LESON 15
Kisannla Zezi Ete?
Zezi enn parmi bann dimounn pli popiler ki finn ena dan listwar. Pourtan, boukou dimounn pa konn boukou kitsoz lor li apart so nom. Ek zot ena diferan lopinion lor kisannla Zezi vremem ete. Me ki Labib ansegn nou lor li?
1. Kisannla Zezi ete?
Zezi, li enn anz bien pwisan ki res dan lesiel. Zeova ti kree Zezi avan tou lezot kitsoz. Se akoz sa ki Labib dir ki li “Premie-ne parmi tou bann kreatir.” (Kolosien 1:15) Labib dir osi ki Zezi, li “Sel Garson” Bondie, parski li tousel ki Zeova finn kree direk. (Zan 3:16) Zezi ti travay ansam avek so Papa, Zeova, ek li ti ed Li pou kree tou lezot kitsoz. (Lir Proverb 8:30.) Zezi bien pros avek Zeova. Li “Laparol,” ouswa port-parol Bondie, setadir ki li transmet bann mesaz ek bann instriksion Bondie.—Zan 1:14.
2. Kifer Zezi ti vinn lor later?
Sa fer apepre 2,000 an ki Zeova ti servi so lespri sin pou transfer lavi Zezi depi lesiel dan vant enn zenn vierz ki apel Mari. Se koumsa ki Zezi ti ne kouma enn imin. (Lir Lik 1:34, 35.) Zeova ti avoy Zezi lor later pou vinn Lemesi, ouswa Lekris, ek pou sap bann dimounn.a Tou bann profesi ki Zeova ti predir konsernan Lemesi finn realize gras-a Zezi. Sa finn ed bann dimounn pou kone ki Zezi, limem “Lemesi, Garson Bondie Vivan.”—Matie 16:16.
3. Kotsa Zezi ete asterla?
Apre ki Zezi ti mor, Bondie ti resisit li kouma enn anz ek li’nn retourn dan lesiel. Laba, “Bondie finn elev li pli lao ki tou.” (Filipien 2:9) Asterla, Zezi enn anz bien pwisan, ek se zis Zeova ki pli pwisan ki li.
ANOU GET INPE PLIS
Nou pou aprann plis lor kisannla Zezi ete vremem ek kifer li bien inportan ki nou aprann konn li.
4. Zezi li pa Bondie Tou-Pwisan
Labib ansegn nou ki mem si Zezi li enn anz bien pwisan dan lesiel, li soumet ar so Bondie ek so Papa, Zeova. Kifer nou dir sa? Zwe VIDEO-la pou trouve seki Labib ansegne lor diferans ki ena ant Zezi ek Bondie Tou-Pwisan.
Bann verse ki swiv pou ed nou pou konpran ki diferans ena ant Zeova ek Zezi. Lir sak verse, ek apre sa, get sa bann kestion-la ansam:
Lir Lik 1:30-32.
Dapre seki sa anz-la ti dir, ki relasion ena ant Zezi ek Zeova, Bondie “Treo”?
Lir Matie 3:16, 17.
Kan Zezi ti pran batem, ki sa lavwa dan lesiel la ti dir?
Dapre ou, kisannla ti pe koze?
Lir Zan 14:28.
Kisannla ki pli gran ek ki ena plis lotorite? Enn papa ouswa enn garson?
Zezi ti apel Zeova Papa. Ki sa aprann nou?
Lir Zan 12:49.
Dapre Zezi, eski li ek so Papa zot mem dimounn? Ki ou panse?
5. Bann prev ki montre ki Zezi li Lemesi
Dan Labib, ena bann profesi ki ed nou pou rekonet Lemesi, setadir sa kikenn ki Bondie inn swazir pou sap bann dimounn la. Zwe VIDEO-la pou trouv sertin profesi ki Zezi inn realize kan li’nn vinn lor later.
Lir sa bann profesi ki ena dan Labib la, ek apre sa, get sa bann kestion-la ansam:
Lir Mishe 5:2 pou aprann kotsa Lemesi ti pou ne.b
Eski nesans Zezi inn realiz sa profesi-la?—Matie 2:1.
Lir Psom 34:20 ek Zakari 12:10 pou aprann seki Labib ti predir konsernan lamor Lemesi.
Eski sa bann profesi-la ti realize?—Zan 19:33-37.
Eski ou panse ki Zezi inn fer par expre pou ki sa bann profesi-la realize?
Ki sa montre nou konsernan Zezi?
6. Li inportan ki nou aprann konn Zezi
Labib dir ki li bien inportan ki nou aprann konn Zezi, ek rol ki Bondie finn donn li. Lir Zan 14:6 ek 17:3, ek apre sa, get sa kestion-la ansam:
Kifer li inportan ki nou aprann konn Zezi?
Zezi inn ouver sime pou ki nou vinn kamarad Bondie. Li’nn ansegn laverite lor Zeova, ek gras-a li, nou kapav gagn lavi pou touletan
SERTIN DIMOUNN DIR: “Bann Temwin Zeova pa krwar dan Zezi.”
Ki ou ti pou reponn?
SEKI NOU’NN APRANN
Zezi, li enn anz bien pwisan. Li Garson Bondie ek Lemesi.
Eski Ou Rapel?
Kifer apel Zezi “Premie-ne parmi tou bann kreatir”?
Ki Zezi ti fer avan ki li vinn lor later?
Kouma nou kone ki Zezi li Lemesi?
DEKOUVER
Get bann lezot prev ki montre ki Zezi li Lemesi.
“Eski Bann Profesi lor Lemesi Montre Nou ki Zezi Limem Lemesi?” (Lartik lor jw.org)
Dan ki fason Bondie li Papa Zezi? Get seki Labib dir.
Aprann kifer Trinite li pa enn lansegnman ki sorti dan Labib.
« Jésus est-il Dieu ? » (Latour Degard, 1e Avril 2009, an Franse)
Gete kouma lavi enn madam ti sanze kan li ti fer bann resers lor seki Labib ansegne lor Zezi.
« Une femme juive explique pourquoi elle a remis sa foi en question » (Leve!, Me 2013, an Franse)