, n’importe ki culture zot été, sa permette bann ki invite lézot ek bann invités toulé-deux, donne le meilleur de zot-même.—Romains 12:13.
6 C’est vrai, l’expérience ki certains finn faire pendant sa bann l’assemblées-la, zot extraordinaire. Mais éna enn pli grand lien encore ki développé entre bann Chrétiens, kan zot servi Jéhovah ensemble pendant enn certaine temps. Kan nous arrivé konn bien nou bann frères, nous plus kapav apprécié zot bann bon qualités. Par exemple nous trouvé couma zot honnête, zot digne de confiance, zot fidèle, zot manifesté la bonté, la générosité, la considération, la compassion ek zot pa égoïste. (Psaume 15:3-5; Proverbes 19:22) Marc, enn missionnaire ki ti servi en Afrique de l’Est, ti faire sa commentaire-la: “Kan nous travail côte-à-côte avec nou bann frères, éna enn lien solide ki formé entre nous.”
7. Ki nous bizin faire pou nous kapav profite l’affection fraternelle ki éna dans la congrégation?
7 Pou ki éna enn grand l’attachement entre bann membres dans enn congrégation, fodé ki sakenn vinn proche ar so camarade. Kan nous assisté réunion régulièrement, nous fortifié l’attachement ki nous éna avec nou bann frères ek soeurs. Nou présence ek nou participation dans bann réunions encourage sakenn pou manifesté “l’amour ek bann bon actions.” (Hébreux 10:24, 25) Nous encourage zot aussi kan nous koz avec zot avant ek après réunions. Enn ancien en Amérique dire: “Mo éna bann bon souvenirs kan mo ti encore zenfant. Mo famille ti toujours derniers pou quitte la Salle du Royaume. Zot ti reste pli longtemps possible pou profite compagnie encourageant bann frères ek soeurs.”
Eski Ou Bizin ‘Élargi Ou’?
8. (a) Ki Paul ti oulé dire kan li ti demann bann Corinthiens pou “élargi zot”? (b) Ki nous kapav faire pou encourage l’affection fraternelle dans la congrégation?
8 Pou nou montré sa qualité l’affection-la, peut-être nous pou bizin “élargi” nous dans nou léker. L’apôtre Paul ti écrire bann membres congrégation Corinthe: “Nou léker finn élargi. C’est pa enn ti place ki zot éna dans nou léker.” En retour, Paul ti encourage zot aussi pou “élargi zot.” (2 Corinthiens 6:11-13) Eski ou aussi ou kapav ‘élargi ou’ dans ou l’affection? Ou pa bizin atann ki c’est lézot ki vinn vers ou en premier. Dans so lettre à bann Chrétiens de Rome, Paul ti associé l’importance pou éna l’affection fraternelle avec sa conseil-la: “Zot bizin toujours premier pou honore zot camarade.” (Romains 12:10) Ou honore lézot kan ou prend l’initiative pou al dire zot bonjour dans réunions. Ou kapav aussi invite zot pou sorti ar ou dans le service, ou-soit pou prépare enn réunion ensemble. Si nous faire sa, nou l’affection fraternelle pou grandi.
9. Ki certains finn faire pou vinn pli proche avec zot frères ek soeurs spirituel? (Si possible, mentionne bann faits local.)
9 Bann familles ou bien chaque membre dans enn congrégation kapav “élargi zot” kan zot rann visite lézot, ou-soit kan zot partage enn repas simple ensemble. Zot kapav aussi participe dans bann lézot l’activités intéressant ensemble. (Luc 10:42; 14:12-14) Par exemple, Hakop habitué organise de temps en temps, bann pique-niques avec bann ti groupe frères ek soeurs. Li dire ki parmi “bann ki présent, éna bann jeunes, bann âgés ek bann parents ki élevé zot zenfants tousel. Zot tou retourne lakaz avec bann bon souvenirs ek zot senti zot pli proche sakenn ar so camarade.” En tant ki Chrétien, nous bizin efforce nous pou vinn bann vrai camarade ek pa seulement reste zis bann frères ek soeurs spirituel.—3 Jean 14.
10. Ki nous kapav faire si li difficile pou rentre camarade avec enn kikenn dans congrégation?
10 Mais à cause nou l’imperfection, li kapav arrivé ki parfois li difficile pou nous faire camarade ek éna l’affection pou lézot. Ki nous pou faire lerla? Premièrement nous kapav prié Jéhovah pou nous éna bann bon relations avec nou bann frères. C’est volonté Jéhovah ki éna enn bon l’entente entre so bann serviteurs, ek Li pou réponn nou bann la-prières sincère ki nous faire dans sa sens-la. (1 Jean 4:20, 21; 5:14, 15) Nous bizin aussi agir en harmonie avec nou la-prière. En Afrique de l’Est, enn surveillant itinérant ki appelle Ric, raconte l’exemple enn frère ki ti éna enn personnalité dur ek insensible. Ti difficile pou faire camarade ar li. Ric raconté: “Au lieu ki mo ti évite sa frère-la, mo ti décidé pou aprann konn li pli bien. Mo’nn aprann ki so papa ti bien sévère concernant la discipline. Kan mo’nn comprend à ki point sa frère-la finn bizin lutté pou surmonte so situation, ek ki quantité progrès li finn faire, mo ti admire li. Nou’nn vinn bann bon camarades.”—1 Pierre 4:8.
Ouvert Ou Léker!
11. (a) Ki nécessaire pou ki l’affection grandi dans la congrégation? (b) Kifer li enn danger lor plan spirituel si nous froid ek nous pa exprime nou sentiments?
11 Zordi, beaucoup dimoune vive zot la-vie sans ki jamais zot faire bann bon camarades. Li bien triste! Fodé pa ki sa arrive bann Chrétiens dans la congrégation. L’amour véritable entre bann Chrétiens, c’est pa zis éna bann conversations agréable, ou-soit éna bann bon manières entre nous; c’est pa aussi kan nous montré nou bann sentiments enn façon exagéré. Mais, c’est kan nous disposé pou ouver nou léker, pareil couma Paul ti faire envers bann Corinthiens. Nous bizin montré nou bann frères ki nous vrai-même intéressé ar zot bien-être. C’est vrai, pa nous tou ki bien content kozé, mais si nous trop réservé ek nous reste dans nou coin, sa kapav dangereux. La Bible donne sa l’avertissement-la: “Enn kikenn ki reste dans so coin tousel, pou rode so propre désir égoïste, li pou résisté kont la sagesse pratique.”—Proverbes 18:1.
12. Kifer enn bon communication li important pou éna bann bon relations dans la congrégation?
12 Pou éna enn vrai l’amitié entre nous, li bien important ki nous éna enn communication franc. (Jean 15:15) Nous tou nous bizin éna bann bon camarades avec ki nous kapav confié nou bann pensées ek nou bann sentiments profond. En plus, plus nous konn nou bann frères bien, plus nous pou kapav aide zot. Kan nou prend compte zot l’intérêt dans sa façon-la, nous favorise enn tendre affection dans la congrégation. Lerla, nous pou faire l’expérience séki Jésus ti dire: “Éna beaucoup plus bonheur kan donné ki kan gagné.”—Actes 20:35; Philippiens 2:1-4.
13. Ki nous kapav faire pou montré ki nous éna enn l’affection véritable pou nou bann frères?
13 Pou ki nou l’affection envers lézot faire zot di-bien, fodé ki nous exprime li. (Proverbes 27:5) Kan nou l’affection li sincère, lézot pou trouve sa lor nou figure, ek lerla, sa kapav pousse zot pou réagir. Enn Proverbe Biblique dire: “Enn lizié ki brillé, faire léker content.” (Proverbes 15:30) Bann actions bien attentionné favorise enn tendre affection. Bien ki personne pa kapav acheté l’affection véritable, mais enn cadeau ki nous donné ar tou nou léker kapav faire beaucoup di-bien. Enn carte, enn lettre, “enn parole ki [nous] dire dans bon moment”—tousala kapav montré nous l’affection sincère. (Proverbes 25:11; 27:9) Enn fois ki nous finn gagne l’amitié lézot, nous bizin contigné manifesté enn l’affection sincère, pou nous garde sa l’amitié-la. Nous pou content présent pou soutenir nou bann camarades surtout dans bann moments difficile. La Bible dire: “Enn vrai camarade montré so l’amour touletan, li couma enn frère dans bann moments difficile.”—Proverbes 17:17.
14. Ki nous kapav faire si enn kikenn pa trop camarade ou nous?
14 Nous bizin réaliste, nous pa kapav atann ki nous pou proche ar zot tou dans congrégation. Li normal ki nous pou senti nous pli proche ar certains ki ar lézot. Donc, si enn kikenn pa trop camarade ar ou couma ou ti pou content, fodé pa ki dé-suite ou pensé ki ou éna enn problème, ou-soit c’est li ki éna enn problème. Ek pa bizin essaye force dimoune-la pou vinn proche ar ou. Si ou simplement montré ou l’amitié dans limites ki dimoune-la permette, peut-être ou pou kapav vinn pli proche ar li dans l’avenir.
“Mo Finn Accepté Toi”
15. Ki l’effet bann félicitations ou-soit enn manque félicitations éna lor lézot?
15 Sûrement Jésus ti bien content kan, pendant so baptême li ti tann enn la voix dans le ciel dire: “Mo finn accepté toi”! (Marc 1:11) Sa bann paroles favorable-la ti sûrement donne Jésus encore plus l’assurance ki so Papa éna l’affection pou li. (Jean 5:20) Malheureusement, certains jamais pa tann dimoune ki zot content ek ki zot respecté, félicite zot coumsa. Anne dire: “Beaucoup jeunes couma moi péna bann membres zot famille dans la vérité. Lakaz, nous tann zis critiques. Sa faire nous bien triste.” Mais kan sa bann jeunes-la vinn dans congrégation, zot ressenti soutien plein d’amour enn famille spirituel ki prend zot compte—bann papa, mama, frères ek soeurs ki éna même la-foi ki zot.—Marc 10:29, 30; Galates 6:10.
16. Kifer enn l’attitude critique pa aide lézot?
16 Dans certaines cultures, li bien rare ki bann parents, bann dimoune âgé, ek bann professeurs félicite bann jeunes sincèrement. Zot pensé ki sa pou faire sa bann jeunes-la vinn trop satisfait ar zot-même ek pou donne zot grandeur. Sa façon pensé-la kapav même affecté bann familles ek la congrégation. Par exemple, après ki enn jeune inn faire enn devoir ou-soit n’importe ki kitsoz, bann ki pli âgé peut-être pou dire li: “Pa mal, mais to kapav faire pli bien ki sa!” Ou-soit par lézot façon, zot kapav même faire jeune-la comprend ki zot pa satisfait ar li. Kan zot agir coumsa, beaucoup pensé ki sa pou motive bann jeunes pou faire zot maximum. Mais souvent, sa façon faire-la éna enn l’effet contraire, parski sa kapav décourage enn jeune ek faire li pensé ki li pa à la hauteur.
17. Kifer nous bizin rode bann l’occasion pou félicite lézot?
17 Seulement, c’est pa zis avant nous conseille enn dimoune ki nou pou félicite li. Bann félicitations sincères favorise enn tendre affection dans la famille ek dans la congrégation. Sa encourage bann jeunes pou al rode conseils avec bann frères ek soeurs ki éna l’expérience dans la congrégation. Donc, au lieu ki nous laisse nou culture dicté façon ki nous traite lézot, anou “mette lor nous, la nouvelle personnalité ki finn crée d’après volonté Bondié dans enn justice ek enn fidélité ki vrai.” Pareil couma Jéhovah, anou félicite lézot.—Éphésiens 4:24.
18. (a) Jeunes, couma ou bizin considère conseils ki bann pli âgé donne ou? (b) Kifer bann ki pli âgé bizin faire bien attention lor façon ki zot donne conseil?
18 De l’autre côté, jeunes, fodé pa ou pensé ki, si bann pli âgés pé corrige ou, ou-soit pé donne ou enn conseil, sa veut dire ki zot pa content ou. (Ecclésiaste 7:9) Au contraire! Zot faire sa parski zot intéresé ar ou ek zot éna enn grand l’affection pou ou. Sinon, kifer zot pou al fatigue zot pou koz ar ou lor certain sujet? Parski zot koné ki l’effet bann paroles kapav éna lor lézot, souvent bann ki pli âgé, surtout bann anciens, prend lé-temps pou réfléchi ek pou prié avant zot donne enn conseil. Zot envie faire surtout di-bien envers lézot.—1 Pierre 5:5.
“Jéhovah Rempli ar Tendre Affection”
19. Kifer bann ki finn faire mauvais l’experience avec certains, kapav rode l’aide Jéhovah?
19 Certains finn faire bann mauvais l’experience après ki zot finn manifesté zot l’affection. Donc, zot pensé ki si zot montré zot l’affection, sa pou faire zot gagne encore déception. Zot bizin éna courage ek enn grand la-foi pou zot ré-ouvert zot léker ar lézot. Mais fodé jamais zot bliyé ki Jéhovah “pa loin ar sakenn parmi nous.” Li invite nous pou vinn proche ar Li. (Actes 17:27; Jacques 4:8) Li comprend aussi la crainte ki nous éna ki lézot blesse nous, ek Li promette pou soutenir nous ek pou aide nous. Dans enn Psaume, David donne nous sa l’assurance-la: “Jéhovah prêt ar bann dimoune ki éna enn grand chagrin dans zot léker; ek Li sauve bann ki démoralisé.”—Psaume 34:18.
20, 21. (a) Couma nous koné ki nous kapav vinn proche ar Jéhovah? (b) Ki condition nous bizin rempli pou éna enn relation intime avec Jéhovah?
20 Relation pli important ki nous kapav développé, c’est enn l’amitié intime avec Jéhovah. Mais eski li vrai-même possible pou éna sa lien-la avec Jéhovah? Oui. La Bible montré à ki point bann zom ek bann femmes juste ti proche ar Jéhovah. D’ailleurs, séki zot finn dire, finn préservé dans la Bible pou ki nous gagne l’assurance ki nous aussi, nous kapav vinn proche ar Jéhovah.—Psaume 23, 34, 139; Jean 16:27; Romains 15:4.
21 N’importe kisannla kapav rempli bann conditions pou vinn proche ar Jéhovah. David ti pose sa question-la: “O Jéhovah, kisannla pou invité dans to la-tente?” Li ti réponn: “Celui ki agir sans défaut ek ki pratique la justice, ek ki dire la vérité dans so léker.” (Psaume 15:1, 2; 25:14) À mesure ki nous servi Jéhovah, nous pou remarqué ki nous gagne bann bons résultats dans nou la-vie ek nous gagne aussi so direction ek so protection. Lerla, nous pou trouvé ki “Jéhovah rempli ar enn tendre affection.”—Jacques 5:11.
22. Ki qualité relation Jéhovah envie ki so peuple éna entre zot?
22 Nous vrai-même béni ki Jéhovah désire éna bann relations personnel avec bann dimoune imparfait! Et nous alors, eski nous pa bizin manifesté enn tendre affection entre nous? Avec l’aide Jéhovah, sakenn parmi nous kapav manifesté ek bénéficié tendre affection ki éna parmi bann vrais Chrétiens. Kan Royaume Bondié pou gouverné, nous tou lor la terre pou ressenti sa l’affection-la éternellement.
Eski Ou Kapav Expliqué?
• Ki qualité l’ambiance bizin éna dans congrégation Chrétienne?
• Couma sakenn parmi nous kapav faire so part pou éna enn tendre affection dans congrégation?
• Couma bann félicitations sincères kapav favorise l’affection entre Chrétiens?
• Couma tendre affection ki Jéhovah manifesté, soutenir nous?
[Zimage, page 31]
Eski ou kapav “élargi” ou dans ou l’affection?