Zistwar 25
Jacob Al Dan L’égypte
JOSEPH nepli kapav kontrol so bann santiman. Li demann tou so bann serviter pou sorti. Asterla ki li tousel avek so bann frer, li koumans plore. So bann frer etone. Zot pa pe konpran kifer li pe plore koumsa. Finalman li dir zot: ‘Momem Joseph. Eski mo papa ankor vivan?’
So bann frer telman soke ki zot pa kapav koze. Zot gagn per, me Joseph dir zot: ‘Silvouple vinn pre ar mwa.’ Lerla li dir: ‘Mo zot frer, Joseph, ki zot inn vande.’
Li dir zot ankor: ‘Pa santi zot koupab parski zot finn vann mwa. Se Bondie Limem ki finn avoy mwa l’Égypte pou sov lavi bann dimounn. Pharaon finn fer mwa vinn sef dan pei. Alor, degaze al kot mo papa ek rakont li sa. Dir li vinn res isi.’
Lerla, Joseph may so bann frer, li ser zot dan so lebra ek li anbras zot. Kan Pharaon aprann ki bann frer Joseph inn vini, li dir Joseph: ‘Zot kapav pran bann kales pou al rod zot papa ek zot fami pou zot vinn res isi. Mo pou donn zot pli bon later dan l’Égypte.’
Se seki zot fer. Jacob vinn res l’Égypte avek tou so fami. Eski to trouv Joseph pe may so papa dan sa zimaz-la?
Jacob so fami inn grandi. Antou zot 70 kan zot vinn l’Égypte; ena Jacob, so bann zanfan ek so bann ti-zanfan. Me ena osi zot bann madam, ek kitfwa boukou serviter. Zot tou zot vinn res dan l’Égypte. Bondie ti sanz nom Jacob, Li ti apel li Israël, akoz sa apel zot bann Izraelit. Kouma nou pou trouve plitar, bann Izraelit finn vinn enn pep bien spesial pou Bondie.