Enseigne ou bann zenfant

JALOUSIE. Ki sa vedir? Eski to finn deja trouve sa difficile pou content enn dimoune parski lezot dire ki li gentil, li joli, ou-soit li bien malin?a— C’est sa-mem ki kapav arrivé kan to jaloux enn kikenn.

Dan enn famille, kapav ena jalousie si bann parent ena enn preference pou enn zenfant plus ki lezot. La Bible koz lor enn famille kot jalousie ti crée enn grand probleme. Anou guette seki ti passé ek ki leson ki nou kapav tiré.

Joseph ti 11^eme garson Jacob, ek so bann demi-frere ti jaloux li. To koné kifer?— C’est parski zot papa, Jacob, ti ena enn preference pou Joseph. Par exemple, Jacob ti faire coude enn joli linge a raie pou Joseph. Jacob ti pli content Joseph “parski c’est garson ki li ti’nn gagné dan so vié jour” ek premier zenfant ki Rachel, so madame ki li ti bien content, ti donne li.

Dapré la Bible ‘kan bann frere Joseph ti trouvé ki zot papa ti pli content li ki zot, zot ti commence ena la haine pou Joseph.’ Enn jour, Joseph ti dire so famille ki dan enn rêve li ti trouve zot tou, parmi so papa aussi, pé prosterne devant li. La Bible dire: “So bann frere ti commence jaloux li,” ek mem so papa ti criye ar li parski li ti raconte sa qualité rêve-la.—Genèse 37:1-11.

Inpé le temps apré sa, kan Joseph ti ena 17 an, so bann frere ti al bien loin pou prend soin troupeau mouton ek cabri ki zot famille ti ena. Alors Jacob ti envoye Joseph pou prend nouvelle so bann frere. Eski to koné ki la plupart parmi zot ti envie faire kan zot ti trouve li pé vini?— Zot ti envie touye li! Mais deux parmi zot, Ruben ek Juda pa ti envie faire sa.

Kan bann marchand ki ti pé al l’Égypte ti passe par la, Juda ti dire so bann frere: “Anou vann li.” C’est seki zot ti faire. Apré sa, zot ti touye enn bouc ek zot ti trempe linge Joseph dan so di-sang. Plitar, kan zot ti montré sa linge-la zot papa, li ti ploré ek li ti dire: ‘Enn mauvais zanimo sauvage surement inn devore Joseph!’—Genèse 37:12-36.

Plitar, Joseph ti gagne l’estime Pharaon, le roi l’Égypte parski avek l’aide Bondié, li ti kapav explik deux rêve ki Pharaon ti faire. Dan so premier rêve, ti ena sept vache ki ti en bonne santé ek apré sept vache ki ti malade. Dan deuxieme rêve-la, ti ena sept zepi ki ti bien joli ek apré, sept zepi ki ti fletri. Joseph ti expliké ki toulé-deux rêve ti represente mem kitsoz: ti pou ena sept l’année kot ti pou ena bann bon recolte ek apré sa, ti pou ena sept l’année famine. Lor l’ordre Pharaon, Joseph ti gagne responsabilité pou ramasse tou bann mangé ki ti pou produire pendant bann l’année kot ti pou ena l’abondance, pou preparé pou la famine.

Kan la famine ti vini, famille Joseph, ki ti reste bien loin, ti bizin mangé. Jacob ti envoye dix grand frere Joseph en Égypte pou al rod mangé. Zot ti vinn devant Joseph, mais zot pa ti reconette li. Sans ki Joseph faire zot koné kisannla li ti été, li ti testé zot, ek li ti rann-li compte ki zot ti regretté ki zot ti’nn traite li dan enn mauvais fason. Lerla Joseph ti dire zot kisannla li ti été. Zot ti bien content pou retrouve-zot ek zot ti tombe dan le bras zot camarade!—Genèse, chapitre 40 ziska chapitre 45.

Ki to kapav aprann concernant jalousie dan sa zistoire la Bible-la?— Kapav gagne bann grand probleme a cause jalousie. Sa kapav mem amenn enn dimoune pou envie faire di-tort so prop frere! Anou lire Actes 5:17, 18 ek Actes 7:54-59 ek anou guetté ki jalousie ti pousse bann dimoune pou faire ar bann disciple Jésus.— Apré ki to’nn lire sa, eski to trouvé kifer nou bizin faire attention pou pa jaloux?—

Joseph ti vive ziska 110 an. Li ti gagne bann zenfant, bann ti-zenfant ek plitar, bann arriere-ti-zenfant. Nou kapav sur ki souvent Joseph ti montré zot ki zot bizin content zot camarade ek evite vinn jaloux.—Genèse 50:22, 23, 26.

[Note]

Bann question:

○ Ki sa vedir jalousie?

○ Ki jalousie ti pousse bann frere Joseph pou faire?

○ Kifer Joseph ti pardonne so bann frere?

○ Ki nou kapav aprann dan sa zistoire-la?