Sapit Sis
Kestyon Ki Nu Tu Bizin Fer Fas
1, 2. (a) Ki kestyon Satan finn suleve dan Edenn? (b) Kuma eski sa kestyon la finn byin resorti dan so bann parol?
U KONSERNE par kestyon pli inportan ki bann dimunn finn bizin fer fas lor later. U lavenir eternel depann lor u pozisyon an rapor avek sa kestyon la. Sa kestyon la ti suleve kan ti ena dezobeisans dan Edenn. Dan sa ler la, Satan ti demann Ev: “Eski vremem Bondye finn dir zot ki zot bizin pa manz frwi okenn pye dan zardin?” Ev ti reponn ki konsernan enn pye, Bondye ti dir: “Zot bizin pa manz so frwi . . . pu ki zot pa mor.” Alor, direkteman Satan ti akiz Zeova ki swadizan Li enn manter kan li ti dir ki ni lavi Adan ek ni lavi Ev pa ti depann lor zot lobeisans ar Bondye. Satan ti pretann ki Bondye ti pe priv so bann kreatir enn kitsoz bon, setadir kapasite pu fer zot prop lalwa dan lavi. Satan ti afirme: “Bondye kone ki zur zot pu manz sa, zot lizye vremem pu uver, ek vremem zot pu vinn parey kuma Bondye, zot pu konn seki bon ek seki move.”—Zenez 3:1-5.
2 Avredir, Satan ti pe dir ki bann dimunn ti pu viv pli byin si zotmem zot ti pran zot prop desizyon olye ki zot obeir bann lalwa Bondye. Wi, li ti defye fason ki Bondye dirize. Sa finn sulev kestyon byin-byin grav konsernan lotorite siprem Bondye, setadir so drwa pu reyne. Sa kestyon la ti’nn suleve: Ki pli bon pu bann dimunn, fason ki Zeova dirize uswa enn reyn indepandan ar Li? Asterla, Zeova ti kapav tuy Adan ek Ev deswit, me sa pa ti pu regle sa kestyon lor reyn siprem la kuma bizin. Par kont, si Bondye les sosyete imin devlope pandan enn long peryod letan, Li pu kapav montre klerman ki konsekans ena kan rezet Bondye ek so bann lalwa.
3. Ki kestyon segonder Satan finn suleve?
3 Latak Satan lor drwa ki Zeova ena pu reyne pa finn arete avek seki ti pase dan Edenn. Satan ti usi pretann ki bann lezot kreatir Zeova pa ti pu kapav res fidel ar Li. Sa finn vinn enn kestyon segonder ki ena enn rapor direk avek premye kestyon la. Satan finn al ziska defye fidelite bann desandan Adan ek Ev ek tu bann anz ki dan lesyel, ek mem premye-ne Zeova, so Garson ki Li byin kontan. Par egzanp, dan lepok Zob, Satan ti pretann ki bann ki servi Zeova pa fer li parski zot kontan Bondye ek so fason dirize, me par lintere egois. Alor, dapre li si sa bann dimunn la arive konn bann sityasyon difisil, zot tu pu sede devan zot bann dezir egois.—Zob 2:1-6; Revelasyon 12:10.
Seki Listwar Finn Pruve
4, 5. Ki listwar finn montre konsernan zom ki pe diriz so prop pa?
4 Dan sa kestyon reyn siprem Bondye la, ena enn pwin inportan: Bondye pa finn kre bann dimunn pu viv indepandan ar so dominasyon ek zot reysi malgre sa. Pu zot profi, Bondye finn fer zot enn fason ki zot bizin depann lor so bann lalwa lazistis. Profet Zeremi ti rekonet sa kan li ti ekrir: “Mo konn byin, O Zeova, pu zom ki lor later la, so simin pa pu li. Enn zom ki pe marse pa gayn drwa mem diriz so pa. Koriz mwa O Zeova.” (Zeremi 10:23, 24) Alor, Parol Bondye donn sa konsey la: “Fer Zeova konfyans avek tu to leker ek pa kont lor to prop lintelizans.” (Proverb 3:5) Parey kuma Bondye finn fer bann lalwa lanatir ki bann dimunn bizin respekte pu zot viv, Li finn fer usi bann lalwa moral ki bann dimunn bizin obeir pu zot viv dan larmoni.
5 Wi, li kler ki Bondye ti kone ki san so reyn, zame bann dimunn lor later ti pu kapav reysi diriz zotmem. Zom finn fer bann zefor dan vid pu viv indepandan ar dominasyon Bondye, zot finn kre tu sort kalite sistem politik, ekonomik, ek relizye. Akoz sa bann diferans la, bann dimunn zame dakor ant zot, seki amenn vyolans, lager ek lamor. “Zom finn dominn zom pu so maler.” (Eklezyast 8:9) Sa mem ki finn arive tutlong listwar bann dimunn lor later. Parey kuma Parol Bondye ti anonse, bann move dimunn ek bann ki tronp zot kamarad finn kontinye “vinn pli pabon ankor.” (2 Timote 3:13) Li vre ki pandan sa 100 an ki finn pase la, zom finn fer bel-bel progre dan domenn syans ek lindistri, me lot kote zot finn konn usi bann pli gran katastrof ki zame zot finn kone avan. Tusala pruve klerman ki bann parol Zeremi 10:23 vre—bann dimunn pa finn kre pu diriz zot prop pa.
6. Kuma eski byinto Bondye pu aret fer bann dimunn viv indepandan ar Li?
6 Bann konsekans tris ki bann dimunn finn kontiyn gayne pandan lontan parski zot finn rod viv indepandan ar Bondye, finn pruve klerman ki bann dimunn zame pa kapav reysi dan zot reyn. Selman reyn Bondye ki kapav amenn kontantman, linite, lasante ek lavi. Parol Bondye montre ki Zeova pa pu tarde pu aret sa reyn indepandan bann zom la. (Matye 24:3-14; 2 Timote 3:1-5) Dan ankor enn tigit letan, Li pu interes Li ar seki bann zom pe fer ek zot pu oblize rekonet so reyn lor later antye. Enn profesi Labib dir: “Dan bann zur sa bann lerwa la [bann dimunn ki pe dirize zordi], Bondye lesyel pu etabli enn rwayom [dan lesyel] ki zame pa pu ranverse. Ek pa pu donn enn lot lepep sa rwayom la [zame ankor bann dimunn pa pu reyne lor later]. Li pu kraz tu sa bann lezot rwayom la [ki egziste zordi] ek li pu fini zot net, ek limem pu res la pu tuletan.”—Danyel 2:44.
Gayn Lavi dan Nuvo Lemond Bondye
7. Letan guvernman Bondye pu fer bann zom aret guverne, kisannla ki pu sape?
7 Kan Bondye pu fer bann dimunn aret guverne, kisannla ki pu sape? Labib reponn: “Bann zom drwat [bann ki an faver reyn Bondye] ki pu res lor later, ek bann zom ki pena blam ki pu res lor la. An seki konsern bann move [bann ki kont reyn Bondye], zot pu disparet lor later.” (Proverb 2:21, 22) Enn ekrivin psom usi finn dir parey: “Dan zis enn tigit letan ankor, sa kikenn ki move la pu nepli la. . . Bann dimunn drwat pu gayn later, ek zot pu res pu tuletan lor la.”—Psom 37:10, 29.
8. Kuma eski Bondye pu zistifye net so reyn siprem?
8 Apre ki Bondye pu fini detrir sistem Satan, Li pu inogir so nuvo lemond ki pu fer vyolans, lager, lamizer, sufrans, maladi ek lamor, tu sa bann kitsoz ki pe pez lor bann dimunn pandan plizir milye banane la, disparet net. Labib fer enn zoli zimaz bann bon kitsoz ki pe atann bann dimunn ki obeir: “Li [Bondye] pu suy tu larm dan zot lizye, ek pa pu ena lamor; pu nepli ena dey, kriye ek duler. Bann kitsoz avan finn disparet.” (Revelasyon 21:3, 4) Par mwayin so guvernman dan lesyel ki Zezi Kris pe dirize, Bondye pu zistifye (uswa pruve) net so drwa pu reyne antan ki Dirizan Siprem.—Romin 16:20; 2 Pyer 3:10-13; Revelasyon 20:1-6.
Kuma Ena Dimunn Finn Montre Zot Pozisyon lor Sa Kestyon La
9. (a) Kuma eski bann dimunn ki ti res fidel ar Zeova ti konsider so parol? (b) Kuma eski Noe ti montre ki li ti fidel, ek ki leson nu kapav tire atraver so legzanp?
9 Tutlong listwar, finn ena bann zom ek bann fam ki par zot lafwa, finn montre ki zot fidel ar Zeova ek zot finn respekte Li kuma zot Dirizan Siprem. Zot ti kone ki zot ti bizin ekut Li ek obeir Li pu zot kontiyn viv. Noe ti enn parmi sa bann zom la. Alor, Bondye ti dir li: “Lafin tu bann [dimunn] finn vinn devan mwa . . . Ranz enn lars pu twa.” Noe ti swiv direksyon Bondye. Bann lezot dimunn zot, malgre ki zot ti gayn lavertisman, zot ti kontiyn amenn zot lavi kuma dir nanyin spesyal pa ti pu arive. Me, Noe ti ranz enn lars byin-byin gran ek li ti kontiyn fer lezot konn bann semin drwat Zeova. Labib kontinye dir: “Noe finn fer tu seki Zeova finn komann li. Sa mem seki li finn fer.”—Zenez 6:13-22; Ebre 11:7; 2 Pyer 2:5.
10. (a) Kuma eski Abraam ek Sara finn sutenir reyn siprem Zeova? (b) Dan ki fason eski nu kapav tir profi ar legzanp Abraam ek Sara?
10 Abraam ek Sara usi ti bann bon legzanp an seki konsern respekte reyn siprem Bondye, zot ti fer tu seki Li ti demann zot. Zot ti res dan lavil Ur, bann Kaldein, enn lavil ki ti byin ris. Purtan, kan Zeova ti dir Abraam al dan enn lot peyi ki li pa ti kone, Abraam “ti ale parey kuma Zeova ti’nn dir li.” Pena dut, Sara ti dan byin dan lavil Ur—li ti ena so lakaz, so bann kamarad, ek so bann fami. Me mem sa, li ti sumet ar Zeova ek ar so mari; li ti al dan peyi Kanaan, malgre ki li pa ti kone ki bann kondisyon lavi ti pe atann li laba.—Zenez 11:31–12:4; Akt 7:2-4.
11. (a) Dan ki bann sityasyon Moiz ti’nn sutenir reyn siprem Zeova? (b) Ki profi nu kapav tire ar legzanp Moiz?
11 Enn lot dimunn ki finn sutenir reyn siprem Zeova, ti Moiz. Ek li finn fer sa dan bann sityasyon byin-byin difisil—li ti bizin fer fas ar Faraon Lezip. Remarke ki Moiz pa ti kont lor limem. Okontrer, li ti suzestim so kapasite pu koz byin. Me, li ti obeir Zeova. Avek Zeova deryer li ek avek led so frer Aaron, plizir fwa li ti al devan Faraon, ki ti teti, pu transmet li parol Bondye. Mem sertin parmi bann garson Izrael ti kritik Moiz enn kantite. Purtan, Moiz ti fidel, li ti fer tu seki Zeova ti’nn komann li ek par so mwayin, Zeova ti tir Izrael dan Lezip.—Egzod 7:6; 12:50, 51; Ebre 11:24-27.
12. (a) Ki montre ki res fidel ar Zeova vedir plis ki obeir bann lalwa presi ki Li finn fer ekrir? (b) Kuma eski kan nu konpran sa kalite fidelite la, sa pu ed nu pu aplik 1 Zan 2:15?
12 Bann ki ti res fidel ar Zeova pa ti panse ki li ti selman neseser obeir seki Bondye ti’nn fer ekrir. Letan fam Potifar ti rod tant Zozef pu li komet ladilter avek li, Bondye pa ti ankor fer ekrir okenn lalwa ki kondann ladilter. Me, Zozef ti konpran laranzman maryaz ki Zeova ti fer dan zardin Edenn. Li ti kone ki gayn relasyon sexyel avek enn fam marye pa ti pu fer Bondye plezir. Zozef pa ti interese kone ziska ki pwin Bondye ti pu permet li fer parey kuma bann Ezipsyin. Li ti sutenir bann manyer azir Zeova kan li ti medit lor bann fason ki Bondye azir avek bann dimunn ek kan li ti fer tu so posib pu aplik seki volonte Bondye ti reprezante pu li.—Zenez 39:7-12; Psom 77:11, 12.
13. Kuma eski nu truve ki Dyab li vremem enn manter kan nu get seki finn pase avek (a) Zob? (b) bann trwa Ebre?
13 Bann ki vremem konn Zeova pa vir ledo ar Li, mem si zot pas dan bann sityasyon byin-byin difisil. Satan ti pretann ki si Zob ti perdi tu so bann dibyin uswa so lasante, mem li—sa kikenn ki Zeova ti byin estime la—ti pu kit Bondye. Me Zob ti pruve ki Dyab enn manter, mem ki Zob limem pa ti kone kifer tu sa bann maler la ti pe tom lor li. (Zob 2:9, 10) Plizir syek plitar, Satan ti rod ankor enn fwa pruv seki li ti pretann. Li ti fer enn lerwa Babilonn ankoler menas trwa zenn Ebre pu zet zot dan enn fur dife si zot pa prostern devan enn zimaz ki li ti’nn fer ranze ek zot pa ador li. Letan zot ti oblize swazir si zot ti pu obeir lord lerwa uswa lalwa Zeova kont lidolatri, zot ti fer kone avek kuraz ki zot ti servi Zeova ek Limem ki ti zot Suverin Siprem. Wi, pu zot, res fidel anver Bondye ti ena plis valer ki zot lavi!—Danyel 3:14-18.
14. Kuma eski nu, bann dimunn inparfe, nu kapav montre ki nu vremem fidel ar Zeova?
14 Eski sa bann legzanp la montre ki pu enn dimunn res fidel ar Zeova, li bizin parfe, uswa eski zot pe montre ki pena okenn lespwar pu enn dimunn ki finn fer enn erer? Zame! Labib rakont nu ki defwa Moiz ti fer erer. Mem ki sa pa ti fer Zeova plezir, Li pa ti rezet Moiz. Bann zapot Zezi usi ti ena zot bann febles. Zeova kone ki nu finn erit linperfeksyon, me Li kontan kan nu pa inyor volonterman, dan ninport ki fason, seki Li ule. Si nu arive fer erer par febles, li inportan ki nu repanti sinserman ek ki nu aret pratik sa move kitsoz la. Kumsa, nu pu montre ki nu vremem kontan seki Zeova dir bon ek nu ayir bann kitsoz ki Zeova fer kone pabon. Grasa nu lafwa dan sakrifis Zezi ki kuver nu pese, nu kapav paret prop devan Bondye.—Amos 5:15; Akt 3:19; Ebre 9:14.
15. (a) Kisannla parmi bann dimunn finn donn Bondye enn latasman fidel ki parfe, ek ki sa finn pruve? (b) Kuma eski Zezi ed nu par seki li finn fer?
15 Me, eski sa vedir tu sinpleman ki okenn dimunn pa kapav obeir reyn siprem Zeova enn fason parfe? Repons sa kestyon la ti res kuma enn “sin sekre” pandan apepre 4,000 an. (1 Timote 3:16) Bondye ti kre Adan parfe, purtan li pa finn les enn legzanp parfe an seki konsern latasman pu Bondye. Alor, kisannla ki ti pu kapav fer sa? Byinsir, pa bann desandan inparfe Adan. Sel zom ki finn kapav fer sa, se Zezi Kris. (Ebre 4:15) Seki Zezi finn fer, finn pruve ki Adan, ki purtan ti pe viv dan bann pli bon kondisyon, ti byin kapav gard enn latasman fidel ki parfe ar Bondye, si li ti anvi. Pa ti ena erer dan travay kreasyon Bondye. Alor, Zezi Kris li enn legzanp ki nu bizin imite, pa zis pu montre ki nu obeir lalwa Bondye, me usi pu montre nu latasman personel ar Zeova, Suverin Liniver.—Deteronom 32:4, 5.
Ki Repons Eski Nu Pu Done Personelman?
16. Kifer eski nu bizin tuletan vey nu latitid anver reyn siprem Zeova?
16 Zordi, sakenn parmi nu bizin fer fas ar sa kestyon reyn siprem dan liniver la. Si nu finn montre okler ki nu dan kote Zeova, Satan pa pu kit nu. Li pu servi tu sort mwayin pu met presyon lor nu, ek li pu kontiyn fer sa ziska lafin sa move sistem ki egziste la. Nu bizin kontiyn res lor nu gard. (1 Pyer 5:8) Par nu kondwit, nu montre nu pozisyon lor gran kestyon reyn siprem Zeova ek lor kestyon segonder konsernan bann dimunn, si zot pu res fidel ar Bondye mem dan bann sityasyon difisil. Nu pu fer numem ditor, si nu panse ki enn kondwit infidel pa grav pwiski sa li enn kitsoz byin popiler dan lemond. Donn Bondye enn latasman fidel vedir ki nu fer zefor pu met an pratik bann prinsip drwat Zeova dan tu seki nu fer dan nu lavi.
17. Kuma eski seki nu kone lor lorizinn mansonz ek vol bizin fer nu rezet sa bann pratik la?
17 Par egzanp, nu pa kapav imit Satan, “papa mansonz.” (Zan 8:44) Nu bizin dir laverite dan tu kitsoz. Dan sa sistem Satan la, suvan bann zenn pa koz laverite avek zot bann paran. Me, bann zenn Kretyin evit sa, ek lerla zot pruve ki Satan finn met enn fos sarz kan li ti dir ki bann serviter Bondye pa pu res fidel dan bann sityasyon difisil. (Zob 1:9-11; Proverb 6:16-19) Ena bann pratik dan biznes ki kapav idantifye enn dimunn kuma enn kikenn ki dan kote “papa mansonz,” olye kuma enn kikenn ki dan kote Bondye laverite. Nu bizin rezet sa bann pratik malonet la. (Mika 6:11, 12) Vol usi parey, fode zame nu donn enn voler rezon, mem si li pe kokin parski so karay so, uswa dimunn ki li pe kokin la ris. (Proverb 6:30, 31; 1 Pyer 4:15) Mem si kot nu reste li normal pu kokin uswa pu pran bann ti kitsoz ki pa pu nu, vol li enn kitsoz ki kont bann lalwa Bondye.—Lik 16:10; Romin 12:2; Efezyin 4:28.
18. (a) Alafin Reyn Milan Zezi Kris, ki tes tu bann dimunn pu bizin pase? (b) Ki labitid nu bizin devlope depi asterla mem?
18 Pandan Reyn Milan Zezi Kris, Satan ek so bann demon pu dan enn tru sinbolik kot zot pa pu kapav inflyans bann dimunn. Sa pu vremem enn sulazman! Me apre milan, zot pu large pu enn tigit letan. Satan ek bann ki pu swiv li pu met presyon lor bann dimunn ki pe kontiyn res fidel ar Bondye parmi limanite ki pu fini retabli. (Revelasyon 20:7-10) Si nu gayn privilez pu viv sa lepok la, kuma eski nu pu reazir fas ar sa kestyon reyn siprem dan liniver la? Pwiski tu dimunn pu fini vinn parfe, ninport ki aksyon infidel ki enn dimunn pu fer, li pu enn aksyon volonter ek li pu konn destriksyon eternel an retur. Wi, li vremem inportan ki depi asterla mem nu obeir ninport ki direksyon ki Zeova donn nu, ki li atraver so Parol uswa atraver so lorganizasyon! Si nu fer sa, nu pu montre nu vre latasman ar Li, nu Suverin Liniver.
Kestyon Revizyon
• Ar ki gran kestyon nu tu nu bizin fer fas? Kuma eski sa finn arive konsern nu?
• Ki kitsoz ki remarkab dan fason ki bann zom ek bann fam lepok lontan ti montre zot latasman fidel ar Zeova?
• Kifer eski li inportan ki nu donn Zeova loner par nu kondwit tulezur?