SECTION 25
Conseil lor la foi, conduite, ek l’amour
Jacques, Pierre, Jean, ek Jude ecrire bann lettre pou encourage bann lezot chretien
JACQUES ek Jude ti bann demi-frere Jésus. Pierre ek Jean ti parmi bann 12 zapotre Jésus. Sa quatre zom-la ti ecrire en tou sept lettre ki trouve dan bann l’Écritures grecques chrétiennes. Chaque lettre porte nom so ecrivain. L’objectif bann conseil ki inspiré ki trouve dan sa bann lettre-la, c’est pou aide bann chretien reste fidele envers Jéhovah ek envers so Royaume.
Manifesté la foi. Li pa assez ki nou zis dire ki nou ena la foi. Enn kikenn ki ena enn vrai la foi, li montré sa par bann action. Jacques ti ecrire: ‘Oui, la foi sans bann action li mort.’ (Jacques 2:26) Kan enn chretien gagne bann l’epreuve ek li agir avek la foi, li developpe l’endurance. Pou ki li reussi supporte sa bann l’epreuve-la, li bizin demann Bondié la sagesse, avek l’assurance ki Bondié pou donne li sa, ek l’endurance faire li gagne faveur Bondié. (Jacques 1:2-6, 12) Si enn chretien garde so fidelité avek la foi, Jéhovah pou ecoute li. Jacques dire: “Vinn proche ar Bondié, ek Li pou vinn proche ar zot.”—Jacques 4:8.
La foi enn chretien bizin assez solide pou aide li resisté kont bann tentation ek bann l’influence immoral. Dan lepok Jude ti ena enn l’environnement kot bann dimoune ti bien immoral ek c’est sa ki ti pousse li pou encourage so bann compagnon pou “lutté pou la foi.”—Jude 3.
Garde enn bon conduite. Jéhovah attann ki so bann serviteur zot saint, setadir ki zot pur dan tou domaine. Pierre ecrire: “Vinn saint zot aussi dan tou zot conduite, parski finn ecrire: ‘Zot bizin saint, parski moi [Jéhovah] mo saint.’” (1 Pierre 1:15, 16) Bann chretien ena enn bon l’exemple pou zot imité. L’apotre Pierre ti dire: “Christ . . . finn souffert pou zot, ek li finn laisse enn modele pou zot, pou ki zot suive bien so trace.” (1 Pierre 2:21) Mem si bann chretien kapav souffert parski zot vive en accord avek bann principe Bondié, zot garde “enn bon conscience.” (1 Pierre 3:16, 17) Pierre encourage bann chretien pou faire beaucoup action ki montré zot conduite saint ek zot l’attachement pou Bondié alors ki zot pé attann jour jugement Bondié ek le monde nouveau ki Li’nn promette, kot “pou ena la justice.”—2 Pierre 3:11-13.
“Vinn proche ar Bondié, ek Li pou vinn proche ar zot.” —Jacques 4:8
Montré nou l’amour. Jean ecrire: “Bondié Li l’amour.” L’apotre Jean dire ki Bondié finn montré so grand l’amour kan Li finn envoye Jésus couma “enn sacrifice pou nou bann peché.” Couma eski bann chretien bizin reagir? Jean expliké: “Bann frere ki mo bien content, si c’est coumsa ki Bondié finn content nou, alors nou aussi nou dan l’obligation pou content sakenn nou camarade.” (1 Jean 4:8-11) Enn fason pou nou montré sa qualité l’amour-la c’est kan nou montré l’hospitalité envers nou bann frere ek sœur.—3 Jean 5-8.
Mais, couma, eski bann serviteur Jéhovah kapav montré zot l’amour pou Li? Jean reponn: “Ala seki vedir l’amour Bondié: suive so bann commandement; ek pourtant so bann commandement pa lourd.” (1 Jean 5:3; 2 Jean 6) Alors, bann ki obeir Bondié zot ena l’assurance ki Bondié pou contigne content zot ek ki zot “pou gagne la vie eternel.”—Jude 21.