Bann Benediksyon Ki Labonn Nuvel Amene

“Zeova finn swazir mwa pu anons labonn nuvel ar bann dimunn ki sumet. Li finn avoy mwa pu sweyn bann ki ena leker brize, . . . pu konsol bann ki an dey.”—IZAI 61:1, 2.

1, 2. (a) Kuma Zezi finn idantifye limem, ek kuma eski li finn fer sa? (b) Ki bann benediksyon labonn nuvel ki Zezi ti anonse, finn amene?

ENN zur saba, dan kumansman so minister, Zezi ti al dan sinagog Nazaret. La, dapre Labib, “finn donn li rulo profet Izai, li finn uver rulo la ek li finn truv [sa bann parol ki ti finn ekrir la]: ‘Lespri Zeova li lor mwa, parski li finn swazir mwa pu al anons labonn nuvel.’” Zezi finn kontiyn lir sa profesi la. Apre sa li finn asize ek li finn dir: “Azordi, sa parol lekritir ki zot finn fek tande la, finn realize.”—Lik 4:16-21.

² Par sa, Zezi finn idantifye limem kuma sa predikater ki mansyone dan sa profesi la, ki anons labonn nuvel, ek amenn konsolasyon. (Matye 4:23) Wi, Zezi ti ena vremem bann bon nuvel pu anonse! Li ti dir bann ki ti pe ekut li: “Mo mem lalimyer lemond. Seki swiv mwa zame pa pu mars dan nwarte, me li pu ena lalimyer lavi.” (Zan 8:12) Li finn dir usi: “Si zot res dan mo parol, vremem zot mo bann disip, ek zot pu konn laverite, ek laverite pu liber zot.” (Zan 8:31, 32) Wi, Zezi ti ena “bann parol lavi pu tuletan.” (Zan 6:68, 69) Lalimyer, lavi, liberte―tusala zot vremem bann benediksyon ki ena buku valer!

3. Ki bon nuvel bann disip Zezi ti prese?

³ Apre fet Lapantkot lane 33 N.L., bann disip finn kontiyn travay predikasyon labonn nuvel ki Zezi ti kumanse. Zot finn pres ‘labonn nuvel dirwayom’ avek bann Izraelit ek bann lezot nasyon. (Matye 24:14; Akt 15:7; Romin 1:16) Bann ki ti ekute ti pe aprann konn Bondye Zeova. Zot ti nepli esklav bann krwayans relizye, ek zot ti kumans fer parti dan enn nasyon spirityel, setadir “Izrael Bondye.” Bann manb sa nasyon la ena lesperans pu guverne pu tuletan dan lesyel ansam avek zot Senyer, Zezi Kris. (Galat 5:1; 6:16; Efezyin 3:5-7; Kolosyin 1:4, 5; Revelasyon 22:5) Wi, sa ti vremem bann benediksyon ki ena buku valer!

Predikasyon Labonn Nuvel Zordi

4. Kuma eski sa misyon pu pres labonn nuvel la pe akonpli zordi?

⁴ Zordi, enn “gran laful” bann “lezot muton” ki deplizanpli pe ogmante, pe sutenir bann manb 144,000 lor later, pu kontiyn ranpli sa misyon ki Zezi ti gayne an premye la. (Revelasyon 7:9; Zan 10:16) Rezilta: Zame avan labonn nuvel pa finn prese sa kantite ki zordi li pe prese la. Dan 235 peyi ek teritwar, bann Temwin Zeova pe “anons labonn nuvel ar bann dimunn ki sumet . . . , [zot pe] sweyn bann ki ena leker brize, [zot pe] anons liberte ar bann esklav, ek ar bann prizonye, zot pe anons ki [zot] lizye pu uver net; [zot pe] proklam lane faver Zeova ek zur vanzans Zeova; [zot pe] konsol bann ki an dey.” (Izai 61:1, 2) Dan sa fason la, predikasyon labonn nuvel pe kontiyn amenn benediksyon pu buku dimunn ek enn vre konsolasyon pu “bann ki pe konn ninport ki kalite maler.”—2 Korintyin 1:3, 4.

5. An seki konsern predikasyon labonn nuvel, kuma eski bann Temwin Zeova zot diferan avek bann legliz Lakretyinte?

⁵ Li vre ki bann legliz Lakretyinte favoriz diferan metod pu pres labonn nuvel. Buku legliz avoy bann misyoner dan lezot peyi pu konverti bann dimunn. Par egzanp, The Orthodox Christian Mission Center Magazine finn fer enn rapor lor laktivite bann misyoner dan Madagascar, dan bann peyi ki dan sid l’Afrique, dan Tanzanie, ek Zimbabwe. Me selman, laplipar bann manb Legliz Ortodox, ek bann lezot legliz Lakretyinte, pa partisip dan sa travay predikasyon la. Parkont, tu bann Temwin Zeova ki finn angaz zot ar Bondye fer seki zot kapav pu partisip dan predikasyon labonn nuvel. Zot konpran ki kan zot anons labonn nuvel, zot montre ki zot ena enn vre lafwa. Dayer, Pol ti dir: “Avek leker ki enn kikenn montre lafwa pu lazistis, me avek labus ki enn kikenn fer deklarasyon piblik pu delivrans.” Enn lafwa ki pa pus enn kikenn pu azir, li enn lafwa ki mor.—Romin 10:10; Zak 2:17.

Enn Bon Nuvel Ki Amenn Bann Benediksyon Eternel

6. Ki bon nuvel pe prese zordi?

⁶ Bann Temwin Zeova pres pli bon nuvel ki kapav ena. Zot uver zot Labib ek zot montre bann dimunn interese ki Zezi finn sakrifye so lavi pu ki tu dimunn kapav vinn pros ar Bondye, gayn pardon zot pese, ek gayn lespwar pu viv pu tuletan. (Zan 3:16; 2 Korintyin 5:18, 19) Zot anonse ki Rwayom Bondye finn fini etabli dan lesyel ek Lerwa Zezi Kris ki Bondye finn swazire, pe diriz sa Rwayom la. Byinto, sa Rwayom la pu tir tu mesanste ki ena lor later ek li pu diriz travay pu fer later vinn enn Paradi. (Revelasyon 11:15; 21:3, 4) Parey kuma Izai ti anonse, zot fer zot prosin kone ki nu lepok sa mem “lane faver Zeova” kot tu bann dimunn kapav ankor ekut labonn nuvel. Zot averti bann dimunn usi ki byinto pu ena “zur vanzans Bondye,” kan Zeova pu detrir tu bann move dimunn ki pale repanti.—Psom 37:9-11.

7. Ki legzanp montre linite bann Temwin Zeova, ek kifer zot konn sa kalite linite la?

⁷ Dan enn lemond ki konn zis maler ek katastrof, sa mem sel bon nuvel ki amenn bann benediksyon eternel. Bann ki aksepte sa bon nuvel la vinn dan enn fami Kretyin internasyonal ki pa les bann diferans nasyonal, rasyal, ek ekonomik diviz zot. Zot finn ‘kuver zot ar lamur, parski li enn lyin linite parfe.’ (Kolosyin 3:14; Zan 15:12) Par egzanp get seki ti arive lane pase dan enn peyi an Afrique. Enn gramatin, finn ena bann kut bal dan kapital sa peyi la. Ti pe prepar enn kudeta. Sa fwa la, bann levennman finn sanze ek sa finn vinn enn problem rasyal. Ek la, enn fami Temwin finn kumans gayn buku kritik parski zot ti pe gard bann lezot Temwin enn lot ras kot zot. Me sa fami la finn reponn: “Nu ena zis bann Temwin Zeova dan nu lakaz.” Wi, pu zot, bann diferans rasyal pa ti ena okenn linportans; parkont, lamur Kretyin―ki donn konsolasyon bann ki bizin―sa li ti byin inportan. Enn paran sa fami la, ki pa Temwin, finn fer sa komanter la: “Bann manb dan tu bann relizyon finn trayir bann ki dan mem relizyon ki zot. Zis bann Temwin Zeova ki pa’nn fer sa.” Dan bann peyi ki ravaze par lager sivil, ena buku ka kumsa ki montre ki bann Temwin Zeova vremem “kontan lafami bann frer an antye.”—1 Pyer 2:17.

Labonn Nuvel Sanz Bann Dimunn

8, 9. (a) Ki sanzman bann ki aksepte labonn nuvel zot fer? (b) Ki bann lexperyans montre puvwar ki labonn nuvel ena?

⁸ Labonn nuvel ena enn rapor avek seki Pol apel “lavi asterla ek lavi dan lavenir.” (1 Timote 4:8) Labonn nuvel pa zis ofer enn lespwar extraordiner ek sir pu lavenir, me li amelyor usi “lavi asterla.” Sak Temwin Zeova les Parol Bondye, Labib gid li pu viv an ankor avek volonte Bondye. (Psom 119:101) Amezir ki zot devlop bann kalite kuma lazistis ek fidelite, zot gayn enn nuvo personalite.—Efezyin 4:24.

⁹ Anu get legzanp Franco. Franco ti ena enn problem: fer koler. Kuma enn kitsoz pa mars kuma li anvi, so koler mont dan but so nene, ek li kumans kraz tu kitsoz. So madam ti pe etidye Labib avek bann Temwin Zeova, ek legzanp Kretyin sa bann Temwin la dusma-dusma finn ed Franco pu truve ki li bizin sanze. Li finn kumans etidye Labib avek zot ek alafin li finn kapav devlop frwi lespri sin Bondye kuma lape ek li kapav kontrol limem asterla. (Galat 5:22, 23) Li ti enn parmi bann 492 dimunn ki ti batize dan Belgique pandan lane servis 2001. Anu get usi legzanp Alejandro. Alejandro ti enn zenom ki ti vinn telman esklav ladrog ki li ti finn tom dan enn lamizer terib kot li ti pe bizin viv avek seki ena dan bann pubel. Li ti rod tu seki li ti kapav gayne pu vande pu ki li kapav aste ladrog. Li ti ena 22 an kan bann Temwin Zeova finn invit li pu etidye Labib, ek li finn aksepte. Li finn kumans lir Labib tulezur ek asiste bann reynion Kretyin. Apre sa, li finn sanz so lavi telman vit ki dan mwins ki sis mwa li ti pre pu partisip dan predikasyon labonn nuvel―li ti enn parmi bann 10,115 proklamater ki ti pres labonn nuvel lane pase dan Panama.

Labonn Nuvel―Enn Benediksyon pu Bann Ki Sumet

10. Ki bann ki montre lintere pu labonn nuvel, ek kuma eski zot vizyon lor lavi sanze?

¹⁰ Izai finn anonse ki labonn nuvel pu prese ar bann dimunn ki sumet. Ki sa bann dimunn la sa? Liv Akt dekrir zot kuma bann ki “dan dispozisyon ki bizin pu viv pu tuletan.” (Akt 13:48) Zot bann dimunn ki ena limilite ek ki sorti dan tu klas sosyal. Zot les mesaz laverite tus zot leker. Sa bann kalite dimunn la aprann ki kan zot fer volonte Bondye, zot pu gayn buku pli gran rekonpans ki seki sa lemond la kapav ofer. (1 Zan 2:15-17) Me, kuma eski bann Temwin Zeova reysi tus leker bann dimunn avek labonn nuvel?

11. Dapre Pol, kuma eski labonn nuvel bizin prese?

¹¹ Anu egzaminn legzanp Lapot Pol, ki ti ekrir bann Korintyin: “Kan mwa mo ti vinn kot zot, [mo] bann frer, mo pa ti vini avek gran-gran koze uswa avek sazes pu anons sin sekre Bondye. Parski mo finn deside pu pa konn nanyin parmi zot, exepte Zezi Kris, ki finn atase lor enn poto.” (1 Korintyin 2:1, 2) Pol pa ti servi so konesans pu inpresyonn bann ki ti pe ekut li. Li ti anseyn zis bann kitsoz vre ki inspire par Bondye, bann kitsoz ki zordi finn ekrir dan Labib. Remark usi lankurazman ki Pol ti donn Timote, ki ti so partner dan travay predikasyon: “Pres laparol, insiste pu fer li.” (2 Timote 4:2) Timote ti bizin pres “laparol,” setadir mesaz Bondye. Pol ti dir Timote usi: “Fer tu to posib pu paret devan Bondye kuma enn kikenn apruve, enn zuvriye ki pena nanyin pu onte, ki konn servi parol laverite kuma bizin.”—2 Timote 2:15.

12. Kuma eski zordi bann Temwin Zeova swiv legzanp Pol ek so bann parol?

¹² Bann Temwin Zeova swiv legzanp Pol, ek usi bann parol ki li ti dir Timote. Zot rekonet ki Parol Bondye ena puvwar; akoz sa zot servi li byin pu montre zot prosin bann parol lespwar ek konsolasyon ki zot bizin. (Psom 119:52; 2 Timote 3:16, 17; Ebre 4:12) Wi, zot servi byin bann piblikasyon ki baze lor Labib pu ki bann dimunn interese kapav pran tu zot letan pu gayn enn pli gran konesans Labib. Me, otan ki posib, zot fer zefor pu montre bann dimunn bann parol ki sorti dan Labib. Zot kone ki Parol ki Bondye finn fer ekrir pu tus leker bann dimunn sinser. An plis, kan zot servi li dan sa fason la, zot fortifye zot prop lafwa usi.

“Konsol Tu Bann Ki an Dey”

13. Pandan lane 2001, ki bann levennman ki finn amenn enn gran bezwin pu konsol bann ki an dey?

¹³ Lane 2001 finn gayn so par an seki konsern bann katastrof. Alor, buku dimunn ti pe bizin konsolasyon. Seki finn arive dan mwa Septam lane pase dan États-Unis li enn legzanp byin frapan. Bann teroris finn atak World Trade Centre dan New York ek Pentagon pre ar Washington, D.C. Sa bann latak la ti enn gran sok pu sa peyi la an antye! Devan sa bann levennman la, bann Temwin Zeova pe fer tu seki zot kapav pu ranpli misyon ki zot ena pu “konsol bann ki an dey.” Anu get detrwa lexperyans ki pu montre nu kuma zot fer sa.

14, 15. Kuma eski, dan de diferan lokazyon, bann Temwin finn kapav servi bann tex Labib dan enn fason byin adapte pu konsol bann ki an dey?

¹⁴ Enn Temwin ki enn proklamatris labonn nuvel aplintan, finn apros enn madam ki ti lor trotwar ek li finn demann li seki li panse lor sa bann resan atak teroris la. Madam la finn kumans plore. Li dir ki li byin sagrin ek li swete ki li ti kapav fer kitsoz pu ede. Temwin la finn dir li ki Bondye byin interese ar nu tu, ek lerla li finn lir Izai 61:1, 2. Dapre madam la sa bann parol Labib la tom byin parski tu dimunn an dey. Li finn aksepte enn trak ek li finn demann Temwin la pu vizit li kot li.

¹⁵ De Temwin Zeova finn zwenn an predikasyon enn misye ki ti pe travay dan so langar. Zot finn propoz pu montre li bann parol konsolasyon ki ena dan Labib an rapor avek katastrof ki finn fek pase dan World Trade Center. Avek so permisyon zot finn lir 2 Korintyin 1:3-7, kot ena usi sa bann parol la: “Nu gayn buku konsolasyon atraver Kris.” Sa misye la finn byin apresye ki so bann vwazin Temwin pe partaz enn kitsoz ki konsol bann dimunn. Li finn dir de Temwin la: “Mo swete ki Bondye beni sa gran travay ki zot pe fer la.”

16, 17. Sit de lexperyans ki montre puvwar ki Labib ena pu ed bann dimunn ki dan tristes ek ki bulverse par bann katastrof.

¹⁶ Enn Temwin ki ti pe revizit bann dimunn interese, finn zwenn garson enn madam ki dernye fwa ti montre lintere. Proklamater la explike ki li ti anvi kone kuma so bann vwazin ti ete apre sa resan katastrof la. Misye la finn inpresyone kan li finn truve ki sa Temwin la finn pran so letan pu vizit bann dimunn ek pran zot nuvel. Li rakonte ki li ti pe travay ase pre ar World Trade Center kan sa latak la finn arive ek li finn truv tu devan so lizye. Kan li finn demande kifer Bondye permet sufrans, Temwin la finn lir bann tex Labib ar li, parmi Psom 37:39 ki dir: “Zeova sap bann dimunn drwat; Li zot fortres kan ena maler.” Misye finn demann nuvel sa Temwin la ek usi nuvel so fami. Li finn invit li pu returne, ek li finn dir li ki li finn apresye sa vizit la avek tu so leker.

¹⁷ Parmi bann milye dimunn ki ti an dey apre bann latak teroris ek ki finn gayn konsolasyon ar bann Temwin Zeova, ti ena enn madam ki bann Temwin ti zwenn kan zot ti pe vizit zot bann vwazin. Madam la ti byin-byin bulverse par seki finn pase ek li finn ekut bann Temwin la lir Psom 72:12-14: “Li pu sap sa pov ki kriye osekur la, ek sa kikenn ki dan gran sagrin la, ek kikenn ki pena personn pu ed li. Li pu sagrin bann ti dimunn ek bann pov, ek li pu sap nam bann pov. Li pu delivre zot nam ar bann kitsoz ki pe kraz zot ek Li pu delivre zot ar vyolans, ek zot disan pu ena valer devan so lizye.” Sa bann parol la ena vremem buku pwa! Madam la finn demann bann Temwin pu relir sa bann verse la ek li finn invit zot pu rant kot li pu kontiyn zot konversasyon. Alafin konversasyon la, zot finn kumans enn letid avek li.

18. Kuma eski enn Temwin finn ed so bann prosin kan finn invit li pu priye pu zot?

¹⁸ Enn Temwin travay dan enn restoran dan enn kominote ase ris, kot avan bann dimunn pa ti tro montre lintere pu labonn nuvel. Me apre sa bann latak teroris la, sa kominote la ti paret bulverse. Vandredi swar, apre sa latak la, manager restoran la finn invit tu dimunn pu al deor avek bann labuzi, ek pu gard enn moman silans an memwar bann viktim. Pu montre respe pu zot santiman, Temwin la usi finn sorti ek li finn debut trankil lor trotwar. Manager la ti kone ki li enn predikater Temwin Zeova. Akoz sa, apre sa ti moman silans la, li finn demann frer la pu fer enn lapriyer pu reprezant tu dimunn ki ti la. Temwin la finn aksepte. Dan so lapriyer, li finn mansyonn sa gran dey la, me li finn dir ki fode pa ki bann dimunn kontiyn res an dey san okenn lespwar. Li finn koz lor lepok kot pu nepli ena sa bann kalite levennman terib la ek li finn dir ki par enn konesans egzak lor Labib tu dimunn kapav vinn pros ar sa Bondye ki donn konsolasyon la. Kan li finn dir “Amenn,” so manager―apre sa plis ki 60 dimunn ki ti andeor restoran―finn apros Temwin la, finn remersye li, finn ser li dan so lebra, ek li finn dir li ki sa mem pli zoli lapriyer ki li finn ekute.

Enn Benediksyon pu Kominote

19. Ki lexperyans montre ki ena dimunn ki rekonet bann prinsip elve bann Temwin Zeova?

¹⁹ Zordi zur sirtu, parey kuma buku finn remarke, bann dimunn pe tir buku profi dan bann kominote kot bann Temwin Zeova byin aktif. Ek buku finn remark sa. Wi, bann dimunn ki fer tu pu ankuraz lape, lonete, ek bann prinsip moral ki prop, vremem zot enn bon linflyans. Dan enn peyi dan l’Asie Centrale, bann Temwin finn zwenn enn ofisye retrete ki ti travay dan enn ansyin lazans sekirite leta. Li dir ki enn fwa li ti gayn enn lanket pu fer lor plizir lorganizasyon relizye. Me kan li finn fer lanket lor bann Temwin Zeova, li finn inpresyone par zot lonete ek zot bon kondwit. Li finn admir zot lafwa solid ek zot bann lanseynman baze lor Labib. Li finn aksepte enn letid Labib.

20. (a) Ki rapor laktivite bann Temwin Zeova lane dernyer montre? (b) Ki montre ki ena ankor buku travay pu fer, ek kuma eski nu konsider privilez ki nu ena pu pres labonn nuvel?

²⁰ Sa detrwa lexperyans dan sa lartik la, ki finn tire parmi bann milye ki kapav site ankor, montre ki bann Temwin Zeova ti byin okipe pandan lane servis 2001.a Zot finn gayn konversasyon avek plizir milyon dimunn. Zot finn konsol buku dimunn ki ti an dey, ek zot travay predikasyon labonn nuvel finn amenn bann bon rezilta. Ti ena 263,431 dimunn ki ti pran batem pu montre zot langazman avek Bondye. Dan lemond antye, kantite bann predikater finn ogmante par 1.7 pursan. Pwiski ti ena 15,374,986 dimunn ki ti asiste Memoryal lamor Zezi ki fer sak lane, sa montre ki ena ankor buku travay pu fer. (1 Korintyin 11:23-26) Alor, anu kontiyn rod bann dimunn ki sumet ek ki ekut labonn nuvel. Tank ki lane faver Zeova kontiyne, anu kontiyn konsol “bann ki ena leker brize.” Wi, nu ena enn travay ki fer nu gayn buku satisfaksyon! Sirman, nu tu nu repet bann mem parol ki Izai ti dir: “San fot, mo pu dan enn gran lazwa pu Zeova. Mo nam pu dan lazwa pu mo Bondye.” (Izai 61:10) Nu swete ki Bondye kontiyn servi nu amezir ki Li realiz bann parol sa profesi la: “Senyer Siprem Zeova pu fer lazistis ek laglwar zerme devan tu bann nasyon.”―Izai 61:11.

[Not anba paz]

Eski U Rapel?

• Ki benediksyon bann dimunn ki sumet finn gayne grasa bon nuvel ki Zezi ti prese?

• Ki bann benediksyon bann dimunn ti gayne kan zot ti montre lintere pu labonn nuvel ki bann premye disip Zezi ti prese?

• Kuma eski bann ki ekut labonn nuvel zordi, gayn benediksyon?

• Kuma eski nu konsider privilez ki nu ena antan ki bann predikater labonn nuvel?

[Tablo lor paz 29-32]

RAPOR SERVIS MONDYAL BANN TEMWIN ZEOVA PU LANE SERVIS 2001

(Get piblikasyon)

[Zimaz lor paz 25]

Bann Temwin Zeova rapel tuletan zot responsabilite pu pres labonn nuvel

[Zimaz lor paz 27]

Bann ki ekut labonn nuvel vinn dan enn fami internasyonal bann frer, ki ini.