Anou aprann ar Parole Bondié

Sa lartik-la examine bann question ki kitfois ou finn deja demann-ou-mem ek li montré kot-sa ou kapav trouve bann reponse dan ou la Bible. Bann Témoins de Jéhovah pou bien content pou examine sa bann reponse-la avek ou.

1. Kifer nou bizin ecoute Bondié?

Bondié ena enn bon nouvelle pou l’humanité. Li koz lor la dan la Bible. La Bible li couma enn lettre ki sorti kot nou Papa ki dan le ciel, ki ena l’amour pou nou.—Lire Jérémie 29:11.

2. Ki sa bon nouvelle-la sa?

Bann dimoune bizin enn bon gouvernement. Okenn dirigeant humain pa finn reussi soulage bann dimoune ar violence, l’injustice, la maladie ou-soit la mort. Mais ena enn bon nouvelle. Bondié pou donne bann dimoune enn bon gouvernement ki pou libere nou ar tou kitsoz ki faire nou souffert.—Lire Daniel 2:44.

3. Kifer li important ki nou ecoute Bondié?

Bientot, Bondié pou tire tou bann dimoune ki faire lezot souffert. Entre-temps, Li pé enseigne bann million dimoune ki humble pou ena enn pli bon la vie ki basé lor l’amour. Grace a Parole Bondié, bann dimoune pé aprann couma pou faire face ar bann probleme ki zot gagné dan la vie, couma pou trouve vrai bonheur, ek couma pou faire Bondié plaisir.—Lire Tsephania 2:3.

4. Kisannla ki finn faire ecrire la Bible?

Ena 66 tipti livre dan la Bible. C’est 40 zom ki finn ecrire sa. Cinq premier livre finn ecrire par Moïse, inn gagne environ 3,500 an. Dernier livre finn ecrire par l’apotre Jean, inn gagne plus ki 1,900 an. Mais bann dimoune ki’nn ecrire la Bible pa’nn ecrire zot prop pensée mais pensée Bondié. Alors, c’est Bondié ki finn faire ecrire la Bible.—Lire 2 Timothée 3:16; 2 Pierre 1:21.

Nou koné ki la Bible sorti kot Bondié parski li predire l’avenir dan enn fason exact, en detail. Okenn dimoune pa kapav faire sa. (Isaïe 46:9, 10) En plus, la Bible faire nou konn bann qualité ki Bondié ena. Li ena pouvoir pou ameliore la vie bann dimoune. Sa bann verité-la finn convaink bann million dimoune ki la Bible li Parole Bondié.—Lire Josué 23:14; 1 Thessaloniciens 2:13.

5. Couma ou kapav comprend la Bible?

Beaucoup dimoune konn Jésus couma enn enseignant Parole Bondié. Mem si la plupart dimoune avek ki li ti kozé ti konn la Bible, zot ti bizin l’aide pou comprend sa. Pou aide zot, Jésus ti faire reference ar enn texte la Bible apré lot ek ti explik “signification bann l’Ecriture.” Sa lartik-la, “Anou aprann ar Parole Bondié,” pou servi mem methode pou aide ou.—Lire Luc 24:27, 45.

Pena beaucoup kitsoz ki aussi interessant ki aprann ar Bondié pou koné ki but la vie. Mais kitfois ena dimoune pa pou content ki ou pé lire la Bible. Pa decouragé. L’espoir pou ou gagne la vie eternel depann lor enn kitsoz: aprann konn Bondié.—Lire Matthieu 5:10-12; Jean 17:3.

Pou gagne plus renseignement, guette chapitre 2 dan livre Ki la Bible enseigné vrai-mem?, publié par bann Témoins de Jéhovah.