Souveraineté Jéhovah ek Royaume Bondié

“Ah Jéhovah, grandeur, puissance, beauté, superiorité ek dignité, zot pou toi . . . Royaume pou toi, ah Jéhovah.”—1 CHRONIQUES 29:11.

1. Kifer Jéhovah ena droit legal pou gouverné en tant ki Pli Grand lé-Roi dan l’univers?

“JÉHOVAH Li-mem inn fixé so trone bien solide dan le ciel; ek so royauté inn domine lor tou kitsoz.” (Psaume 103:19) Par so bann parole, ecrivain sa Psaume-la ti montré sa verité fondamental-la en rapport avek domination: parski Jéhovah Li nou Createur, Li ena droit legal pou gouverné en tant ki Pli Grand lé-Roi dan l’univers.

2. Couma Daniel ti decrire domaine spirituel kot Jéhovah regné?

² Bien sur, pou ki enn dirigeant gouverné, fodé ena bann sujet setadir bann dimoune lor ki li pou dirigé. Pou commencé, Jéhovah ti regne lor bann creature spirituel ki Li ti crée—premierement, ti ena so Garson ki Li ti crée direct, ek apré, ti ena bann ange. (Colossiens 1:15-17) Beaucoup plitar, dan enn vision, prophete Daniel ti trouve seki ena dan le ciel. Li ti raconté: “Mo ti contigne guetté ziska ki ti installe bann trone, ek l’Ancien bann jour ti assizé. . . . Ti ena mille millier ki ti pé servi Li, ek dix mille fois dix mille ti pé deboute devant Li.” (Daniel 7:9, 10) Pendant bien-bien longtemps, Jéhovah, “l’Ancien bann jour,” inn dirigé en tant ki Pli Grand lé-Roi lor so grand famille spirituel ki ti bien organisé. Zot ti servi Li couma so “bann ministre” ki ti faire so volonté.—Psaume 103:20, 21.

3. Couma Jéhovah finn faire so domination vinn pli grand?

³ Finalement, Jéhovah ti faire so domination vinn pli grand kan Li ti crée l’univers ki bien grand ek complexe, parmi ti ena la terre. (Job 38:4, 7) Enn dimoune ki pé observé depuis la terre pou remarké ki ena tellement l’ordre ek precision dan maniere ki bann zetoile ek bann planete fonctionné ki coumadir zot pa bizin personne pou guide zot ou-soit pou control zot. Pourtant enn psalmiste ti dire: “[Jéhovah] inn donne l’ordre, ek zot inn crée. Ek Li faire zot reste pou touletan, pou bann lé-temps indefini. Li finn donne enn la-loi, ek li pa pou disparette.” (Psaume 148:5, 6) Jéhovah finn touletan montré ki Li-mem Pli Grand lé-Roi dan l’univers kan Li’nn dirige, gouverne ek ena enn control lor tou seki passé dan domaine spirituel ek dan l’univers physik.—Nehémia 9:6.

4. Couma Jéhovah regne lor bann dimoune?

⁴ Kan Jéhovah ti crée premier couple humain, Li ti regné dan enn lot fason encore. En plus ki Li ti donne bann dimoune tou seki zot ti bizin pou amenn enn la-vie ki ena enn sens ek ki donne zot satisfaction, Jéhovah ti laisse zot control bann creature ki pli inferieur ki zot, ki trouve lor la terre—sa montré ki Li ti donne zot enn certaine l’autorité. (Genèse 1:26-28; 2:8, 9) Alors, li clair ki domination Jéhovah li pa zis enn bon domination ki faire nou gagne bann bienfait, mais sa domination-la donne aussi so bann serviteur l’honneur ek dignité. Tant ki Adam ek Ève ti soumette ar domination ou-soit souveraineté Jéhovah, zot ti ena privilege pou vive pou touletan dan enn paradi lor la terre.—Genèse 2:15-17.

5. Ki nou kapav dire lor fason ki Jéhovah regné?

⁵ Ki tousala montré nou? Premierement, Jéhovah finn toujours regne lor tou so creation. Deuxiemement, domination Jéhovah li bon ek li donne dignité so bann sujet. Troisiemement, kan nou obeir ek nou soutenir domination Bondié, nou pou gagne bann benediction pou touletan. Li pa etonnant ki le roi David, ki ti regne en Israël dan le passé, ti dire: “Ah Jéhovah, grandeur, puissance, beauté, superiorité ek dignité, zot pou toi; parski tou seki dan le ciel ek lor la terre pou toi. Royaume pou toi, ah Jéhovah, toi ki aussi eleve-toi en tant ki chef lor tou.”—1 Chroniques 29:11.

Kifer ti bizin Royaume Bondié?

6. Ki lien ena entre domination Bondié ek so Royaume?

⁶ Parski Jéhovah finn toujours servi so pouvoir en tant ki Pli Grand lé-Roi dan l’univers, alors kifer ti bizin Royaume Bondié? En general, enn lé-roi gouverné a travers enn l’organisation ki li etabli lor so bann sujet. Alors, Royaume Bondié c’est enn moyen ki Jéhovah servi pou gouverne lor tou so bann creature dan l’univers.

7. Kifer Jéhovah ti etabli enn nouveau moyen pou Li gouverné?

⁷ Dan different lepok, Jéhovah finn servi different moyen pou montré so domination. Kan enn nouveau situation ti’nn presenté, Jéhovah ti servi enn nouveau moyen pou gouverné. Sa ti arrivé kan Satan, enn garson spirituel Bondié ki ti vinn infidele, ti reussi influence Adam ek Ève pou zot rebelle kont domination Jéhovah. Sa rebellion-la ti enn l’attak kont domination Bondié. Dan ki sens? Kan li ti dire Ève ki li “pa pou mort” si li mange sa fruit ki Jéhovah ti defann-la, Satan ti faire croire ki Jéhovah pa dire la verité, alors pa kapav faire Li confiance. Satan ti aussi dire Ève: “Bondié koné ki, jour ki zot mange sa fruit-la, sa jour-la-mem zot lizié pou ouvert, ek vrai-mem zot pou vinn couma Bondié, zot pou konn seki bon ek seki pa bon.” Satan ti pé pretann ki li ti pou pli bon ki Adam ek Ève pa prend compte commandement Bondié ek faire seki zot, zot envie. (Genèse 3:1-6) Sa ti mette en doute dan enn fason direct droit ki Bondié ena pou gouverné ek fason ki Li gouverné. Ki Jéhovah ti pou faire?

8, 9. (a) Couma enn dirigeant pou reagir si bann dimoune rebellé dan so pays? (b) Ki Jéhovah ti faire kan ti ena rebellion en Éden?

⁸ Ki enn dirigeant pou faire si ena enn grand rebellion dan so pays? Bann dimoune ki bien konn l’Histoire kapav rappel bann cas kot sa inn arrivé. Au lieu ki li zis ignore seki’nn arrivé, en general enn dirigeant—mem si li bon—pou juge bann rebelle ek pou condamne zot parski zot finn faire traitre. Lerla, kitfois li pou etabli enn kikenn ki pou arrete sa rebellion-la ek pou retabli la paix. Jéhovah aussi ti faire pareil. Li ti montré ki Li ti pé control bien sa situation ki ti’nn arrivé-la, kan Li ti faire kitsoz dé-suite ek kan Li ti prononce enn jugement lor bann rebelle. Li ti jugé ki Adam ek Ève pa ti merite don la vie eternel, ek Li ti tire zot dan jardin Éden.—Genèse 3:16-19, 22-24.

⁹ Kan Jéhovah ti prononce so jugement kont Satan, Li ti faire konn enn nouveau moyen ki Li ti pou servi pou gouverné, enn moyen ki Li ti pou servi pou ré-amenn la paix ek l’ordre dan tou so royaume. Bondié ti dire Satan: “Mo pou mette la haine entre toi ek la femme, ek entre to descendance ek so descendance. Li pou crase to la-tête ek to pou blesse so talon.” (Genèse 3:15) Alors, Jéhovah ti faire koné ki c’est so projet pou donne l’autorité enn “descendance” pou crase Satan ek bann ki ensam avek li, ek pou prouvé ki Li ena droit legal pou dirigé.—Psaume 2:7-9; 110:1, 2.

10. (a) Kisannla sa ‘descendance-la’ ti été? (b) Ki Paul ti dire concernant realisation premier prophetie?

¹⁰ Sa ‘descendance-la’ ti Jésus Christ ek enn groupe dimoune ki associé avek li. Ensam, zot forme Royaume messianik Bondié. (Daniel 7:13, 14, 27; Matthieu 19:28; Luc 12:32; 22:28-30) Mais Bondié pa ti faire konn tousala dé-suite. En realité, fason ki sa premier prophetie-la ti pou realisé ti reste enn “saint secret ki finn reste dan silence pendant bien longtemps.” (Romains 16:25) Pendant plusieurs siecle, bann dimoune ki ti ena la foi ti attann avek impatience kan Bondié ti pou faire konn sa ‘saint secret-la’ ek kan premier prophetie ti pou realisé pou justifié droit ki Jéhovah ena pou gouverné.—Romains 8:19-21.

Bondié faire konn “saint secret” tigit par tigit

11. Ki Jéhovah ti faire Abraham koné?

¹¹ A mesure ki le temps ti passé, Jéhovah ti faire konn bann l’aspect sa ‘saint secret lor royaume Bondié-la,’ tigit par tigit. (Marc 4:11) Parmi bann dimoune ki Jéhovah ti faire konn sa, ti ena Abraham, ki la Bible appel “camarade Jéhovah.” (Jacques 2:23) Jéhovah ti promette Abraham ki Li pou faire li “vinn enn grand nation.” Plitar, Bondié ti dire Abraham: “Bann lé-roi pou sorti dan to descendance,” ek “par moyen to descendance, tou bann nation lor la terre pou vrai-mem attire benediction lor zot.”—Genèse 12:2, 3; 17:6; 22:17, 18.

12. Couma descendance Satan ti apparette apré deluge?

¹² Pendant lepok Abraham, bann dimoune ti’nn deja essaye gouverné ek domine lezot. Par exemple, concernant Nimrod, arriere-ti-zenfant Noé, la Bible dire: “Li-mem ti premier pou vinn enn zom puissant lor la terre. Li ti montré ki li ti enn grand chasseur kont Jéhovah.” (Genèse 10:8, 9) Li clair ki Nimrod ek bann lezot dimoune ki ti faire zot-mem vinn bann dirigeant, ti couma bann marionnette dan la main Satan. Zot ek bann ki ti soutenir zot ti’nn vinn enn partie dan descendance Satan.—1 Jean 5:19.

13. Ki Jéhovah ti annoncé par Jacob?

¹³ Malgré bann zeffort ki Satan inn faire pou ki ena bann dirigeant humain, projet Jéhovah inn contigne avancé. Par moyen Jacob, ti-zenfant Abraham, Jéhovah ti annoncé: “Baton royal pa pou quitte Juda, ni baton commandant pa pou quitte so lipié, ziska ki Shilo vini; ek c’est li ki pou gagne l’obeissance bann peuple.” (Genèse 49:10) Mot “Shilo” vedir “Dimoune pou ki sa été.” Sa prophetie-la ti montré ki ti pou ena enn kikenn ki ti pou vini, ki ti pou ena droit legal pou gagne “baton royal” ek “baton commandant” ki represente domination ek pouvoir pou dirige “bann peuple,” setadir tou dimoune lor la terre. Kisannla ‘Shilo’ ti pou été?

“Ziska ki Shilo vini”

14. Ki l’alliance Jéhovah ti faire avek David?

¹⁴ Parmi bann descendant Juda, premier dimoune ki Jéhovah ti choisir pou vinn le roi lor so peuple, ti enn berger ki ti appel David, enn garson Jessé.a (1 Samuel 16:1-13) Malgré ki li ti faire bann peché ek bann erreur, David ti gagne faveur Jéhovah parski li ti fidele envers So domination. Jéhovah ti donne plus renseignement lor prophetie ki Li ti donné en Éden kan Li ti faire enn l’alliance avek David: “Vrai-mem mo pou faire to descendance existé apré toi, li pou sorti dan to-mem; ek vrai-mem mo pou fixé so royaume bien solide.” Sa pa ti pou concerne zis Salomon, garson David ki ti vinn le roi apré li, parski dapré sa l’alliance-la, Jéhovah ti dire: “Mo pou fixé trone so royaume bien solide pou touletan.” Sa l’alliance ki Jéhovah ti faire avek David-la ti montré bien ki sa “descendance” ki ti pou gagne enn royaume-la, ti pou parette plitar dan famille David.—2 Samuel 7:12, 13.

15. Kifer ti kapav considere royaume Juda couma enn model ki ti represente Royaume Bondié?

¹⁵ David ek bann lé-roi ki’nn vinn apré li ki ti sorti dan so descendance, ti oint avek enn de l’huile sacré par grand pretre. Par sa action-la, Jéhovah ti montré ki Li’nn choisir zot pou vinn so bann oint, ou-soit so bann messie. (1 Samuel 16:13; 2 Samuel 2:4; 5:3; 1 Rois 1:39) Ti kapav dire ki zot ti pé assize lor trone Jéhovah ek zot ti so bann lé-roi kan zot ti pé dirigé dan Jérusalem. (2 Chroniques 9:8) C’est dan sa sens-la ki royaume Juda ti represente Royaume Bondié, enn moyen ki Jéhovah ti servi pou dirigé.

16. Ki ti arrivé apré regne bann lé-roi Juda?

¹⁶ Kan le roi ek le peuple ti soumette ar domination Jéhovah, zot ti gagne So protection ek So benediction. Pendant regne Salomon surtout, ti ena enn periode la paix ek prosperité extraordinaire. Sa ti represente dan enn fason prophetik domination Royaume Bondié kan pou tire l’influence Satan net ek kan droit ki Jéhovah ena pou gouverné, pou justifié. (1 Rois 4:20, 25) Malheureusement, la plupart lé-roi ki ti bann descendant David pa ti obeir Jéhovah, ek le peuple ti tombe dan l’idolatrie ek l’immoralité. Finalement, Jéhovah ti permette ki bann Babylonien detruire royaume Juda en 607 avant nou lepok. Lerla, bann zeffort ki Satan ti’nn faire pou abaisse domination Jéhovah coumadir ti’nn reussi.

17. Couma nou koné ki malgré ki royaume bann descendant David ti’nn tombé, Jéhovah ti encore ena enn control total lor sa situation-la?

¹⁷ Kan royaume bann descendant David ti’nn tombé—ek avant sa, kan royaume Israël dan le nord ti’nn tombé—sa pa ti prouvé ki Jéhovah pa ti ena droit ou-soit ki Li pa ti kapav gouverné. Au contraire sa ti montré mauvais consequence ki l’influence Satan ek l’independance bann dimoune envers Bondié, ena. (Proverbes 16:25; Jérémie 10:23) Pou montré ki Li ti pé toujours gouverné, Jéhovah ti dire par prophete Ézékiel: “Tire turban, ek enleve couronne. . . . Mo pou faire sa vinn enn ruine, enn ruine, enn ruine. Mais sa aussi, vrai-mem li pa pou vinn pou personne ziska ki sa kikenn ki ena droit legal-la vini, ek mo pou donne li sa.” (Ézékiel 21:26, 27) Sa bann parole-la montré ki “descendance” ki Bondié ti promette, sa Kikenn “ki ena droit legal-la,” pa ti encore vini.

18. Ki ange Gabriel ti dire Marie?

¹⁸ Anou al pli loin, en l’an 2 avant nou lepok. Bondié ti envoye ange Gabriel kot Marie, enn vierge ki ti reste Nazareth, enn la-ville Galilée dan le nord Palestine. Li ti dire li: “To pou tombe enceinte ek to pou gagne enn garson, ek fodé ki to appel li Jésus. Li pou vinn enn kikenn ki grand, ek pou appel li Garson Très-Haut; ek Jéhovah pou donne li trone David, so papa, ek li pou regne lor lakaz Jacob pou touletan, ek so royaume pa pou fini jamais.”—Luc 1:31-33.

19. Ki bann l’evenement extraordinaire ti pou bizin arrivé bientot?

¹⁹ Finalement, ti’nn arrive l’heure pou revele sa ‘saint secret-la.’ Partie principal sa “descendance” ki ti promette-la, ti pré pou apparette lor la terre. (Galates 4:4; 1 Timothée 3:16) Satan ti pou blesse so talon. Mais apré, sa ‘descendance-la’ pou crase la tête Satan, ek tire so l’influence ek l’influence so bann agent, net. Li ti pou aussi rann temoignage ki par moyen Royaume Bondié, tou bann dommage ki Satan inn faire, pou reparé, ek ki droit ki Jéhovah ena pou gouverné, pou justifié. (Hébreux 2:14; 1 Jean 3:8) Couma Jésus ti pou faire sa? Ki l’exemple li’nn donne nou? Nou pou trouve sa bann reponse-la dan prochain lartik.

Eski ou kapav expliké?

• Kifer Jéhovah ena droit legal pou gouverné en tant ki Pli Grand lé-Roi dan l’univers?

• Kifer Royaume Bondié ti necessaire dan projet Jéhovah?

• Couma tigit par tigit, Jéhovah ti’nn faire koné ki été “saint secret”?

• Couma nou koné ki malgré ki royaume bann descendant David ti’nn tombé, Jéhovah ti encore ena enn control total lor sa-situation-la?

[Note]

[Zimage lor page 5]

Ki Jéhovah ti annoncé par Abraham?

[Zimage lor page 7]

Kifer, kan royaume bann descendant David ti tombé, sa pa ti montré ki Jéhovah pa kapav gouverné?