SECTION 24
Paul ecrire bann congregation
Bann lettre Paul encourage bann chretien premier siecle
CONGREGATION chretien ki ti’nn fek etabli, ti pou ena enn role important dan realisation projet Jéhovah. Mais bann chretien premier siecle pa ti tardé pou gagne persecution. Eski zot ti pou reste fidele envers Bondié malgré persecution ki zot ti gagné en dehors congregation ek malgré bann lezot danger pli sournois dan congregation? Dan bann l’Écritures grecques chrétiennes, ena 21 lettre ki ti donne bann chretien bann conseil ek l’encouragement ki zot ti bizin.
Quatorze lettre—depuis Romains ziska Hébreux—ti ecrire par l’apotre Paul. Sa bann lettre-la ena mem nom ki bann congregation ou-soit certain dimoune ar ki zot adressé. Anou prend certain sujet ki Paul ti kozé dan so bann lettre.
Conseil lor moralité ek conduite. Bann ki pratik fornication, l’adultere, ek bann lezot peché bien grave “pa pou herite royaume Bondié.” (Galates 5:19-21; 1 Corinthiens 6:9-11) Bann serviteur Bondié bizin reste uni malgré ki zot ena different nationalité. (Romains 2:11; Éphésiens 4:1-6) Zot bizin content pou faire tou seki zot kapav pou aide lezot chretien ki dan le besoin. (2 Corinthiens 9:7) Paul ti dire: “Prié touletan.” Oui, bann serviteur Bondié encouragé pou devide zot leker ar Jéhovah dan la priere. (1 Thessaloniciens 5:17; 2 Thessaloniciens 3:1; Philippiens 4:6, 7) Pou ki Bondié ecoute la priere, fodé ki bann dimoune prié avek la foi.—Hébreux 11:6.
Ki pou aide bann famille pou prosperé? Bann mari bizin content zot femme couma zot prop lekor. Bann femme bizin ena enn profond respé pou zot mari. Bann zenfant bizin obeir zot parent, parski sa faire Bondié plaisir. Bann parent bizin servi bann principe biblik pou guide zot zenfant ek forme zot avek amour.—Éphésiens 5:22–6:4; Colossiens 3:18-21.
Bann chretien gagne l’aide pou comprend projet Bondié. Beaucoup kitsoz ki ti ena dan la Loi mosaïk ti’nn ecrire pou protege ek pou guide bann Israélite ziska ki Christ vini. (Galates 3:24) Mais bann chretien zot, zot pa bizin suive la Loi pou zot adore Bondié. Kan Paul ti ecrire bann Hébreux—bann chretien ki ti juif avant—li ti donne beaucoup l’eclaircissement lor signification la Loi ek lor fason ki Bondié realise so projet a travers Christ. Paul ti expliké ki plusieurs l’aspect dan sa la Loi-la ena enn signification prophetik. Par exemple, sacrifice bann zanimo ti annonce sacrifice Jésus, ki ti pou amenn vrai pardon pou bann peché. (Hébreux 10:1-4) Par moyen sacrifice ki Jésus ti faire kan li ti mort, Bondié ti cancel l’alliance la Loi, parski sa la Loi-la ti nepli necessaire.—Colossiens 2:13-17; Hébreux 8:13.
Fason ki bizin organise congregation. Bann zom ki disposé pou prend bann responsabilité dan congregation bizin ena enn niveau moralité bien elevé ek rempli bann condition spirituel. (1 Timothée 3:1-10, 12, 13; Tite 1:5-9) Bann adorateur Jéhovah bizin assisté reunion regulierement avek lezot chretien pou encourage sakenn so camarade. (Hébreux 10:24, 25) Bann reunion ki faire pou adore Jéhovah bizin encourageant ek instructif.—1 Corinthiens 14:26, 31.
Lepok ki Paul ti ecrire Timothée so deuxieme lettre, li ti fini retourne Rome; li ti dan prison ek li ti pé attann so jugement. Zis certain chretien ki ti ena courage, ti prend risk pou visite li. Paul ti koné ki li pa ti ena beaucoup le temps pou vive. Li ti dire: “Mo’nn combatte sa joli combat-la, mo’nn termine la course, mo’nn garde la foi.” (2 Timothée 4:7) Nou pensé ki enn tipé apré, bann l’ennemi ti touye Paul a cause so la foi. Mais bann lettre ki li ti ecrire guide bann vrai chretien ziska zordi.
—Basé lor Romains; 1 ek 2 Corinthiens; Galates; Éphésiens; Philippiens; Colossiens; 1 ek 2 Thessaloniciens; 1 ek 2 Timothée; Tite; Philémon; Hébreux.