Bann ange—“Bann l’esprit pou enn service publik”

“Eski zot tou zot pa bann l’esprit pou enn service publik, ki’nn envoyé pou servi bann ki pou gagne delivrance?”—HÉB. 1:14.

1. Ki l’encouragement nou gagné kan nou lire Matthieu 18:10 ek Hébreux 1:14?

JÉSUS CHRIST ti donne sa l’avertissement-la n’importe kisannla ki ti pou kapav faire so bann disciple tombé: “Faire bien attention ki zot pa meprise okenn parmi sa bann tipti-la; parski mo dire zot ki zot bann ange dan le ciel trouve touletan figure mo Papa ki dan le ciel.” (Mat. 18:10) L’apotre Paul ti pé koz lor bann ange fidele kan li ti ecrire: “Eski zot tou zot pa bann l’esprit pou enn service publik, ki’nn envoyé pou servi bann ki pou gagne delivrance?” (Héb. 1:14) Sa bann parole-la bien encourageant ek donne nou l’assurance ki Bondié servi sa bann creature spirituel-la pou aide bann dimoune. Ki la Bible dire nou lor bann ange? Couma zot aide nou? Ki nou kapav aprann ar zot l’exemple?

2, 3. Cite certain travail ki bann creature spirituel faire.

² Ena plusieurs million ange fidele dan le ciel. Zot tou zot bien ‘puissant, zot faire seki Bondié dire zot.’ (Ps. 103:20; lire Révélation 5:11.) Sa bann garson spirituel Bondié-la ena sakenn so personnalité, zot ena bann qualité pareil couma Bondié ek zot ena liberté pou choisir. Bondié inn organise zot dan enn fason extraordinaire ek inn donne zot bann grand position; Mikaël (nom ki Jésus ena dan le ciel), li-mem l’archange. (Dan. 10:13; Jude 9) Sa “premier-né dan tou creation[-la],” li “la Parole” setadir Porte-parole Bondié ek Jéhovah ti servi li pou faire tou lezot kitsoz.—Col. 1:15-17; Jean 1:1-3.

³ Enba l’archange ena bann séraphin, ki proclamé ki Jéhovah Li saint ek zot aide peuple Bondié pou reste pur lor plan spirituel. Ena aussi bann chérubin ki soutenir souveraineté Bondié. (Gen. 3:24; Is. 6:1-3, 6, 7) Bann lezot ange, ou-soit bann messager zot accompli volonté Bondié dan different fason.—Héb. 12:22, 23.

4. (a) Couma bann ange ti reagir kan Bondié ti faire fondation la terre? (b) Couma bann dimoune ti pou vive si Adam ek Ève ti bien servi zot liberté pou choisir?

⁴ Tou bann ange ti content kan Bondié ti “faire fondation la terre” ek zot ti faire zot travail dan la joie pendant ki Jéhovah ti pé prepare sa joli planete-la pou faire li vinn enn place pou bann dimoune vive. (Job 38:4, 7) Jéhovah ti crée bann dimoune “enn tipé pli bas ki bann ange” mais dan So “ressemblance,” sa permette bann dimoune pou reflete bann qualité extraordinaire ki nou Createur ena. (Héb. 2:7; Gen. 1:26) Si Adam ek Ève ti servi dan enn bon fason zot liberté pou choisir, zot ek zot descendance ti pou kapav profite la vie dan enn paradis, en tant ki membre dan famille universel Jéhovah.

5, 6. Ki rebellion ti ena dan le ciel, ek couma Bondié ti reagir?

⁵ Surement bann ange ti gagne sok kan zot ti trouvé couma rebellion ti’nn commencé dan famille Bondié dan le ciel. Enn parmi zot ti nepli satisfait pou loué Jéhovah, mais li ti envie gagne l’adoration. Li ti faire li-mem vinn Satan (ki vedir “Opposant”) kan li ti mette en doute droit ki Jéhovah ena pou dirige l’univers ek kan par ambition li ti essaye etabli enn domination rival. Kan Satan ti koz menti, dan enn fason sournois li ti faire premier couple humain prend part avek li dan so rebellion kont nou bon Createur.—Gen. 3:4, 5; Jean 8:44.

⁶ Bien vite, Jéhovah ti faire so jugement kont Satan kan Li ti dire dan premier prophetie la Bible: “Mo pou mette la haine entre toi ek la femme ek entre to descendance ek so descendance. Li pou crase to la tête ek to pou blesse so talon.” (Gen. 3:15) Sa la haine-la ti pou contigné entre Satan ek “femme” Bondié. Oui, Jéhovah ti considere so l’organisation dan le ciel kot ena bann creature spirituel ki fidele couma enn femme ki Li bien content ek Li uni avek li couma enn mari. Sa prophetie-la ti pose enn base solide pou enn l’esperance mem si bann detail ki ena ladan ti reste enn “saint secret” ki ti pou revelé tigit par tigit. Projet ki Bondié ti ena c’est ki enn membre ki forme partie dan so l’organisation dan le ciel ti pou detruire tou bann rebelle ek grace a li, “bann kitsoz ki dan le ciel ek bann kitsoz ki lor la terre” ti pou rassemblé.—Éph. 1:8-10.

7. Ki certain ange ti faire dan lepok Noé, ek ki Jéhovah inn faire zot?

⁷ Dan lepok Noé, certain ange ti quitte “sa place kot zot ti’nn crée pou resté-la” ek zot ti vinn lor la terre avek enn lekor humain pou satisfaire zot plaisir egoïste. (Jude 6; Gen. 6:1-4) Jéhovah inn jette sa bann rebelle-la dan enn grand noirté, ek lerla ensam avek Satan, zot ti vinn “bann mauvais l’esprit” ek bann l’ennemi dangereux pou bann serviteur Bondié.—Éph. 6:11-13; 2 Pierre 2:4.

Couma bann ange aide nou?

8, 9. Couma Jéhovah ti servi bann ange pou aide bann dimoune?

⁸ Abraham, Jacob, Moïse, Josué, Isaïe, Daniel, Jésus, Pierre, Jean ek Paul ti parmi bann dimoune ki bann ange inn aidé. Bann ange ki juste, ti applik bann jugement Bondié ek ti annonce bann prophetie ek donne bann instruction, parmi ti ena la Loi mosaïk. (2 Rois 19:35; Dan. 10:5, 11, 14; Actes 7:53; Rév. 1:1) Parski zordi nou ena Parole Bondié ki complet, kitfois li nepli necessaire ki bann ange vinn dire nou bann message ki sorti kot Bondié. (2 Tim. 3:16, 17) Mais, bann ange zot bien occupé pou faire volonté Bondié ek pou soutenir so bann serviteur mem si bann dimoune pa trouve seki zot pé faire.

⁹ La Bible donne nou sa l’assurance-la: “Ange Jéhovah pé campe autour bann ki ena la crainte pou Li, ek li delivré zot.” (Ps. 34:7; 91:11) Parski Satan inn mette en doute l’integrité bann dimoune, Jéhovah permette li faire nou gagne tou sorte qualité difficulté. (Luc 21:16-19) Selman, Bondié koné kan eski nou finn assez endure enn l’epreuve pou prouve nou fidelité envers Li ek ki li pa necessaire laisse sa l’epreuve-la contigné parski sa pa pou prouve nanyin. (Lire 1 Corinthiens 10:13.) Bann ange zot touletan pré pou agir dapré volonté Bondié. Zot ti sauve Shadrak, Méshak, Abed-Négo, Daniel ek Pierre, mais zot pa ti empeche bann l’ennemi Étienne ek Jacques, touye zot. (Dan. 3:17, 18, 28; 6:22; Actes 7:59, 60; 12:1-3, 7, 11) Bann circonstance ek bann lezot kitsoz ki ti impliké, ti different. Li pareil aussi pou bann temoin ki ti dan bann camp concentration nazi, certain ti perdi zot la vie alors ki grace a l’aide Jéhovah, la plupart ti gagne la vie sauve.

10. A part l’aide bann ange, ki l’aide nou kapav gagné?

¹⁰ La Bible pa enseigné ki chaque dimoune lor la terre ena enn ange gardien. Nou prié avek confiance ki “n’importe ki kitsoz nou demandé en accord avek so volonté, [Bondié] ecoute nou.” (1 Jean 5:14) Bien sur, Jéhovah kapav envoye enn ange pou aide nou, mais nou kapav gagne so l’aide dan enn lot fason. Jéhovah kapav pousse nou bann frere ek soeur pou aide nou ek encourage nou. Li kapav donne nou la sagesse ek la force ki nou bizin pou faire face ar “enn pikan dan la chair” ki pé affecté nou coumadir nou’nn gagne batté ar “enn ange Satan.”—2 Cor. 12:7-10; 1 Thess. 5:14.

Imite Jésus

11. Couma Bondié ti servi bann ange pou aide Jésus, ek ki Jésus ti prouvé kan li ti reste fidele envers Bondié?

¹¹ Anou guetté couma Jéhovah ti servi bann ange dan cas Jésus. Zot ti annonce so naissance ek so resurrection ek zot ti soutenir li kan li ti lor la terre. Bann ange ti kapav empeche bann dimoune arrete li ek touye li. Mais, Bondié ti plutot envoye enn ange pou fortifié li. (Mat. 28:5, 6; Luc 2:8-11; 22:43) En accord avek projet Jéhovah, Jésus ti mort en sacrifice ek li ti prouvé ki enn dimoune parfait kapav reste fidele envers Bondié mem si li passe par bann l’epreuve bien dur. Alors, Jéhovah ti ressuscite Jésus ek ti donne li la vie immortel dan le ciel, Li ti donne li “tou pouvoir” ek ti faire bann ange soumette ar li. (Mat. 28:18; Actes 2:32; 1 Pierre 3:22) Sa montré ki Jésus li partie principal “descendance” “femme” Bondié.—Gen. 3:15; Gal. 3:16.

12. Dan ki fason nou kapav imite l’exemple Jésus ki ti agir avek “bon sens”?

¹² Jésus ti koné ki fodé pa li testé Jéhovah ek attann ki bann ange vinn sap li si li ti agir dan enn fason ki pa prudent. (Lire Matthieu 4:5-7.) Alors, anou imite l’exemple Jésus kan nou vive avek “bon sens,” sans ki nou prend bann risk inutile, mais en mem temps anou faire face ar persecution avek confiance.—Tite 2:12.

Ki nou kapav aprann ar bann ange fidele

13. Ki nou kapav aprann ar l’exemple bann ange ki juste, ki mentionné dan 2 Pierre 2:9-11?

¹³ Kan certain ti “koz en mal” lor bann serviteur ki Jéhovah ti’nn oint, l’apotre Pierre ti attire l’attention lor bon l’exemple bann ange ki juste. Mem si zot ena enn grand pouvoir, avek humilité ek “par respé pou Jéhovah” bann ange evite comporte-zot couma bann juge ek faire bann accusation. (Lire 2 Pierre 2:9-11.) Alors, anou faire enn maniere ki nou aussi nou pa juge lezot dan enn mauvais fason, ki nou respecté bann ki ena responsabilité dan congregation, ek laisse tou kitsoz dan la main Jéhovah ki pli grand Juge.—Rom. 12:18, 19; Héb. 13:17.

14. Ki nou kapav aprann ar bann ange en seki concerne l’humilité?

¹⁴ Bann ange Jéhovah donne nou enn bon l’exemple en seki concerne servi avek l’humilité. Certain ange ti refuse dire zot nom ar bann dimoune. (Gen. 32:29; Juges 13:17, 18) Mem si ena plusieurs million creature spirituel dan le ciel, la Bible donne nom zis Mikaël ek Gabriel, surement pou evité ki nou donne bann ange enn l’honneur ki pa bizin. (Luc 1:26; Rév. 12:7) Kan l’apotre Jean ti tombe devant enn ange pou adore li, ange-la ti dire li: “Attention! Pa faire sa! Mo zis enn esclave pareil couma toi ek to bann frere.” (Rév. 22:8, 9) C’est zis Bondié ki nou bizin adoré ek c’est zis Li tousel ki nou bizin prié.—Lire Matthieu 4:8-10.

15. Couma bann ange donne nou enn l’exemple lor patience?

¹⁵ Bann ange donne nou aussi enn l’exemple lor patience. Mem si zot bien interessé pou konn bann saint secret ki Bondié inn donné, zot pa konn tou sa bann secret-la. La Bible dire: “C’est dan sa bann kitsoz-la-mem ki bann ange envie examine en profondeur.” (1 Pierre 1:12) Alors, ki zot faire? Zot attann avek patience ler ki Bondié inn fixé pou faire ‘konn so sagesse ki bien varié’ “a travers congregation.”—Éph. 3:10, 11.

16. Couma nou conduite kapav ena enn l’effet lor bann ange?

¹⁶ Bann chretien ki gagne bann l’epreuve, zot ‘enn spectak pou bann ange.’ (1 Cor. 4:9) Avek enn grand satisfaction, bann ange observe nou fidelité ek zot mem content kan zot trouve enn dimoune ki’nn faire peché, repenti. (Luc 15:10) Kan bann femme chretien ena enn conduite ki en accord avek bann principe Bondié, bann ange remark sa. La Bible montré ki “enn femme bizin ena enn signe l’autorité lor so la tête a cause bann ange.” (1 Cor. 11:3, 10) Oui, bann ange content kan zot trouve bann femme chretien ek tou bann lezot serviteur Bondié lor la terre soumette ar bann disposition ek l’autorité theocratik. Sa qualité l’obeissance-la li enn bon rappel pou sa bann garson Bondié ki reste dan le ciel-la.

Bann ange soutenir l’activité predication

17, 18. Kifer nou kapav dire ki bann ange pé soutenir nou l’activité predication?

¹⁷ Bann ange impliké dan certain parmi bann kitsoz extraordinaire ki pé arrivé pendant “jour du Seigneur.” Parmi sa bann kitsoz-la ena naissance Royaume Bondié en 1914, ek seki ti arrive Satan ek so bann demon. “Mikaël ek so bann ange” ti tire zot dan le ciel ek ti jette zot lor la terre. (Rév. 1:10; 11:15; 12:5-9) L’apotre Jean ti trouve enn “ange ki ti pé envolé au milieu le ciel, ek li ti ena enn bon nouvelle eternel pou annoncé couma enn l’evangile ar bann ki reste lor la terre.” Sa ange-la ti annoncé: “Ena la crainte pou Bondié ek donne Li la gloire, parski l’heure so jugement inn arrivé; ek adore sa Kikenn ki’nn crée le ciel ek la terre ek la mer ek bann la source de l’eau.” (Rév. 14:6, 7) Sa montré ki bann serviteur Jéhovah ena l’assurance ki bann ange soutenir zot kan zot preche la bonne nouvelle lor Royaume ki’nn etabli, malgré grand l’opposition Satan le Diable.—Rév. 12:13, 17.

¹⁸ Zordi, bann ange pa koz ar nou pou dirige nou vers bann dimoune sincere pareil couma enn ange ti faire avek Philippe kan li ti dirige li vers enn fonctionnaire Éthiopien. (Actes 8:26-29) Selman, beaucoup l’experience ki’nn arrivé dan nou lepok montré ki mem si nou pa trouve zot, bann ange pé soutenir nou l’activité predication lor Royaume Bondié ek pé dirige nou vers bann dimoune ki “ena l’attitude ki bizin pou gagne la vie eternel.”a (Actes 13:48) Alors, li vrai-mem bien important ki nou preché regulierement pou ki nou kapav faire nou part pou trouve bann ki envie “adore le Père avek l’esprit ek la verité”!—Jean 4:23, 24.

19, 20. Ki part bann ange ena dan bann l’evenement ki arrivé pendant “conclusion sa systeme-la”?

¹⁹ Jésus ti koz lor nou lepok kan li ti dire ki dan “conclusion sa systeme-la,” bann ange pou “separe bann mauvais dimoune ar bann bon dimoune.” (Mat. 13:37-43, 49) Bann ange joué enn role pou rassemblé ek pou scelle bann chretien oint dan enn fason definitif. (Lire Matthieu 24:31; Rév. 7:1-3) En plus, Jésus pou accompagné par bann ange kan li pou “separe bann mouton ar bann cabri.”—Mat. 25:31-33, 46.

²⁰ “Pendant revelation nou Seigneur Jésus depuis le ciel avek so bann ange puissant” tou “bann ki pa konn Bondié ek . . . ki pa obeir la bonne nouvelle concernant nou Seigneur Jésus” pou detruire. (2 Thess. 1:6-10) Kan Jean ti trouve sa mem l’evenement-la dan enn vision, li ti decrire Jésus ek so l’armée ange lor bann cheval blanc pou ki zot faire la guerre avek justice.—Rév. 19:11-14.

21. Ki action sa ange ki ena “la clé l’abime ek enn grand la chaine dan so la main[-la]” pou prend kont Satan ek so bann demon?

²¹ Jean ti aussi “trouve enn ange ki ti sorti dan le ciel, desann avek la clé l’abime ek enn grand la chaine dan so la main.” Sa ange-la c’est Mikaël l’archange, ki pou attache Satan le Diable ek pou jette li—ek aussi so bann demon—dan l’abime. Pou largue zot pou enn ti moment a la fin Regne mille an Jésus Christ kan bann dimoune parfait pou passe par enn l’epreuve final. Apré sa, Satan ek tou bann rebelle pou konn enn destruction. (Rév. 20:1-3, 7-10; 1 Jean 3:8) Tou rebellion kont Bondié pou’nn disparette.

22. Couma bann ange impliké dan bann l’evenement ki pré pou arrivé, ek ki sentiment nou bizin ena lor zot role?

²² Enn grand delivrance ar sa mauvais systeme Satan-la pré pou arrivé. Bann ange pou ena enn role important pendant bann l’evenement bien important ki pou justifié souveraineté Jéhovah ek pou realise dan enn fason complet so projet pou la terre ek pou bann dimoune. Bann ange ki juste zot vrai-mem “bann l’esprit pou enn service publik, ki’nn envoyé pou servi bann ki pou gagne delivrance.” Alors, anou ena reconnaissance envers Jéhovah pou fason ki Li servi bann ange pou aide nou faire so volonté ek gagne la vie eternel.

[Note]

Couma ou pou reponn?

• Couma bann creature spirituel ki dan le ciel zot organisé?

• Ki certain ange ti faire dan lepok Noé?

• Couma Bondié inn servi bann ange pou aide nou?

• Ki role bann ange ki juste ena dan nou lepok?

[Zimage lor page 22]

Bann ange content pou faire volonté Bondié

[Zimage lor page 24]

Pareil couma dan cas Daniel, bann ange zot toujours pré pou agir en accord avek volonté Bondié

[Zimage lor page 25]

Prend courage, parski bann ange pé soutenir l’activité predication lor Royaume Bondié!

[Remerciement photo]

Globe: NASA photo