Rit ek Noemi

Pandan enn lepok kot ti ena lafaminn dan Izrael, enn Izraelit ki ti apel Noemi ti al res dan pei Moab avek so mari ek so de garson. Plitar, Noemi so mari ti mor. So bann garson ti marye avek de Moabit, Rit ek Orpa. Malerezman, avek letan, bann garson-la osi ti mor.

Kan Noemi ti tann dir ki ti nepli ena lafaminn dan Izrael, li ti desid pou retourn kot li. Rit ek Orpa ti al ansam avek li. Me lor sime, Noemi ti dir zot: ‘Zot ti bann bon madam pou mo bann garson ek zot bann bon belfi. Mo anvi ki zot remarye. Retourn kot zot dan Moab.’ Me Rit ek Orpa ti reponn: ‘Nou kontan twa! Nou pa anvi kit twa.’ Kanmem sa, Noemi ti kontign dir zot ale. Alafin, Orpa ti ale, me Rit ti reste. Noemi ti dir Rit: ‘Orpa pe retourn kot so pep ek kot so bann bondie. Al avek li, ek retourn lakaz to mama.’ Me Rit ti reponn: ‘Mo pa pou kit twa. To pep pou vinn mo pep, ek to Bondie pou vinn mo Bondie.’ Dapre twa, ki Noemi ti resanti kan Rit ti dir li sa?

Rit ek Noemi ti ariv dan Izrael kan rekolt lorz ti koumanse. Enn zour, Rit ti al dan karo enn zom ki ti apel Boaz, pou ramas bann lagrin ki bann travayer pa ti ramase. Boaz ti garson Raab. Boaz ti tann dir ki Rit ti enn Moabit ek ki li ti touletan ed Noemi. Boaz ti dir so bann travayer pou kit inpe lagrin anplis dan karo pou ki Rit kapav ramase.

Sa lanwit-la, Noemi ti demann Rit: ‘Dan ki karo to’nn al travay zordi?’ Rit ti reponn: ‘Dan karo enn zom ki apel Boaz.’ Noemi ti dir li: ‘Boaz enn fami ar mo misie. Kontign travay dan so karo avek bann lezot zenn madam. To pou an sekirite laba.’

Rit ti kontign travay dan karo Boaz ziska lafin lepok rekolt. Boaz ti remarke ki Rit ti travay bien dir ek ki li ti enn bon madam. Dan sa lepok-la, si enn zom ki ti marye ek ki pa ti ena garson, ti mor, enn manb so fami ti kapav marye ar so madam. Alor, Boaz ti marye ar Rit. Zot ti gagn enn garson ki ti apel Obed. Obed ti granper Lerwa David. Bann kamarad Noemi ti extra kontan. Zot ti dir: ‘Avan, Zeova ti donn twa Rit, ki ti bien bon avek twa, ek aster-la, to’nn gagn enn ti-zanfan. Ki Zeova gagn laglwar!’