Eski ou premier pou honore lezot?
“Zot bizin toujours premier pou honore sakenn so camarade.”—ROM. 12:10.
1. Ki l’habitude bann dimoune nepli ena dan beaucoup pays?
DAN certain pays, kan bann zenfant trouve-zot avek bann adulte, li enn coutume ki zot agenou pou honore zot. Coumsa, zot pa riské parette pli grand ki bann ki pli vié ki zot. Dan sa bann communauté-la, zot considere sa couma enn mank respé si enn zenfant tourne so ledo ar enn adulte. Mem si dan lezot culture, bann dimoune ena different fason pou montré respé, seki nou’nn mentionné la-haut faire nou rappel sa commandement dan la Loi mosaïk-la: “Devant bann cheveux blanc to bizin levé [par respé], ek to bizin montré consideration pou enn vié dimoune.” (Lév. 19:32) Malheureusement, dan beaucoup pays, dimoune inn perdi l’habitude pou honore lezot. En realité, partout nou trouve bann dimoune ki pena respé pou zot prochain.
2 Dapré Parole Bondié, kisannla nou bizin honoré?
2 Dan Parole Bondié nou trouvé ki honore lezot, sa ena enn grand l’importance. La Bible dire nou ki nou bizin honore Jéhovah ek Jésus. (Jean 5:23) Li dire nou aussi ki nou bizin honore bann membre nou famille, nou bann frere ek soeur spirituel ek aussi certain dimoune ki pa forme partie dan congregation. (Rom. 12:10; Éph. 6:1, 2; 1 Pierre 2:17) Ki bann fason nou kapav montré ki nou honore Jéhovah? Couma nou montré l’honneur, setadir enn grand respé, envers nou bann frere ek soeur spirituel? Anou reponn sa bann question-la ek lezot question ki ena enn rapport avek sa.
Honore Jéhovah ek so nom
3. Cite enn fason important ki nou honore Jéhovah.
3 Pou honore Jéhovah, li important ki nou montré respé ki bizin pou so nom. Eski nou pa ‘enn peuple pou so nom’? (Actes 15:14) Li vrai-mem enn l’honneur pou porte nom Jéhovah, Bondié tout-puissant. Prophete Mika ti dire: “Tou bann peuple zot, zot pou marche sakenn au nom zot bondié, mais nou, nou pou marche au nom Jéhovah nou Bondié pou touletan, oui pou toujours.” (Mika 4:5) Nou “marche au nom Jéhovah” kan chaque jour nou faire tou pou vive dan enn fason ki honore sa nom ki nou ena-la. Pareil couma Paul ti rappel bann chretien ki ti reste Rome, si nou pa vive en accord avek la bonne nouvelle ki nou preché, bann dimoune pou “koz en mal” lor nom Bondié, zot pou traite li sans okenn respé.—Rom. 2:21-24.
4. Couma ou considere privilege pou rann temoignage lor Jéhovah?
4 Nou honore Jéhovah aussi kan nou rann temoignage. Dan le passé, Jéhovah ti invite bann membre nation Israël pou vinn so bann temoin, mais zot pa’nn reussi rempli sa role-la. (Is. 43:1-12) Souvent, zot ti rebellé kont Jéhovah ek zot “ti mem faire Saint Israël la peine.” (Ps. 78:40, 41) Finalement, zot ti perdi faveur Jéhovah net. Mais nou zordi, nou reconnaissant ki nou ena privilege pou rann temoignage lor Jéhovah ek pou faire bann dimoune konn so nom. Si nou faire sa, c’est parski nou content Li ek nou envie ki so nom sanctifié. Couma nou kapav pa preché alors ki nou konn la verité lor nou Papa ki dan le ciel ek lor so bann projet? Nou ena mem sentiment ki l’apotre Paul kan li ti dire: “C’est enn obligation ki mo ena. Oui, malheur lor moi si mo pa annonce la bonne nouvelle!”—1 Cor. 9:16.
5. Couma la foi en Jéhovah ena enn rapport avek respé ki nou ena pou Li?
5 Psalmiste David ti chanté: “Bann dimoune ki konn to nom pou mette zot confiance en toi, parski jamais to pa pou quitte bann ki rod toi, ah Jéhovah.” (Ps. 9:10) Si nou konn Jéhovah vrai-mem ek nou respecté so nom pou seki sa nom-la representé, nou pou ena confiance en Li pareil couma so bann serviteur fidele dan le passé. Alors, kan nou ena enn confiance ek enn la foi coumsa en Jéhovah, c’est enn lot fason pou honore Li. Remarké couma Parole Bondié montré ki ena enn rapport entre ena confiance en Jéhovah ek ena respé pou Li. Kan nation Israël pa ti mette zot confiance en Li, Jéhovah ti demann Moïse: “Ziska kan sa peuple-la pou mank respé envers moi, ek ziska kan zot pa pou ena la foi en moi, malgré tou bann signe ki mo’nn faire parmi zot?” (Nomb. 14:11) Le contraire aussi li vrai. Kan nou ena confiance ki Jéhovah pou protege nou ek pou soutenir nou, mem kan nou pé passe par bann l’epreuve, nou montré ki nou respecté Li.
6. Ki pousse nou pou montré enn respé sincere pou Jéhovah?
6 Jésus ti montré ki nou respé pou Jéhovah bizin sorti dan nou leker. Kan li ti koz ar certain dimoune ki pa ti sincere dan zot l’adoration pou Jéhovah, li ti cite seki Jéhovah ti dire: “Sa peuple-la honore moi ar zot la levre, mais zot leker bien loin ar moi.” (Mat. 15:8) Nou ena enn respé sincere pou Jéhovah parski nou ena enn vrai l’amour pou Li. (1 Jean 5:3) Ek nou rappel aussi sa promesse-la: “Bann ki honore moi, mo pou honore zot.”—1 Sam. 2:30.
Bann ki prend la tête dan congregation respecté lezot
7. (a) Kifer bann frere ki ena bann responsabilité bizin honore bann ki zot dirigé? (b) Couma Paul ti montré respé envers so bann frere ek soeur spirituel?
7 L’apotre Paul ti donne sa conseil-la bann chretien: “Zot bizin toujours premier pou honore sakenn so camarade.” (Rom. 12:10) Bann frere ki ena responsabilité dan congregation bizin donne l’exemple—“zot bizin toujours premier”—pou honore bann ki zot dirigé. Dan sa domaine-la, bann ki ena bann grand responsabilité bizin suive l’exemple ki Paul inn laissé. (Lire 1 Thessaloniciens 2:7, 8.) Bann frere dan bann congregation ki Paul ti visité ti koné ki jamais li ti pou demann zot faire bann kitsoz ki li-mem li pa ti disposé pou faire. Paul ti respecté so bann frere ek en retour li ti gagne zot respé. Kan Paul ti dire: “Alors mo suppliye zot, imite moi,” nou kapav sur ki beaucoup ti disposé pou imite li parski li ti donne enn bon l’exemple.—1 Cor. 4:16.
8. (a) Couma Jésus ti montré ki li respecté so bann disciple? (b) Couma bann ancien kapav imite l’exemple Jésus zordi?
8 Enn lot fason ki enn frere ki ena bann responsabilité montré respé pou bann ki li dirigé c’est kan li explik zot bann raison kifer li demann zot pou faire certain kitsoz ou-soit kifer li donne zot certain instruction. Kan li faire sa, li imite Jésus. Par exemple, kan Jésus ti dire so bann disciple prié pou ki ena plus travailleur dan recolte, li ti dire zot kifer. Li ti dire: “Recolte-la grand, mais bann travailleur tigit. Alors, suppliyé Maitre recolte pou Li envoye bann travailleur dan so recolte.” (Mat. 9:37, 38) Li pareil aussi kan li ti dire so bann disciple “contigne veillé,” li ti dire zot kifer. Li ti dire: “Parski zot pa koné ki jour zot Seigneur pé vini.” (Mat. 24:42) Plusieurs fois, Jésus pa ti zis explik so bann disciple seki zot ti bizin faire, mais aussi kifer zot ti bizin faire sa. Dan sa fason-la, li ti montré ki li respecté zot ek ki li ti traite zot avek dignité. C’est vrai-mem enn bon l’exemple ki bann ancien bizin suive!
Respecté congregation Jéhovah ek direction ki li donne nou
9. Kisannla nou respecté aussi kan nou respecté congregation chretien ek so bann representant? Expliké.
9 Pou nou honore Jéhovah, nou bizin honore aussi congregation chretien ek so bann representant. Kan nou suive bann conseil ki l’esclave fidele et avisé donne nou, nou montré respé pou sa disposition ki Jéhovah inn prend-la. Dan congregation premier siecle, l’apotre Jean ti trouvé ki li necessaire pou reprend bann chretien ki pa ti respecté bann frere nommé. (Lire 3 Jean 9-11.) Seki Jean ti dire montré ki certain pa ti ena respé, pa zis pou bann ancien, mais aussi pou zot l’enseignement ek pou direction ki zot ti pé donné. Heureusement, la plupart chretien pa ti ena sa l’attitude-la. Tant ki bann zapotre ti vivant, bann chretien en tant ki groupe ti montré enn grand respé pou bann frere ki ti prend la tête.—Phil. 2:12.
10, 11. Servi la Bible pou expliké kifer li bon ki certain ena l’autorité dan congregation.
10 Jésus ti dire so bann disciple ki “zot tou zot frere.” (Mat. 23:8) Alors, a cause sa, certain inn tire conclusion ki zot tou bizin pareil ek ki personne pa bizin ena l’autorité dan congregation. Pourtant, dan bann l’Écritures hébraïques ek dan bann l’Écritures grecques chrétiennes toulé-deux, ena beaucoup l’exemple bann zom ki Bondié inn donne l’autorité. L’histoire bann patriarche, bann juge ek bann le roi dan lepok bann Hébreu dan le passé, montré bien ki Jéhovah ti servi bann dimoune pou donne bann instruction. Kan so peuple pa ti honore sa bann serviteur ki Li ti nommé-la, Jéhovah ti discipline zot.—2 Rois 1:2-17; 2:19, 23, 24.
11 Dan premier siecle aussi bann chretien ti reconette l’autorité bann zapotre. (Actes 2:42) Par exemple, Paul ti donne so bann frere bann instruction. (1 Cor. 16:1; 1 Thess. 4:2) Selman, li aussi li ti bien disposé pou soumette ar bann ki ti ena l’autorité lor li. (Actes 15:22; Gal. 2:9, 10) Oui, Paul ti ena enn bon l’attitude concernant l’autorité ki ti ena dan congregation.
12. Ki deux leson nou kapav tiré dan bann l’exemple biblik concernant l’autorité?
12 Nou kapav tire deux leson ar seki nou finn trouvé. Enn premier leson, “l’esclave fidele et avisé” par so College central, agir en accord avek la Bible kan li nomme bann frere pou prend bann responsabilité, ek certain frere zot nommé pou ena l’autorité lor lezot frere ki’nn nommé. (Mat. 24:45-47; 1 Pierre 5:1-3) Deuxieme leson, nou tou, mem bann frere ki’nn nommé, nou bizin honore bann ki ena l’autorité lor nou. Mais, dan ki fason pratik nou kapav honore bann dimoune ki ena responsabilité pou dirigé dan congregation?
Montré respé pou bann surveillant itinerant
13. Couma nou kapav montré respé pou bann frere ki represente congregation zordi?
13 Paul ti dire: “Frere, nou demann zot pou ena consideration pou bann ki travail dur parmi zot ek ki dirige zot dan le Seigneur, ek ki averti zot; ek pou donne zot enn l’estime plus ki special dan l’amour, a cause zot travail. Vive en paix entre zot.” (1 Thess. 5:12, 13) Pena doute ki bann surveillant itinerant zot parmi “bann ki travail dur.” Alors, anou donne zot “enn l’estime plus ki special.” Enn fason ki nou kapav faire sa c’est kan nou suive zot conseil ek zot l’encouragement avek tou nou leker. Kan enn surveillant donne nou bann instruction ki li’nn gagné ar College central, “sagesse ki sorti la-haut” pousse nou pou ki nou “disposé pou obeir.”—Jacq. 3:17.
14. Couma bann congregation montré ki zot ena enn respé sincere envers bann surveillant itinerant, ek ki resultat sa produire?
14 Mais ki nou pou faire si dire nou faire kitsoz dan enn certaine fason ki different avek fason ki nou habitué faire? Parfois, pou nou montré respé, nou pou bizin controle nou-mem pou pa dire enn kitsoz couma: “Nou pa faire bann kitsoz coumsa ici” ou-soit: “Kitfois sa kapav marché dan lezot place, mais pa dan nou congregation.” Au lieu ki nou ena sa l’attitude-la, nou pou faire zeffort pou obeir. Si nou rappel ki congregation li pou Jéhovah ek ki c’est Jésus ki chef la congregation, sa pou aide nou pou obeir. Kan bann membre dan enn congregation accepté avek la joie bann instruction ki surveillant donné ek zot mette sa en pratik, c’est enn preuve ki zot manifesté enn respé sincere. L’apotre Paul ti felicite bann frere dan congregation Corinthe parski zot ti obeir avek respé bann instruction ki Tite, enn ancien, ti donne zot kan li ti visite zot congregation. (2 Cor. 7:13-16) Zordi, nou aussi nou kapav sur ki, kan nou disposé pou suive bann conseil ki bann surveillant itinerant donne nou, sa permette nou pou gagne la joie dan nou l’activité predication.—Lire 2 Corinthiens 13:11.
“Honore tou sorte qualité dimoune”
15. Cite certain fason couma nou kapav montré respé pou nou bann frere ek soeur.
15 Paul ti ecrire: “Pa critik severement enn zom ki dan l’age. Au contraire, suppliye li couma enn papa, bann jeune garson couma bann frere, bann femme agé couma bann mama, bann jeune femme couma bann soeur avek enn l’esprit pur. Honore bann veuve ki vrai-mem veuve.” (1 Tim. 5:1-3) Oui, la Bible encourage nou pou honore zot tou dan congregation. Mais ki ou pou faire si ou ena enn probleme personnel avek enn frere ou-soit enn soeur? Eski sa pou empeche ou pou montré respé pou sa frere-la ou-soit sa soeur-la? Eski ou pa kapav plutot change ou l’attitude ek reconette ki sa serviteur Bondié-la ena bann qualité spirituel? Bann ki ena enn certaine l’autorité dan congregation bizin toujours considere zot bann frere avek respé ek jamais pa “domine lor . . . troupeau [Bondié].” (1 Pierre 5:3) Bann dimoune reconette congregation chretien par l’amour sincere ki ena entre so bann membre. Ek dan sa congregation-la, nou ena beaucoup l’occasion pou honore sakenn nou camarade.—Lire Jean 13:34, 35.
16, 17. (a) Kifer li important ki nou ena respé, pa zis pou bann dimoune ki nou joinde dan predication, mais aussi pou nou bann opposant? (b) Couma nou kapav “honore tou sorte qualité dimoune”?
16 Bien sur, nou pa respecté zis bann dimoune ki forme partie dan congregation. Paul ti dire bann chretien dan so lepok: “Tant ki nou ena enn le temps favorable pou sa, anou faire di-bien envers tou dimoune.” (Gal. 6:10) Li vrai ki li kapav difficile pou applik sa principe-la kan enn camarade travail ou-soit enn camarade lekol mauvais envers nou. Dan sa bann situation-la, nou bizin rappel sa bann parole-la: “Pa sofé a cause bann mauvais dimoune.” (Ps. 37:1) Si nou applik sa conseil-la, sa pou aide nou pou contigne agir avek respé mem envers bann dimoune ki opposé ar nou. Li pareil aussi kan nou dan predication. Si nou humble ek nou pena enn trop grand l’opinion lor nou-mem, sa pou kapav aide nou pou reponn bann dimoune “avek douceur ek enn grand respé.” (1 Pierre 3:15) Mem par nou l’apparence ek fason ki nou habillé, nou kapav montré ki nou respecté bann dimoune ki nou joinde dan predication.
17 Oui, ki li avek bann membre dan congregation ou-soit avek bann ki en dehors congregation, nou envie faire tou pou applik sa conseil-la: “Honore tou sorte qualité dimoune, content toute la famille nou bann frere, ena la crainte pou Bondié ek honore le roi.”—1 Pierre 2:17.
Couma ou pou reponn?
Couma ou kapav montré respé ki bizin pou:
• Jéhovah?
• bann ancien dan congregation ek bann surveillant itinerant?
• chaque membre dan congregation?
• bann dimoune ki nou joinde dan predication?
[Zimage page 23]
Bann chretien premier siecle ti respecté direction college central
[Zimage page 24]
Bann ancien dan tou pays honore bann surveillant itinerant ki College central nommé