Jéhovah Li nou Souverain Seigneur!

“Mo finn mette mo refuge dan Souverain Seigneur Jéhovah.”—PS. 73:28.

1. Dapré bann parole ki trouve dan 1 Corinthiens 7:31, ar ki kitsoz Paul ti pé surement faire reference?

L’APOTRE Paul ti dire: “Scene sa le monde-la pé changé.” (1 Cor. 7:31) Li parette ki li ti pé compare le monde ar l’estrade enn theatre kot pé joué enn piece. Bann acteur joué zot role, bon ou-soit mauvais, ziska ki scene-la changé.

2, 3. (a) Couma nou kapav compare situation ki existé lor plan universel en rapport avek souveraineté Jéhovah? (b) Ki bann question nou pou examiné?

² Zordi, ena enn situation ki pé deroulé ki nou kapav compare ar enn piece theatre ki ena enn grand l’importance—ek ou impliké ladan! Li ena enn rapport surtout avek justification souveraineté Jéhovah. Sa piece theatre-la decrire seki kapav passé dan enn certain pays. Enn coté ena enn gouvernement etabli ki ena droit legal pou dirigé, ki pé faire en sorte ki ena l’ordre dan pays. Lot coté, ena enn l’organisation illegal ki pé servi fraude, violence ek crime pou dirigé. Sa l’organisation illegal-la mette en doute domination sa gouvernement ki ena droit legal-la, ek li testé fidelité tou bann citoyen envers zot gouvernement.

³ Enn situation pareil existé lor plan universel. Enn coté ena gouvernement legal “Souverain Seigneur Jéhovah” ki ena tou droit pou gouverné. (Ps. 71:5) Mais lot coté, ena aussi enn l’organisation illegal ki dirigé par “sa kikenn ki mauvais-la,” ek ki enn menace pou l’humanité. (1 Jean 5:19) Li mette en doute domination gouvernement legal Bondié ek li testé fidelité tou bann dimoune envers so domination. Couma sa situation-la finn arrivé? Kifer Bondié permette sa? Personnellement, ki nou kapav faire en rapport avek sa situation-la?

Bann kitsoz ki impliké dan sa piece theatre-la

4. Ki kitsoz impliké dan sa piece theatre ki pé deroulé lor plan universel-la?

⁴ Sa piece theatre ki pé deroulé lor plan universel-la implik deux kitsoz ki marche ensam: souveraineté Jéhovah ek l’integrité bann dimoune. Dan la Bible, souvent appel Jéhovah “Souverain Seigneur.” Par exemple, avek enn confiance total en Jéhovah, enn psalmiste ti chanté: “Mo finn mette mo refuge dan Souverain Seigneur Jéhovah.” (Ps 73:28) Mot “souveraineté” vedir pouvoir ek domination supreme, ou-soit domination pli superieur ki ena. Nou ena bann bon raison pou considere Jéhovah couma sa Kikenn ki Supreme-la.—Dan. 7:22.

5. Kifer nou bizin senti-nou poussé pou soutenir souveraineté Jéhovah?

⁵ En tant ki Createur, Jéhovah Li Souverain la terre ek l’univers en entier. (Lire Révélation 4:11.) Jéhovah Li aussi nou Juge, Li-mem ki donne nou la loi ek Li nou le Roi. (Is. 33:22) C’est grace a Li ki nou existé ek nou depann lor Li. Alors, nou bizin considere Li couma nou Souverain Seigneur. Nou pou senti-nou poussé pou soutenir so position ki bien haute si nou toujours rappel ki “Jéhovah Li-mem inn fixé so trone bien solide dan le ciel; ek so royauté inn dominé lor tou kitsoz.”—Ps. 103:19; Actes 4:24.

6. Decrire enn dimoune ki ena l’integrité.

⁶ Pou soutenir souveraineté Jéhovah, nou bizin garde nou l’integrité envers Li. Enn kikenn ki ena “l’integrité” li droite lor plan moral, ou-soit li attaché ar Jéhovah avek enn leker complet. Lezot pa kapav faire li okenn reproche. Job ti enn zom coumsa.—Job 1:1.

Couma sa piece theatre-la ti commencé

7, 8. Couma eski Satan ti mette en doute droit ki Jéhovah ena pou dirigé?

⁷ Finn gagne plus ki six mille an, enn creature spirituel ti mette en doute droit ki Jéhovah ena pou dirige l’univers. C’est enn desir egoïste pou gagne l’adoration ki ti influence bann parole ek bann action sa rebelle-la. Li ti pousse premier couple humain, Adam ek Ève, pou vinn infidele envers souveraineté Bondié. Li ti aussi essaye jette deshonneur lor nom Bondié kan li ti pretann ki Li ti’nn koz menti. (Lire Genèse 3:1-5.) Sa rebelle-la ti vinn grand l’Adversaire Bondié, Satan (Opposant), le Diable (Calomniateur), serpent (ki trompe bann dimoune), ek dragon (ki devore bann dimoune).—Rév. 12:9.

⁸ Satan ti faire li-mem vinn enn dirigeant rival. Devant sa situation-la, ki Souverain Seigneur Jéhovah ti pou faire? Eski desuite Li ti pou detruire sa trois rebelle-la—Satan, Adam ek Ève? Pena doute ki Li ti ena pouvoir pou faire sa, ek si Li ti faire sa, sa ti pou prouvé ki Li ena l’autorité supreme. Sa ti pou prouvé aussi ki Jéhovah ti’nn dire la verité concernant condamnation a mort ki zot ti pou gagné si zot ti desobeir la loi. Mais, kifer eski Bondié pa finn faire sa?

9. Ki Satan ti mette en doute?

⁹ Kan li ti koz menti ek ti detourne Adam ek Ève ar Bondié, Satan ti mette en doute droit ki Jéhovah ena pou attann ki bann dimoune obeir Li. En plus, kan li ti pousse premier couple humain pou desobeir Bondié, Satan ti mette aussi en doute fidelité tou bann creature intelligent. Couma nou’nn trouvé dan cas Job, ki ti reste fidele ar souveraineté Jéhovah, Satan ti pretann ki li ti pou kapav detourne tou dimoune ar Bondié.—Job 2:1-5.

10. Ki Jéhovah finn permette kan Li pa finn detruire Satan desuite pou confirmé ki Li-mem Souverain l’univers?

¹⁰ Si Li ti detruire Satan desuite, Jéhovah ti pou kapav confirmé ki Li-mem Souverain l’univers. Mais Li finn renvoye sa pou plitar. Kan Li’nn faire sa, Li’nn donne Satan le temps pou prouve seki li ti pretann. Bondié finn aussi donne bann dimoune l’occasion pou montré zot fidelité envers so souveraineté. Ki finn arrivé a mesure ki bann siecle finn passé? Satan finn monte enn l’organisation illegal bien puissant. Finalement Jéhovah pou detruire sa l’organisation-la ek le Diable. Kan Bondié pou faire sa, Li pou donne enn preuve extraordinaire ki Li ena tou droit pou dirigé. Jéhovah ti tellement sur ki a la fin tou ti pou fini bien, ki Li ti predire sa kan ti ena rebellion en Éden.—Gen. 3:15.

11. Ki beaucoup dimoune finn faire en rapport avek souveraineté Jéhovah?

¹¹ Beaucoup dimoune finn ena la foi ek finn garde zot l’integrité en rapport avek souveraineté Jéhovah ek sanctification so nom. Parmi ena Abel, Hénok, Noé, Abraham, Sara, Moïse, Ruth, David, Jésus, bann premier disciple Christ, ek bann million lezot dimoune fidele zordi. Sa bann dimoune ki soutenir souveraineté Jéhovah-la, zot prouvé ki Satan li enn menteur. Zot faire zot part pou tire deshonneur ki le Diable finn jetté lor nom Bondié kan li finn faire vantard ki li pou kapav detourne tou dimoune ar Bondié.—Prov. 27:11.

Nou koné couma sa piece theatre-la pou fini

12. Couma nou kapav sur ki Bondié pa pou tolere mechanceté pou touletan?

¹² Nou kapav sur ki bientot Jéhovah pou confirmé ki Li-mem Souverain l’univers. Kifer? C’est parski Li pa pou tolere pou touletan mechanceté ki ena lor la terre, ek nou koné aussi ki nou pé vive dan bann dernier jour. Jéhovah ti prend bann action kont bann mauvais dimoune pendant deluge. Li ti detruire Sodome ek Gomorrhe ek Pharaon ek so l’armée. Li ti impossible pou Sisera ek so l’armée, ek Sennakérib ek so bann soldat Assyrien, pou combatte kont Jéhovah, ki Tout-Puissant. (Gen. 7:1, 23; 19:24, 25; Ex. 14:30, 31; Juges 4:15, 16; 2 Rois 19:35, 36) Alors, nou kapav ena confiance ki Jéhovah pa pou tolere pou touletan ki bann dimoune mank respé pou so nom ek maltraite so bann Témoins. En plus, zordi nou trouve bann preuve concernant signe ki montré presence Jésus ek conclusion sa mauvais systeme-la.—Mat. 24:3.

13. Ki nou bizin faire pou nou pa detruire ensam avek bann l’ennemi Jéhovah?

¹³ Pou ki nou pa detruire ensam avek bann l’ennemi Bondié, nou bizin montré nou fidelité envers souveraineté Jéhovah. Couma nou kapav faire sa? C’est kan nou reste separé ar domination cruel Satan ek nou pa laisse so bann agent faire nou peur. (Is. 52:11; Jean 17:16; Actes 5:29) C’est zis si nou faire sa ki nou pou kapav soutenir justification souveraineté nou Papa ki dan le ciel. Nou pou kapav aussi ena l’espoir pou sapé kan Jéhovah pou tire deshonneur lor so nom ek pou montré ki Li-mem Souverain l’univers.

14. Ki bann detail nou trouvé dan different partie la Bible?

¹⁴ Partout dan la Bible nou trouve bann detail ki concerne l’humanité ek souveraineté Jéhovah. Trois premier chapitre koz lor creation ek couma dimoune finn tombe dan peché, alors ki trois dernier chapitre la Bible montré nou couma l’humanité pou revinn parfait. Bann lezot page ki au millieu donne bann detail lor bann disposition ki Souverain Seigneur Jéhovah finn prend pou realise so projet pou l’humanité, la terre ek l’univers. Genèse montré couma Satan ek mechanceté ti commence existé. Dernier partie livre Révélation montré nou couma mechanceté pou disparette, couma le Diable pou detruire, ek couma volonté Bondié pou faire lor la terre pareil couma dan le ciel. Oui, la Bible faire nou koné couma peché ek la mort finn apparette ek li montré couma Bondié pou tire zot lor la terre. Lerla, tou bann dimoune ki garde zot l’integrité pou kapav konn enn la joie sans limite ek gagne la vie eternel.

15. Ki nou bizin faire pou ki nou kapav tire profit kan sa piece theatre-la fini?

¹⁵ Bientot, scene sa le monde-la pou changé net. Sa piece theatre ki implik souveraineté Bondié ek ki pé duré depuis plusieurs siecle-la, bientot pou fini. Bondié pou tire Satan lor l’estrade ek finalement pou detruire li, ek volonté Bondié vrai-mem pou faire lor la terre. Mais pou nou kapav profite bann bienfait ki sa pou amené ek tou bann benediction ki Parole Bondié ti annoncé, nou bizin soutenir souveraineté Jéhovah asterla-mem. Nou pa kapav reste au millieu, sans prend part personne. Pou nou kapav dire “Jéhovah avek moi,” nou bizin reste dan so coté.—Ps. 118:6, 7.

Nou kapav garde nou l’integrité!

16. Kifer nou kapav sur ki bann dimoune kapav garde zot l’integrité envers Bondié?

¹⁶ Nou kapav soutenir souveraineté Jéhovah ek garde nou l’integrité, parski l’apotre Paul ti ecrire: “Pena okenn tentation ki zot inn gagné ki lezot pa’nn gagné. Mais Bondié Li fidele, ek Li pa pou laisse zot gagne enn tentation ki zot pa kapav supporté, mais avek sa tentation-la, Li pou aussi donne zot enn moyen pou sorti ladan, pou ki zot kapav endure sa.” (1 Cor. 10:13) Ki qualité tentation Paul ti mentionné, ek couma eski Bondié donne nou enn moyen pou sorti ladan?

17-19. (a) Devant ki tentation bann Israélite ti cedé kan zot ti dan desert? (b) Kifer li possible ki nou garde nou l’integrité envers Jéhovah?

¹⁷ Seki ti arrive bann Israélite dan desert montré nou ki nou gagne “tentation” a travers bann situation ki kapav pousse nou pou desobeir la loi Bondié. (Lire 1 Corinthiens 10:6-10.) Bann Israélite ti kapav resisté kont tentation, mais zot ti envie “bann mauvais kitsoz” kan, par enn mirak, Jéhovah ti donne zot bann caille pou enn mois. Mem si sa ti faire inpé le temps ki zot pa ti’nn gagne la viande, Bondié ti’nn donne zot assez la manne pou mangé. Pourtant, kan zot ti pé ramasse bann caille, zot ti laisse-zot tenté par enn desir exageré pou gagne plus, ek zot pa ti ena okenn maitrise.—Nomb. 11:19, 20, 31-35.

¹⁸ Enn tipé avant, letan Moïse ti monte lor montagne Sinaï pou gagne la Loi, bann Israélite ti vinn bann idolatre kan zot ti pratik l’adoration veau d’or ek zot ti faire zot-mem plaisir dan enn fason malsain. Parski Moïse, zot chef, pa ti la, zot pa ti’nn maitrise-zot devant sa tentation-la. (Ex. 32:1, 6) Zis avant ki zot ti rente dan la Terre promise, plusieurs millier Israélite ti laisse-zot tenté par bann femme Moabite ek zot ti commette l’immoralité sexuel avek sa bann femme-la. Sa jour-la, a cause peché ki zot ti faire, sa bann millier Israélite-la ti perdi la vie. (Nomb. 25:1, 9) Parfois, bann Israélite ti laisse-zot tenté pou critiké avek enn l’esprit rebelle. Enn fois, zot ti koz kont Moïse ek aussi kont Bondié Li-mem! (Nomb. 21:5) Apré ki Bondié ti touye Qorah, Dathân, Abiram—bann rebelle—ek zot bann associé, bann Israélite ti murmuré. Zot ti pensé ki execution sa bann rebelle-la ti injuste. Resultat: Bondié ti envoye enn malheur lor zot ek 14,700 Israélite ti mort.—Nomb. 16:41, 49.

¹⁹ Tou sa bann tentation ki nou finn fek mentionné-la, c’est bann tentation ki bann Israélite ti kapav resisté. Le peuple ti cedé devant sa bann tentation-la parski zot ti perdi la foi ek zot ti blié Jéhovah. Zot ti blié couma, avek amour, Li ti prend zot soin, ek ki Li agir dan enn fason droite. Pareil couma dan cas bann Israélite, bann tentation ki nou gagné, lezot dimoune aussi inn deja gagne sa. Si nou faire bann zeffort ki bizin pou resisté kont sa bann tentation-la ek nou compte lor Bondié pou soutenir nou, nou pou kapav garde nou l’integrité. Nou kapav ena confiance ki nou pou reussi faire sa parski “Bondié Li fidele” ek Li pa laisse nou ‘gagne enn tentation ki nou pa kapav supporté.’ Jéhovah jamais pa pou laisse nou arrive enn point kot, en tant ki enn humain, nou nepli kapav faire so volonté.—Ps. 94:14.

20, 21. Kan nou devant bann tentation, couma Bondié ‘donne nou enn moyen pou sorti ladan’?

²⁰ Jéhovah ‘donne nou enn moyen pou sorti’ dan tentation kan Li fortifié nou pou resisté kont sa. Par exemple, bann ki persecute nou kapav batte nou pou essaye faire nou abandonne nou la foi. Sa bann mauvais traitement-la kapav tente nou pou faire bann l’arrangement ki al kont nou la foi pou evite gagne encore plus batté, gagne bann torture, ou-soit-mem la mort. Mais selman, si nou base-nou lor l’assurance ki Paul ti inspiré pou ecrire en 1 Corinthiens 10:13, nou koné ki sa situation ki tente nou-la li pa pou duré pou touletan. Jéhovah pa pou permette sa developpé ziska enn point kot li impossible nou reste fidele ar Li. Bondié kapav faire nou la foi vinn fort ek donne nou la force spirituel ki nou bizin pou nou kapav garde nou l’integrité.

²¹ Jéhovah soutenir nou par so l’esprit saint. Sa l’esprit-la faire nou rappel aussi bann pensée biblik ki nou bizin pou nou kapav resisté tentation. (Jean 14:26) Coumsa, nou pa pou laisse lezot embete nou ek entraine-nou pou suive enn mauvais chemin. Par exemple, nou comprend bann kitsoz ki impliké en rapport avek souveraineté Jéhovah ek l’importance pou garde nou l’integrité. Grace a sa connaissance-la ek l’aide Bondié, beaucoup finn kapav reste fidele ziska la mort. Mais, c’est pa la mort ki’nn faire zot reussi sorti dan tentation; c’est grace a l’aide Jéhovah ki zot finn kapav enduré ziska la fin sans ki zot cedé. Jéhovah kapav faire pareil pou nou. En realité, Li servi so bann ange fidele pou aide nou. Kan li koz lor bann ange, la Bible dire nou ki ‘zot bann l’esprit pou enn service publik, ki’nn envoyé pou servi bann ki pou gagne delivrance.’ (Héb. 1:14) Couma prochain lartik pou montré, zis bann ki garde zot l’integrité ki kapav ena l’espoir pou gagne privilege pou soutenir souveraineté Bondié pou touletan. Nou pou kapav parmi sa bann dimoune-la si nou reste toujours attaché ar Jéhovah, nou Souverain Seigneur.

Couma ou pou reponn?

• Kifer nou bizin accepté Jéhovah couma nou Souverain Seigneur?

• Ki sa vedir garde nou l’integrité envers Bondié?

• Couma nou koné ki Jéhovah bientot pou confirmé ki Li-mem Souverain l’univers?

• Kan nou examine 1 Corinthiens 10:13, kifer nou kapav dire ki li possible pou garde nou l’integrité?