Kisann-la Bondie?

BANN dimounn ador boukou bondie. Me bann Lekritir Sakre montre nou ki ena enn sel vre Bondie. Pena personn kouma li. Limem ki pli siperyer ek li eternel. Li’nn kree tou seki ena dan lesiel ek lor later, ek li’nn donn nou lavi. Alor, zis li tousel ki merit nou ladorasion.

Bondie ena enn sel nom, li apel ZEOVA. Bondie ti dir Moiz: “Ala seki to bizin dir bann Izraelit, ‘Zeova Bondie zot bann anset, Bondie Abraam, Bondie Izaak, ek Bondie Zakob finn avoy mwa kot zot.’ Samem mo nom pou touletan, ek se koumsa ki zot bizin rapel mwa zenerasion apre zenerasion.” (Exod 3:15) Ena nom Zeova anviron 7,000 fwa dan bann Lekritir Sakre. Psom 83:18 dir konsernan Bondie: “Twa, ki apel Zeova, to tousel Pli Lao lor later antie.”

Okenn dimounn zame pa’nn trouv Bondie. Bondie ti dir Moiz: “To pa kapav trouv mo figir, parski okenn zom pa kapav trouv mwa ek viv.” (Exod 33:20) Bondie viv dan lesiel ek bann dimounn pa kapav trouv li. Li pa bon ki nou fer bann zidol, bann zimaz, ouswa fer ninport ki kitsoz pou reprezant Bondie ouswa mem servi sa pou priye li. Zeova ti donn profet Moiz sa lord-la: “Fode pa to fer okenn stati skilpte ni okenn form ki parey kouma enn kitsoz ki lao dan lesiel ouswa ki anba lor later ouswa ki dan delo anba later. Fode pa to prostern devan sa bann kitsoz-la ni les lezot pous twa pou al servi zot, parski mwa, Zeova to Bondie, mo enn Bondie ki oule ki bann dimounn res atase zis ar mo tousel.” (Exod 20:2-5) Plizir lane apre, Bondie ti fer profet Izai ekrir: “Mwa mo Zeova. Samem mo nom; mo pa donn mo laglwar personn, ni mo donn bann zidol mo louanz.”​—Izai 42:8.

Sertin dimounn krwar dan Bondie, me zot panse ki li inposib pou konn li ek pou vinn pros avek li. Zot panse ki se enn kikenn ki nou pa kapav kontan, me ki nou bizin per. Me ou, ki ou panse? Eski Bondie interese avek ou personelman? Eski ou kapav vremem konn li ek mem vinn pros avek li? Anou gete seki bann Lekritir Sakre dir lor bann zoli kalite ki Bondie ena.