Sapit Trez

Enn Gran Laful Devan Tronn Zeova

1. (a) Avan ki bann serviter ki’nn vinn viv depi lepok Abel ziska Zan Batis gayn zot rekonpans uswa avan ki bann manb 144,000 gayn zot rekonpans, ki zot tu pu bizin kone? (b) Ki pu posib pu “enn gran laful” ki pe viv dan nu lepok?

BANN serviter Bondye depi Abel ziska Zan Batis, finn tuletan met volonte Bondye an premye dan zot lavi. Me, zot tu finn mor ek zot pe atann rezireksyon lor later dan nuvo lemond Bondye. Bann 144,000 ki pu reyn avek Zezi Kris dan lesyel, dan so Rwayom, pu bizin mor zot usi, avan ki zot gayn zot rekonpans. Selman, Revelasyon 7:9 montre ki dan bann dernye zur, pu ena “enn gran laful” ki sorti dan tu bann nasyon ek ki pa pu konn lamor; me, zot pu gayn posibilite viv pu tuletan lor later. Eski u parmi zot?

Idantifye Sa Gran Laful La

2. Kuma eski dusma-dusma bann serviter Zeova finn byin konpran seki gran laful ki mansyone dan Revelasyon 7:9 reprezante?

² An 1923, bann serviter Zeova ti konpran ki “bann muton” ki mansyone dan legzanp Zezi, dan Matye 25:31-46 ek bann “lezot muton” ki mansyone dan Zan 10:16, zot reprezant bann dimunn ki pu gayn lokazyon viv pu tuletan lor later. An 1931, zot finn konpran usi ki bann ki gayn mark lor zot fron, dapre Ezekyel 9:1-11, zot usi zot ena lesperans pu viv lor later. Apre an 1935, zot finn aprann ki sa gran laful la fer parti bann lezot muton ki Zezi ti mansyone. Zordi, sa gran laful ki ena faver Bondye la, zot par milyon.

3. Kifer eski lexpresyon “pe debut devan tronn” pa aplik avek enn grup ki pu al dan lesyel?

³ Dapre deskripsyon ki Revelasyon 7:9 done, sa gran laful la li pa dan lesyel. Mem ki zot “pe debut devan tronn” Bondye, li pa neseser ki zot dan lesyel. Zot sinpleman devan lizye Bondye. (Psom 11:4) Nu konpran ki sa gran laful ki “personn pa kapav konte” la pa pu al dan lesyel, kan nu konpar so kantite ki pa fix avek seki ena dan Revelasyon 7:4-8 ek Revelasyon 14:1-4. Sa bann verse la donn nu sif egzak bann dimunn ki pu al dan lesyel, setadir 144,000.

4. (a) Dan ki “gran detres” gran laful pu sove? (b) Dapre Revelasyon 7:11, 12, ki bann ki obzerv gran laful ek ador Bondye ansam avek zot?

⁴ Konsernan sa gran laful la, Revelasyon 7:14 dir: “Sa bannla zot bann ki sorti dan gran detres.” Zot sap dan pli gran katastrof ki finn kapav ena dan listwar bann dimunn. (Matye 24:21) Kan zot remersye Bondye ek Zezi Kris, ki finn sov zot, lerla tu bann kreatir fidel ki dan lesyel pu dir ansam avek zot: “Amenn! Benediksyon, laglwar, sazes, remersiman, loner, puvwar ek lafors li pu nu Bondye pu tuletan. Amenn.”—Revelasyon 7:11, 12.

Zot Merite

5. Kuma eski nu kapav kone seki nu bizin fer pu fer parti dan gran laful?

⁵ Delivrans gran laful dan gran detres, li an akor avek bann prinsip drwat Zeova. Labib egzaminn klerman bann kalite ki idantifye bann ki pu sape. Alor, bann ki kontan lazistis kapav fer zefor zordi pu zot kapav sov zot lavi. Ki zot bizin fer?

6. Kifer eski kapav konpar gran laful avek bann muton?

⁶ Bann muton zot dus ek zot sumet. Abe, kan Zezi ti dir ki li ena lezot muton ki pa fer parti parmi bann ki pu al dan lesyel, li ti koz lor bann dimunn ki pa selman pu’le viv pu tuletan lor later, me ki pu usi sumet ar so bann lanseynman. Zezi ti dir: “Mo bann muton ekut mo lavwa, ek mo konn zot, ek zot swiv mwa.” (Zan 10:16, 27) Sa bann muton la zot bann dimunn ki vremem ekut Zezi ek ki fer seki li dir avek lobeisans, ek zot vinn so bann disip.

7. Ki bann kalite bann disip Zezi bizin devlope?

⁷ Ki bann lezot kalite ankor sak disip Zezi pu bizin devlope? Parol Bondye reponn: “Zot bizin rezet vye personalite ki baze lor zot ansyin kondwit ek . . . met lor zot nuvo personalite ki finn kre dapre volonte Bondye dan vre lazistis ek vre fidelite.” (Efezyin 4:22-24) Zot devlop bann kalite ki ogmant linite parmi bann serviter Bondye, kuma par egzanp “lamur, lazwa, lape, pasyans, fer dibyin, bonte, lafwa, duser, kontrol [zotmem].”—Galat 5:22, 23.

8. Ki gran laful pu bizin fer fas amezir ki zot sutenir bann manb 144,000 ki reste lor later?

⁸ Gran laful sutenir sa ti grup bann manb 144,000 ki ankor lor later la ek ki pe diriz travay predikasyon. (Matye 24:14; 25:40) Sa bann lezot muton la fer sa, mem si zot kone zot pu fer fas ar lopozisyon parski dan kumansman sa bann dernye zur la, Zezi Kris ek so bann anz finn pus Satan ek so bann demon andeor lesyel. Akoz sa “maler pu later . . . parski Dyab finn desann ver zot; li ena enn gran koler pwiski li kone ki li ena zis enn tigit letan mem.” (Revelasyon 12:7-12) Alor, plis lafin sa sistem la koste, plis Satan pe fer presyon lor bann serviter Bondye.

9. Ziska ki pwin bann serviter Bondye pe reysi dan predikasyon labonn nuvel, ek kifer?

⁹ Malgre enn persekisyon sovaz, travay predikasyon pe kontiyn al devan. Alafin Premye Lager Mondyal, zot ti zis detrwa milye proklamater, me zordi, zot plizir milyon, parski Zeova ti promet: “Ninport ki zarm ki pu forme kont twa, pa pu reysi.” (Izai 54:17) Mem enn manb lakur siprem Zwif ti rekonet ki personn pa kapav aret travay Bondye. Konsernan bann disip, li ti dir bann Farizyin sa lepok la: “Les zot trankil (parski, si sa proze la uswa sa travay la sorti ar bann zom, abe li pu ranverse; me si li sorti ar Bondye, zot pa pu kapav ranvers li;) sinon, kitfwa zot pu truv zot pe lager avredir kont Bondye Limem.”—Akt 5:38, 39.

10. (a) Ki “sa mark” ki lor bann manb gran laful la vedir? (b) Kuma eski bann serviter Bondye obeir sa “lavwa ki sorti dan lesyel” la?

¹⁰ Dan profesi Ezekyel, bann manb gran laful paret kuma bann ki finn gayn enn mark pu lavi. (Ezekyel 9:4-6) “Sa mark la” li enn prev ki zot finn angaz zot ar Zeova, ki zot finn batize kuma bann disip Zezi, ek ki zot pe fer zefor pu devlop enn personalite kuma Kris. Zot obeir sa “lavwa [ki] sorti dan lesyel” ek ki pe dir konsernan pwisans mondyal fos relizyon Satan: “Sorti ladan, mo pep, si zot pa anvi partisip dan so bann pese, ek si zot pa anvi gayn enn par dan so bann maler.”—Revelasyon 18:1-5.

11. Dan ki fason inportan bann manb gran laful montre ki zot bann serviter Zeova?

¹¹ Zezi ti dir so bann disip usi: “Par sa tu pu kone ki zot mo bann disip, si zot ena lamur ant zot.” (Zan 13:35) Par kont, bann manb bann relizyon dan lemond tuy zot bann lezot manb dan lager, suvan zis parski zot pa mem nasyon! Parol Bondye dir: “Par sa ki rekonet bann zanfan Bondye ek bann zanfan Dyab: Enn kikenn ki pa pratik lazistis pa sorti kot Bondye, ni enn kikenn ki pa kontan so frer. . . . Sakenn parmi nu bizin kontan so prosin; pa kuma Kain, ki ti sorti kot sa kikenn move la ek li finn tuy so frer.”—1 Zan 3:10-12.

12. Dan gran detres, kuma eski Zeova pu tret bann relizyon ki kuma ‘bann pye’ ki raport bann frwi ki pena valer?

¹² Zezi ti dir: “Enn bon pye raport bann bon frwi, me enn pye puri raport bann frwi ki pena valer; enn bon pye pa kapav raport bann frwi ki pena valer, ni enn pye puri pa kapav raport bann bon frwi. Tu pye ki pa raport bann bon frwi bizin kupe ek zet dan dife. Vremem, lerla, par zot bann frwi ki zot pu rekonet sa bann zom la.” (Matye 7:17-20) Bann frwi ki bann relizyon dan sa lemond la pe raporte montre ki zot ‘bann pye’ puri ki byinto Zeova pu detrir dan gran detres.—Revelasyon 17:16.

13. Kuma eski gran laful montre ki zot “pe debut devan tronn” Zeova, ansam dan linite?

¹³ Revelasyon 7:9-15 atir latansyon lor bann fakter ki permet gran laful sov zot lavi. Dan sa vizyon la, Zan ti truv zot ansam dan linite ‘pe debute devan tronn’ Zeova, ek zot pe sutenir suverennte Zeova dan liniver. Zot finn “lav zot rob ek zot finn fer li vinn blan dan disan Lanyo” ek zot montre par la ki zot rekonet ki sakrifis Zezi kuver zot pese. (Zan 1:29) Zot finn angaz zot ar Bondye ek zot finn montre sa par zot batem dan delo. Alor, zot ena enn pozisyon prop devan Bondye ki reprezante par bann rob blan; ek zot pe servi li par enn “servis sakre lanwit lizur.” Eski ena bann fason kot u kapav viv plis an akor avek sa deskripsyon ki u finn fek lir la?

Bann Byinfe Asterla

14. Ki sertin byinfe selman bann serviter Zeova pe kone depi asterla mem?

¹⁴ Sirman u finn remark bann byinfe ki zis bann ki servi Zeova pe gayne depi asterla mem. Par egzanp, kan u finn aprann lor bann proze drwat ki Zeova ena, u finn konpran ki ena enn gran lespwar kler pu lavenir. Alor, asterla u lavi ena enn vre sans—pu servi vre Bondye avek enn bel posibilite pu viv pu tuletan dan enn paradi lor later. Wi, Lerwa Zezi Kris “pu gid [sa gran laful la] ver bann lafontenn delo lavi.”—Revelasyon 7:17.

15. Ki profi bann Temwin Zeova pe tire etandone ki zot respekte bann prinsip Labib lor bann zafer politik ek moral?

¹⁵ Lamur, linite ek larmoni ki ena parmi bann serviter Zeova partu lor later, sa li enn lot byinfe extraordiner ankor ki gran laful pe gayne. Pwiski nu tu nu manz mem nuritir spirityel, nu tu obeir bann mem lalwa ek prinsip ki truv dan Parol Bondye. Ala kifer, nu pa divize par bann lide politik uswa nasyonalis. Pa fini, nu gard enn nivo moral elve an akor avek seki Bondye demann so pep. (1 Korintyin 6:9-11) Alor, olye ki zot konn bagar, dezakor ek move lavi moral ki ena dan sa lemond la, lepep Zeova pe zwir seki nu apel enn paradi spirityel. Gete kuma Izai 65:13, 14 dekrir sa byin.

16. Malgre bann problem ki egziste dan lavi, ki lespwar bann manb gran laful ena?

¹⁶ Non, bann serviter Zeova lor later pa parfe. Zot usi, zot afekte par bann problem ki ena tulezur dan lemond; zot konn bann sityasyon difisil uswa zot sufer kuma bann viktim inosan kan bann nasyon lager. Zot fer fas usi ar maladi, sufrans ek lamor. Me selman, zot ena lafwa ki dan lemond nuvo, Bondye “pu suy tu larm dan zot lizye, ek pa pu ena lamor; pu nepli ena dey, kriye ek duler.”—Revelasyon 21:4.

17. Mem ki kapav ariv nu zordi, ki lavenir extraordiner finn rezerve pu bann ki ador sel vre Bondye?

¹⁷ Mem si u perdi u lavi asterla akoz vyeyes, maladi, aksidan, uswa persekisyon, Zeova pu resisit u dan Paradi. (Akt 24:15) Lerla, u pu kontinye profit enn festin spirityel pandan Reyn Milan Zezi Kris. U lamur pu Bondye pu vinn pli profon amezir ki u truv so bann proze realize dan laglwar. Bann benediksyon ki Zeova pu done lor plan fizik pu plis ogmant u lamur pu Li. (Izai 25:6-9) Wi, enn lavenir extraordiner finn rezerve pu lepep Bondye!

Kestyon Revizyon

• Avek ki levennman extraordiner Labib asosye gran laful?

• Si vremem nu anvi fer parti dan sa gran laful ki ena faver Bondye la, ki nu bizin fer depi asterla mem?

• Bann benediksyon ki gran laful pe gayne zordi ek zot pu gayne dan nuvo lemond Bondye, komye eski sa inportan pu u?

[Zimaz paz 123]

Bann milyon dimunn ki fer parti dan gran laful pe ador vre Bondye dan linite