Eski ou toujours premier pou honore lezot?

“Dan l’amour fraternel, ena enn grand l’affection sakenn pou so camarade. Zot bizin toujours premier pou honore sakenn so camarade.”—ROM. 12:10.

1, 2. (a) Ki conseil Paul ti donné dan lettre ki li ti ecrire bann Romain? (b) Ki bann question nou pou examiné?

DAN lettre ki li ti ecrire bann Romain, l’apotre Paul ti mette l’accent lor l’importance pou bann chretien montré l’amour dan congregation. Li ti rappel nou ki nou l’amour bizin ‘pa hypocrite.’ Li ti mentionne aussi l’expression “l’amour fraternel” ek li ti dire ki nou bizin montré sa qualité l’amour-la ensam avek “enn grand l’affection.”—Rom. 12:9, 10a.

² Oui, l’amour fraternel implik plus ki zis ena bann sentiment pou lezot. Nou bizin montré sa bann sentiment-la par bann action. Apré tou, personne pa pou koné ki nou ena l’amour ek l’affection, a moins ki nou montré sa dan enn certaine fason. Ala kifer Paul ti ajoute sa conseil-la: “Zot bizin toujours premier pou honore sakenn so camarade.” (Rom. 12:10b) Mais, honore lezot, ki sa impliké? Kifer li important ki nou toujours premier pou honore nou bann compagnon chretien? Couma nou kapav faire sa?

Respé ek l’honneur

3. Ki signification mot “l’honneur” ena en grec ek en hébreu?

³ Mot principal en hébreu pou “l’honneur” vedir “poids.” Kan nou honore enn dimoune sa vedir ki nou considere sa dimoune-la couma enn kikenn ki ena poids, ki important. Dan bann l’Ecriture, souvent traduire sa mem mot hébreu-la par “la gloire.” Sa montré encore plus ki quantité nou bien estime sa dimoune ki nou pé donne l’honneur-la. (Gen. 45:13) Mot grec ki’nn traduire par “l’honneur” dan la Bible donne l’idée ki nou ena l’estime pou lezot, ki zot ena valeur pou nou. (Luc 14:10) Oui, bann ki nou donne l’honneur zot ena beaucoup valeur pou nou.

4, 5. Dan ki sens, l’honneur ek respé c’est deux kitsoz ki marche ensam? Donne enn l’exemple.

⁴ Mais, honore lezot, ki sa impliké? D’abord nou bizin ena respé pou zot. En realité, souvent servi mot “l’honneur” ek “respé” ensam, parski sa deux mot-la zot bien proche. Kan nou honore enn dimoune, nou montré par bann action, ki nou ena respé pou li. En resumé nou kapav dire ki nou montré respé envers nou frere par fason ki nou considere li, alors ki nou honore li par fason ki nou agir envers li.

⁵ Couma eski enn chretien kapav honore so bann compagnon dan enn fason sincere si li pena enn profond respé pou zot? (3 Jean 9, 10) Anou prend enn l’exemple. C’est selman si finn plante enn pié dan bon la terre ki pié-la pou grandi ek pou contigne vive. Li pareil kan nou honore lezot. Si nou envie montré enn l’honneur sincere ki pou duré, envers enn dimoune, fodé ki dan nou leker nou ena enn profond respé pou li. Si nou pena enn profond respé pou enn dimoune, l’honneur ki nou pou manifesté pa pou sincere, ek pou arrive enn jour ki sa l’honneur-la pou mort, pareil couma enn pié ki planté dan enn mauvais la terre. Alors, asterla nou comprend kifer avant ki Paul ti dire bann chretien ki zot bizin honore zot camarade, li ti dire zot sa bann parole bien franc-la: “Fodé pa ki zot l’amour hypocrite.”—Rom. 12:9; lire 1 Pierre 1:22.

Honore bann ki’nn crée “dan ressemblance Bondié”

6, 7. Kifer nou bizin ena respé pou lezot?

⁶ Nou finn trouvé ki li bien important ki nou ena enn profond respé pou lezot, pou nou kapav donne zot l’honneur. Alors, fodé jamais nou blié bann raison biblik ki nou ena pou montré respé envers tou nou bann frere ek soeur. Anou examine deux raison.

⁷ Bann humain pa pareil couma tou bann lezot creature lor la terre. Zot finn crée “dan ressemblance Bondié.” (Jacq. 3:9) A cause sa-mem nou ena bann qualité ki Bondié ena, couma l’amour, la sagesse, ek la justice. Remark enn lot kitsoz ki nou Createur inn donne nou. Enn psalmiste dire: “O Jéhovah . . . , pé raconte to dignité dan bann place pli haute ki le ciel! . . . To finn aussi commence faire [zom] pli bas ki bann ange, ek to finn mette la gloire ek enn grand beauté [“l’honneur,” Bible en français courant] couma enn couronne lor li.” (Ps. 8:1, 4, 5; 104:1)a Bondié finn mette dignité, la gloire ek l’honneur couma enn couronne lor bann dimoune en general. A cause sa, kan nou donne enn dimoune dignité, en realité, nou pé donne l’honneur Jéhovah ki donne bann humain dignité. Alors, si nou ena bann bon raison pou ena respé envers bann dimoune en general, comié plus nou bizin ena respé pou nou bann compagnon chretien!—Jean 3:16; Gal. 6:10.

Nou bann membre enn sel famille

8, 9. Dapré Paul, pou ki raison nou bizin ena respé pou nou bann compagnon chretien?

⁸ Paul ti mentionne enn lot raison kifer nou ena respé pou nou prochain. Zis avant ki li ti donne conseil pou montré l’honneur, li ti dire: “Dan l’amour fraternel, ena enn grand l’affection sakenn pou so camarade.” L’expression grec ki finn traduire par “affection fraternel” faire reference ar lien bien fort ki uni bann membre enn famille kot sakenn content ek soutenir zot camarade. Alors, kan Paul ti servi sa l’expression-la, li ti mette l’accent lor enn point: dan congregation bizin ena bann relation bien solide, bien fort pareil couma ena parmi bann membre enn famille ki bien soudé. (Rom. 12:5) En plus, fodé pa nou blié ki Paul ti ecrire sa bann parole-la pou bann chretien oint. Bondié finn adopté tou sa bann chretien oint-la ek zot inn vinn bann zenfant enn sel Papa, Jéhovah. Sa faire nou comprend enn kitsoz ki bien important: dan enn sens spirituel, zot ti forme parti dan mem famille. Alors, bann chretien oint dan lepok Paul ti ena enn bon raison pou ena respé pou zot camarade. Sa applik aussi pou bann chretien oint zordi.

⁹ Mais ki nou kapav dire lor bann membre “lezot brebis”? (Jean 10:16) Mem si Bondié pa finn adopté zot couma so bann zenfant, zot kapav appel zot camarade, frere ek soeur. Kifer? Parski zot forme partie dan enn sel famille chretien international ki uni. (1 Pierre 2:17; 5:9) Si bann membre lezot brebis comprend bien seki zot pé dire kan zot servi l’expression “frere” ou-soit “soeur,” alors zot ena enn bon raison pou ena enn grand respé pou zot bann compagnon chretien.—Lire 1 Pierre 3:8.

Kifer li bien important?

10, 11. Kifer li bien important ki nou ena respé ek nou honore lezot?

¹⁰ Kifer li bien important ki nou ena respé ek nou honore lezot? C’est parski, kan nou donne l’honneur nou bann frere ek soeur, nou pé contribué beaucoup pou ki zot tou dan congregation zot senti-zot bien ek ki congregation reste uni.

¹¹ Bien sur, nou conscient ki, en tant ki bann vrai chretien, ena deux kitsoz ki soutenir nou beaucoup: nou bon relation avek Jéhovah ek soutien so l’esprit. (Ps. 36:7; Jean 14:26) En mem temps, kan nou bann frere ek soeur montré ki zot apprecié nou, sa encourage nou beaucoup. (Prov. 25:11) Kan enn dimoune dire ou-soit faire enn kitsoz ki montré ki li apprecié nou ek ki li ena respé pou nou, sa remonte nou moral. Sa donne nou plus la force pou contigne marche lor chemin la vie avek la joie ek determination. Pena doute ki personnellement ou finn faire sa l’experience-la.

12. Couma eski nou tou nou kapav favorise enn bon l’atmosphere, kot ena l’amour, dan congregation?

¹² Jéhovah koné ki li normal ki nou ressenti enn besoin pou gagne respé lezot. A cause sa, a travers so Parole, Li encourage nou pou “ena enn grand desir pou montré respé sakenn envers nou camarade.” (Rom. 12:10, Today’s English Version; lire Matthieu 7:12.) Sa c’est enn conseil ki jamais pa changé. Tou bann chretien ki prend serieux sa conseil-la pou favorise enn bon l’atmosphere, kot ena l’amour, parmi bann frere ek soeur. Alors, li bon ki nou arreté ek nou demann nou-mem: ‘Kan dernier fois mo finn dire enn parole ou-soit faire enn kitsoz pou montré mo respé sincere pou enn frere ou-soit enn soeur dan congregation?’—Rom. 13:8.

Nou tou nou ena enn responsabilité

13. (a) Kisannla bizin toujours premier pou honore lezot? (b) Ki kitsoz, bann parole ki Paul ti ecrire en Romains 1:7, faire nou comprend?

¹³ Kisannla bizin toujours premier pou honore lezot? La Bible montré nou ki bann ancien bizin “bann l’exemple” pou la congregation. (1 Pierre 5:3) Li vrai ki bann ancien donne enn bon l’exemple dan different l’activité. Mais en tant ki bann berger troupeau Bondié, zot bizin toujours premier pou honore zot bann compagnon chretien, parmi ena bann lezot ancien aussi. Par exemple, kan bann ancien joinde ensam pou discute lor besoin spirituel congregation, zot montré ki zot honore zot camarade kan zot ecoute bien bann commentaire ki n’importe ki ancien faire. En plus, kan zot prend enn decision, zot montré ki zot honore zot camarade kan zot prend en consideration l’opinion ek parole tou bann ancien. (Actes 15:6-15) Mais, nou bizin rappel enn kitsoz: lettre ki Paul ti ecrire bann Romain, pa ti adressé zis ar bann ancien, mais aussi ar congregation en entier. (Rom. 1:7) Alors, nou kapav dire ki sa conseil pou toujours premier pou honore lezot-la, li applik aussi ar nou tou zordi.

14. (a) Donne enn l’exemple pou montré difference ki ena entre honore lezot ek toujours premier pou honore lezot. (b) Ki question nou kapav pose nou-mem?

¹⁴ Remark enn lot l’aspect sa conseil ki Paul ti donné-la. Li ti encourage bann chretien dan Rome pa zis pou honore lezot mais pou toujours premier pou honore lezot. Eski sa faire enn difference? Anou prend enn l’exemple. Eski enn professeur pou encourage enn groupe zeleve ki deja konn lire, pou aprann lire? Non. Zot deja konn lire. Professeur-la pou essaye aide zot plutot pou lire pli bien. Li pareil pou nou aussi. L’amour ki nou ena sakenn pou nou camarade, ki pousse nou pou honore lezot, li deja identifié nou couma bann vrai chretien. (Jean 13:35) Anou ré-vinn avek nou l’exemple. Sa bann zeleve ki deja konn lire-la kapav contigne faire bann progré kan zot ameliore zot capacité pou lire. Nou aussi pareil, nou kapav contigne faire bann progré kan nou toujours premier pou honore lezot. (1 Thess. 4:9, 10) Nou tou nou finn gagne sa responsabilité. Nou kapav demann nou-mem: ‘Eski mo pé faire sa? Eski mo toujours premier pou honore lezot dan congregation?

Honore bann “ti dimoune”

15, 16. (a) Kan nou pé honore lezot, kisannla fodé pa nou blié, ek kifer? (b) Ki kitsoz kapav faire nou koné ki nou ena enn respé sincere pou tou nou bann frere ek soeur?

¹⁵ Kan nou honore lezot, kisannla dan congregation fodé pa nou blié? Parole Bondié dire: “Seki aide enn ti dimoune pé prete Jéhovah, ek seki li’nn faire, Jéhovah pou rann li.” (Prov. 19:17) Ki l’effet sa principe ki trouve dan sa verset-la bizin ena lor nou kan nou pé faire zeffort pou honore lezot?

¹⁶ Surement ou pou d’accord ki la plupart dimoune disposé pou honore bann ki ena enn pli grand position ki zot. Mais sa bann mem dimoune-la kitfois zot pena beaucoup respé, ou-soit zot pena respé ditou pou bann ki zot considere couma inferieur ar zot. Mais Jéhovah Li, Li pa coumsa. Li dire: “Bann ki honore moi, mo pou honore zot.” (1 Sam. 2:30; Ps. 113:5-7) Jéhovah honore tou bann ki servi Li ek honore Li. Li pa ignore bann “ti dimoune.” (Lire 1 Samuel 2:8; 2 Chron. 16:9) Bien sur, nou envie imite Jéhovah. Alors, si nou envie koné ki quantité nou pé donne lezot enn l’honneur sincere, li bon nou demann nou-mem: ‘Couma eski mo traite bann ki pena enn grand responsabilité dan congregation?’ (Jean 13:14, 15) Reponse sa question-la pou faire nou koné ki quantité respé nou ena pou lezot.—Lire Philippiens 2:3, 4.

Honore lezot kan ou donne zot ou le temps

17. Couma nou kapav toujours premier pou honore zot tou dan congregation ek kifer?

¹⁷ Couma nou kapav toujours premier pou honore zot tou dan congregation? C’est kan nou donne zot nou le temps. Kifer nou dire sa? En tant ki chretien, nou bien occupé. Nou ena beaucoup l’activité bien important dan congregation ki prend beaucoup nou le temps. Alors, li pa etonnant ki pou nou, le temps ena beaucoup valeur. Nou comprend aussi ki fodé pa nou trop attann ki nou bann frere ek soeur donne nou beaucoup zot le temps. Dan mem fason, nou apprecié kan lezot dan congregation comprend ki fodé pa zot attann ki nou donne zot beaucoup nou le temps.

18. Couma nou kapav montré ki nou disposé pou donne inpé le temps nou bann compagnon chretien?

¹⁸ Malgré sa, nou reconette (surtout bann ki parmi nou servi en tant ki ancien dan bann congregation) ki, kan nou disposé pou arrete nou bann l’activité pou donne inpé le temps nou bann compagnon chretien, nou montré ki nou ena respé pou zot. Dan ki fason? Kan nou arrete faire seki nou ti pé faire ek nou donne inpé le temps nou bann compagnon chretien, en realité, coumadir nou pé dire zot: ‘To ena tellement valeur pou moi ki li pli important ki mo donne toi inpé le temps, ki mo contigne faire seki mo ti pé faire.’ (Marc 6:30-34) Le contraire aussi vrai. Si nou pa disposé pou arrete nou bann activité pou donne inpé le temps nou frere, nou kapav faire li ressenti ki li pena okenn valeur pou nou. Bien sur, li kapav arrivé ki ena fois li impossible ki nou arrete faire enn kitsoz ki bien urgent. Mem sa, enn kitsoz pou montré si vrai-mem nou ena enn grand respé pou nou bann frere ek soeur: c’est si nou disposé pou donne zot inpé nou le temps ou-soit non?—1 Cor. 10:24.

Determiné pou toujours premier pou honore lezot

19. Cite enn lot fason couma nou kapav montré ki nou honore nou bann compagnon chretien.

¹⁹ Ena lezot fason bien important ki nou kapav honore nou bann compagnon chretien. Par exemple, kan nou donne zot inpé nou le temps, nou bizin donne zot aussi tou nou l’attention. Encore enn fois, Jéhovah donne nou l’exemple dan sa domaine-la. Psalmiste David dire: “Lizié Jéhovah lor bann dimoune ki juste, ek so zoreille tann zot suppliye Li pou gagne l’aide.” (Ps. 34:15) Nou essaye imite Jéhovah kan nou guette nou bann compagnon chretien ek nou ecoute zot, setadir nou donne zot tou nou l’attention, surtout bann ki vinn vers nou pou gagne l’aide. Kan nou faire sa, nou honore zot.

20. Ki bann rappel nou envie garde bien dan nou l’esprit en rapport avek donne lezot l’honneur?

²⁰ Couma nou finn examiné, nou envie garde bien dan nou l’esprit kifer nou bizin ena enn profond respé pou nou bann compagnon chretien. En plus, nou rod bann l’occasion pou toujours premier pou donne zot tou l’honneur, mem bann “ti-dimoune.” Kan nou faire tousala, sa pou fortifié lien ki ena entre bann frere ek soeur ek pou ena l’unité dan congregation. Alors, nou tou, anou contigne pa zis honore lezot, mais surtout toujours premier pou honore nou camarade. Eski ou determiné pou faire sa?

[Note]

Eski ou rappel?

• Ki lien ena entre l’honneur ek respé?

• Ki bann raison nou ena pou honore nou bann compagnon chretien?

• Kifer li important ki nou honore sakenn nou camarade?

• Dan ki fason nou kapav montré ki nou honore nou bann compagnon chretien?