Contigne augmente zot l’amour pou zot bann frere

“Contigne marche dan l’amour, pareil couma Christ aussi finn content zot.”—ÉPH. 5:2.

1. Dapré Jésus, ki kitsoz important ti pou permette reconette so bann disciple?

BANN dimoune konn bann Témoins de Jéhovah pou predication la bonne nouvelle ki zot faire de porte en porte. Mais, Jésus ti montré ki c’est enn lot kitsoz ki ti pou faire bann dimoune reconette so bann vrai disciple. Li ti dire: “Mo pé donne zot enn nouveau commandement: zot bizin content zot camarade. Pareil couma mo finn content zot, zot aussi, zot bizin content zot camarade. Par sa tou dimoune pou koné ki zot mo bann disciple, si zot ena l’amour entre zot.”—Jean 13:34, 35.

2, 3. Ki l’effet nou l’amour ena lor bann dimoune ki assisté nou bann reunion?

² Okenn part nou pa pou trouve enn l’amour couma l’amour ki existé entre bann vrai chretien. Pareil couma enn lema attire ferraille, l’amour attire bann serviteur Jéhovah sakenn avek zot camarade pou servi dan l’unité. Li attire aussi bann dimoune sincere vers vrai l’adoration. Prend l’exemple Marcelino, enn missié ki reste Cameroun ek ki’nn perdi so lizié dan enn accident travail. Apré so accident, enn rumeur ti fané ki li ti’nn vinn aveugle parski li ti enn sorcier. Au lieu ki so pasteur ek lezot membre so religion ti reconforte li, zot ti mette li dehors. Kan enn Témoin de Jéhovah ti invite li pou assisté enn reunion, Marcelino ti hesité. Li pa ti envie ki bann dimoune rejette li encore.

³ Marcelino ti bien impressionné par seki ti passé dan la Salle du Royaume. Bann Témoins ti bien accueillir li ek bann l’enseignement la Bible ki li ti tendé ti encourage li. Li ti commence assisté tou bann reunion, li ti progressé dan so l’etude ek li ti prend bapteme en 2006. Zordi, li pé partage la verité avek bann membre so famille ek avek so bann voisin ek li’nn commence plusieurs l’etude la Bible. Marcelino envie ki bann dimoune ki pé etudié la Bible avek li ressenti mem l’amour ki li’nn koné parmi bann serviteur Bondié.

4. Kifer nou bizin obeir conseil ki Paul donne nou pou “contigne marche dan l’amour”?

⁴ Mais mem si nou l’amour li bien attirant, nou bizin faire zeffort pou contigne entretenir li. Mazinn enn difé ki nou faire a-soir kan nou al campé. So bann la flamme ek so chaleur attire bann dimoune. Mais, si bann dimoune ki pé profite sa difé-la pa contigne mette di-bois ladan, li pou teigne. Li pareil aussi pou l’amour extraordinaire ki uni bann membre dan enn congregation, si sakenn parmi nou pa faire zeffort pou fortifié sa l’amour-la, li pou vinn faible. Couma nou kapav faire sa? L’apotre Paul reponn: “Contigne marche dan l’amour, pareil couma Christ aussi finn content zot ek finn donne li-mem ar Bondié pou zot couma enn offrande ek enn sacrifice ki senti bon.” (Éph. 5:2) Enn question ki nou envie examiné c’est: ‘Dan ki fason mo kapav contigne marche dan l’amour?’

“Zot aussi, ouvert zot leker bien grand”

5, 6. Kifer Paul ti encourage bann chretien dan Corinthe pou “ouvert zot leker bien grand”?

⁵ L’apotre Paul ti ecrire bann chretien dan ancien la ville Corinthe ek li ti dire zot: “Nou la bouche finn ouvert pou zot, bann Corinthien, nou leker finn ouvert bien grand. C’est pa enn ti place ki zot ena dan nou leker, mais en seki concerne zot prop l’affection c’est dan zot leker ki zot pena assez place. Alors, couma enn recompense—mo pé koz ar zot couma bann zenfant—zot aussi, ouvert zot leker bien grand.” (2 Cor. 6:11-13) Kifer Paul ti encourage bann Corinthien pou ouvert zot leker bien grand en rapport avek zot l’amour?

⁶ Anou guetté couma congregation Corinthe ti’nn formé. Paul ti vinn Corinthe vers la fin l’an 50 nou lepok. Kan li ti fek commence preché certain dimoune ti opposé ar li, mais malgré sa Paul pa ti baisse lé-bras. Apré zis enn tipé le temps, beaucoup dimoune dan sa la ville-la ti accepté la bonne nouvelle. Paul ti passe “enn an ek six mois” pou enseigné ek pou fortifié sa nouveau congregation-la. Oui, li ti ena enn grand l’amour pou sa bann chretien dan Corinthe-la. (Actes 18:5, 6, 9-11) Zot ti ena tou bann raison pou content li ek pou respecté li. Pourtant, certain dan congregation ti eloigne-zot ar li. Kitfois ti ena certain parmi zot ki pa ti content bann conseil bien franc ki li ti donné. (1 Cor. 5:1-5; 6:1-10) Lezot kitfois ti’nn ecoute bann palab ki “bann super-apotre” ti fané. (2 Cor. 11:5, 6) Paul ti envie ki tou so bann frere ek soeur ena enn vrai l’amour pou li. Alors, li ti suppliye zot pou “ouvert zot leker bien grand,” setadir pou vinn proche ar li ek ar lezot chretien.

7. Couma nou kapav manifesté l’amour ek coumsa ‘ouvert nou leker bien grand’?

⁷ Ki nou kapav dire lor nou? Couma nou kapav ‘ouvert nou leker bien grand’ en rapport avek l’amour ki nou bizin ena pou nou bann frere? Li possible ki bann dimoune ki ena mem l’age ou-soit mem culture, attiré dan enn fason automatik sakenn ar zot camarade. Bann ki content mem divertissement souvent passe beaucoup le temps ensam. Mais, si sa l’interet ki nou ena pou certain chretien-la separe nou ar lezot, nou bizin ‘ouvert nou leker bien grand’ envers lezot. Li pou bon ki nou demann nou-mem: ‘Eski li rare ki mo preche ou-soit ki mo detann moi ensam avek bann frere ek soeur ki pa parmi mo bann camarade intime? Dan la Salle du Royaume, eski mo pa trop koz ar bann nouveau parski mo pensé ki d’abord zot bizin faire zeffort pou montré ki zot merite mo l’amitié? Eski dan congregation mo dire bonjour bann jeune ek bann agé toulé-deux?’

8, 9. Couma conseil ki Paul ti donné dan Romains 15:7 kapav aide nou pou dire bonjour tou dimoune dan enn fason ki pou augmente nou l’amour?

⁸ En seki concerne dire bonjour tou dimoune, seki Paul ti dire bann Romain kapav aide nou pou ena enn bon l’opinion lor nou bann frere. (Lire Romains 15:7.) Mot grec ki’nn traduire dan sa verset-la par “accueil” vedir “recevoir enn dimoune avek bonté ou-soit hospitalité, accepté enn kikenn parmi bann dimoune ki nou frequenté ek nou bann camarade.” Dan lepok biblik, kan enn dimoune ti recevoir so bann camarade kot li, li ti faire zot koné ki quantité li ti content pou trouve zot. Dan enn certaine sens, Christ inn accueillir nou dan sa fason-la, ek nou encouragé pou imite li dan fason ki nou accueillir bann lezot chretien.

⁹ Kan nou dire bonjour nou bann frere dan la Salle du Royaume ek dan lezot place, nou kapav passe enn tipé le temps avek bann ki nou pa finn joinde ou-soit ki nou pa finn kozé depuis inpé longtemps. Kifer nou pa passe deux-trois minute pou koz ar zot? Dan prochain reunion, nou kapav faire pareil avek lezot. Dan inpé le temps, nou pou’nn gagne bann bon conversation avek preské tou nou bann frere ek soeur dan congregation. Fodé pa nou tracassé si nou pa reussi koz ar zot tou mem jour. Personne pa bizin senti-li offensé si nou pa reussi dire li bonjour chaque reunion.

10. Ki possibilité extraordinaire nou tou nou ena dan congregation, ek couma nou kapav profite sa bien?

¹⁰ Dire bonjour lezot, c’est premier pas ki nou faire pou accueillir zot. C’est enn pas ki kapav faire nou ena bann bon conversation ek developpe enn vrai l’amitié avek zot. Par exemple, kan bann ki assisté l’assemblée faire connaissance avek lezot ek commence enn conversation, zot envie pou retrouve zot camarade enn lot fois. Bann volontaire ki travail lor construction bann la Salle du Royaume ek bann ki participe dan bann secours, souvent vinn bann bon camarade parski zot aprann pou konn sakenn zot bann bon qualité a travers bann l’experience ki zot inn faire ensam. Dan l’organisation Jéhovah ena beaucoup possibilité pou developpe bann l’amitié solide. Si nou ‘ouvert nou leker bien grand’ nou pou augmente quantité camarade ki nou ena, ek sa pou augmente l’amour ki uni nou dan vrai l’adoration.

Trouve le temps pou lezot

11. Couma nou trouvé dan Marc 10:13-16, ki l’exemple Jésus inn donne nou?

¹¹ Tou bann chretien bizin faire zeffort pou montré ki zot abordable, pareil couma Jésus ti été. Reflechi lor fason ki Jésus ti reagir kan so bann disciple ti essaye empeche bann parent pou amenn zot zenfant ar li. Li ti dire: “Laisse bann ti zenfant vinn vers moi; pa rod empeche zot, parski royaume Bondié li pou bann dimoune ki pareil couma zot.” Lerla “li ti prend bann zenfant dan so lé-bras, li ti pose so la main lor zot, ek li ti commence beni zot.” (Marc 10:13-16) Maziné ki quantité sa bann jeune-la ti surement content ki nou Grand Enseignant ti montré l’amour envers zot coumsa!

12. Ki kapav empeche nou pou koz avek lezot dimoune?

¹² Chaque chretien bizin demann li-mem: ‘Eski mo disponible pou lezot ou-soit eski souvent mo parette trop occupé?’ Bann l’habitude ki pa necessairement mauvais kapav parfois crée bann barriere ek empeche bann dimoune vinn koz ar nou. Si par exemple devant lezot souvent nou servi enn telephone portable ou-soit nou ena bann ecouteur dan nou zoreille, kitfois nou pé faire zot croire ki nou pa envie koz ar zot. Si souvent lezot trouve nou lizié collé lor nou ti computer ki nou kapav mette dan nou poche, zot kapav pensé ki nou pa interessé pou koz ar zot. Bien sur, ena “enn le temps pou reste trankil.” Mais kan nou parmi bann dimoune, souvent c’est “le temps pou kozé.” (Eccl. 3:7) Certain kapav dire: “Mo prefere reste dan mo coin” ou-soit, “Mo pa content kozé dan gramatin.” Kan-mem, si nou commence bann conversation amical mem si nou pa envie faire sa, nou pou montré ki nou ena enn l’amour ki “pa rod so prop l’interet.”—1 Cor. 13:5.

13. Dapré Paul, couma eski Timothée ti bizin considere so bann frere ek soeur spirituel?

¹³ Paul ti encourage Timothée ki ti encore jeune pou ena respé pou tou bann membre congregation. (Lire 1 Timothée 5:1, 2.) Nou aussi nou bizin traite bann chretien agé coumadir zot nou mama ek nou papa ek bann jeune coumadir zot nou bann prop frere ek soeur, bann zenfant nou prop parent. Si nou ena sa l’attitude-la, personne parmi nou bann frere ek soeur pa pou senti-zot couma enn etranger kan zot avek nou.

14. Ki bann bienfait ena kan nou gagne bann conversation encourageant avek lezot?

¹⁴ A mesure ki nou ena bann conversation encourageant avek lezot, nou fortifié zot lor plan spirituel ek affectif. Enn frere ki travail dan enn Béthel ena bann bon souvenir lor lepok kan li ti fek rente Béthel. Plusieurs Béthélite ki ti pli agé ti prend le temps pou koz ar li regulierement. Zot parole encourageant ti faire li senti ki li ti vrai-mem forme partie dan famille Béthel. Asterla, li essaye imite zot kan li gagne bann conversation avek lezot Béthélite.

L’humilité aide nou pou faire la paix

15. Ki montré ki kapav ena bann desaccord entre nou?

¹⁵ Évodie ek Syntyche, deux soeur spirituel ki ti reste dan ancien la ville Philippes, ti parette ena difficulté pou reglé enn probleme entre zot. (Phil. 4:2, 3) Paul et Barnabas ti gagne enn grand discussion et tou dimoune ti’nn konn sa, ek a cause sa, sakenn finn al so coté pendant enn temps. (Actes 15:37-39) Sa bann recit-la montré ki parfois li arrivé ki ena bann desaccord entre bann vrai adorateur Jéhovah. Jéhovah donne nou l’aide necessaire pou reglé bann probleme ek pou retabli nou l’amitié. Mais Li demann nou pou faire enn kitsoz.

16, 17. (a) Ki quantité l’humilité li important pou reglé bann probleme personnel? (b) Couma fason ki Jacob ti approche Esaü montré valeur l’humilité?

¹⁶ Faire coumadir ou ek enn camarade zot pou al faire enn voyage dan l’auto. Avant ki ou kapav commence ou voyage, ou bizin tourne la clé contact ek mette ou moteur en marche. Pou nou kapav reglé bann probleme personnel, sa aussi commence par enn la clé. Sa la clé-la c’est l’humilité. (Lire Jacques 4:10.) Pareil couma l’exemple biblik dan prochain paragraphe pou montré nou, sa la clé-la permette bann ki ena probleme entre zot pou applik bann principe biblik.

¹⁷ Vingt an ti’nn passé depuis ki Esaü ti vinn amer parski li ti perdi so droit premier-né ki Jacob, so frere jumeau, ti’nn prend, ek li ti envie touye li. Asterla, sa deux jumeau-la ti pou réjoinde apré tou sa le temps-la, “ek Jacob ti gagne bien peur ek li ti commence tracassé.” Li ti pensé ki ti ena enn grand possibilité ki Esaü attak li. Mais kan zot ti joinde, Jacob ti faire enn kitsoz ki Esaü pa ti pé attann. Li “ti commence prosterné a terre” a mesure ki li ti approche ar so frere. Ki ti arrivé apré? “Esaü ti galopé pou vinn joinde li, li ti maye li, ti tombe dan so lé-bras, ti embrasse li, ek zot toulé-deux ti ploré.” Ti nepli ena okenn risk ki ti pou ena enn la guerre entre zot. L’humilité Jacob ti permette li pou surmonte n’importe ki la haine ki Esaü ti’nn kapav ena kont li.—Gen. 27:41; 32:3-8; 33:3, 4.

18, 19. (a) Kan nou gagne enn probleme personnel avek enn lot dimoune, kifer li bien important ki nou prend l’initiative pou applik conseil ki la Bible donne nou? (b) Kifer fodé pa nou baisse lé-bras si lot dimoune-la pa reagir dan enn bon fason premier coute?

¹⁸ La Bible donne bann bon conseil lor fason pou reglé bann probleme. (Mat. 5:23, 24; 18:15-17; Éph. 4:26, 27)a Mais si nou pa mette sa bann conseil-la en pratik avek humilité, li pou difficile pou faire la paix. Si nou attann ki lot dimoune-la montré l’humilité, alors ki nou aussi nou ena sa la clé-la dan nou la main, sa li pa enn solution.

¹⁹ Si pou certain raison, nou bann demarche pou faire la paix pa’nn reussi, fodé pa nou baisse lé-bras. Kitfois lot dimoune-la bizin le temps pou comprend so bann prop sentiment. Bann frere Joseph ti faire traitre ar li. C’est apré bien longtemps ki zot finn retrouve Joseph, ek lerla li ti premier ministre l’Égypte. Mais zot ti’nn changé ek finalement zot ti suppliye li pou pardonne zot. Joseph ti pardonne zot, ek bann garson Jacob ti vinn enn nation ek zot ti gagne privilege pou porte nom Jéhovah. (Gen. 50:15-21) Kan nou garde la paix avek nou bann frere ek soeur, nou favorise l’unité ek la joie dan congregation.—Lire Colossiens 3:12-14.

Anou montré l’amour “par bann action ek la verité”

20, 21. Ki leson nou aprann ar Jésus kan li ti lave lipié so bann zapotre?

²⁰ Enn tipé avant so la mort, Jésus ti dire so bann zapotre: “Mo finn donne zot l’exemple, pou ki, pareil couma mo finn faire pou zot, zot aussi zot faire pareil.” (Jean 13:15) Li ti’nn fek fini lave lipié so douze zapotre. Jésus pa ti zis faire sa pou respecté enn tradition ou-soit zis par bonté. Avant ki Jean ti raconte recit kot Jésus ti lave zot lipié, li ti ecrire: “Jésus, ki ti content bann ki ti pou li dan le monde, ti content zot ziska la fin.” (Jean 13:1) C’est so l’amour pou so bann disciple ki ti pousse Jésus pou faire enn kitsoz ki normalement enn esclave ti faire. Asterla, zot ti bizin faire bann bon kitsoz sakenn pou zot camarade avek humilité. Oui, enn vrai l’amour pou tou nou bann frere bizin pousse nou pou prend zot compte ek pou interessé ar zot tou.

²¹ L’apotre Pierre, ki ti gagne privilege ki Garson Bondié lave so lipié, ti comprend seki Jésus ti faire. Li ti ecrire: “Asterla ki zot finn purifié zot nâme par zot l’obeissance pou la verité—ek grace a sa finn ena enn l’amour fraternel ki pa hypocrite—content sakenn zot camarade avek enn grand l’amour, avek tou zot leker.” (1 Pierre 1:22) L’apotre Jean, ki ti gagne aussi privilege ki le Seigneur lave so lipié, ti ecrire: “Bann ti zenfant, anou montré nou l’amour, pa zis en parole ni avek nou la bouche, mais par bann action ek la verité.” (1 Jean 3:18) Anou faire en sorte ki nou leker pousse nou pou montré l’amour ki nou ena pou nou bann frere par nou bann action.

[Note]

Eski ou rappel?

• Dan ki fason nou kapav ‘ouvert nou leker bien grand’ en rapport avek l’amour ki nou bizin ena sakenn pou nou camarade?

• Ki pou aide nou pou donne lezot nou le temps?

• Ki role l’humilité joué kan nou pé rod faire la paix?

• Ki bizin pousse nou pou interessé ar lezot?

[Zimage page 24]

Accueillir avek amour ou bann frere ek soeur

[Zimage page 26]

Pa rate bann l’occasion pou trouve le temps pou lezot