Kifer nou bizin respecté l’autorité?

1, 2. (a) Ki la lutte ena dan nou leker kan nou bizin respecté l’autorité? (b) Ki bann question nou pou examiné?

ESKI ou’nn deja observé couma enn ti zenfant reagir kan dire li faire enn kitsoz ki li pa envie faire ditou? Kan ou guette so figure ou kapav trouvé couma li pé lutté dan so leker. Li tann la voix so parent, ek li koné ki li supposé respecté so l’autorité. Mais la, vrai-mem li pa envie obeir. Seki pé passé dan leker sa ti zenfant-la, li enn kitsoz ki parfois arrive nou tou.

² Li pa touletan facile pou ena respé pou l’autorité. Eski parfois ou trouve sa difficile pou respecté bann dimoune ki ena enn certaine l’autorité? Si c’est ou cas, maziné ki ou pa tousel. Nou pé vive enn lepok kot jamais avant bann dimoune pa finn autant mank respé pou l’autorité. Pourtant, la Bible dire ki nou bizin montré respé pou bann ki ena l’autorité lor nou. (Proverbes 24:21) En realité, nou bizin faire sa si nou envie reste dan l’amour Bondié. Alors li normal ki nou demann-nou certain question. Kifer li aussi difficile ki sa pou nou respecté l’autorité? Kifer Jéhovah demann nou sa, ek ki pou aide nou pou obeir? Finalement, dan ki fason eski nou kapav montré nou respé pou l’autorité?

KIFER LI DIFFICILE

3, 4. Couma eski peché ek l’imperfection inn commencé, ek kifer nou l’imperfection faire ki li difficile pou respecté l’autorité?

³ Anou arrete-nou enn ti moment lor deux raison kifer li tellement difficile pou montré respé pou bann ki ena l’autorité. Premierement, nou imparfait; deuxiemement, bann dimoune ki ena l’autorité lor nou, zot aussi zot imparfait. Peché ek l’imperfection inn commencé bien longtemps, kan Adam ek Ève ti rebelle kont l’autorité Bondié dan jardin Éden. Alors peché inn commencé par enn rebellion kont l’autorité. Depuis sa, nou’nn herite tendance pou rebellé.—Genèse 2:15-17; 3:1-7; Psaume 51:5; Romains 5:12.

⁴ Parski peché li dan nou, la plupart parmi nou kapav facilement developpe l’orgueil, alors ki l’humilité li enn qualité rare ki nou bizin travail dur pou developpé ek gardé. Mem apré plusieurs l’année ki nou’nn servi Bondié avek fidelité, nou riské laisse l’orgueil domine nou ek vinn teti. Anou prend l’exemple Qorah ki ti reste attaché avek fidelité ar peuple Jéhovah dan beaucoup l’epreuve. Pourtant, li ti envie gagne plus l’autorité ek sans okenn la honte li ti commence enn rebellion kont Moïse ki ti beaucoup pli humble ki tou bann dimoune ki ti ena lor la terre sa lepok-la. (Nombres 12:3; 16:1-3) Mazinn aussi le roi Ouzziya. So l’orgueil ti pousse li pou rente dan temple Jéhovah ek offert enn service sacré ki ti reservé zis pou bann pretre. (2 Chroniques 26:16-21) Sa bann zom-la inn paye bien cher zot rebellion. Mais seki’nn arrive zot bizin servi nou couma enn l’avertissement. Nou bizin lutté pou rejette l’orgueil ki empeche nou respecté l’autorité.

5. Couma eski bann dimoune imparfait inn mal servi zot l’autorité?

⁵ Lot coté, bann dimoune imparfait ki ti ena l’autorité zot-mem inn faire ki bann dimoune pena respé pou l’autorité. Beaucoup finn agir sans okenn pitié, zot finn agir avek violence, ou-soit zot finn faire dominere. En realité, l’Histoire montré ki touletan finn ena dimoune ki finn abuse zot pouvoir. (Ecclésiaste 8:9) Par exemple, Saül ti enn bon dimoune ki ti bien humble kan Jéhovah ti choisir li pou vinn le roi. Mais, li ti laisse l’orgueil ek jalousie domine li ek lerla li ti persecute David ki ti enn zom fidele. (1 Samuel 9:20, 21; 10:20-22; 18:7-11) Plitar David ti vinn enn parmi bann pli bon le roi ki ti ena en Israël. Pourtant li aussi li ti mal servi so pouvoir kan li ti prend femme Ouriya, enn Hittite, ek li ti envoye sa zom innocent-la devant dan la guerre pou ki li trouve la mort. (2 Samuel 11:1-17) Oui a cause l’imperfection, li difficile pou bann dimoune servi zot pouvoir couma bizin. Ek kan bann ki ena pouvoir pena respé pou Jéhovah, zot pli mal servi zot pouvoir encore. Apré ki li ti raconté couma certain le pape catholique ti commence enn grand persecution, enn politicien anglais ti ecrire: “Pouvoir ena tendance pou encourage corruption, ek kan bann dimoune ena pouvoir total, corruption aussi li total.” Apré ki nou’nn trouvé couma pendant toute longue l’Histoire, bann dimoune inn mal servi zot l’autorité, anou considere enn question: Kifer nou bizin respecté l’autorité?

KIFER NOU BIZIN RESPECTÉ L’AUTORITÉ?

6, 7. (a) Ki nou l’amour pou Jéhovah pousse nou pou faire, ek kifer? (b) Ki soumission impliké, ek couma nou kapav montré soumission?

⁶ Bann pli bon raison ki pousse nou pou respecté l’autorité, ena enn rapport avek l’amour—l’amour pou Jéhovah, pou nou prochain, ek aussi pou nou-mem. Parski nou content Jéhovah avant tou, nou envie faire so leker content. (Proverbes 27:11; Marc 12:29, 30) Nou koné ki depuis rebellion dan jardin Éden, Satan inn mette en doute souveraineté Jéhovah, So droit pou dirige l’univers. Nou koné aussi ki majorité dimoune inn al dan coté Satan ek inn rejette domination Jéhovah. Mais nou, nou bien content pou soutenir souveraineté Jéhovah. Kan nou lire bann parole extraordinaire ki ena dan Révélation 4:11, sa touche nou leker. Li tellement clair pou nou ki Jéhovah ena tou droit pou dirigé en tant ki Souverain l’univers! Nou soutenir souveraineté Jéhovah kan nou accepté ki so domination ena enn l’influence dan nou la vie toulé-jour.

⁷ Sa qualité respé-la implik plus ki zis obeir. Nou disposé pou obeir Jéhovah parski nou content Li. Mais pou ena bann l’occasion kot li pou bien difficile pou nou obeir. Lerla nou pou bizin aprann soumission pareil couma sa ti zenfant ki nou ti mentionné dan commencement-la. Nou rappel ki Jésus ti soumette ar volonté so Papa mem kan sa ti kapav parette bien difficile. Li ti dire so Papa: “Pa couma moi mo envie, mais couma toi to envie.”—Luc 22:42.

8. (a) Zordi, ki soumission ar l’autorité Jéhovah souvent impliké, ek ki kitsoz faire nou koné seki Jéhovah pensé lor la? (b) Ki kitsoz kapav aide nou pou ecoute conseil ek accepté discipline? (Guette l’encadré “Ecoute conseil ek accepté discipline.”)

⁸ Bien sur, zordi Jéhovah pa koz ar sakenn parmi nou; Li servi so Parole ek bann dimoune ki represente Li lor la terre. Alors, pli souvent, nou montré nou soumission ar l’autorité Jéhovah kan nou respecté bann dimoune ki Jéhovah inn donne enn certaine l’autorité, ou-soit inn permette ki zot contigne ena certaine l’autorité lor nou. Si nou rebelle kont sa bann dimoune-la—par exemple kan nou refuse accepté zot conseil ek discipline ki basé lor la Bible—nou pou offense nou Bondié. Kan bann Israélite ti murmuré ek ti rebelle kont Moïse, Jéhovah ti considere sa couma bann peché ki zot ti commette kont Li personnellement.—Nombres 14:26, 27.

9. Kifer nou l’amour pou nou prochain pousse nou pou respecté l’autorité? Donne enn l’exemple.

⁹ Nou aussi montré respé pou l’autorité parski nou content nou prochain. Couma? Eh bien, faire coumadir ou enn soldat dan l’armée. Pou ki ou l’armée gagne victoire, pou ki li kapav mem survive, sa depann lor cooperation ek l’obeissance chaque soldat ek aussi respé ki li ena pou so bann chef depuis so pli tipti ziska so pli grand. Si ou rebelle kont sa l’autorité bien etabli-la, ou kapav mette la vie tou lezot soldat en danger. Li vrai ki zordi bann l’armée humain faire bann grand degat dan le monde. Mais Jéhovah ena bann l’armée ki faire zis seki bon. Enn quantité fois, la Bible appel Bondié “Jéhovah, Chef bann l’armée.” (1 Samuel 1:3) Li Commandant enn grand l’armée kot ena bann creature spirituel puissant. Parfois, Jéhovah compare so bann serviteur lor la terre ar enn l’armée. (Psaume 68:11; Ézékiel 37:1-10) Si nou rebelle kont bann dimoune ki Jéhovah inn donne l’autorité, eski nou pa pou mette nou bann lezot compagnon soldat en danger? Kan enn chretien rebelle kont bann ancien ki’nn etabli, lezot dan congregation kapav souffert zot aussi. (1 Corinthiens 12:14, 25, 26) Kan enn zenfant rebellé, tou so famille kapav souffert. Alors nou montré nou l’amour pou nou prochain kan nou respecté bann ki ena l’autorité ek cooperé avek zot.

10, 11. Couma desir ki nou ena pou pa faire nou-mem di-tort, pousse nou pou obeir l’autorité?

¹⁰ Nou aussi respecté l’autorité parski sa li dan nou prop l’interet. Kan Jéhovah demann nou respecté l’autorité, souvent Li mentionne bann l’avantage ki nou pou gagné si nou faire sa. Par exemple, Li dire bann zenfant obeir zot bann parent pou ki zot kapav vive longtemps ek heureux. (Deutéronome 5:16; Éphésiens 6:2, 3) Li dire nou respecté bann ancien dan congregation sinon sa pou faire nou di-tort lor plan spirituel. (Hébreux 13:7, 17) Ek Li dire nou obeir bann gouvernement pou nou prop protection.—Romains 13:4.

¹¹ Eski ou pa d’accord ki li pli facile pou respecté l’autorité kan nou koné kifer Jéhovah envie ki nou obeir? Alors anou guetté couma nou kapav montré respé pou l’autorité dan trois domaine principal dan nou la vie.

RESPÉ DAN LA FAMILLE

12. Ki role Jéhovah donne bann mari ek bann papa dan la famille, ek couma enn zom bizin rempli sa role-la?

¹² La famille, c’est enn disposition ki Jéhovah Li-mem inn etabli. En tant ki enn Bondié l’ordre, Jéhovah inn organise la famille pou ki li kapav marche bien. (1 Corinthiens 14:33) Li donne enn mari ek enn papa l’autorité pou agir couma chef dan so famille. Enn mari montré respé pou so Chef, Christ Jésus, kan li imite fason ki Jésus exerce so l’autorité lor la congregation. (Éphésiens 5:23) Alors fodé pa ki enn mari demissionné dan so responsabilité familial mais li bizin sarié so responsabilité couma bizin. Fodé pa li dominere ni dur mais, li bizin plutot ena beaucoup l’amour, li bizin raisonnable, ek bon. Li bizin toujours maziné ki so l’autorité ena enn limite, ki l’autorité Jéhovah pli grand ki so l’autorité.

13. Couma eski enn femme ek enn mama kapav rempli so role dan la famille dan enn fason ki faire Jéhovah plaisir?

¹³ Enn femme ek enn mama bizin enn kikenn ki aide so mari, ki soutenir li. Li aussi li’nn gagne l’autorité dan la famille, parski la Bible koz lor “la loi to mama.” (Proverbes 1:8) Bien sur, c’est l’autorité so mari ki passe avant. Enn femme chretien montré respé pou l’autorité so mari kan li aide li pou rempli so role en tant ki chef famille. Li pa abaisse so mari, ni influence li pou faire seki li, li envie, ni prend so place. Li plutot soutenir li ek coopere avek li. Kan li pa d’accord avek bann decision so mari, li kapav dire li seki li pensé avek respé, mais li toujours soumette. Si so mari pa enn temoin, kitfois li pou bizin faire face ar bann situation difficile, mais kan li montré so soumission, sa kapav pousse so mari pou rod konn Jéhovah.—1 Pierre 3:1.

14. Couma bann zenfant kapav faire leker zot parent ek leker Jéhovah content?

¹⁴ Bann zenfant faire leker Jéhovah content kan zot obeir zot papa ek zot mama. Zot aussi faire zot bann parent gagne l’honneur ek la joie. (Proverbes 10:1) Dan bann famille kot ena enn sel parent, bann zenfant applik mem principe l’obeissance, ek zot comprend ki zot parent kitfois plus bizin zot soutien ek cooperation. Kan tou bann membre dan enn famille rempli role ki Bondié inn donne zot, ena enn grand la paix ek la joie. Sa honore Jéhovah, sa Kikenn grace a ki, tou bann famille existé.—Éphésiens 3:14, 15.

RESPÉ DAN CONGREGATION

15. (a) Dan la congregation, couma nou kapav montré ki nou respecté l’autorité Jéhovah? (b) Ki bann principe kapav aide nou pou obeir bann ki dirigé dan congregation? (Guette l’encadré “Obeir bann ki pé dirige zot.”)

¹⁵ Jéhovah inn etabli so Garson couma Chef lor congregation chretien. (Colossiens 1:13) Jésus li, li’nn etabli so “l’esclave fidele et avisé” pou occupe bann l’interet spirituel peuple Bondié lor la terre. (Matthieu 24:45-47) College central bann Témoins de Jéhovah represente sa l’esclave fidele-la. Pareil couma dan bann congregation chretien premier siecle, zordi bann ancien gagne bann l’instruction ek conseil College central soit directement, soit par so bann representant, couma par exemple par bann surveillant itinerant. Kan sakenn parmi nou respecté l’autorité bann ancien, nou pé obeir Jéhovah.—Hébreux 13:17.

16. Dan ki sens eski bann ancien zot etabli par l’esprit saint?

¹⁶ Bann ancien ek bann assistant ministeriel zot pa parfait. Zot ena zot defaut pareil couma nou. Pourtant, bann ancien zot bann ‘zom ki Jéhovah inn donné couma bann don’ pou aide congregation pou reste fort lor plan spirituel. (Éphésiens 4:8) Bann ancien etabli par l’esprit saint. (Actes 20:28) Dan ki sens? D’abord sa bann zom-la bizin rempli bann condition necessaire ki ena dan Parole Bondié ki’nn inspiré par l’esprit saint. (1 Timothée 3:1-7, 12; Tite 1:5-9) En plus, kan bann ancien bizin examiné si enn frere rempli sa bann condition-la, zot suppliye Jéhovah pou ki so l’esprit saint guide zot.

17. Kifer bann femme chretien bizin parfois couvert zot la tête kan zot pé faire enn activité dan congregation?

¹⁷ Dan la congregation, li kapav arrivé ki pena okenn ancien ek assistant ministeriel pou faire travail ki zot, zot supposé faire, par exemple, conduire enn reunion pou predication. Dan sa bann cas-la, lezot frere kapav faire sa travail-la. Si pena okenn frere, bann soeur capable kapav remplace zot. Mais kan enn soeur faire enn travail ki normalement bizin faire par enn frere, li couvert so la tête.a (1 Corinthiens 11:3-10) Kan li couvert so la tête, sa pa faire enn madame perdi so valeur. Au contraire, sa donne li l’occasion pou montré respé pou enn disposition ki Jéhovah inn prend concernant l’autorité, dan lakaz ek dan congregation toulé-deux.

RESPÉ POU GOUVERNEMENT

18, 19. (a) Couma ou pou explik bann principe ki ena dan Romains 13:1-7? (b) Couma eski nou montré respé pou bann gouvernement?

¹⁸ Bann vrai chretien faire-zot enn devoir pou reste attaché ar bann principe ki ena dan Romains 13:1-7. Kan ou lire sa passage-la, ou kapav trouvé ki “bann l’autorité superieur” ki mentionné, c’est bann gouvernement. Tant ki Jéhovah permette ki sa bann gouvernement-la existé, zot faire certain travail important kan zot garde enn certain l’ordre ek kan zot donne nou bann service ki necessaire. Nou montré respé pou sa bann l’autorité-la kan nou obeir bann la loi. Nou assure-nou ki nou paye tou nou taxe, ek ki nou rempli bien n’importe ki form ou-soit document ki gouvernement demandé. Nou assure-nou aussi ki nou obeir n’importe ki la loi ki concerne nou-mem, nou famille, nou business, ou-soit nou bann di-bien. Mais nou pa soumette avek bann gouvernement si zot demann nou pou desobeir Bondié. Au contraire, nou reponn pareil couma bann zapotre dan le passé: “Nou bizin obeir Bondié couma enn chef plutot ki bann zom.”—Actes 5:28, 29; guette l’encadré “Kisannla mo bizin obeir?”

¹⁹ Nou aussi montré respé pou bann gouvernement dan fason ki nou comporte-nou. Parfois nou bizin koz avek bann representant gouvernement. L’apotre Paul ti bizin koz ar bann dirigeant couma le roi Hérode Agrippa ek gouverneur Festus. Sa bann zom-la ti ena bann gros defaut, mais Paul ti koz ar zot avek respé. (Actes 26:2, 25) Nou imite l’exemple Paul kan nou koz avek enn representant gouvernement, ki li enn dirigeant ki ena enn grand pouvoir ou-soit ki li enn simple la police dan nou l’endroit. Dan lekol, bann jeune chretien faire tou zot possible pou montré mem respé pou zot bann professeur, bann responsable dan lekol ek lezot dimoune ki employé dan zot lekol. Bien sur, fodé pa nou respecté zis bann ki d’accord avek nou bann croyance. Nou montré respé aussi envers bann ki pa content bann Témoins de Jéhovah. En general, bann ki pa Témoins bizin kapav trouvé ki nou bann dimoune ki ena respé.—Romains 12:17, 18; 1 Pierre 3:15.

20, 21. Mentionne certain bienfait ki nou gagné kan nou montré respé ki bizin pou l’autorité?

²⁰ Fodé ki nou touletan disposé pou montré respé. L’apotre Pierre ti ecrire: “Honore tou sorte qualité dimoune.” (1 Pierre 2:17) Kan bann dimoune senti ki nou ena enn respé sincere pou zot, sa kapav impressionne zot beaucoup. Pa blié ki sa qualité-la pli allé pé vinn pli rare. Alors kan nou montré respé, sa li enn fason pou ecoute sa commandement Jésus-la: “Faire ki zot la lumiere brillé devant bann dimoune, pou ki bannla trouve zot bon travail ek donne la gloire zot Papa ki dan le ciel.”—Matthieu 5:16.

²¹ Dan sa le monde ki dan noirté-la, bann dimoune ki ena enn bon leker, zot attiré vers la lumiere spirituel. Alors kan nou montré respé dan la famille, dan congregation, ek pou bann lezot l’autorité ki existé, sa kapav attire certain ek pousse zot pou marche ensam avek nou dan la lumiere. Enn possibilité extraordinaire, pa vrai? Mais mem si sa pa arrivé, ena enn kitsoz ki sur: respé ki nou ena pou bann dimoune faire plaisir Jéhovah ek Li aide nou pou reste dan so l’amour. Eski nou kapav attann enn pli grand recompense ki sa?