Douz Espion

Bann Izraelit ti kit Montagn Sinai ek zot ti travers dezer Parann ziska enn landrwa ki apel Kades. Laba, Zeova ti dir Moiz: ‘Avoy 12 zom, enn dan sak tribi, pou espionn Kanaan, pei ki mo pou donn bann Izraelit.’ Alor, Moiz ti swazir 12 espion ek li ti dir zot: ‘Al Kanaan, ek gete si sa pei-la li bon pou fer plantasion. Gete si bann abitan sa pei-la, zot feb ouswa for, ek si zot res dan bann latant ouswa bann lavil.’ Lerla, sa 12 espion-la ti al Kanaan, ek parmi zot ti ena Zozwe ek Kaleb.

Apre 40 zour, sa bann espion-la ti retourne. Zot ti amenn bann fig, bann grenad, ek bann rezin avek zot. Zot ti dir: ‘Se enn bon pei, me bann abitan-la for ek zot bann lavil ena bann gran miray.’ Lerla, Kaleb ti dir: ‘Nou kapav gagn laviktwar lor zot. Anou al deswit!’ Eski to kone kifer Kaleb ti dir sa? Parski li ek Zozwe ti ena konfians an Zeova. Me lezot dis espion-la ti dir: ‘Non! Bann dimounn ki laba, zot gran, zot koumadir bann zean! Nou koumadir bann sotrel devan zot.’

Bann Izraelit ti dekouraze. Zot ti koumans plengne ek zot ti pe dir ant zot: ‘Anou swazir enn lot sef ek anou retourn Lezip. Kifer nou bizin al Kanaan pou ki bann-la touy nou?’ Me Zozwe ek Kaleb ti dir: ‘Pa dezobeir Zeova, ek pa gagn per. Zeova pou protez nou.’ Me bann Izraelit pa ti ekout zot. Zot ti mem anvi touy Zozwe ek Kaleb!

Ki Zeova ti fer? Li ti dir Moiz: ‘Apre tou seki mo’nn fer pou bann Izraelit, zot touzour pa obeir momem. Akoz sa, zot pou res dan dezer pandan 40 an, ek zot pou mor lamem. Zis zot bann zanfan, Zozwe, ek Kaleb ki pou viv dan sa pei ki mo finn promet pou donn zot la.’