“Silvouple, Ekout Mo Rev”

JOSEPH pe get ver les, enn gran tristes lor so figir. Si selman li kapav kit sa karavann-la sove-ale. So lakaz kit par, par la dan Hébrôn, pa tro lwin, zis deryer sa bann kolinn-la. Sirman taler, kan soley pou tonbe, so Papa, Jacob pou al dormi dan so lakaz, san ki li kone ki’nn ariv so garson prefere. Me, la kot li ete, Joseph pa kapav al zwenn li; parski tou seki li kone se ki kitfwa zame li pa pou retrouv figir so vie papa ankor. Lor sa larout kas-kase-la, bann marsan pe tap zot bann samo pou fer zot avanse. Me, a sak fwa zot zet enn koudey lor Joseph. Li pou zot asterla, ek zot pa’le kit li mem enn pous. Pou zot, sa garson-la ena mem valer ki zot kargezon delwil ek lagom parfime, bann marsandiz ki bien ser. Dan l’Égypte, kot zot pe ale, zot pou gagn boukou profi ar tousala.

Joseph pena mem 17 an. Mazinn li pe vire, pe plis so lizie pou get lesiel, amezir ki soley pe desann dan lorizon Lamer Méditerranée. Li pe esey konpran kouma enn sel kout so lavi inn devir anba-lao koumsa. Li pa’le krwar ki so bann prop frer inn preske touy li ek inn vann li kouma enn esklav. Joseph santi so lagorz sere, larm koumans roule dan so lizie. Li pa kone ki demin inn rezerve pou li.

Joseph so bann prop frer inn bat li, ek inn rezet li. Me kouma Joseph inn retrouv li dan enn sitiasion difisil koumsa? Ki nou kapav aprann gras-a lafwa sa zenn garson-la?

ENN LAVI FAMI BIEN KONPLIKE

Joseph sorti dan enn fami kot ena boukou dimounn. Me selman, pena ni linite, ni boner dan so fami. Fason ki Labib dekrir fami Jacob samem ase pou prouve ki poligami fer boukou dega. Sa lepok-la, poligami ti enn koutim bien ankre. Bondie ti toler sa pratik-la ziska ki so Garson vini ek retabli prinsip ki Li ti met an plas depi koumansman, setadir ki enn zom bizin ena enn sel madam. (Matthieu 19:4-6) Jacob ena omwin 14 zanfan avek kat madam​—so de madam, Léa ek Rachel, ek zot bann servant, Zilpa ek Bilha. Depi koumansman, Jacob kontan so zoli Rachel. Malerezman, Papa Rachel anbet li ek fer li marye avek Léa, gran ser Rachel. Me, sa lamour ki li ena pou Rachel-la, zame li’nn resanti sa pou Léa. Sa de madam-la zame ti dakor. Sa ti afekte osi zot bann zanfan; sakenn ti zalou zot kamarad.​—Genèse 29:16-35; 30:1, 8, 19, 20; 37:35.

Pandan lontan, Rachel pa’nn kapav gagn zanfan. Kan finalman li reisi donn nesans Joseph, Jacob bien kontan sa garson ki li’nn gagne dan so vie zour-la. Par exanp, kan Jacob ek so fami ti lor larout pou al zwenn so frer Ésaü, ki ti ena lintansion pou touy li, li ti fer sir ki Rachel ek ti Joseph ti an sekirite. Akoz sa li ti met zot par deryer net. Sirman seki finn pase sa zour-la inn res grave dan lespri Joseph. Mazine ki li’nn resanti kan enn gramatin li’nn rann li kont ki so papa, ki ankor touzour bien for malgre so laz, pe koumans mars bwate. Devet li’nn poz limem enn kantite kestion. Sirman li’nn gagn sok kan li’nn aprann ki so papa inn lite enn nwit avek enn anz pwisan! Ek pou ki rezon? Parski Jacob ti anvi gagn enn benediksion Jéhovah. Ki rekonpans li’nn gagne? Bondie finn sanz so nom, finn apel li Israël. Enn nasion antie ti pou port so nom! (Genèse 32:22-31) Avek letan, Joseph inn aprann ki bann garson Israël ti pou donn nesans bann tribi sa nasion-la!

Plitar, Joseph, konn enn gran maler. Alor ki li ankor bien zenn, dimounn ki li pli kontan ek ki li pli bizin, inn kit li. So mama inn perdi lavi kan li pe donn nesans so ti frer, Benjamin. So papa bien-bien afekte. Mazinn Jacob pe souy lizie Joseph avek boukou lamour. Mazinn li pe rekonfort so garson avek mem lespwar ki enn fwa ti rekonfort Abraham, granper Jacob. Sirman Joseph so leker bien touse kan li aprann ki enn zour Jéhovah pou redonn so mama lavi! Kitfwa sa finn fer Joseph ena enn pli gran lamour ankor pou “Bondie . . . bann ki vivan,” sa Bondie ki zenere la. (Luc 20:38; Hébreux 11:17-19) Lefe ki Jacob inn perdi so madam, li’nn touletan bien kontan sa de garson ki Rachel inn donn li la.​—Genèse 35:18-20; 37:3; 44:27-29.

Avek enn latansion spesial koumsa, boukou zanfan kapav vinn bann zanfan gate-pouri ouswa mem malelve. Me pa Joseph. Okontrer, li’nn obzerv bann zoli kalite ki so bann paran ti ena, ek li’nn aprann. Li’nn devlop osi enn lafwa solid ek kapasite pou fer bien diferans ant seki bon ek seki pa bon. Joseph enn berze. Laz 17 an, alor ki li pe ed so bann gran frer, li al remark enn kitsoz ki pa bon. Eski li anvi res trankil zis pou gagn zot faver? Nou pa kone. Me seki nou sir se ki li’nn fer seki drwat. Li al raport sa so papa. (Genèse 37:2) Sa aksion ki Joseph fer avek boukou kouraz-la, fer Jacob ena enn pli bon lopinion ankor lor so garson. Se enn bon lexanp pou bann zenn Kretien zordi. Li bon ki zot reflesi lor la! Li kapav arive ki zot tante pou kasiet enn fot bien grav enn lot dimounn, kitfwa zot frer ouswa zot ser ouswa mem enn kamarad. Ki li bon zot fer dan sa ka la? Li bon zot imit Joseph ek fer sir ki bann ki dan pozision pou ed sa kikenn ki’nn fer pese-la, zot kone.​—Lévitique 5:1.

Nou kapav aprann osi enn leson kan nou examinn lavi fami Joseph. Azordi, li vre ki bann vre Kretien nepli pratik poligami, me selman parmi lepep Jéhovah ena sertin ki’nn remarye. Dan sa bann fami-la, ena bann boper, belmer, demi frer ek demi ser. Ki zot tou kapav aprann ar fami Jacob? Ena de kitsoz ki kapav minn linite enn fami: Preferans ek favoritism. Kouma bann paran ki’nn remarye kapav montre ki zot ena sazes? Se kan zot fer tou pou konvink zot bann zanfan ek bann zanfan zot konzwin ki zot kontan zot tou parey. Zot bizin osi fer zot konpran ki sakenn ena bann don inik, ek ki sakenn kapav fer so par pou ki zot fami viv ere.​—Romains 2:11.

ZALOUZI PRAN RASINN

Jacob donn so garson enn gran loner; li donn li enn linz spesial. Kifer? Kitfwa parski li trouve ki Joseph inn pran pozision pou seki drwat, avek kouraz. (Genèse 37:3) Boukou dir ki sa linz-la ti enn palto a-re ouswa enn palto plizir kouler. Me pena gran prev pou sa. An realite, se enn zoli rob, mans long ek kitfwa li bat kot so lipie. Li posib ki se bann gran dimounn ouswa bann prins ki ti met sa kalite linz la.

Jacob pena move lintansion kan li fer sa, ek Joseph sirman bien touse par sa kado ki so papa inn donn li la. Sa montre ki so papa bien kontan ek bien estim li. Me sa linz-la pou met li dan lakle. Kifer nou dir sa? Dabor, rapel ki Joseph enn berze. Li fer bann travay maniel bien-bien dir. Mazinn sa zenn garson-la pe travers bann long-long lerb, pe grinp lor bann ros, ouswa pe sey tir enn mouton ki’nn maye dan enn ti pie pikan, tousala, abiye kouma enn prins avek sa long rob-la. Pli pir ankor, kan so bann frer pou trouve ki Jacob ena enn preferans pou li, ki lefe sa pou ena lor relasion ki li ena avek zot?

Labib reponn: “Kan so bann frer ti trouve ki zot papa ti pli kontan li ki tou so bann frer, zot ti koumans ena laenn pou li, zot pa ti kapav koz ar li bien kouma bizin.”a (Genèse 37:4) Nou kapav konpran kifer bann frer Joseph ti zalou. Me, selman zot inn mal fer kan zot inn les sa pwazon-la pran plas dan zot leker. (Proverbes 14:30; 27:4) Eski to’nn deza retrouv twa dan sa sitiasion koumsa? Eski to’nn deza resanti enn zalouzi monte kan enn kikenn inn gagn latansion ouswa loner ki twa to ti pe anvi? Rapel bann frer Joseph. Zot zalouzi inn amenn zot pou fer bann aksion ki plitar zot pou bien regrete. Zot lexanp li enn lavertisman pou bann Kretien. Li rapel nou ki li pli bon nou “partaz lazwa bann ki zwaye.”​—Romains 12:15.

Joseph sirman santi ki so bann frer ena laenn pou li. Alor, eski li kasiet so rob kouma li trouv so bann frer? Kitfwa se seki li anvi fer. Me, rapel ki Jacob ti donn Joseph sa linz-la pou montre ki li kontan li ek ki li’nn donn li so faver. Joseph ti anvi azir an-akor avek konfians ki so papa ti ena an li, akoz sa li’nn met sa linz la. So lexanp bien itil pou nou. Mem si nou Papa ki dan lesiel pa fer preferans, parfwa Li swazir enn parmi so bann fidel serviter ek Li donn li so faver. Anplis, Li demann zot tou pou res diferan ar sa move lemond imoral la. Linz Joseph ti spesial, sa ti rann li diferan. Li parey osi pou kondwit bann vre Kretien. Sa rann zot diferan ar bann ki otour zot. Parfwa, akoz nou kondwit, sertin zalou ouswa mem ena laenn pou nou. (1 Pierre 4:4) Eski enn Kretien bizin kasiet so vre lidantite antan ki enn serviter Bondie? Non, parey kouma Joseph osi pa ti bizin kasiet so rob.​—Luc 11:33.

BANN REV JOSEPH

Enn tipe plitar, Joseph gagn de rev extraordiner. Dan so premie rev, Joseph trouv limem ek so bann frer, sakenn pe atas bann pake dible. Me so pake dible leve ek tini drwat. Lerla bann pake dible ki so bann frer inn atase anserkle seki pou li, ek prostern devan sa. Dan so deziem rev, soley, lalinn ek 11 zetwal ti pe prostern devan li. (Genèse 37:6, 7, 9) Se bann rev bien etranz me anmemtan bien vivan. Ki Joseph pou fer asterla?

Sa bann rev-la sorti kot Bondie Jéhovah. An realite, se bann profesi ek Bondie anvi ki Joseph pas mesaz ki ena ladan. Dan enn sertin sans, Joseph ti pou bizin fer seki tou bann profet finn fer plitar, setadir anons So pep rebel bann mesaz ek bann zizman Jéhovah.

Avek takt Joseph dir so bann frer: “Silvouple ekout mo rev.” So bann frer inn konpran rev-la ek zot pa’nn kontan ditou. Zot reponn: “Eski vremem to pou fer twa vinn lerwa lor nou ek to pou dominn lor nou?” Labib azoute: “Alor, akoz so bann rev ek seki li’nn dir, zot inn trouv enn lot rezon pou ena laenn pou li.” Kan Joseph rakont so papa ek so bann frer so deziem rev, la osi zot mal reazir. Nou lir: “So papa ti kriy ar li ek ti dir li: ‘Ki savedir sa rev-la? Eski vremem mwa, ansam avek to mama ek to bann frer, nou pou vini ek pou prostern ater devan twa?’” Malgre sa, Jacob kontign pans lor seki Joseph inn dir li. Eski Jéhovah pe kominik avek sa garson-la?​—Genèse 37:6, 8, 10, 11.

Se pa premie fwa ni mem dernie fwa ki Jéhovah inn demann enn so bann serviter pou transmet enn mesaz profetik, enn mesaz ki boukou dimounn pa ti pou aksepte ek ki ti kapav fer zot gagn persekision. Jésus limem pli gran parmi tou bann ki’nn anons sa kalite mesaz la ek li’nn dir so bann disip: “Si bannla finn persekit mwa, bannla pou persekit zot osi.” (Jean 15:20) Bann Kretien ninport ki laz kapav aprann ar lafwa ek kouraz zenn garson, Joseph.

LAENN MONT DAN LATET

Enn tipe apre, Jacob avoy Joseph pou al zwenn so bann gran frer ki pe okip zot mouton pre ar lavil Shekèm. Zot ena bann lennmi laba, parski pa tro lontan zot ti atak sa lavil-la. Alor, li normal ki Jacob trakase pou so bann garson. Akoz samem li avoy Joseph pou gete si zot bien. Mazinn seki Joseph pe resanti. Li kone so bann frer deteste li ankor plis! Asterla ki li pe al ver zot antan ki mesaze zot papa, kouma zot pou pran sa? Malgre sa, Joseph obeir so papa ek li ale.​—Genèse 34:25-30; 37:12-14.

Se enn long vwayaz​—anviron kat-sink zour lamars. Shekèm trouv apepre 80 kilomet dan lenor Hébrôn. Me kan Joseph ariv Shekèm, li aprann ki so bann frer inn al Dothân, enn lavil ki trouv 22 kilomet dan lenor. Finalman Joseph ariv Dothân. So bann frer trouv li pe vini delwin. Bien vit laenn koumans mont dan zot latet. Labib dir: “Zot dir zot kamarad: ‘Gete! Ala seki fer rev la pe vini. Anou ale, nou al touy li ek zet li dan enn sa bann pwi la, apre nou’a dir ki enn zanimo sovaz inn devor li. Lerla nou ava gete ki pou ariv so bann rev.’” Me Ruben reisi konvink so bann frer pou zet Joseph vivan dan pwi la. Kitfwa li ti panse li pou kapav vinn sap so frer plitar.​—Genèse 37:19-22.

Joseph pa konn ditou ki pe arive. Li al zwenn zot dan lespwar ki bannla pou koz bien ar li. Olie sa, so bann frer atak li! Avek laraz, zot ras so zoli rob lor li, zot ris li zot amenn li kot enn pwi ki’nn sek, ek zot zet li ladan. Joseph tonbe! Apre sa sok-la, li reisi debout lor so de lipie. Me, par limem zame li pa pou kapav sorti dan pwi-la. Li lev lizie li trouv zis lesiel. Li tann lavwa so bann frer inpe lwin. Li kriye zot, sipliy zot, me zot fer koumadir zot pa tande. San pitie, zot asize zot manze pa tro lwin ar sa pwi-la. Ruben pa la. Alor, ankor enn fwa, zot pans pou touy Joseph. Me, Juda konvink zot pou vann li avek bann marsan ki pe pase. Dothân trouv pre avek semin ki amenn ver l’Égypte. Enn ti moman apre, enn karavann Yismaelit ek Madianit pase. Avan ki Ruben retourne, travay-la inn fini fer. Pou 20 sicle, zot inn vann zot frer kouma enn esklav.b​—Genèse 37:23-28; 42:21.

Nou retrouv nou la kot nou ti koumanse, dan sa karavann-la. Amezir ki bannla pe pran direksion lesid lor larout ki pe al ver l’Égypte, Joseph ena linpresion ki asterla tou inn fini pou li. Bannla inn derasinn li, inn separ li net ar so fami! Pandan plizir lane, li pa pou konn nanye ki pe arive dan so fami. Li pa pou kone ki Ruben inn resanti kan li’nn retourne ek li’nn rann li kont ki Joseph pa la. Li pa pou kone ki kantite sagrin Jacob inn sagrin kan bannla inn anbet li ek inn fer li krwar ki so Joseph ki li bien kontan, inn mor. Li pa pou kone ki’nn ariv so granper Isaac, ki ankor vivan. Ek li pa pou konn nanye lor so ti frer Benjamin. Pandan tou sa letan-la, Joseph pou mank li boukou. Me eski vremem Joseph inn perdi tou?​—Genèse 37:29-35.

Joseph ti ankor ena enn kitsoz ki so bann frer pa ti kapav pran: so lafwa. Li ti konn boukou kitsoz lor so Bondie Jéhovah ek nanye ni personn pa ti pou kapav pran sa ar li​—pa mem lapert so lakaz, ni bann difikilte ki li’nn gagne alor ki li ti anferme pandan sa long vwayaz pou al l’Égypte-la, ni mem imiliasion ki li’nn kone kan finn vann li kouma enn esklav avek Potiphar, enn Ezipsien ki ti bien ris. (Genèse 37:36) Lafwa Joseph ek so determinasion pou res atase ar so Bondie inn vinn deplizanpli solid dan sa bann moman difisil-la. Dan bann prosin lartik nou pou trouve kouma gras-a so lafwa, Joseph inn vinn ankor pli itil pou Jéhovah, ek pou so fami, ki dan difikilte. Alor li saz ki nou imit lafwa Joseph!