Anu Donn Zeova ek So Garson Loner
Kuma Tu Seki Asiste Memoryal le 8 Avril Kapav Tir Buku Profi
1 Kisannla zordi pe gayn enn loner spesyal? Bann ki, devan lizye lemond, finn realiz bann gran explwa. Me lapliparditan, bann dimunn bliye byin vit sa bann gran explwa la. Me ki nu kapav dir lor bann aksyon ki vremem pe fer limanite tir profi? Nu pu donn plis latansyon enn parmi sa bann aksyon la si nu asiste Repa Diswar Senyer, apre kuse soley le 8 Avril, 2001.
2 Kisannla merit pli gran loner? Labib reponn: “To merite, Zeova, . . . pu gayn laglwar ek loner ek puvwar, parski to finn kre tu kitsoz.” (Revelasyon 4:11) Pwiski Zeova Li Kreater, Li mem Dirizan Suverin dan liniver. Li pu tuletan merit loner!—1 Timote 1:17.
3 Zezi Kris, Garson Bondye, ti fer bann aksyon ki ena buku valer ek ki pu amenn bann benediksyon pu tuletan lor limanite. Li finn imit so Papa egzak pu egzak. (Zan 5:19) Parski li finn obeir san fot ek li finn res fidel, li “merit gayn pwisans, rises, sazes, lafors, loner, laglwar ek benediksyon.” (Revelasyon 5:12) So Papa finn donn li loner kan Li finn fer li vinn Lerwa. (Psom 2:6-8) Nu’si, nu pu gayn lokazyon pu donn loner, Papa ek Garson tulede, kan nu pu selebre Repa Diswar Senyer le 8 Avril, 2001.
4 Malerezman, zis enn tigit dimunn mem dan listwar limanite finn donn Zeova ek so Garson loner ki zot merite. Parfwa, mem bann Izraelit, ansyin lepep Bondye ti rann Zeova enn servis zis pu lizye dimunn. Sa ti vremem enn gran mank respe. (Malaki 1:6) Respekte Zeova ek so Garson kuma bizin vedir obeir zot fidelman parski nu kontan ek nu apresye tu seki zot finn fer pu nu. Kan nu donn sa kalite loner ek respe la, nu montre ki nu ena lakrint ek nu respekte zot pozisyon; ek nu pran Zeova ek Zezi kont dan tu seki nu fer. Zisteman, kongregasyon Kretyin fer zefor pu anseyn ek pu ed lezot pu fer parey.
5 Enn Lokazyon Spesyal pu Montre Loner: Tulelane, selebrasyon Memoryal li rasanbleman pli inportan pu lepep Zeova. Tu seki ena dezir pu servi Zeova ek pu donn Li loner bizin prezan. (Lik 22:19) Nu panse ki san kont bann 6 milyon Temwin aktif ki ena, bann dimunn interese ki pu vinn asiste pu ogmant nu lasistans ziska plis ki 14 milyon. Sa li vremem enn bon lokazyon pu donn loner nu Papa ki dan lesyel! Mem si selebrasyon la met lanfaz sirtu lor Zezi, loner ek respe ki nu montre pu seki li finn fer donn laglwar so Papa ki finn anvway li.—Zan 5:23.
6 Ki nu kapav fer pu sutenir sa lokazyon spesyal la? Nu kapav ed bann nuvo ki interese pu tir plis profi. Ankuraz zot pu asiste, ek si bizin, propoz u led zantiman pu zot kapav vinn asiste. Explik zot bi sa diskur la. Prezant zot bann lezot manb. Seki zot truve ek tande kapav pus zot pu zwenn zot ansam avek nu pu donn Zeova loner.
7 Fode zame pa suzestim lefe ki sa program la kapav ena. Enn etidyan dan liniversite ti dir: “Mo finn asiste Lakominyon plizir fwa dan mo legliz, me sannla byin diferan. Mo truve ki sa li egzakteman seki Labib dir, ek mo panse zot ena laverite.” Li finn kumans asiste bann reynion regilyerman ek li pa finn tarde pu pran batem.
8 Ed Bann Nuvo pu Progrese: Pran not bann nuvo ki asiste Memoryal ek apre sa reynion inportan la, pa tarde pu vizit zot pu reget avek zot bann nuvo kitsoz ki zot finn aprann ek remarke. Fer zot konn bann lezot reynion kot zot kapav ogmant zot konesans Labib. U kapav reget sapit 17, “Truv Sekirite Parmi Lepep Bondye” dan liv Connaissance pu montre zot enn gran kantite laranzman spirityel ki kongregasyon fer, ki deza zot pe kapav profite. Organize pu get ansam avek zot kaset video Our Whole Association of Brothers, kumsa zot kapav truv avek zot prop lizye linite, lazwa, ek zel lepep Bondye!
9 Li inportan ki bann ki interese aprann kuma zot kapav personelman montre loner ek respe pu Zeova. Explike, ki bann lapriyer ki sorti dan nu leker fer Zeova plezir, ek ki sa kalite lapriyer la li enn sulazman lor plan spirityel. (1 Zan 5:14) Servi bann leson 8-12 dan brosir Ki Bondye Pe Demann Nu? pu montre ki kalite kondwit ki donn Zeova loner. Egzaminn paz 30-1 dan brosir Les Témoins de Jéhovah pu ankuraz bann nuvo pu reflesi lor posibilite pu partisip personelman dan travay predikasyon pu donn Zeova loner.
10 Kan nu apresye sakrifis Zezi ek privilez pu servi antan ki bann disip Zezi ki pe donn loner nu Papa, sa fer lezot gayn bann benediksyon. Zezi ti promet: “Si enn kikenn servi mwa, mo Papa pu donn li loner.”—Zan 12:26.