Zot perdi droit pou reste dan Paradis

BIEN longtemps avant ki Li ti crée bann humain, Bondié ti crée enn quantité creature spirituel invisible, setadir bann ange. Dan jardin Éden, enn ange rebelle, ki plitar ti appel Satan le Diable, ti bien decidé pou tente Ève, dan enn fason sournois, pou ki li mange fruit sel pié ki Bondié ti donne zot l’ordre pou pa mangé.

Satan ti koz a travers enn serpent, ek li ti pretann ki Bondié ti pé prive Ève ek so mari, enn kitsoz ki bon. Sa ange-la ti dire Ève ki li ek so mari pa pou mort si zot ti mange sa fruit ki Bondié ti donne zot l’ordre pou pa mangé-la. Par sa bann parole-la Satan ti accuse Bondié ki Li koz menti ar So bann zenfant lor la terre. Satan ti presente desobeissance envers Bondié couma enn kitsoz ki attirant ek ki grace a sa, Adam ek Ève ti pou kapav gagne enn grand connaissance ek liberté. Mais tousala ti enn mensonge. Enn realité, sa ti premier mensonge lor la terre. Question ki vrai-mem ti soulevé c’est eski Bondié ena droit pou dirigé ek eski so domination li juste ek dan l’interet so bann sujet.

Ève ti croire mensonge Satan. Li ti commence ena enn desir pou mange sa fruit-la, ek apré vrai-mem li’nn mange enn boute ladan. Plitar li ti donne enn boute so missié, ek li aussi li ti mangé. C’est coumsa ki zot inn faire peché. Sa action ki parette simple-la, en realité ti montré zot rebellion. Adam ek Ève ti’nn choisir volontairement pou desobeir commandement Bondié. Kan zot ti faire sa, zot ti rejette domination zot Createur ki ti donne zot tou, parmi ti ena enn la vie parfait.

Bondié ti condamne sa bann rebelle-la. Li ti annoncé ki enn Descendance ou-soit enn Sauveur ti pou vini ek ti pou detruire Satan, ki ti representé par enn serpent. Bondié ti retarde execution sa condamnation a mort kont Adam ek Ève-la pou enn tipé le temps, ek coumsa Li’nn montré so misericorde envers zot bann descendant ki pa ti encore né. Sa bann zenfant-la ti pou ena enn raison pou ena l’espoir parski sa Kikenn ki Bondié ti pou envoyé-la ti pou tire tou bann consequence ki rebellion en Éden ti’nn amené. A mesure ki la Bible finn ecrire, tigit par tigit bann dimoune ti koné couma projet Bondié concernant sa Sauveur ki ti pou vini-la, ti pou realisé, ek kisannla sa Kikenn ki Bondié ti pou envoyé-la.

Bondié ti mette Adam ek Ève dehors dan Paradis. Zot ti pou bizin rinté pou occupe la terre en dehors jardin Éden pou zot kapav vive. Apré sa, Ève ti tombe enceinte ek li’nn donne naissance Caïn, premier zenfant Adam ek Ève. Zot finn gagne lezot garson ek tifi, parmi ti ena Abel, ek Seth ki ti ancetre Noé.

—Basé lor Genèse chapitre 3 ziska 5; Révélation 12:9.