Leson 10

Bann pratik ki Bondié detesté

Ki sentiment ou bizin ena pou bann kitsoz ki Bondié detesté? (1)

Ki qualité conduite sexuel ki pa bon? (2)

Ki enn chrétien bizin pensé lor koz menti? (3) joué l’argent? (3) kokin? (3) violence? (4) gagne contact avek bann mauvais l’esprit? (5) boire ziska sou? (6)

Couma eski enn kikenn kapav arrete net ar bann mauvais pratik? (7)

1. Bann serviteur Bondié content seki bon. Mais zot bizin aussi aprann detesté seki pa bon. (Psaume 97:10) Sa vedir rejette bann pratik ki Bondié detesté. Eski ou konn certain sa bann pratik-la?

2. Fornication: Bann relation sexuel avant mariage, adultere, gagne relation sexuel avek bann zanimo, gagne relation sexuel avek enn membre dan famille ek relation sexuel entre deux dimoune mem sexe, tousala zot bann peché bien grave kont Bondié. (Lévitique 18:6; Romains 1:26, 27; 1 Corinthiens 6:9, 10) Si deux dimoune ki pa marié pé vive ensam, soit zot bizin separé, soit zot bizin marié devant la loi.—Hébreux 13:4.

3. Koz menti, joué l’argent, kokin: Jéhovah pa kapav koz menti. (Tite 1:2) Si nou envie ki Bondié accepté nou, fodé pa nou koz menti. (Proverbes 6:16-19; Colossiens 3:9, 10) Derriere tou bann joué l’argent ena l’envie pou gagne encore plus. Alors, bann chrétien pa prend part dan okenn joué l’argent couma loterie, lé-course ek loto. (Éphésiens 5:3-5) Ek bann chrétien pa kokin. Zot pa acheté bann kitsoz ki zot koné finn kokin, ni zot prend bann kitsoz sans permission.—Exode 20:15; Éphésiens 4:28.

4. La colere ek la violence: Enn colere ki pa controlé kapav pousse enn dimoune pou faire violence. (Genèse 4:5-8) Enn dimoune violent pa kapav vinn camarade Bondié. (Psaume 11:5; Proverbes 22:24, 25) Kan lezot finn arrivé faire-ou di-tort, fodé pa pousse vengeance ou-soit rann le mal pou le mal.—Proverbes 24:29; Romains 12:17-21.

5. Jette enn mauvais sort ek gagne contact avek bann mauvais l’esprit: Ena dimoune appel la force bann l’esprit pou essaye gueri bann maladie. Ena mem ki jette enn mauvais sort pou faire zot bann l’ennemi malade ou-soit mem pou touye zot. Satan li-mem sa la-force ki derriere tou sa bann pratik-la. Alors, bann chrétien bizin reste loin ar sa bann pratik-la. (Deutéronome 18:9-13) Si dimoune jette enn mauvais sort lor ou, pli bon protection c’est reste proche ar Jéhovah.—Proverbes 18:10.

6. Boire ziska sou: Nou kapav boire enn tipé di-vin, la biere, ou-soit bann lezot boisson alkolik. (Psaume 104:15; 1 Timothée 5:23) Mais abuse lalkol ek boire ziska sou pa bon devant lizié Bondié. (1 Corinthiens 5:11-13; 1 Timothée 3:8) Si ou boire trop beaucoup, ou kapav gate ou la-santé ek mette ou famille dan problem. Sa kapav aussi faire ou vinn faible devant lezot tentation.—Proverbes 23:20, 21, 29-35.

7. Bann dimoune ki pratik bann kitsoz ki pa bon devant lizié Bondié “pa pou herite Royaume Bondié.” (Galates 5:19-21) Si vrai-mem ou content Bondié ek ou envie faire Li plaisir, ou pou kapav arrete net ar sa bann pratik-la. (1 Jean 5:3) Nou bizin aprann detesté seki Bondié dire pa bon. (Romains 12:9) Nou bizin frequente bann dimoune ki ena bann l’habitude ki Bondié accepté. (Proverbes 13:20) Ou kapav gagne l’aide avek bann chrétien ki ena plus l’experience. (Jacques 5:14) Avant tou, compte lor l’aide Bondié par la priere.—Philippiens 4:6, 7, 13.

[Zimage, page 20]

Bondié pa content kan enn dimoune kokin, boire ziska sou, joué l’argent, ek faire violence