Sapit Kinz
Ekut Konsey, Aksepte Disiplinn
1. (a) Kifer eski nu tu, nu bizin konsey ek disiplinn? (b) Ki kestyon nu bizin egzamine?
“NU TU, suvan nu fer erer,” ala seki Labib dir dan Zak 3:2. Nu kapav pans buku lokazyon kot nu pa finn reysi montre nu sa kalite dimunn ki Parol Bondye demann nu pu ete la. Akoz sa, nu rekonet ki Labib ena rezon kan li dir: “Ekut konsey ek aksepte disiplinn, pu ki to kapav vinn saz dan to lavenir.” (Proverb 19:20) Sirman, nu finn deza fini fer bann sanzman dan nu lavi pu viv an akor avek bann lanseynman Labib. Me, kuma eski nu reazir kan enn lot Kretyin konsey nu lor enn pwin presi ki konsern nu?
2. Ki nu bizin fer kan nu gayn konsey personel?
2 Ena rod bann pretex pu zistifye zotmem, pu fer zot sityasyon paret mwin grav, uswa pu zet blam lor lezot. Me, li pli bon ki nu ekut konsey ek nu aplik li. (Ebre 12:11) Byinsir, personn pa bizin atann ki lezot parfe, ni donn bann konsey lor tu ti kitsoz uswa lor bann zafer ki Labib les nu deside par numem. Anplis, kitfwa sa kikenn ki pe donn konsey la pena tu bann fe devan li; alor avek respe nu kapav atir so latansyon lor la. Me fer kuma dir dan prosin konversayon ki nu gayne konsey la uswa disiplinn la li vremem aplike, li baze lor Labib. Kuma eski nu bizin reazir?
Bann Legzanp Ki Kapav Konvink Nu
3, 4. (a) Ki ena dan Labib ki kapav ed nu pu devlop enn bon latitid anver konsey ek disiplinn? (b) Kuma eski Sail ti reazir kan li ti gayn konsey, ek avek ki rezilta?
3 Dan Parol Bondye ena bann legzanp reel bann dimunn ki ti gayn konsey ki zot ti bizin. Suvan, apre konsey ti ena usi disiplinn. Sail, Lerwa Izrael, ti enn parmi sa bann legzanp la. Li pa ti obeir Zeova konsernan nasyon Amalek. Bann Amalekit ti kont bann serviter Bondye, ek dan so zizman kont sa move nasyon la, Zeova ti dir ki fode ki okenn parmi zot, ni okenn zot trupo sape. Purtan, Lerwa Sail pa ti tuy lerwa Amalek ek bann meyer zanimo dan trupo.—1 Samyel 15:1-11.
4 Zeova ti avoy profet Samyel pu koriz Sail. Kuma eski Sail ti reazir? Li ti diskit avek Samyel, li ti dir ki li ti’nn bat bann Amalekit, me selman li ti’nn deside pu pa tuy zot lerwa. Me, sa pa ti an akor avek lord ki Zeova ti done. (1 Samyel 15:20) Konsernan trupo zanimo ki li pa ti tuye, Sail ti sey zet tor lor lepep. Li ti dir: “Mo finn gayn per lepep ek mo finn obeir zot lavwa.” (1 Samyel 15:24) Sail ti paret pli interese ar so repitasyon ek li ti mem demann Samyel pu donn li loner devan lepep. (1 Samyel 15:30) Byinsir lerla, Zeova ti rezet Sail kuma lerwa.—1 Samyel 16:1.
5. Ki ti ariv Lerwa Uziya kan li ti rezet konsey?
5 Lerwa Zida, Uziya “ti fer enn aksyon infidel kont Zeova, so Bondye. Li ti vinn dan tanp Zeova pu bril lansan.” (2 Kronik 26:16) Me, dapre Lalwa selman bann pret ki ti kapav ofer lansan. Kan sef pret ti rod aret Uziya, li ti reazir avek koler. Ki ti arive lerla? Labib dir: “Lalep finn paret lor so fron . . . parski Zeova finn frap li. Ek lerwa Uziya finn kontiyn ena lalep ziska zur so lamor.”—2 Kronik 26:19-21.
6. (a) Kifer eski Sail ek Uziya tulede ti refiz konsey? (b) Kifer eski refiz konsey li enn problem grav zordi?
6 Kifer eski Sail ek Uziya tulede ti truv difisil pu aksepte konsey? Zot gro problem ti lorgey, zot ti krwar ki zot ti tro gran. Akoz sa defo la mem ki buku gayn problem. Kitfwa zot ti panse ki si zot ti aksepte konsey, sa ti pu montre ki zot ti ena kit defo par la uswa sa ti pu gat zot repitasyon. Me, lorgey li enn febles. Lorgey bus lespri enn dimunn sibyin ki li gayn tandans pu reziste kont led ki Zeova done par mwayin so Parol ek so lorganizasyon. Ala kifer Zeova averti nu: “Avan fraka ena lorgey, ek avan enn fo pa, ena enn lespri vantar.”—Proverb 16:18; Romin 12:3.
Nu Bizin Aksepte Konsey
7. Ki bann bon leson pozitif nu kapav tire dan fason ki Moiz ti reazir devan konsey ki li ti gayne?
7 Dan Labib ena usi bann bon legzanp bann ki finn aksepte konsey, ek nu kapav tir leson. Get Moiz, par egzanp. So boper ti konsey li lor fason ki li bizin fer so travay, ki ti pe pez lor li. Moiz finn ekut li ek li finn aplik sa konsey la deswit. (Egzod 18:13-24) Mem ki Moiz ti ena enn gran lotorite, kifer eski li finn ekut konsey? Parski li ti ena limilite. “Moiz ti ena buku plis limilite ki tu bann zom ki ti lor later.” (Nonm 12:3) Ki kantite eski limilite li inportan? Sefanya 2:3 montre ki limilite vedir lavi.
8. (a) Ki bann pese David ti komet? (b) Kuma eski David ti reazir kan Natann ti koriz li? (c) Ki bann konsekans bann pese David ti ena?
8 Lerwa David ti komet ladilter avek Batseba ek pu kasyet so pese, li ti fer enn fason ki Uriya, mari Batseba, mor. Alor, Zeova ti avoy profet Natann pu koriz David. David ti repanti ek li ti admet san ezite: “Mo finn fer pese kont Zeova.” (2 Samyel 12:13) Mem si Bondye ti aksepte David kan li ti finn repanti, li ti bizin kan mem pey bann konsekans so move aksyon. Zeova ti dir li ki lepe “pa pu kit [so] prop lakaz,” pu donn so bann fam “[so] kamarad,” ek sa garson ki ti ne par sa ladilter la “san fot li pu mor.”—2 Samyel 12:10, 11, 14.
9. Ki fode pa nu bliye kan pe konsey nu uswa disiplinn nu?
9 Lerwa David ti kone ki profi ena kan ekut bann konsey saz. Li ti remersye Bondye pu sa dimunn ki Li ti servi pu konsey li la. (1 Samyel 25:32-35) Eski nu’si, nu kumsa? Si wi, sa pu anpes nu dir uswa fer bann kitsoz ki kapav fer nu regrete apre. Ki nu pu fer si nu truv nu dan bann sityasyon kot nu bizin gayn konsey uswa disiplinn? Fode zame nu bliye ki konsey uswa disiplinn, li enn prev ki Zeova kontan nu ek ki Li anvi nu viv byin pu tuletan.—Proverb 3:11, 12; 4:13.
Bann Kalite Ki Ena Gran Valer, Ki Nu Bizin Devlope
10. Dapre Zezi, ki kalite ki neseser pu bann ki ule gayn Rwayom?
10 Pu ena enn bon relasyon avek Zeova ek avek nu bann frer Kretyin, nu bizin devlop sertenn kalite. Zezi ti fer remark enn sa bann kalite la kan li ti met enn zanfan omilye so bann disip ek li ti dir: “Si zot pa sanze ek zot pa vinn parey kuma bann ti zanfan, zot pa pu kapav rant dan rwayom lesyel. Alor, seki abes li kuma sa ti zanfan la, limem ki pli gran dan rwayom lesyel.” (Matye 18:3, 4) Bann disip Zezi ti bizin devlop limilite, parski zot ti pe diskite pu rod kone kisannla pli gran parmi zot.—Lik 22:24-27.
11. (a) Devan kisannla nu bizin abes nu, ek kifer? (b) Si nu ena limilite, kuma eski nu pu pran bann konsey ki nu gayne?
11 Lapot Pyer ti ekrir: “Zot tu, atas limilite kuma enn sintir ar zot, ek montre sa kalite la sakenn anver so kamarad, parski Bondye kont bann vantar, me li donn so faver ki [nu] pa merite ar bann ki abes zot.” (1 Pyer 5:5) Nu kone ki nu bizin abes nu devan Bondye, me sa verse la montre ki nu bizin abes nu devan nu bann frer Kretyin. Si nu ena limilite anver zot, nu pa pu pran an mal bann sigzesyon ki lezot donn nu, me okontrer nu pu aprann ar zot.—Proverb 12:15.
12. (a) Ki kalite inportan ki byin asosye avek limilite? (b) Kifer eski nu bizin pran kont lefe ki nu kondwit kapav ena lor lezot?
12 Pran kont lintere lezot sa li byin asosye avek limilite. Lapot Pol ti ekrir: “Ki sakenn pa rod so prop lavantaz, me lavantaz lezot. . . . Alor, swa ki zot manze, swa ki zot bwar uswa ninport ki kitsoz zot fer, fer tu pu laglwar Bondye. Fer atansyon ki zot pa vinn bann lokazyon pu fer lezot tonbe, pu bann Zwif, pu bann Grek ek pu kongregasyon Bondye.”(1 Korintyin 10:24-33) Pol pa ti pe dir ki fode pa nu pran ditu kont nu bann preferans personel. Non, me li ti ankuraz nu pu pa fer nanyin ki kapav pus enn kikenn fer enn kitsoz ki so konsyans finn dir li pabon.
13. Ki legzanp kapav montre si nu ena labitid pu aplik konsey Labib?
13 Eski u met lintere lezot dimunn avan u prop preferans personel? Nu tu bizin aprann fer sa. Ena buku fason ki nu kapav fer sa. Get par egzanp labiyman ek laparans. Sa de kitsoz la depann lor gu personel sak dimunn tank ki zot sinp, prop ek an ord, an akor avek seki Labib dir. Me si u aprann ki u manyer abiye uswa u laparans kapav anpes sertin dimunn dan u kominote aksepte mesaz Rwayom, parski zot finn elve dan enn sertenn fason, eski u pu pre pu fer bann sanzman dan u labiyman uswa dan u laparans? Byinsir, ed enn dimunn gayn lavi eternel buku pli inportan ki fer numem plezir.
14. Kifer eski li inportan devlop limilite ek lintere pu lezot?
14 Zezi finn les enn legzanp an seki konsern limilite ek pran kont lintere lezot; li ti mem lav lipye so bann disip. (Zan 13:12-15) Konsernan Zezi, Labib dir: “Gard sa latitid mantal ki ti usi dan Kris Zezi la; mem si li finn egziste dan form Bondye, li pa ti pans pu pran plas Bondye, ni pu vinn egal avek Bondye. Non, me li finn vid limem ek li finn pran form enn esklav ek li finn pran resanblans bann zom. An plis tusala, kan li ti kuma enn zom, li finn abes li, ek li finn vinn obeisan ziska lamor.”—Filipyin 2:5-8; Romin 15:2, 3.
Pa Rezet Disiplinn Zeova
15. (a) Ki bann sanzman nu bizin fer si nu’le ena enn personalite ki fer Bondye plezir? (b) Par ki mwayin Zeova donn nu tu konsey ek disiplinn?
15 Parski nu tu fer pese, nu bizin fer bann sanzman dan nu latitid ek dan nu kondwit si nu’le reflekte personalite Bondye. Nu bizin met “nuvo personalite” lor nu. (Kolosyin 3:5-14) Konsey ek disiplinn ed nu pu rekonet dan ki bann domenn nu bizin fer bann sanzman ek pu gete kuma pu fer sa bann sanzman la. Nu prinsipal surs linstriksyon li Labib limem. (2 Timote 3:16, 17) Bann piblikasyon baze lor Labib ek bann reynion ki lorganizasyon Zeova donn nu, ed nu pu aplik Parol Bondye. Mem si nu finn deza tann enn konsey avan, eski nu pu rekonet ki nu bizin sa konsey la ek eski nu pu sey amelyor nu?
16. Ki led Zeova donn sakenn parmi nu personelman?
16 Avek enn lintere ranpli ar lamur, Zeova ed nu dan nu bann problem. Bann milyon dimunn finn gayn led grasa enn letid Labib kot zot. Bann paran konsey ek disiplinn zot bann zanfan pu protez zot kont bann kondwit ki kapav fer leker fer mal apre. (Proverb 6:20-23) Dan kongregasyon, suvan sertin demann konsey ek bann lide ar bann Kretyin ki ena plis lexperyans, pu ki zot amelyor zot bann prop zefor dan predikasyon. Defwa, bann ansyin usi demann konsey ant zotmem uswa avek bann ki ena plis lexperyans dan minister. Bann ki ena bann kalifikasyon spirityel servi Labib pu ed, avek duser, bann ki bizin led. Si u pe donn konsey, pa bliye pu ‘vey lor umem, tansyon u’si u tante.’ (Galat 6:1, 2) Wi, nu tu nu bizin konsey ek disiplinn pu ador sel vre Bondye dan linite.
Kestyon Revizyon
• Kuma eski Zeova ed nu avek lamur pu truve dan ki bann domenn nu bizin personelman fer bann sanzman?
• Kifer eski buku gayn difikilte pu aksepte konsey ki zot bizin, ek ki kantite eski sa li grav?
• Ki bann kalite ki ena gran valer pu ed nu pu aksepte konsey, ek kuma eski Zezi finn donn legzanp lor sa bann kalite la?
[Zimaz paz 142]
Uziya ti rezet konsey ek li ti frape ar lalep
[Zimaz paz 142]
Moiz ti tir profi kan li ti ekut konsey Yitro