Ki Ete Sa Bon Nouvel-La?

1. Ki sa bon nouvel ki sorti kot Bondie la?

Bondie anvi ki bann dimounn viv ere lor later. Li’nn kree later ek tou bann kitsoz ki lor la parski Li kontan nou. Biento Li pou fer kitsoz pou ki bann dimounn dan tou pei kapav ena enn pli bon lavenir. Li pou tir tou seki fer bann dimounn soufer.​—Lir Jérémie 29:11.

Okenn gouvernman zame pa’nn reisi tir violans, maladi, ouswa lamor. Me ena enn bon nouvel! Biento, Bondie pou ranplas tou bann gouvernman imin par so prop gouvernman. Bann ki soumet ar sa gouvernman-la pou viv dan lape ek zot pou ena enn bon lasante.​—Lir Isaïe 25:8; 33:24; Daniel 2:44.

2. Kifer nou bien bizin tann sa bon nouvel-la?

Se selman kan Bondie pou tir tou move dimounn lor later ki soufrans pou disparet. (Tsephania 2:3) Kan sa pou arive? Parol Bondie ti fini anons bann kondision ki ena lor later zordi. Bann levennman ki pe arive montre ki Bondie pre pou azir.​—Lir 2 Timothée 3:​1-5.

3. Ki nou bizin fer?

Nou bizin aprann konn Bondie gras-a so Parol, Labib. Labib li kouma enn let ki enn bon papa inn avoy nou. Li dir nou ki nou bizin fer pou ki nou ena enn bon lavi azordi ek ki nou bizin fer pou ki nou kapav viv pou touletan lor later, dan lavenir. Sertin dimounn pa pou kontan ki nou pe ed ou pou konpran Labib. Me se Bondie ki promet ou enn pli bon lavenir, alor pa les sa bon lokazion-la pase.​—Lir Proverbes 29:25; Révélation 14:​6, 7.