Jésus Christ—Reponse nou bann question

“Kisannla bann la foule dire mo été?”​—LUC 9:18.

JÉSUS ti demann so bann disciple sa question-la parski li ti koné ki bann dimoune ti ena different l’opinion lor li. Pourtant, pa ti ena okenn raison pou ena confusion. Jésus pa ti vive en cachiette ek li pa ti agir en secret. Au contraire, li ti frequente bann dimoune dan zot village ek zot la ville. Li ti preché ek li ti enseigné en publik parski li ti envie ki bann dimoune konn la verité lor li.​—Luc 8:1.

Nou kapav konn la verité lor Jésus par so bann parole ek par so bann action dan quatre l’Evangile ki trouve dan la Bible, Matthieu, Marc, Luc, ek Jean. Sa bann recit inspiré-la zot enn base pou nou reponn bann question ki nou posé lor Jésus.a​—Jean 17:17.

QUESTION: Eski Jésus ti vrai-mem existé?

REPONSE: Oui. Bann historien premier siecle, parmi ti ena Josèphe ek Tacite, mentionne Jésus couma enn kikenn ki finn vrai-mem existé. Pli important encore, bann l’Evangile montré dan enn fason sur ki Jésus ti vrai-mem existé ek li pa ti enn dimoune ki finn inventé. Sa bann recit-la bien precis ek donne bann detail ki montré kan ek ki coté bann l’evenement ti deroulé. Par exemple, dan so l’Evangile, Luc mentionne sept dimoune ki ti ena l’autorité​—bann nom ki confirmé par bann historien​—pou etablir l’année ki Jésus ti commence so ministere.​—Luc 3:1, 2, 23.

Bann preuve ki ena donne nou l’assurance ki Jésus ti vrai-mem existé. Livre Preuves de l’historicité de Jésus (en anglais), dire: “La plupart bann bibliste pou d’accord ki enn zom ki ti appel Jésus ek ki ti sorti Nazareth ti vive dan premier siecle.”

QUESTION: Eski Jésus li-mem Bondié?

REPONSE: Non. Jamais Jésus ti considere-li-mem egal ar Bondié. Au contraire, plusieurs fois Jésus ti montré ki li ti inferieur ar Jéhovah.b Par exemple, li ti appel Jéhovah “mo Bondié” ek “sel vrai Bondié.” (Matthieu 27:46; Jean 17:3) Zis enn dimoune ki ena enn position inferieur ki kapav servi sa bann expression-la kan li pé koz lor enn lot dimoune. Enn travailleur ki appel enn dimoune ki employe li “mo patron” ou-soit “sa kikenn ki en charge-la,” montré dan enn fason clair ki li reconette ki li ena enn position inferieur.

Jésus ti montré aussi ki li pa ti Bondié. Enn jour, Jésus ti dire bann opposant ki ti mette en doute so l’autorité: “Dan zot prop la Loi inn ecrire: ‘Temoignage deux dimoune vrai.’ C’est moi ki rann temoignage lor mo-mem, ek le Pere ki’nn envoye moi rann temoignage lor moi.” (Jean 8:17, 18) Jésus ek Jéhovah pa kapav mem personnage, sinon couma ti pou kapav considere zot couma deux temoin?c

QUESTION: Eski Jésus ti zis enn bon dimoune?

REPONSE: Non. Li ti plus ki sa. Jésus ti comprend ki li ti ena plusieurs role important kan li ti accompli volonté Bondié. Anou guette deux-trois parmi sa bann role-la:

● “Sel garson ki Bondié inn crée direct.” (Jean 3:18) Jésus ti koné kot li sorti. En realité, so la vie ti commencé bien longtemps avant ki li ti né lor la terre. Li ti expliké: “Mo finn sorti dan le ciel.” (Jean 6:38) Jésus ti premier creation Bondié, ek li ti aidé dan creation tou lezot kitsoz. Zis Jésus tousel ki finn crée direct par Bondié, alors la Bible ena raison pou appel li “sel garson ki Bondié inn crée direct.”​—Jean 1:3, 14; Colossiens 1:15, 16.

● “ Fils de l’homme. ” (Matthieu 8:20) Plusieurs fois, Jésus ti koz lor li-mem couma “ Fils de l’homme, ” enn l’expression ki nou trouvé environ 80 fois dan bann l’Evangile. Sa l’expression-la montré ki Jésus ti enn humain ek pa Bondié dan enn lekor humain. Couma eski sel Garson ki Bondié ti crée direct, ti né en tant ki enn humain? Jéhovah ti servi so l’esprit saint pou transfere la vie so Garson dan ventre enn vierge juif ki ti appel Marie ek coumsa Jésus ti formé dan ventre sa vierge-la. Alors, Jésus ti né sans peché ek parfait.​—Matthieu 1:18; Luc 1:35; Jean 8:46.

● “Enseignant.” (Jean 13:13) Jésus ti montré ki travail ki Bondié ti donne li, c’est pou ‘enseigne ek preche la bonne nouvelle’ lor Royaume Bondié. (Matthieu 4:23; Luc 4:43) Dan enn fason bien clair ek bien simple, li ti expliké ki été Royaume Bondié ek ki sa Royaume-la pou faire pou realise volonté Jéhovah.​—Matthieu 6:9, 10.

● “La Parole.” (Jean 1:1) Jésus ti servi en tant ki Porte-parole Bondié, setadir ki Jéhovah ti servi li pou transmette bann l’information ek bann l’instruction ar lezot creature. Jéhovah ti servi Jésus pou transmette So message ar bann dimoune lor la terre.​—Jean 7:16, 17.

QUESTION: Eski Jésus ti Messie ki Bondié ti promette?

REPONSE: Oui. Bann prophetie la Bible ti annoncé ki le Messie, ou-soit Christ, ki vedir “Oint,” pou vini. Sa Messie ki Bondié ti’nn promette-la ti pou joué enn role important dan realisation projet Jéhovah. Enn jour, enn femme samaritaine ti dire Jésus: “Mo koné ki Messie pé vini, sa kikenn ki appel Christ-la.” Alors, Jésus ti dire dan enn fason clair: “Moi ki pé koz avek toi, mo-mem sa kikenn-la.”​—Jean 4:25, 26.

Eski ena bann preuve ki Jésus ti vrai-mem le Messie? Pareil couma enn l’empreinte identifié zis enn dimoune, ena trois qualité preuve ki ensam montré dan enn fason ki nou pa kapav contredire, ki zis Jésus ki le Messie. Anou guette sa bann preuve-la:

● So bann ancetre. La Bible ti annoncé ki le Messie ti pou sorti dan descendance Abraham ek ki David ti pou enn so bann ancetre. (Genèse 22:18; Psaume 132:11, 12) Jésus ti enn descendant Abraham ek David toulé-deux.​—Matthieu 1:1-16; Luc 3:23-38.

● Bann prophetie ki finn realisé. Dan bann l’Écritures hébraïques ena plusieurs douzaine prophetie concernant la vie le Messie lor la terre, parmi ena bann detail lor so naissance ek so la mort. Jésus ti realise tou sa bann prophetie-la. Par exemple: li ti né dan Bethléhem (Mika 5:2; Luc 2:4-11), Bondié ti faire li sorti dan l’Égypte (Hoshéa 11:1; Matthieu 2:15), ek kan ti touye li, okenn so bann lezo pa ti cassé (Psaume 34:20; Jean 19:33, 36). Li impossible ki Jésus ti controle bann l’evenement dan so la vie pou faire zot corresponn ar bann condition ki ti bizin, pou realise tou bann prophetie messianik.d

● Bondié Li-mem ti temoigné. Kan Jésus ti né, Bondié ti envoye bann ange pou dire bann berger ki le Messie ti’nn né. (Luc 2:10-14) Dan different l’occasion pendant ministere Jésus, Bondié personnellement ti koz depuis le ciel, pou dire ki Jésus ena so faveur. (Matthieu 3:16, 17; 17:1-5) Jéhovah ti permette Jésus faire bann grand mirak, ek sa ti donne plus preuve ki Jésus ti le Messie.​—Actes 10:38.

QUESTION: Kifer Jésus ti bizin souffert ek mort?

REPONSE: Jésus pa ti faire peché, alors, li pa ti merité souffert. Li pa ti merité aussi ki so bann l’ennemi couloute li lor enn poteau couma enn criminel ek laisse li lor la pou konn enn la mort ki ti humilié li. Malgré sa, Jésus ti attann pou gagne sa bann souffrance-la, ek li ti disposé pou accepté sa.​—Matthieu 20:17-19; 1 Pierre 2:21-23.

Bann prophetie messianik ti annoncé ki le Messie ti pou bizin souffert ek mort pou couvert peché bann dimoune. (Isaïe 53:5; Daniel 9:24, 26) Jésus li-mem ti dire ki li ti vinn lor la terre “pou donne so nâme couma enn ranson en echange pou beaucoup.” (Matthieu 20:28) Sacrifice Jésus couvert peché bann dimoune. Alors, bann ki ena la foi dan valeur sa sacrifice-la ena l’esperance pou delivré ar peché ek la mort ek pou vive pou touletan dan Paradis lor la terre.e​—Jean 3:16; 1 Jean 4:9, 10.

QUESTION: Eski vrai-mem nou kapav croire ki Jésus ti ressuscité?

REPONSE: Oui. Jésus ti bien koné ki li ti pou ressuscité. (Matthieu 16:21) Mais li important ki nou remarké ki ni Jésus, ni bann ecrivain la Bible jamais pa ti pretann ki Jésus ti pou ressuscité par bann moyen naturel. Li ti pou difficile pou croire enn kitsoz coumsa. Au contraire, la Bible dire: “Bondié ti ressuscite li kan Li ti tire douleur la mort.” (Actes 2:24) Si nou d’accord ki ena enn Bondié ek ki Li-mem Createur tou kitsoz, alors nou ena bann bon raison pou croire ki Li ti kapav ressuscite so Garson parmi bann mort.​—Hébreux 3:4.

Eski nou ena bann preuve solide ki Jésus ti ressuscité? Anou examine sa bann point-la.

● Temoignage bann dimoune ki’nn trouve Jésus apré so resurrection. Apepré 22 an apré la mort Jésus, l’apotre Paul ti ecrire ki ti ena plus ki 500 temoin ki ti trouve Jésus apré so resurrection ek la plupart parmi zot ti encore vivant kan Paul ti ecrire sa. (1 Corinthiens 15:6) Li possible pou dementi enn ou-soit deux temoin, mais kisannla kapav dementi temoignage 500 temoin?

● Bann temoin ki nou kapav faire confiance. Bann premier disciple Jésus​—ki ti bien placé pou koné seki ti vrai-mem arrivé​—ti annonce avek enn grand zele ki Jésus ti’nn ressuscité. (Actes 2:29-32; 3:13-15) En realité, zot ti considere zot croyance dan resurrection couma enn kitsoz bien important pou la foi bann chretien. (1 Corinthiens 15:12-19) Sa bann disciple-la ti disposé pou mort au lieu ki zot renonce zot la foi en Jésus. (Actes 7:51-60; 12:1, 2) Eski ou konn enn kikenn ki disposé pou mort pou enn kitsoz ki li koné fausse?

Nou finn examine bann reponse biblik pou six question important lor Jésus. Sa bann reponse-la dire nou dan enn fason clair kisannla Jésus ti été. Mais eski sa bann reponse-la vrai-mem ena l’importance? Eski seki ou choisir pou croire lor Jésus ena vrai-mem enn l’importance?

[Notes]