Juge zot digne pou ki guide zot vers bann la-source de l’eau la vie
“L’Agneau . . . pou prend zot soin, ek pou guide zot vers bann la-source de l’eau la vie.”—RÉV. 7:17.
1. Couma eski Parole Bondié appel bann chretien oint, ek ki responsabilité Jésus ti donne zot?
PAROLE Bondié appel bann chretien oint ki pé occupe bann l’interet Christ lor la terre, “l’esclave fidele et avisé.” Kan Christ ti inspecté so “esclave” en 1918, li ti trouvé ki sa bann chretien oint lor la terre-la ti fidele dan zot travail pou donne ‘nourriture spirituel dan l’heure ki bizin.’ Alors a partir sa moment-la Jésus, le Maitre, ti content pou mette zot en charge “tou so bann di-bien.” (Lire Matthieu 24:45-47.) C’est dan sa fason-la ki, avant ki zot gagne zot l’heritage dan le ciel, bann chretien oint servi bann lezot adorateur Jéhovah ici lor la terre.
2. Decrire bann di-bien Jésus.
2 Enn maitre ena tou droit lor so di-bien, ek li kapav servi zot couma li envie. Tou bann l’interet Royaume Bondié lor la terre faire partie dan di-bien Jésus Christ, le Roi ki Jéhovah inn etabli. Parmi so bann di-bien ena “enn grand la-foule” ki l’apotre Jean ti trouvé en vision. Jean decrire sa grand la-foule-la kan li dire: “Guetté! enn grand la-foule, ki personne pa ti kapav compté, ki sorti dan tou nation, ek tribu, ek peuple ek langue, ki pé debouté devant trone ek devant l’Agneau, habillé avek bann longue robe blanc; ek ti ena bann branche palmier dan zot la-main.”—Rév. 7:9.
3, 4. Ki bann privilege la grande foule ena?
3 Bann membre sa grande foule-la faire partie dan seki Jésus appel so “bann lezot brebis.” (Jean 10:16) Zot ena l’esperance pou vive lor enn la-terre ki pou vinn enn paradi. Zot ena confiance ki Jésus “pou guide zot vers bann la-source de l’eau la vie” ek ki “Bondié pou souye tou larme dan zot lizié.” Parski zot ena sa l’esperance-la, zot inn “lave zot longue robe ek zot finn faire sa vinn blanc dan di-sang l’Agneau.” (Rév. 7:14, 17) Parski zot ena la foi dan sacrifice Jésus, devant lizié Bondié zot ena ‘bann robe blanc.’ Li considere zot juste en tant ki so bann camarade, pareil couma Abraham.
4 En plus, parski Bondié considere la grande foule bann lezot brebis ki pé augmenté couma bann dimoune juste, zot kapav ena l’espoir pou sapé dan destruction sa systeme-la kan la grande tribulation vini. (Jacq. 2:23-26) Zot kapav aussi vinn proche avek Jéhovah, ek zot ena l’espoir extraordinaire pou sapé en tant ki groupe kan Har–Maguédôn vini. (Jacq. 4:8; Rév. 7:15) Zot pa forme enn groupe separé ki independant mais zot disposé pou servi enba direction zot lé-Roi ki dan le ciel ek so bann frere oint ki lor la terre.
5. Couma bann membre la grande foule soutenir bann chretien oint?
5 Bann chretien oint inn gagne ek pou contigne gagne grand l’opposition ar le monde Satan. Malgré sa, zot kapav compte lor soutien zot bann compagnon ki forme partie dan la grande foule. Alors ki bann chretien oint inn bien diminué, la grande foule contigne augmenté par centaine millier toulé-l’année. Bann chretien oint pa kapav dirige personnellement sa apepré 100,000 congregation ki ena dan le monde entier-la. Alors, enn domaine kot zot gagne soutien lezot brebis, c’est ki parmi la grande foule, ena bann zom qualifié ki servi en tant ki ancien dan bann congregation. Sa bann ancien-la aidé pou prend soin bann million chretien ki zordi enba responsabilité “l’esclave fidele et avisé.”
6. Couma eski sa soutien ki bann chretien oint gagné avek bann compagnon ki forme partie dan bann lezot brebis, ti deja prophetisé?
6 Isaïe ti prophetise concernant sa soutien volontaire ki bann chretien oint ti pou gagné avek zot bann compagnon ki forme partie dan la grande foule. Li ti ecrire: “C’est seki Jéhovah inn dire: ‘Bann travailleur ki pa gagne okenn la-paye, ki sorti l’Égypte, ek bann marchand l’Éthiopie ek bann Sabéen, bann zom ki bien haute, pou vinn kot toi, ek zot pou vinn pou toi. Zot pou marche derriere toi.’” (Is. 45:14) Dan enn fason symbolik, zordi bann chretien ki ena l’esperance pou vive lor la terre, pé marche derriere groupe bann chretien oint ek so College central kan zot pé suive zot direction. Christ inn donne so bann disciple oint ki lor la terre travail pou preché partout lor la terre. Pareil couma “bann travailleur ki pa gagne okenn la-paye,” bann lezot brebis donne tou zot la-force ek zot bann ressource volontairement ek avek tou zot leker pou soutenir bann chretien oint dan sa travail-la.—Actes 1:8; Rév. 12:17.
7. Dan ki but eski la grande foule pé gagne enn formation?
7 Alors ki zot pé soutenir zot bann frere oint, bann membre la grande foule pé gagne enn formation ki pou aide zot pou forme base sa nouveau societé humain ki pou existé apré Har–Maguédôn-la. Fodé ki sa base-la solide ek stable, ek ki so bann membre envie ek kapav suive bann instruction ki le Maitre pou donné. Zordi chaque chretien pé gagne l’occasion pou montré ki le Roi, Christ Jésus, kapav servi li. Kan li ena la foi ek li montré so fidelité asterla, li montré ki li pou obeir kan le Roi pou donne li bann instruction dan le monde nouveau.
La grande foule montré zot la-foi
8, 9. Couma eski bann membre la grande foule pé montré ki zot ena la foi?
8 Bann lezot brebis, bann compagnon congregation bann chretien oint, montré zot la-foi dan plusieurs fason. En premier, zot soutenir bann chretien oint pou proclame la bonne nouvelle lor Royaume Bondié. (Mat. 24:14; 28:19, 20) Deuxiemement, zot soumette-zot volontairement ar direction ki College central donné.—Héb. 13:17; lire Zekaria 8:23.
9 Troisiemement, bann membre la grande foule soutenir zot bann frere oint kan zot vive en accord avek bann principe droite ki sorti kot Jéhovah. Zot faire zeffort pou developpe ‘l’amour, la joie, la paix, la patience, la bienveillance, la bonté, la foi, la douceur, la maitrise de soi.’ (Gal. 5:22, 23) Zordi, li pa trop la mode pou bann dimoune manifesté sa bann qualité-la dan zot la-vie. Bann dimoune plutot developpe bann “oeuvres de la chair.” Mais mem sa, bann membre la grande foule bien decidé pou evite “fornication, l’impureté, conduite devergondé, l’idolatrie, pratik spiritisme, la haine, bagarre, jalousie, crise colere, bann dispute, division, secte, envié lezot, bann paryaz boire, bann bakanal, ek bann lezot kitsoz ki pareil coumsa.”—Gal. 5:19-21.
10. Ki bann membre la grande foule determiné pou faire?
10 Parski nou imparfait, li kapav bien difficile pou developpe fruit l’esprit, pou evite bann oeuvres de la chair, ek pou resisté kont pression ki le monde Satan faire lor nou. Nou kapav decouragé parski nou ena bann faiblesse personnel, nou pa reussi touletan faire tou seki bon, ou-soit nou ena bann limite physik. Mais malgré sa, nou determiné pou pa laisse sa qualité decouragement-la affaibli nou la-foi ou-soit diminué nou l’amour pou Jéhovah. Nou koné ki Jéhovah pou faire pareil couma Li’nn promette—Li pou faire la grande foule passe la grande tribulation vivant.
11. Ki bann tactik Satan servi pou li essaye affaibli la foi bann chretien?
11 Mais malgré sa, nou touletan lor nou garde parski nou koné ki nou vrai l’ennemi, c’est Satan le Diable, ek li pa abandonné facilement. (Lire 1 Pierre 5:8.) Li’nn essaye servi bann apostat ek lezot dimoune pou faire nou croire ki bann l’enseignement ki nou pé suive, zot fausse. Mais en general sa tactik-la pa finn reussi. Li pareil pou persecution. Mem si sa finn parfois ralenti travail predication, souvent sa finn plutot fortifié la foi bann ki ti pé gagne persecution. Alors, ena enn methode ki Satan pli allé pé servi, parski pou li sa parette enn methode ki ena plus chance pou affaibli nou la-foi: li exploite bann sentiment decouragement. Bann premier chretien ti gagne enn l’avertissement kont sa danger-la kan Paul ti dire zot: “Reflechi bien lor sa kikenn [Christ] ki’nn endure sa bann qualité kozé ki contraire-la, ki bann dimoune ki faire peché inn dire kont zot prop l’interet.” Kifer? “Pou ki zot pa fatigué ek zot pa perdi courage.”—Héb. 12:3.
12. Couma eski conseil ki ena dan la Bible donne la force bann ki decouragé?
12 Eski ou’nn deja senti coumadir ou envie abandonné? Eski parfois ou senti ki ou’nn rate ou la-vie en tant ki enn chretien? Si oui, pa laisse Satan servi sa bann sentiment-la pou empeche ou servi Jéhovah. Enn l’etude la Bible ki profond, bann la-priere sincere, assisté bann reunion regulierement ek frequente bann lezot chretien, c’est bann kitsoz ki pou donne ou la force ek empeche ou “perdi courage.” Jéhovah inn promette pou aide bann ki pé servi Li pou regagne la force, ek nou kapav ena confiance dan so promesse. (Lire Isaïe 40:30, 31.) Concentré lor bann activité theocratik. Evite bann distraction ki prend beaucoup lé-temps, ek fixé ou l’esprit lor l’activité pou aide lezot. Lerla ou pou gagne la force pou enduré malgré decouragement.—Gal. 6:1, 2.
Zot sap dan tribulation pou rente dan le monde nouveau
13. Ki travail attann bann ki traverse Har–Maguédôn vivant?
13 Apré Har–Maguédôn, pou bizin montré tou sa bann dimoune injuste ki pou ressuscité-la, couma marche dan bann chemin Jéhovah. (Actes 24:15) Zot pou bizin aprann concernant sacrifice Jésus ki couvert bann peché. En plus, pou bizin enseigne zot pou ena la foi dan sa sacrifice-la pou zot kapav profite so bann bienfait. Zot pou bizin rejette bann fausse croyance religieux ki zot ti ena avant ek abandonne zot ancien fason vive. Zot pou bizin mette lor zot sa nouveau personnalité ki permette reconette bann vrai chretien-la. (Éph. 4:22-24; Col. 3:9, 10) Bann membre lezot brebis ki traverse Har–Maguédôn vivant pou ena beaucoup travail pou faire. Vrai-mem li pou enn la-joie pou faire bann travail coumsa pou Jéhovah, ek nou pa pou ena bann pression ek bann kitsoz ki prend nou lé-temps couma asterla dan sa lé-monde mauvais-la!
14, 15. Raconté couma bann ki pou traverse la grande tribulation vivant ek bann juste ki pou ressuscité pou ena kitsoz pou raconte zot camarade.
14 Bann serviteur fidele Jéhovah ki’nn mort avant ki Jésus vinn lor la terre, zot aussi pou ena beaucoup pou aprann kan zot ressuscité. Zot pou aprann kisannla sa Messie ki Bondié ti’nn promette-la ek ki zot ti pé attann, mais ki zot pa’nn reussi trouvé. Dan zot la-vie avant, zot ti deja montré ki zot envie ki Jéhovah enseigne zot. Maziné ki la joie ek ki privilege nou pou ena pou aide zot—par exemple, pou explik Daniel couma bann prophetie ki li ti ecrire mais ki li pa ti comprend, finn realisé!—Dan. 12:8, 9.
15 Bien sur, bann ressuscité pou ena beaucoup pou aprann avek nou. Mais nou aussi, nou pou ena enn quantité question pou demann zot. Zot pou donne nou bann detail lor bann l’evenement ki la Bible mentionné mais ki pa raconté en detail. Maziné couma li pou interessant pou aprann bann detail personnel lor Jésus grace a so cousin Jean le Baptiste! Sa bann kitsoz ki nou pou aprann ar bann temoin fidele-la pou surement aide nou pou comprend pli bien Parole Bondié comparé ar seki nou comprend zordi. Bann serviteur fidele Jéhovah ki’nn mort—parmi ena bann membre la grande foule ki’nn mort pendant lepok la fin—pou gagne enn “pli bon resurrection.” Zot ti commence servi Jéhovah dan enn lé-monde dominé par Satan. Sa pou vrai-mem enn la-joie pou zot pou contigne zot service dan le monde nouveau kot pou ena bann condition beaucoup pli bon!—Héb. 11:35; 1 Jean 5:19.
16. Dapré bann prophetie, couma eski Jour Jugement pou deroulé?
16 Pou arrive enn l’heure pendant Jour Jugement, pou ouvert bann rouleau. C’est lor base sa bann rouleau-la ek lor base la Bible ki pou juge tou bann ki vivant, pou guetté si zot digne pou gagne la vie eternel. (Lire Révélation 20:12, 13.) A la fin Jour Jugement, sakenn pou gagne bien l’occasion pou montré ki so position lor question souveraineté Jéhovah. Eski li pou soutenir Royaume Bondié ek laisse l’Agneau guide li vers “bann la-source de l’eau la vie”? Ou-soit eski li pou resisté ek refuse soumette-li ar Royaume Bondié? (Rév. 7:17; Is. 65:20) Ziska la, zot tou ki lor la terre pou’nn gagne l’occasion prend enn decision personnel, sans ki peché ki bann dimoune inn herité, ou-soit enn mauvais l’environnement influence zot. Personne pa pou kapav mette en doute la justice Jéhovah dan jugement final. Zis bann mauvais dimoune ki pou detruire pou touletan.—Rév. 20:14, 15.
17, 18. Ki kitsoz faire bann chretien oint ek bann lezot brebis attann Jour Jugement dan la joie?
17 Parski Jéhovah inn juge zot digne pou gagne enn royaume, bann chretien oint pé attann avek impatience pou regné pendant Jour Jugement. C’est enn grand privilege ki zot pou ena! Kan zot pense seki pé attann zot, sa motive zot pou suive sa conseil ki Pierre ti donne zot bann frere dan premier siecle-la: “Bondié inn appel zot ek inn choisir zot; alors zot ena plus raison encore pou faire tou zot possible pou ki zot reste digne pou gagne sa; parski si zot contigne faire sa bann kitsoz-la, zot pou toujours reussi reste digne. En realité, c’est coumsa ki zot pou gagne tou droit pou rente dan royaume eternel nou Seigneur ek Sauveur Jésus Christ.”—2 Pierre 1:10, 11.
18 Bann lezot brebis content pou zot bann frere oint. Zot determiné pou soutenir zot. En tant ki bann camarade Bondié zordi, zot motivé pou faire tou seki zot kapav dan service Bondié. Pendant Jour Jugement, zot pou content pou soutenir avek tou zot leker bann disposition Bondié a mesure ki Jésus guide zot vers bann la-source de l’eau la vie. Lerla, enfin, Jéhovah pou juge zot digne pou vinn so bann serviteur lor la terre pou touletan!—Rom. 8:20, 21; Rév. 21:1-7.
Eski ou rappel?
• Ki kitsoz ki forme partie dan di-bien Jésus?
• Couma eski la grande foule soutenir zot bann frere oint?
• Ki bann privilege la grande foule ena, ek ki zot attann pou l’avenir?
• Couma ou maziné Jour Jugement pou été?
[Zimage, page 29]
Bann membre la grande foule finn lave zot robe ek finn faire zot vinn blanc dan di-sang l’Agneau
[Zimage, page 31]
Ki ou esperé aprann avek bann fidele ki pou ressuscité?