Watchtower BIBLIOTEK LOR INTERNET
Watchtower
BIBLIOTEK LOR INTERNET
Kreol Morisien
  • LABIB
  • PIBLIKASION
  • RENION
  • w25 Me p. 2-7
  • Swiv Lexanp Bann Anz

Pena video ki disponib pou seki ou finn swazir.

Sori, enn erer inn anpes sa video-la zwe.

  • Swiv Lexanp Bann Anz
  • Latour Degard Pe Anons Rwayom Zeova (Edision Letid)—2025
  • Soutit
  • Lor Mem Size
  • BANN ANZ ENA LIMILITE
  • BANN ANZ KONTAN BANN DIMOUNN
  • BANN ANZ ENA LANDIRANS
  • BANN ANZ EDE POU GARD LASANBLE PROP
  • Bann ange—“Bann l’esprit pou enn service publik”
    La Tour de Garde pé annonce Royaume Jéhovah—2009
  • Kouma Bann Anz Kapav Ed Ou?
    Latour Degard Pe Anons Rwayom Zeova (Edision Piblik)—2017
  • Laverite Konsernan Bann Anz
    Latour Degard Pe Anons Rwayom Zeova (Edision Piblik)—2017
  • Repons pou Bann Kestion Biblik
    Latour Degard Pe Anons Rwayom Jéhovah—2014
Rod Plis
Latour Degard Pe Anons Rwayom Zeova (Edision Letid)—2025
w25 Me p. 2-7

LARTIK LETID 19

KANTIK 6 Lesiel Anons Laglwar Bondie

Swiv Lexanp Bann Anz

“Loue Zeova, zot tou so bann anz.”—PS. 103:20.

PWIN PRINSIPAL

Nou pou get bann leson ki nou kapav aprann ar lexanp bann anz.

1-2. (a) Ki diferans ena ant nou ek bann anz? (b) Ki pwin komin nou ena ar bann anz?

BANN serviter Zeova form parti enn gran fami kot ena lamour. Dan sa fami-la, ena bann frer ek ser ki dan lemond antie, ek osi bann milyon anz. (Dan. 7:9, 10) Kan nou mazinn bann anz, sirman nou mazine ki kantite zot diferan avek nou. Par exanp, zot pli pwisan ki nou, ek zot existe depi pli lontan ki nou. (Zob 38:4, 7) Ek akoz nou inparfe, zot pli zis ek pli sin ki nou.—Lik 9:26.

2 Selman, malgre sa bann diferans-la, nou ena osi boukou pwin komin ar bann anz. Par exanp, parey kouma bann anz, nou ena liberte pou swazir, ek nou kapav imit bann zoli kalite ki Zeova ena. Sak anz ena so nom, so personalite, ek bann responsabilite ki Zeova inn donn li. Sa li parey pou nou osi. Ek parey kouma bann anz, nou kone ki nou ena enn Kreater, ek sa pous nou pou ador Li.—1 Pier 1:12.

3. Ki nou kapav aprann ar bann anz?

3 Wi, nou ena bann pwin komin avek bann anz, ek akoz sa, zot bon lexanp kapav ankouraz nou ek ansegn nou bann leson bien inportan. Dan sa lartik-la, nou pou trouve kouma nou kapav imit zot limilite, zot lamour pou bann dimounn, zot landirans, ek bann zefor ki zot fer pou gard lasanble prop.

BANN ANZ ENA LIMILITE

4. (a) Kouma bann anz montre ki zot ena limilite? (b) Kifer bann anz ena limilite? (Psom 89:7)

4 Bann anz ena limilite. Kifer nou dir sa? Parski mem si zot ena boukou lexperyans, zot bien pwisan, ek zot ena sazes, zot obeir bann instriksion Zeova. (Ps. 103:20) Kan zot asim zot bann responsabilite, zot pa fer gran-nwar, ek kan zot servi zot pwisans, zot pa atir latansion lor zotmem. Mem si Labib pa mansionn zot nom ek ki zot pa gagn okenn loner pou seki zot fer pou Zeova, zot kontan servi Li.a (Zen. 32:24, 29; 2 Ler. 19:35) Anplis, zot refiz gagn laglwar ki zis Zeova tousel merite. Kifer bann anz ena limilite? Se parski zot kontan Zeova ek zot ena enn gran respe pou Li.—Lir Psom 89:7.

5. Kan li’nn koriz fason panse Zan, kouma enn anz inn montre ki li ena limilite? (Get zimaz osi.)

5 Anou get enn lexanp ki montre ki bann anz ena limilite. Lane 96 Nou Lepok, enn anz, ki nou pa konn so nom, ti montre lapot Zan enn vizion extraordiner. (Rev. 1:1) Kouma Zan ti reazir? Li ti prostern devan sa anz-la. Selman, deswit anz-la ti aret li, ek ti dir li: “Fer atansion! Pa fer sa! Mo zis enn esklav parey kouma twa ek parey kouma to bann frer . . . Ador Bondie!” (Rev. 19:10) Sa anz-la ti ena boukou limilite, pa vre! Li pa ti interese pou gagn loner ek laglwar. Okontrer, deswit li ti dir Zan ki li ti bizin ador zis Zeova. Anz-la pa ti panse osi ki li ti pli inportan ki Zan. Mem si sa fer lontan ki li ti pe servi Zeova ek ki li ti pli pwisan ki Zan, avek limilite anz-la ti dir Zan ki li enn esklav parey kouma li. Ek mem si li’nn bizin koriz fason panse Zan, anz-la pa’nn kriy ar li ouswa koz brit ar li. Okontrer, li’nn koz ar boukou bonte. Sirman li ti konpran ki Zan ti tom azenou devan li parski li ti inpresione ar seki li ti trouve.

Enn anz pe anpes lapot Zan prostern devan li ek ador li.

Enn anz ti montre limilite kan li ti koz avek Zan (Get paragraf 5)


6. Kouma nou kapav ena limilite parey kouma bann anz?

6 Kouma nou kapav ena limilite, parey kouma bann anz? Nou osi, kan nou asim nou bann responsabilite, fode pa nou fer gran-nwar ek fode pa nou atir latansion lor nou-mem. (1 Kor. 4:7) Ek si sa fer lontan ki nou pe servi Zeova ouswa si nou ena sertin privilez dan lasanble, fode pa nou panse ki nou pli inportan ki lezot. Avredir, plis nou ena bann responsabilite, plis nou bizin “azir kouma enn kikenn ki pli tipti.” (Lik 9:48) Alor, parey kouma bann anz, nou anvi servi lezot ek nou pa anvi donn zot linpresion ki nou pli siperyer ki zot.

7. Kouma nou kapav montre limilite kan nou bizin konsey ouswa koriz fason panse enn kikenn?

7 Kouma nou kapav montre limilite kan nou bizin konsey ouswa koriz fason panse nou zanfan ouswa enn kikenn dan lasanble? Mem si parfwa nou pou bizin ferm, parey kouma sa anz-la nou pou bizin fer sa avek bonte. Kan nou konsey enn kikenn, fode pa ki apre ki nou’nn koz ar li, li santi li dekouraze. Anplis, kan nou pa pran nou pou pli siperyer ki lezot, nou pou kapav donn bann konsey ki sorti dan Labib avek amour ek respe.—Kol. 4:6.

BANN ANZ KONTAN BANN DIMOUNN

8. (a) Dapre Lik 15:10, kouma bann anz montre ki zot kontan bann dimounn? (b) Kouma bann anz ed nou kan nou prese? (Get zimaz lor kouvertir.)

8 Bann anz pa panse ki bann dimounn pena valer. Okontrer, zot bien interese avek nou ek zot bien kontan nou. Zot bien kontan kan enn kikenn ki’nn fer enn pese repanti, ouswa kan enn kikenn ki’nn abandonn Zeova, retourn ver Li. Zot kontan osi kan enn kikenn aprann konn Zeova ek ki li fer bann sanzman dan so lavi. (Lir Lik 15:10.) Bann anz bien soutenir nou osi kan nou prese. (Rev. 14:6) Mem si zot pa koz ar bann dimounn, zot gid nou ver bann dimounn ki anvi konn Zeova. Biensir, kan enn kikenn vinn dan laverite, nou pa pou dir ki bann anz inn gid nou ver sa dimounn-la. Kifer? Parski Zeova servi bann lezot mwayin osi pou gid nou ver bann dimounn, kouma par exanp so lespri sin. (Zist. 16:6, 7) Selman, Zeova servi so bann anz pou ed nou dan predikasion, ek zot fer boukou zefor pou ed nou. Alor, kan nou prese, nou kapav sir ki bann anz pe soutenir nou.—Get lankadre “Zot Inn Gagn Repons pou Zot Lapriyer.”b

Enn koup pe marse avek enn prezantwar dan enn lavil. Bann anz pe gid ser-la ver enn zenn madam ki paret trakase ek ki pe asize lor enn ban.

Enn koup fek fini fer prezantwar. Kan zot pe retourn lakaz, ser-la trouv enn madam ki paret trakase. Ser-la kone ki bann anz gid nou ver bann ki bizin led lor plan spiritiel. Sa motiv li pou al koz ar madam-la ek pou rekonfort li (Get paragraf 8)


Zot Inn Gagn Repons pou Zot Lapriyer

Eski nou kapav dir ki Zeova inn servi bann anz pou reponn lapriyer sa bann dimounn-la?

  • Kan li ti pe prese par telefonn ansam ar so mama, enn proklamatris ki ena 12 an ek ki res Perou, ti koz avek enn madam. Madam-la ti pe priye Bondie pou ki Li avoy enn kikenn pou ed li. Kan tifi-la ti telefone, madam-la ti dir ki sa ti enn repons pou so lapriyer, ek li ti aksepte enn letid Labib. Bien vit apre sa, li ti koumans asiste bann renion.

  • Dan Roumani, enn madam ti pe etidie Labib ar bann Temwin, me apre li ti aret so letid. Inpe letan apre, kan li ti pe travay kouma gard-malad dan Litali, li ti anvi rekoumans so letid. Alor, li ti priye Zeova pou ed li parski li pa ti konn okenn Temwin dan sa landrwa-la. Inpe apre, sa fami kot li ti pe travay-la, ti demann li pou al laboutik. Selman, zot ti dir li pa koz ar proprieter-la parski li enn Temwin Zeova ek ki li koz lor Labib ar so bann klian. Kan li ti al laboutik-la, frer-la ti pres ar li. Madam-la ti santi ki sa ti enn repons pou so lapriyer. Li ti rekoumans so letid ek li ti fer bann sanzman dan so lavi pou ki li kapav servi Zeova. Gras-a so bon lexanp, enn parmi so bann garson inn koumans etidie Labib ek pe asiste bann renion.

  • Enn koup Temwin ti desid pou vann zot loto. Kan enn misie ek so madam ti vinn get loto-la, koup Temwin la ti explik zot kifer zot ti pe vann zot loto. Zot ti dir koup-la ki zot ti anvi diminie zot bann depans, pou ki zot kapav ena plis letan pou ed bann dimounn pou konn plis lor Labib. Misie ki ti vinn get loto-la ti dir: “Yer, mo ti priye Bondie ek mo ti dir li: ‘Silteple, fer mwa zwenn enn kikenn ki kapav ed mwa. Mo ena boukou kestion ek mo bizin zot bann repons.’” Misie-la ti trouv sa kouma enn repons pou so lapriyer. Li ek so madam, ek zot de tifi, ti koumans etidie Labib. Azordi, sa fami-la pe asiste bann renion.

9. Kouma nou kapav kontan bann dimounn parey kouma bann anz?

9 Kouma nou kapav kontan bann dimounn, parey kouma bann anz? Kan fer enn lanons dan lasanble ki enn kikenn inn reintegre, nou kapav montre ki nou bien kontan parey kouma bann anz. Kouma? Nou kapav al dir nou frer ouswa nou ser ki nou bien kontan li, ek ki nou kontan ki li pe rekoumans servi Zeova. (Lik 15:4-7; 2 Kor. 2:6-8) Nou kapav osi swiv lexanp bann anz kan nou fer nou maximum dan predikasion. (Ekle. 11:6) Ek parey kouma bann anz ki soutenir nou kan nou prese, nou kapav rod bann fason pou nou soutenir nou bann frer ek ser dan predikasion. Par exanp, nou kapav pres ar bann ki nouvo dan laverite, ouswa nou kapav organiz nou pou pres ansam ar bann frer ek ser ki vie ouswa ki malad.

10. Ki nou kapav aprann ar lexanp Sara?

10 Me ki nou kapav fer si akoz nou sitiasion, nou nepli kapav fer otan ki avan dan predikasion? Si nou dan sa sitiasion-la, nou kapav sir ki bann anz pou soutenir nou. Anou get lexanp Sara,c enn ser ki res Lenn. Apre ki li’nn fer pionie pandan apepre 20 an, Sara inn tom bien malad. Li ti nepli kapav marse ek sorti lor so lili. Sa ti bien dekouraz li. Me tigit-tigit, li ti reisi regagn so lazwa gras-a so lektir Labib ek led bann frer ek ser dan lasanble. Akoz so sitiasion, li ti bizin trouv bann lezot fason pou prese. Sara pa ti kapav asize pou ekrir bann let, alor li ti pres zis par telefonn. Li ti telefonn so bann vizit, ek bann-la ti ed li pou gagn bann lezot vizit. Apre de-trwa mwa, Sara ti ena 70 letid Labib. Li pa ti kapav etidie ar zot tou, alor li ti demann bann frer ek ser dan lasanble pou fer sertin parmi so bann letid. Azordi, boukou parmi so bann etidian Labib pe asiste bann renion. Sirman bann anz bien kontan kan zot travay ansam ar bann frer ek ser ki, parey kouma Sara, pe kontign fer tou seki zot kapav pou zot prese!

BANN ANZ ENA LANDIRANS

11. Kifer bann anz zot bann zoli lexanp landirans?

11 Bann anz, zot bann zoli lexanp landirans. Kifer nou dir sa? Parski sa fer plizir milye lane ki zot pe andir lemal ek linzistis. Par exanp, zot inn trouv Satan ek bann lezot anz, ki ti pe servi Zeova ansam ar zot, rebel kont Zeova. (Zen. 3:1; 6:1, 2; Zid 6) Labib koz osi lor enn anz ki’nn bizin lit kont enn demon bien pwisan pandan plizir zour. (Dan. 10:13) Anplis, depi lepok Adan ek Ev, bann anz inn trouve ki laplipar bann dimounn pa anvi servi Zeova. Malgre tousala, zot inn res fidel ar Zeova ek zot pe kontign servi Li ar lazwa. Zot kone ki dan moman ki Zeova inn deside, Li pou tir lemal ek linzistis.

12. Ki kitsoz kapav ed nou pou andire?

12 Kouma nou kapav ena landirans, parey kouma bann anz? Parey kouma bann anz, kitfwa nou trouv bann linzistis ouswa nou bizin fer fas ar lopozision. Selman, parey kouma zot, nou sir ki Zeova pou tir tousala dan moman ki Li’nn deside. Alor, anou imit bann anz kan nou pa “dekouraze pou fer seki bon.” (Gal. 6:9) Anplis, Bondie promet nou ki Li pou ed nou pou andire. (1 Kor. 10:13) Nou kapav priye Li pou gagn so lespri sin, ki pou ed nou pou ena pasians ek pou res zwaye. (Gal. 5:22; Kol. 1:11) Ek si nou pe gagn lopozision, nou bizin ena konfians an Zeova ek fode pa nou trakas plis ki bizin. Nou kapav sir ki Li pou touletan soutenir nou ek donn nou lafors.—Ebre 13:6.

BANN ANZ EDE POU GARD LASANBLE PROP

13. Pandan bann dernie zour, ki responsabilite spesial bann anz ena? (Matie 13:47-49)

13 Pandan bann dernie zour, Zeova inn donn bann anz enn responsabilite bien spesial. (Lir Matie 13:47-49.) Gras-a predikasion, bann milyon dimounn dan lemond antie pe interese ar bon nouvel, ek sertin parmi zot pe fer bann zefor pou zot kapav vinn bann serviter Zeova. Responsabilite ki Zeova inn donn bann anz, se pou “separ bann move dimounn ar bann bon dimounn.” Savedir ki bann anz pe ede pou gard lasanble prop. Selman, sa pa vedir ki si enn kikenn kit lasanble, ki li nepli kapav retourne. Ek sa pa vedir osi ki pa pou ena okenn problem dan lasanble. Me malgre sa bann sitiasion-la, nou kapav sir ki bann anz pe fer zot maximum pou gard lasanble prop.

14-15. Kouma nou kapav ede pou gard lasanble prop parey kouma bann anz? (Get zimaz osi.)

14 Kouma nou kapav ede pou gard lasanble prop, parey kouma bann anz? Nou kapav ede pou ki lasanble res prop lor plan moral ek spiritiel. Pou nou fer sa, nou bizin kontign fer nou lamitie ar Zeova vinn pli for, nou bizin swazir bann kamarad ki kontan Li, ek nou bizin res lwin ar ninport kisann-la ki kapav gat nou lamitie ar Li. (Ps. 101:3) Nou kapav osi ed nou bann frer ek ser pou res fidel ar Zeova. Par exanp, si nou aprann ki enn kikenn inn fer enn pese grav, nou kapav ankouraz li pou al koz ar bann ansien. Nou pou ankouraz li pou fer sa parski nou kontan li. Me si li pa al get bann ansien, se nou ki pou bizin al koz ar bann ansien. Kifer? Parski nou anvi ki nou frer ouswa nou ser, ki nepli ena enn bon lamitie ar Zeova, pa tarde pou gagn led ki li bizin pou ki li kapav revinn pros ar nou Papa.—Zak 5:14, 15.

15 Selman, kan enn kikenn fer enn pese grav ek ki li pa repanti, bizin tir li dan lasanble. Ek kan sa arive, nou bizin “aret frekant” sa dimounn-la.d (1 Kor. 5:9-13) Dispozision pou tir enn kikenn dan lasanble, sa ede pou gard lasanble prop. Anplis, kan nou pa frekant enn kikenn ki nepli form parti dan lasanble, se enn fason ki nou montre ki nou kontan li. Kifer? Parski kan nou obeir Zeova ek ki nou pa frekant li, sa kapav ed li pou konpran ki li bizin retourn ar Zeova. Ek si li retourne, nou pou bien kontan, parey kouma Zeova ek so bann milyon anz.—Lik 15:7.

Zimaz: 1. De ser pe asize lor enn ban ek pe bwar enn kafe. Enn ser pe koze ek lot ser-la pe get lot kote. 2. Plitar, dan Lasal Renion, ser ki ti pe koze la inn al get bann ansien.

Ki nou bizin fer si nou aprann ki enn frer ouswa enn ser inn fer enn pese grav? (Get paragraf 14)e


16. Ki zefor to kapav fer pou swiv lexanp bann anz?

16 Se vremem enn gran loner pou aprann konn bann anz ek pou travay ansam ar zot! Alor, anou imit zot bann zoli kalite: zot limilite, zot lamour pou bann dimounn, zot landirans, ek bann zefor ki zot fer pou gard lasanble prop. Ek si nou kontign swiv lexanp bann anz, nou pou kapav kontign form parti dan fami Zeova pou touletan!

PAREY KOUMA BANN ANZ, KOUMA NOU KAPAV . . .

  • ena limilite?

  • kontan bann dimounn?

  • fer zefor pou gard lasanble prop?

KANTIK 123 Nou Soumet ar Bondie Avek Fidelite

a Parmi bann milyon anz ki existe, Labib donn nom zis de anz—Mikael ek Gabriel.—Dan. 12:1; Lik 1:19.

b To pou trouv bann lezot lexanp dan Index des publications des Témoins de Jéhovah. Rod « Anges » ek al dan « direction angélique (exemples) ».

c Finn sanz sertin nom dan sa lartik-la.

d Parey kouma inn explike dan Rapor 2024 #2 par Komite Santral, si enn kikenn ki nepli form parti dan lasanble asiste enn renion, enn proklamater pou servi so konsians pou deside si li pou dir li bonzour ek akeyir li.

e DESKRIPSION ZIMAZ : Enn ser pe ankouraz so kamarad pou al koz ar bann ansien. Inpe letan inn pase, me kamarad-la pa’nn al get bann ansien, alor ser-la al koz ar bann ansien.

    Piblikasion Kreol Morisien (2000-2025)
    Dekoneksion
    Koneksion
    • Kreol Morisien
    • Partaze
    • Preferans
    • Copyright © 2025 Watch Tower Bible and Tract Society of Pennsylvania
    • Linformasion Legal
    • Prinsip Konfidansialite
    • Reglaz Konfidansialite
    • JW.ORG
    • Koneksion
    Partaze